TANTACHÄWIN jukʼanikïpjjatapajj nayatakejj walikïnwa, kunattejj wali ajjsarirïyätwa. Jiskʼatpachpun ukham ajjsaririyäta, jaqenakajj utar jutapjjeri ukhas imantasirïyätwa, uñtʼatäpkchïna ukasa.

Jehová Diosan markapanjja, jan uñtʼatanakampi amigonakampi ukhamaw irnaqawayta, ukhamajj inas jumajj akham sischisma: “Kunjamarak mä ajjsariristi ukham irnaqaspasti” sasa. Ajjsarañasa, naya pachpar jan atinisiñas utjaskakituwa. Ukampis Diosan yanaptʼapampiw lurañanakaj phoqawayta. Aka arunak phoqasirsa uñjawayaraktwa: “Jan ajjsaramti, nayaw jumampïskta [...]. Nayaw chʼamañchaskäma, nayarakiw yanapaskäma, atipjiri amparajjampirakiw uywaskäma” sasa (Isa. 41:10). Jehová Diosajj jilat kullakanakampiw yanaptʼawayitu. Kunjamsa jiskʼäskayäta ukhatpach yanaptʼawayitu uk jichhajj parltʼapjjäma.

Ontario markat Inti jalanta aynach toqenwa jakasipjjayäta, ukaruw 1940 maran Elsie Huntingford kullakajj purinïna. Uka urojj domingönwa lupis wal qhantʼasinkäna. Tatajajj nayjam ajjsarirïnwa, ukatwa mamajajj punku jistʼarir saräna. Nanakajj uta manqhatakwa ischʼukipjjayäta. Tatajajj  mä aljir warmïpachaw sasaw amuyäna, ukatwa ‘mamamajj kuns alakispawa’ sas qhepat mistüna, ukat akhamwa Elsie kullakar säna: “Janiw kunsa munapkti” sasa. “¿Janit Bibliat yateqañ munapkta?” sasaw kullakajj sarakïna. Tatajasti “munapjjtwa” sasaw säna.

Awk taykajajj mä iglesiaruw sarapjjäna (Iglesia Unida de Canadá). Ukampis qhepat janiw sarjjapjjänti. ¿Kunatsa? Iglesia pʼeqtʼirejja, iglesia punkuruw qollq churirinakan sutinakap mä listar uchirïna. Ukampis uka listanjja walja qollqe churirinakan sutinakapaw nayraqatankänjja. Awk taykajan sutinakapajj qhepankakipunirïnwa, pisin jakasipjjatap layku. Ukat irpirinakajj jukʼamp qollq churapjjañapatakiw waytʼapjjäna. Yamas uka iglesian mä yatichiripajj akham sasaw säna: “Kuntï yatichkta ukarojj janiw creykti, ukampis jan trabajo aptʼasiñatakiw ukham yatichta” sasa. Ukatwa uka iglesiar jan sarjjapjjayätti, cheqa yatichäwjja thaqasipkakiyätwa. Ukhamajj Elsie kullakajj horasarupuniw purinïna.

Canadá markan Jehová Diosan Qhanañchirinakapajj janiw Bibliat yatiyapjjañapäkänti. Ukatwa Elsie kullakajj Bibliasa mä chʼiyar cuadernos aptʼat jutäna. Qhepat nanakar confiyjjäna ukhajja, yatichir jutkasajj Bibliat apstʼat qellqatanakwa churapjjerïtäna. Jan katjayasiñatakejja, yateqañ tukuyjjasajj wali sum ukanak imantapjjerïta. *

Jan walinakas utjkchïnjja, kullakajj Diosan Arupat yatiyapunirïnwa. Uk uñjasaw Diosar serviñ amtawayta. Awk taykajajj 1948 maranwa bautisasipjjäna. Ukat nayajj febrero 27, 1949 maran bautisasirakta, 17 marani. Ukanjja uywa umayañ mä jachʼa bañadoranwa (jan ukajj lavadoranwa) bautisasiyäta. Qhepatsti precursorjamaw irnaqtʼañ munarakiyäta.

Janiw precursorjam ukjpach irnaqañ qalltkayätti, jan ukasti precursoräñatakiw qollqe imasiñ amtayäta. Ukatakejj mä bancona ukat mä oficinanwa trabajiyäta. Ukampis waynjamajj ratukiw qollq tukuntirïta. Mä kutejja, Ted Sargent jilatajj akhamwa situ: “Janiw ajjsarañamäkiti, Jehová Diosaruw confiyañama” sasa (1 Cró. 28:10). Uka jilatan chʼamañchtʼatajja, 1951 maranwa noviembre phajjsin precursoräñ qalltawayta. Ukhatakejj  mä merqʼe bicicletampi, mä machaq maletinampikiw utjitäna, qollqes 40 dolarakirakiw utjitäna. Ukampis Jehová Diosaw yanaptʼitäna. Ted jilatan chʼamañchtʼatapat walpun yuspärta, jupaw precursoräñatak chʼamañchtʼawayitu. Ukham serviñ amtatajatjja, walja bendicionanakwa katoqawayta.

Khä 1952 maran agosto phajjsi tukuyarojja, Toronto markatwa mä arumajj jawsanipjjetu, Canadá markankir Betelan septiembre phajjsit irnaqañajataki. Nayajj janiw mä kutis Betelar visitir saririkayätti, ukat wali ajjsaririrakiyätwa. Walja precursoranakaw Betelat wali sum parlapjjetäna, ukatwa wal sarañ munayäta. Qhepatsti Betelan utajanjamwa jakasjjayäta.

Betelar puritajat pä mara pasjjäna ukhajja, Bill Yacos sat jilat lantiw Toronto markankir taman uttʼayapjjetu, jupasti siervo de congregación (jan ukajj irpir chuymaninakat sarayiri) satäkis ukhamaw irnaqaskäna. 23 maranïkayäta ukhajja, jan kun lurirjam mä jiskʼa wawjamaw amuyasiyäta. Ukampis Bill jilataw kuntï lurañajäkäna uk munasiñampi, llampʼu chuymampi yatichitäna. Ukatsti Jehová Diosaw uk phoqañatak wal yanaptʼitäna.

Bill jilatajja, jiskʼa tansa, chʼamani, wali kʼuchi jilatänwa, mayninakatsa walpun llakisirïna. Jilat kullakanakarojj wal munasïna, jupanakas ukhamarakiw jupar munasipjjäna. Jilat kullakanakarojj tumptʼirejj sarapunirïnwa, walikïsipkpasa janisa. Jupjam lurañatakisa, tamamp chika yatiyir sarañatakis wal chʼamañchtʼitäna. Jupajj sirïnwa: “Ken, jilat kullakanakat llakisiñamawa. Ukaw pantjasitanakap perdonañatak yanaptʼätam” sasa.

1957 enero phajjsit aksarojja, Jehová Diosajj jukʼamp yanaptʼawayitu. Uka phajjsinwa Evelynamp casarasta, jupajj Galaad Escuelaruw (clase 14) saräna. Janïr casaraskasajja, Evelynajj Quebec markan francés aru parlapki ukanwa misionerjam irnaqaskäna. Uka tiempon Católica Iglesiajj uka markan wali munañanïnwa, ukatwa yatiyañajj chʼamäna. Ukhampachas Evelynajj Diosan Arupat yatiyaskakïnwa.

Evelynajj qalltatpunwa wali sum yanaptʼitäna (Efe. 5:31). Ukampis casarasipkta uka qhepatjja, yantʼataw uñjasiwayi. Casarasisasti, Florida (Estados Unidos) markaruw paseot sarañ amtapjjayäta, ukampis qhepürojj sucursalatwa akham sas jawsanipjjetu: ‘Canadá markankir Betelaruw mä semana yatichäw katoqer jutañama’ sasa. Esposajampejj kuntï Jehová Diosajj maykistu ukwa lurañasa sasaw sapjjta, ukatwa paseotsa jan sarjjapjjti. Uka semanasti jupajj sucursal jakʼanakanwa yatiyäna. Janiw ukham cheqanakan nayrajj yatiyirïkänti, ukampis mistuskakïnwa.

Uka seman tukuyarojja, yaqha yatiyäwiw purinipjjetäna: ‘Tamanak tumptʼirjamaw Ontario markat alay toqeru sarapjjañama’ sasa. ¡Janiw cheqaw sañjamäkänti! 25 maranikïskayätwa, ukhakirakiw casarasisipkayäta, janïraw kuna experiencianïkayätsa. Ukhamäkchïnsa,  Jehová Diosaw yanapaskistani sasaw confiyapjjayäta. Ukatwa tamanak tumptʼirinakamp chika wali thaya arumana mä trenar sarjjatawayapjjta, jupanakasti wasitat tamanak tumptʼir kuttʼasipkäna. ¡Jupanakajj wal chʼamañchtʼapjjetäna! Trenan qonuñanakapajj janiw sumäkänti, ukatwa mä jilatajj “cabinan iktʼapjjam” sasin sapjjetäna. Jupaw ukan ikiñapäna, ukampis nanakaruw uk churapjjetäna. Qhepürojja, 15 urukis casaratäsipkchiyätjja, Hornepayne jiskʼa gruporuw visittʼañatak puripjjta.

Jukʼamp mayjtʼäwinakajj utjaskakïnwa. 1960 maranjja, Galaad Escuelaruw (clase 36) invitapjjetäna. Uka escuelajj 10 phajjsinakaw apasiñapäna, 1961 maranwa Brooklyn markan febrero phajjsit qalltañapäna. Ukhajj tamanak tumptʼirinakan uñjiripjamaw irnaqaskayäta. Uka invitación katoqasajj wal kusisiyäta, ukampis esposajarojj janiw invitapkataynati ukatwa llakisiyäta. Ukhamajj esposajarusa jupjam jikjjatasipkäna uka kullakanakarusa mä carta Betelar qellqanipjjam sasaw mayisïna, ukansti akham sañapänwa: “10 phajjsinakajj sapak qheparaskiristwa” sasa. Esposajajj wal jachäna, 10 phajjsinakaw jupat jayankañajäna. Ukampis kunja wakiskirïnsa sarañajajja ukwa panpachanejj amuyapjjta, ukaw esposajarus kusisiyarakïna.

Brooklynan escuelankaskayäta ukhajja, esposajajj Canadá markankir Betelan irnaqaskäna. Ukanjja, Margaret Lovell kullakampiw mä cuarton jakapjjäna, uka kullakajj alajjpachar sarañatak ajllitänwa. Evelynat wal llakisiyäta, jupas nayat ukhamaraki, ukampis Jehová Diosaw lurañanak sum phoqañatak yanaptʼawayapjjetu. Evelynajj nayamp chikäskañat sipansa, Diosar jukʼamp serviñataki ukat markapar yanaptʼañatakiw wal chʼamachasïna, ukaw chuymar purtʼawayitu.

Kimsa phajjsiw Galaad Escuelankjjayäta, ukhaw Knorr jilatajj mä invitación churitäna. Jupajj oraqpachan yatiyasiñapatakiw pʼeqtʼaskäna. Akham sasaw sitäna: “¿Galaad Escuela jaytasin Canadá markar kuttʼasmati, ukhamat uka sucursalan Escuela del Ministerio del Reino satäkis ukan yatichañamataki? Jan ukajj ¿Escuela tukuyañpuncha munasma, ukhamat inas misionerjam yaqha markanakar sarañamataki?” sasa. Ukat sarakitänwa: “Janitï munkstajja walikïskarakiniwa. Jumatï Canadá markar sarañ ajllïta ukhajja, inas Galaad Escuelar jan mayamp jawsatäjjchïtati, ukat inas akat mä qawqha tiempot Canadá markan yaqha markanakar wasitamp khitapjjchïma, esposamajj kamschiniya, juparus jisktʼarakismawa, ukat awisitäta” sasa.

Janiw esposajarojj jisktʼañajj wakiskänti, jupajj Diosan markapan lurañanak wali askitwa uñjäna. Panpachaniw akham amtapjjayäta: “Jiwasan askis thaqañat sipansa, kawkharuy Jehová Diosajj khitchistani ukharuw sarañäni” sasa. Ukatwa Knorr jilatarojj akham sas sista: “Kunjjay Jehová Diosan markapajj ‘luram’ sapjjchitani uk lurapjjakïwa” sasa.

 Brooklynatjja abril 1961 maran Canadá markaruw kuttʼjjayäta. Ukanjja, Escuela del Ministerio del Reino satäkis ukwa yatichayäta. Ukatsti uka markankir Betelaruw invitapjjarakitäna. Ukan irnaqkasinjja, Galaad Escuelar sarañatakiw wasitamp invitapjjetu (clase 40), ukasti 1965 maranwa qalltañapäna. Wasitampiw esposajajj Betelar mä carta qellqañaparakïna: “Sapak qheparaskiristwa” sasa. Mä qawqha semananakatjja, mä yatiyäwi katoqapjjta. ¡Escuelarojj esposajamppacharuw invitapjjetäna!

Galaad Escuelanjja, Knorr jilatajj akham sapjjetäna: “Francés aru yateqerinakajj África markaruw sarapjjäta” sasa. Ukampis janiw ukhamäjjänti, Canadá markaruw khitapjjetäna. Ukanwa sucursal pʼeqtʼañatak uttʼayapjjetu (jichhajj Sucursal sarayirinakan coordinadorapa satäjjewa). “Waynakïsktwa janïraw wakichtʼatäkti, jichhaw 34 maranïskta” sasaw Knorr jilatar sayäta. Wal jupajj yanaptʼitäna. Ukhamarus janïr kuna amtar purkasajja, experienciani jilïr jilatanakarojj jisktʼasipunirïtwa.

Betelanjja, walja jilat kullakanakatwa yateqawayta. Sucursalan mayni sarayirinakarus wal respetta, ukha suma luratanakapata. Ukan irnaqtʼir wayn tawaqonakatsa, jilïrinakatsa wal yateqawayta, ukat kawkïr tamanakarutï yanaptʼapkayäta ukanakatsa ukhamaraki.

Betelan yaqha jilat kullakanakarus yatichawayaraktwa, Diosat jan jitheqtapjjañapatakis yanaptʼawayaraktwa. Apóstol Pablojj Timoteorojj sänwa: “Kuntejj yateqkta [...], ukarojj jan pächasis arkam”, ukatsti “kuntejj walja testigonakan nayraqatapan arsuri istʼkista ukjja, khitinakatejj churañjamäki, ukhamarak mayninakarus yatichirjamäki ukanakarojj uka pachpa arunakampi ewjjtʼam” sasa (2 Tim. 2:2; 3:14). 57 maranakaw Betelankjjta. Awisajj yaqhepajj akham sasaw jisktʼapjjetu: “Walja maranaka Betelankkasajj ¿kunanaksa yateqawayta?” sasa. “Diosan markapan kuna lurañanakatï utjki ukanakjja, jankʼakiw Jehová Diosar confiyas wali kusisit katoqañasa” sasaw sarakta.

Jichhakis Betelar purinkirista ukham amuyasta. Nayajj wali ajjsariri, jan experienciani ukhamakïyätwa. Ukampis Jehová Diosajj janipuniw jaytanukuwaykituti. Jilat kullakanakajj wal yanaptʼawayapjjetu, munasiñampiw uñjawayapjjetu, ukham Diosajj irpnaqawayitu. Jupasti siwa: “Jan ajjsaramti, nayaw yanapaskäma” sasa (Isa. 41:13).