1. Diosan arunakapat yatiykasajja, ¿kunjamsa jaqenakar uñjañasa? Uk mä uñachtʼäwimp qhanañchtʼam. (Aka janankir foto uñjjattʼam.)

FIYI markanjja, mä chacha warmiw Jesucriston jiwäwip amtañataki invitacionanak lakirasipkäna. Kunapachatï mä warmimp parlasipkäna ukhajja, mä akatjamatwa jallojj purintäna. Ukatwa jilatajj uka warmirojj mä paragua maytʼäna, ukat jupampi warmipampisti mayni paraguapampiw jarkʼaqasipjjäna. Qhepatsti, kunapachatï uka warmejj Jesusan jiwäwip amtañatak tantachäwir sarkäna ukhajja, wali kusisitaw jilatampi kullakampejj jikjjatasipjjäna. Uka tantachäwir sarir warmejj akham sarakïnwa: “Kuntï yatichapkitäna uk janiw sumpach amtaskti, ukampis wali munasiñampiw uñjapjjetäna ukatwa tantachäwir sarta” sasa. Ukhamajj ¿kunatsa uka warmejj tantachäwir jutäna? Jesusan ewjjaparjamaw jilatampi kullakampejj uka warmir uñjapjjäna.

2. 1) ¿Kamsasas Jesusajj ewjjtʼäna? 2) ¿Kunjamsa Jesusan ewjjap phoqsna?

² Jesucristojja akham sasaw ewjjtʼäna: “Kunjämtï jumanakajj jaqenakampi uñjatäñ munapktas ukhamarak jumanakajj  jupanakar uñjapjjam” sasa (Mat. 7:12). ¿Jiwasajj kunjamsa uk phoqsna? Nayraqatjja akham sasaw jisktʼasiñasa: “Nayatejj jupïrista ukhajja, ¿kunjam uñjatäñsa munirista?” sasa. Ukatjja, kunjam uñjatäñtï munktan ukarjamaw uñjañasaraki (1 Cor. 10:24).

3, 4. 1) ¿Tama taypinakti Jesusan ewjjtʼap phoqañasäspa? 2) ¿Kunsa aka yatichäwin yatjjataskañäni?

³ ¿Tama taypinakti Jesusan ewjjap phoqañasäspa? Janiwa. Jesusajj janïr uk siskasajja, taqeniruw sum uñjapjjañama, uñisirinakamarus ukhamaraki sasaw ewjjtʼaskäna (Lucas 6:27, 28, 31, 35 liytʼañataki). Ukhamajj niyakejjay uñisirinakasarus sum uñjañasächejja, yatiyir sarkasajj jaqenakar jukʼampi sumwa uñjañasa, jupanakatsti waljaniw ‘wiñay jakañatak wakichatäsipkaspa’ (Hech. 13:48).

⁴ Yatiyir sarkasajja aka pusi jisktʼanakatwa amtañasa: 1) ¿khitinakarus yatiyäjja?, 2) ¿kawkinsa parläjja?, 3) ¿kunapach yatiyañas wakisispa?, 4) ¿kunjamsa yatiyäjja? sasa. Uka jisktʼanakajja, jaqenakajj kunjam uñjatäñsa munapjjaspa uk amuyañatakiw yanaptʼistani, ukhamatwa sapa maynirus sum yaticharakiñäni (1 Cor. 9:19-23).

5. ¿Kunanaksa Diosan arunakap yatiykasajj jisktʼasiñasa?

⁵ Diosan Arupat yatiykasajja, kunayman jaqenakampiw jikistanjja, sapa maynin llakinakapasa sarnaqäwinakapasa mayj mayjawa (2 Cró. 6:29). Ukhamajj yatiykäta ukhajja, akham jisktʼasiñamawa: “Nayatï jupïristjja ¿mä aleq vecinoparjamak uñjatäñti muniristjja? Jan ukajj ¿cheqpachansa kunjam jaqëtsa ukham sum uñjatäñcha muniristjja?” sasa. Sapa mayniw jaq jaqëtanjja, janiw taqenejj mä kikpäktanti uk amtañatakiw uka jisktʼanakajj yanaptʼistani.

6, 7. Maynitï jan sum katoqkistaspa ukhajja, ¿kunsa lurañasa?

⁶ Janiw khitis “jan wali jaqet” uñtʼatäñ munktanti. Amuytʼañataki, Diosan Arupan akham siwa: “Parlatanakamasti sumäñapapuniwa” sasa (Col. 4:6). Cristianjamajj sapa mayniw uka arunakarjam phoqañatak chʼamachastanjja; ukampis jucharar jaqjamajja, kun arsusasa awisajj pantjastanwa, qhepatakwa chuym leqʼesisktanjja (Sant. 3:2). Awisajj jan walinakan jikjjatasisajja, inas arunakasampi mayniru chuym ustʼaysna, ukampis jankʼaki jiwasar “qhoru jaqeta, jan respetasirita” uñjistaspa ukhajja, ¿walikïspati? ¿Janit kunjamas jikjjataskayätan uk sum amuytʼañap munksna? Ukhamajj jiwasajj mayninakar ukham uñjarakiñäni.

⁷ Maynitï jan sum katoqkistaspa jan ukajj coleratäskaspa ukhajja, kunatsa ukhamäskpacha uk amuyañaw wakisispa. Inas trabajonsa yateqañ utansa walja lurañanakanïchi, inas usuntat jikjjatasiskchi ukatwa ukhamäskaspa. Walja jaqenakajja, qalltan wali colerataw jilat kullakanakar katoqapjjerïna, ukampis suma chuymampi respetomp uñjatajja, Diosan Arupat yateqañwa qalltjjapjjäna (Pro. 15:1; 1 Ped. 3:15).

8. ¿Kunatsa ‘taqe kasta jaqenakaru’ Diosan Reinopat yatiyañasa?

⁸ Diosan Arupjja kunayman jaqenakaruw yatiytanjja. Yatiyañataki sat revistanjja, “Bibliat yatjjatasaw nayra jakäwinakapjja jaytawayapjje” sat yatichäwiw mistuwayi, ukanakansti sojjta tunka jilat kullakanakan jakäwinakapat qhanañchasiwayi. Jupanakasti nayrajj lunthatanaka, machirinaka, drogampi qolljasirinaka ukhamäpjjänwa. Yaqhanakasti politiconaka, religionanakan pʼeqtʼirinakapa jan ukajj profesionaläñatak chʼamachasirinaka ukhamäpjjarakïnwa.  Yamas yaqhepanakajja, wachoq juchan sarnaqer jaqenakäpjjänwa. Ukampis Diosan Arupat yatjjatasaw nayra jakäwinakap jaytawayapjje, jichhasti jilat kullakanakasäjjapjjewa. Ukhamasti, yaqhep jaqenakajj janiw Diosan Reinopat istʼapkaniti sasin janipun amuyapjjañäniti, jan ukasti ‘taqe kasta jaqenakawa’ Diosan Reinopat istʼapjjani sasaw amuyañasa (1 Cor. 9:22; 1 Corintios 6:9-11 liytʼañataki).

9. ¿Kunatsa jaqenakan utapa respetomp uñjañasa?

⁹ Diosan arunakap utat uta sarasaw jilpach yatiytanjja (Mat. 10:11-13). Ukampis ak amtañäni, taqenis utasjja respetomp uñjapjjaspa ukwa muntanjja. Utasjja jan khitins mantkaya wali sum lurtʼastanjja, janirakiw khitin uñchʼukitäñsa munktänti. Ukhamasti vecinonakasan utaparojj ukham respetompiw uñjañasaraki. ¿Ukhamti uñjasktanjja? (Hech. 5:42.)

10. Jaqenakar jan colerayañatakejja, ¿kunanakatsa amuyasiñasa?

¹⁰ Jichhürunakanjja, jan wali jaqenakajj waliw jiljjattaski, ukatwa walja jaqenakajj jan uñtʼatanakarojj jan confiyjjapjjeti (2 Tim. 3:1-5). Ukampis jiwasat jan ukham amuyapjjañapatakejj chʼamachasiñasawa. Mä utarus punkut leqtʼasksna ukham amuytʼañäni, utanejj jan mistunkani ukhajja, inas ventanat uñantañsa jan ukajj ut muytañsa munsna. Vecinonakajj ukham lurir uñjapjjestaspa ukhajja, ¿kamsapjjaspasa? Yatiyktan uka cheqanakan ¿ukham lurañajj walikïskaspati? Cheqansa, Diosan suma arunakapjja taqeniruw yatiyañ muntanjja (Hech. 10:42). Janirakiw jan wali amuyumpis utat uta sarktanti, jan ukasti taqenis Diosar uñtʼapjjaspa ukwa muntanjja (Rom. 1:14, 15). Ukampis wali amuyumpiw yatiyañasa, janiw jaqenakar ina chʼusat colerayañ munktanti. Apóstol Pablojj akham sänwa: “Janirakiw khitirus kuna jan walsa lurapkti, ukhamata nanakan luräwinakajjat jan walinak parlasipkañapataki” sasa (2 Cor. 6:3). Kunapachatï utanakap wali respetompi uñjktan ukhajja, jaqenakajj Diosan Arupat inas yatjjatañ munapjjarakchispa (1 Pedro 2:12 liytʼañataki).

11. ¿Kunatsa tiemposa respetapjjañap muntanjja?

¹¹ Cristianonakjamajj niya taqeniw jan tiemponi sarnaqtanjja. Ukhamasti kuna lurañanakay utjchistu ukanak sum phoqañatakejja, tiemp sumwa jalanoqtʼastanjja (Efe. 5:16; Fili. 1:10). Ukampis maynitï lurañanakasat tiempo apaqestaspa ukhajja, inas colerassna. Inas akham sissna: “Jan tiemponïskataj amuyaspa, janirak jaya tiempos parljjayitaspati” sasa. Ukhamajj Jesusan ewjjaparjam phoqañatakejja, ¿kunjamsa yatiykasajj jaqenakan tiempop respetatas uñachtʼaysna?

12. Kuna horasas jaqenakar visittʼañajj wakisispa ukjja, ¿kunjamatsa yatsna?

¹² Kunapachas jaqenakar visittʼañajj wakisispa uk sumwa amuyañasa. Territorioman ¿kuna horasasa jaqenakajj utapankasipki? ¿Kuna ratus sum istʼapjjestaspa? Uk amuytʼasawa yatiyir sarañatakejj tiempo apstʼasiñasa. Yaqhep lugaranakanjja, jaypʼu toqeruw utat uta yatiyir mistupjje. Jumajj jakkta uka cheqan ukhamarakïchi ukhajja, inas uka horasanakar mistuñataki chʼamachaschisma (1 Corintios 10:24 liytʼañataki). Jaqenakajj tiemponïpki uka horasaru yatiyir mistuñatak chʼamachasiñäni ukhajja, Jehová Diosajj bendicistaniwa.

13. ¿Kunjamsa jaqenakar respeto uñachtʼayaskaksna?

 ¹³ ¿Kunjamsa respeto uñachtʼayaskaksna? Mä jaqetï sum katoqtʼistani ukhajja, Diosan Arupat sumwa yatiyañasa, ukampis janiw tiempo añch apaqañasäkiti. Inas uka horasajja, kunatï jupatak askïki ukanak lurañataki tiemp apstʼasiskchi. Ukatjja, jupatï “janiw tiemponïkti” sistani ukhajja, “mä ratukïniwa” sañasawa, ukatsti ukarjamaw phoqañasaraki (Mat. 5:37). Parlañ tukuyjjasajja, “kuna ratus wasitamp kuttʼanirista” sasaw saraksna. Yaqhep jilat kullakanakajj akham sasaw sapjje: “Wasitat kuttʼaniñwa munirista. Janïr jutkasajja, ¿celularamar jawsanirismati jan ukajj mä mensajcha aptʼayanirisma?” sasa. Kunapachatï jaqenakajj tiemponïpki uka horasar yatiyktan ukhajja, apóstol Pablotwa yateqasisktanjja. Jupajj akham sänwa: “Janiw nayan walïñajjakti [munktjja] jan ukasti mayninakan askïñapwa muntjja, ukhamata jupanakajj qhespiyatäpjjañapataki” sasa (1 Cor. 10:33).

14-16. 1) Kuna amtampis visittʼasktan ukjja, ¿kunatsa qhan sañasa? Uk mä uñachtʼäwimp qhanañchtʼam. 2) Tamanak tumptʼir mä jilatarojja, ¿kunjam yatiyañas yanaptʼi?

¹⁴ Mä jan uñtʼat jaqes celularamar jawsankiristam ukham amuytʼañäni, ¿kuns manqʼañ munasma? sasin jisktʼiristam ukhajja, inas jumajj khitirakïpacha, kuns munpacha sas amuychisma. Ukat uka jaqempejj janiw jaya tiempo parlkasmati, inas respetot mä jukʼa tiemp istʼchisma. Ukampis jawsaniritï sum arunttʼasina sutipa awisiristam ukhamarak  manqʼa aljirïtwa sasin siristam ukhajja, inas juparojj sum istʼchisma. Cheqas taqeniw respetompi qhana arunakampi parlatäñ muntanjja. Ukhamajj Diosan Arunakap yatiykasajja, ¿janit ukham lurañajj wakiskarakispa?

¹⁵ Walja cheqanakanjja, kuna amtampis visittʼasktan uk qhanwa yatiyañasa. Cheqas Diosan suma yatiyäwinakapwa aptanjja, ukampis jan sum aruntasaki, akham sasin jisktʼañajj ¿walikïspati?: “Jumatï akapachan jan waltʼäwinakap chhaqtayañ munasma ukhajja, ¿kawkïrsa nayraqat chhaqtayasma?” sasa. Ukham jisktʼañajj walikïskaspawa, ukhamatarakwa Bibliatsa qhanañchsna. Ukampis utanejj jiwasat kamsaspasa ukwa amuyañasa, jupajj inas akham sischispa: “¿Khitis aka jan uñtʼat jaqejja, kunatsa ukham jisktʼitu? ¿Kunsa munpacha?” sasa. Ukhamasti, khitïtansa uk qalltatpach qhan sañaw wakisispa (Fili. 2:3, 4). ¿Kunas uk lurañatak yanaptʼistaspa?

¹⁶ Tamanak tumptʼiri mä jilatarojj ak lurañaw yanaptʼi: nayraqatjja utaniruw sum arunttʼi, ukjjarusti jupajj khitisa ukwa yatiyaraki, ukatsti ¿Kunatï chiqäki uk yatiñ munasmati? sat tratado churi, ukjjarojja akham siwa: “Jichhürojja, aka qellqatampiw yatiyasipkta. Akanjja kuntï jaqenakajj jilapart jisktʼasipki uka sojjta jisktʼaruw qhanañchaski. Aka may jaytawayäma” sasa. Ukjjarusti, qellqat uñjjattʼayasajja jilatajj akham sasaw jisktʼaraki: “¿Uka toqenakat jisktʼasirïtati?” sasa. Utanitï mä jisktʼa ajllchi ukhajja, ukarjamaw jilatajj Bibliamp qhanañchtʼi. Jan ukajj jupaw mä jisktʼa ajllirapi, ukhamat utanimp parltʼaskakiñataki. Cheqas kunayman toqenakatwa parltʼañ qalltsna. Uka jilatajj akham sarakiwa: “Kunaratutï khitïtansa, kuna amtampis visittʼasktan uk yatiytan ukhajja, jaqenakajj janiw añch ajjsarayasipkiti, ukhamatwa jupanakampejj parltʼaskaksna” sasa. Yaqhep cheqanakanjja, kuna amtampis visittʼasktan uk janïr siskasajja, khitïtansa kawkitsa juttan ukanak yatiñwa munapjje. Ukhamajja, kunjamatsa jaqenakajj sum istʼapjjestaspa uk amuyañajj wali wakiskiriwa.

17. Kunjamtï aka yatichäwin yatjjataniwayktanjja, ¿kunjamsa Jesusan ewjjtʼaparjam phoqsna?

¹⁷ ¿Kunjamanakatsa Jesusan ewjjtʼaparjam Diosan Arup yatiyaskaksna? Sapa mayniw jaq jaqëtanjja janiw mä kikpäktanti, ukhamarjamaw uñjañasa. Utapsa respetañasarakiwa. Ukat kuna horasas utapankasipki, tiemponïsipki ukhaw yatiyir sarañasa. Ukhamarus utanejj kunjam uñjatäñsa munaspa ukarjamaw yatiyañasaraki.

18. ¿Kunatsa Jesusan ewjjtʼaparjam jaqenakar yatiyañasa?

¹⁸ Jiwasatï jaqenakar kunjam uñjatañtï munktan ukarjam uñjañäni ukhajja, wali sum jaqenakajj katoqapjjestani. Ukhamarus wali amuyumpi munasiñamp jaqenakar parltʼañäni ukhajja, Diosan yatichäwinakaparjam sarnaqataswa uñachtʼayañäni, ukatsti Alajjpachankir Awkisarus jachʼañcharakiñäniwa (Mat. 5:16). Ukham yatiyañäni ukhajja, waljaniw Diosan Arupat yateqañ munapjjani (1 Tim. 4:16). Janis taqenipunejj Diosan Reinopat istʼapkchistanejja, taqe chuyma chʼamachasitasat kusisitaw jikjjatasiñäni (2 Tim. 4:5). Apóstol Pablot yateqasipjjañäni, jupajj akham sänwa: “Taqe akanakjja [Jehová] Tatitun arunakap parlañ laykuw lurta, ukhamata kuna askinakatejj uka arunak parlañanjja utjki ukanak katoqañajjataki” sasa (1 Cor. 9:23). Ukhamasti, Diosan Reinopat yatiyasajj Jesusan ewjjaparjam lurapjjañäni.