1, 2. ¿Kunjamsa Jehová Diosajj servirinakaparojj uñji?

WAWANAKAJJ anatkasinjja, kunaymaninak lurapjje, uk uñjasaw awk taykanakapajj wal kusisipjje. Inas jumajj uk uñjarakirïsta. Wawanakajj mayj mayjäpjjewa, inas maynejj wal tʼijnaqtʼañ yatchi, maynïristi inas sum dibujtʼañ yatirakchi jan ukajj yaqhepanakajj kunanaksa wali sum lurtʼañ yatipjjaraki. Ukatwa awk taykanakajja, kuntï wawanakapajj yatipki ukanak jukʼampi sum lurapjjañapatakejj yanaptʼapjje.

² Jehová Diosajj ukhamarakiw aka Oraqenkir wawanakaparojj yanaptʼi. Jupasti servirinakaparojj ‘wali askitwa uñji’, jupar iyawsapjjatapata ukhamarak servipjjatapata (Hag. 2:7). Ukampis jichhürunakanjja, jilat kullakanakasajj ukhamarakiw kunayman lurañanak yatipjje. Yaqhep jilatanakajj wali suma arstʼirïpjjewa, yaqhanakasti sumarakwa organizañ yatipjjaraki. Kullakanakatsti, Diosan arunakap yatiyañatakejja, waljanirakiw yaqha arunak facilak yateqapjje, yaqhepanakasti llakitanakar chuymachtʼañsa jan ukajj usutanakar uñjañsa sum yatipjjaraki (Rom. 16:1, 12). Cheqas ukham jilat kullakanakampi Diosar serviñajj wali kusiskañapuniwa.

3. ¿Kuna jisktʼanakarusa aka yatichäwin qhanañchasiskani?

 ³ Yaqhep cristianonakajja, mä arunjja, yaqhep wayn tawaqonakasa, jichhak bautisasirinakasa kunanaksa tama taypin lurapjjani uk janiw sum yatisipkaspati. ¿Kunjamsa nayrar sartapjjañapatak yanaptʼsna? Kunanaktï sum lurañ yatipki ukanakjja, ¿kunatsa sum amuyañasa? ¿Kunsa Jehová Diosat yateqassna?

4, 5. Jehová Diosajj kuntï servirinakapajj lurapkaspa uk sum yati, uk ¿kunjamsa Jueces 6:11-16 qellqatajj uñachtʼayistu?

⁴ Jehová Diosajja, janiw kunanaktï servirinakapajj lurapki ukanakak uñjkiti, jan ukasti kunanaktï lurapjjaspa ukwa sum amuyaraki sasaw Bibliajj qhanañchi. Amuytʼañatakejj Gedeonat parltʼañäni. Jehová Diosajja, juparuw madianitanakat israelitanakar qhespiyañapatak ajllïna. Diosan angelapasti akham sasaw aruntäna: “Diosajj jumampïskiwa, chʼamani, jan ajjsarir jaqe” sasa. Uk istʼasajja “¿kunatarak ukham sispachïtu?” sasaw jisktʼaspachäna. Ukapachajja, Gedeonajj janiw kunjamtï angelajj siskäna ukham amuyaskänti. Jan ukasti pächasïnwa, janis kunatakis askïkaspa ukhamwa amuyasïna. Ukampis Jehová Diosajj janiw ukham uñjkänti, jan ukasti kunanaktï jupajj lurkaspa ukwa amuyäna (Jueces 6:11-16 liytʼañataki).

⁵ Gedeonajj kunjam jaqënsa uk Jehová Diosajj sum uñjaskäna, ukatwa Israel markar qhespiyañapatak ajllïna. Gedeonajj kunjamsa taqe chʼamampi trigo jawqʼaskäna ukwa Diosajj uñjäna. Uka tiemponakan yapuchirinakajja, trigot jipi apaqañatakejj pampanakanwa jawqʼapjjerïna. Ukampis Gedeonajj uvasa takiña estanquenwa trigo jawqʼaskäna, ukhamat madianitanakampi jan uñjayasiñataki ukhamarak jan lunthatayasiñataki. Cheqas ¡Gedeonajj wali amuytʼasirïnwa! Jehová Diosajj janiw suma yapuchiritak uñjkänti, jan ukasti amuytʼasir jaqëtapwa amuyäna. Ukatwa israelitanakaru qhespiyañatak ajllïna.

6, 7. 1) ¿Amós profetarojj kunjamtï yaqhep israelitanakajj uñjapkäna ukhamarakti Jehová Diosajj uñjäna? 2) ¿Kunatsa Amós profetajj wali amuytʼasir jaqënwa sasin sissna?

⁶ Jichhasti Amós profetat parltʼarakiñäni, inas jupajj jaqenakatakejj jan amuytʼasirjam jan ukajj jan yäqañjam ukhamächïna, ukampis Jehová Diosajj janiw ukham uñjkänti, jan ukasti kuntï lurkaspa ukwa amuyäna. Amós profetajj uwij awatiri ukhamarak sicómoro sat higonak apthapirïnwa. Uka higonaksti pobrenakakiw manqʼañatak apthapisipjjerïna. Ukhamajj kunapachatï Jehová Diosajj Israelan tunka tribunakapar juchañchañatak Amós profetaru ajllkäna ukhajja, inas yaqhep israelitanakajj akham amuyapjjchïna: ‘Janiw jupajj ukatak wakichtʼatäkiti’ sasa (Amós 7:14, 15 liytʼañataki).

⁷ Amós profetajj mä jiskʼa markatakïnwa. Ukampis ukapach costumbrenakatsa, marka apnaqerinakatsa sumwa yatïna, ukhamajj janiw kuna jan yatiñan jaqëkänsa. Ukatjja kunas Israel markansa yaqha markanakansa pasaskäna ukjja sumwa yatirakpachäna, uksti alakip jaqenakaw jupar yatiyapjjerïpachäna (Amós 1:6, 9, 11, 13; 2:8; 6:4-6). Biblia toqet yatjjatirinakajja, Amós profetajj qellqañ sum yatïna sasaw sapjje. Profetasti amuykañ arunakampi, chuymar purtʼkir arunakampi parlirïna. Ukhamarus jan ajjsartʼasaw Amasías ñanqha sacerdoter juchañchäna. Ukhamasti, Jehová Diosajj Amós profetar ajllisajj janiw pantjaskänti. Diosajj janiw aleq uñtasakejj ajllkänti, jan ukasti kunanaktï profetajj lurkaspäna ukwa Jehová Diosajj amuyäna, ukatwa munañap phoqañapatak ajllïna (Amós 7:12, 13, 16, 17).

8. 1) ¿Kunsa Jehová Diosajj Davitarojj säna? 2) Pächasirinakarojja, ¿kunjamsa Salmo 32:8 qellqatajj chuymachtʼaspa?

⁸ Ukhamajj Diosajja, kunanaktï sapa mayni servirinakapajj lurapkaspa ukwa uñji. David reyirojj ‘nayaw irpaskäma, uñchʼukiskarakïma’  sasaw säna (Salmo 32:8 liytʼañataki). ¿Kunatsa uka arunakajj wal chuymachistu? Inas Diosar serviñatak amtanakas jan phoqerjamäkstan, ukampis Jehová Diosaw amtanakasat sipansa, jukʼampinak phoqañatak yanaptʼistani. Kunjamtï mä yatichirejj jan experienciani yateqerirojj yatichkejja, ukhamarakiw Jehová Diosajj servirinakaparojj yanaptʼistu. Ukjja jilat kullakanak toqew yanaptʼistu, jupanakaw kunanaktï lurksna ukanakataki chʼamachasiñ yanaptʼapjjestu. ¿Kunjamsa uk lurapjje?

9. ¿Kunjamatsa Pablon arunakaparjam phoqsna?

⁹ Jilat kullakanakajj kunjamäsipkisa ukanakat llakisipjjañamawa sasaw apóstol Pablojj cristianonakar chʼamañchtʼäna (Filipenses 2:3, 4 liytʼañataki). Ukatwa jilat kullakanakasajj kunsa lurapjjaspa uk amuyañasa, ukat sum luripansti “walik ukham lurtajja” sasaw sañasaraki. Jiwasarutï suma luratanakas uñjas ukham sapjjestaspa ukhajja, ¿kunjamas jikjjatassna? Uka arunak istʼañajj wali kusiskañäspawa, ukatjja jukʼamp luraskakiñatakiw chʼamañchistaspa. Ukhamajj mayninakarutï “walik ukham lurtajja” sasin sañäni ukhajja, Diosar jukʼamp yupaychapjjañapatakiw chʼamañchtʼañäni.

10. ¿Khitinakas jukʼamp yanaptʼatäñ munapjje?

¹⁰ ¿Khitinakas jukʼamp yanaptʼa munapjjaspa? Cheqas taqeniw yanaptʼa muntanjja. Ukampis jila partejj wayn tawaqonakampi jichhak bautisasirinakampiw yanaptʼatäñjja jukʼamp munapjje, jupanakajj tama taypin lurañanakjja katoqapjjañaparakiwa. Ukhamatwa jupanakajj Diosan markap taypin kusisita jikjjatasipjjani. Ukhamarus Biblianjja, servirinakapajj jukʼamp lurañ munapjjaspa ukatakiw chʼamañchi (1 Tim. 3:1). Ukhamasti jiwasatï luratanakapat jan chʼamañchtʼkañäni ukhajja, janiw tama taypin nayrar sartañataki chʼamachasipkaspati.

11. 1) ¿Kunjamsa mä irpir chuymanejj mä ajjsarir waynitur yanaptʼäna? 2) Kunjamtï Julien jilatar yanaptʼaskäna ukatjja, ¿kunsa yateqsna?

¹¹ Ludovic sat irpir chuyman jilatat parltʼañäni, juparojj waynitutpachwa jilat kullakanakajj yanaptʼapjjäna. Jilatajj siwa: “Kunapachatï mayniru sum lurañapatak yanaptʼtan ukhajja, ratukiw Diosar yupaychañan nayrar sartapjje” sasa. Jupajj Julien sat wali ajjsariri jilataruw yanaptʼäna. Uka toqet parlkasajj akham siwa: “Jupapachpat wal pächasirïna, ajjsarañatjja janikiw sums lurirïkänti, ukampis jupajj wali munasirïnwa, jilat kullakanakarus taqe chuymaw yanaptʼañ munäna. Ukhamajj jan wali luratanakap uñchʼukiskañat sipansa, kunja suma chuymanïnsa ukwa amuyayäta, jukʼamp chʼamachasiñapatakis yanaptʼarakiyätwa” sasa. Tiempompisti Julien jilatajj irpir chuymaninakan yanapiripäjjänwa, jichhasti precursor regularjamaw serviskaraki.

12. ¿Kunas mayninakar yanaptʼañatak munasi? Mä uñachtʼäwimpi qhanañchtʼam.

¹² Cheqas mayninakar yanaptʼañatakejja, kunanaksa lurasipki uk sum amuyañasawa. Kunjamtï Julien jilatan experienciap uñjawayktanjja, janiw maynin jan wali luratanakapak uñchʼukiñasäkiti, jan ukasti kunjam jaqesa, kunsa sum luraspa ukwa amuyañasa. Jesusajj ukhamwa apóstol Pedrot amuyäna. Nayrajja, Pedrojj Simón satänwa, jupajj kuntï lurañ amtkäna ukjja, awisajj janiw phoqerïkänti. Ukhamäkchïna ukasa, Jesusajj Pedro jan ukajj Cefas sasaw sutichäna, uka sutinakasti “qarqa” sañwa muni. Ukampejj qarqjam wali suma saytʼatäniwa sañwa Jesusajj munäna (Juan 1:42).

13, 14. 1) ¿Kunsa Bernabeajj Marcosat amuyäna? 2) ¿Kunjamsa mä waynajj Marcosjam yanap katoqäna? (28 janankir foto uñjjattʼam.)

¹³ Jichhasti kunjamsa Bernabeajj Marcosar yanaptʼäna uka toqet parltʼarakiñäni (Hech. 12:25). Pablompi Bernabeampejj nayrïr kuti misionerjam  viajipkäna ukhajja, Marcosajj jupanakar ‘yanaptʼañatakiw’ sararakïna. Ukampis Panfilia cheqar purisajja, jan kun yatiyasakiw jupanakar jaytjawayjjäna. Ukapachasti jupanakajj alay toqer sarañwa amtasipkäna, uksa thakinakanjja lunthatanakajj waliw utjäna (Hech. 13:5, 13). Ukampis ¿kunsa Bernabeajj lurpachäna? Marcosan pantjasitanakap uñchʼukiskañat sipansa, kunjam jaqesa kunjam chuymanisa ukwa amuyäna. Qhepatjja, Marcosan nayrar sartaskakiñapatakejj yanaptʼaskakpachänwa (Hech. 15:37-39). Tiempompejja, Marcosajj Jehová Diosar wali sumwa servjjäna. Kunapachatï Pablojj Roma carcelana Colosankirinakar carta qellqkäna ukhajja, Marcosajj Pabloruw uñjaskäna. Uka cartansti Pablojj Marcosan aruntapwa apayäna ukhamarak jupatsa wali sumwa parlarakïna (Col. 4:10). Ukat Pablojj Marcosan yanapap wasitat maykäna ukhajja, Bernabeajj wal kusispachäna (2 Tim. 4:11).

¹⁴ Jichhasti Alexandre sat jilatat parltʼañäni, jupajj jichhakiw irpir chuymanjam uttʼayatäski. Juparojj kunjamsa mä jilatajj yanaptʼäna, uk amtasajj akham siwa: “Qʼajjo waynäskäyäta ukhajja, waljanitak oración mayiñajj nayatakejj wali chʼamapunïnwa. Mä irpir chuyman jilataw wakichtʼasiñsa jan ajjsarañsa yanaptʼitäna. Janiw ukhamaruki jaytkitänti, jan ukasti yatiyir mistuñatak tantachäwinakanjja, nayarupuniw oración jilapart mayiyirïtu. Ukhamatwa jukʼat jukʼata jan sinti ajjsarjjayätti” sasa.

15. ¿Kunjamsa Pablojj jilat kullakanakar chʼamachtʼäna?

¹⁵ Mayninakar sum lurir uñjasajja, ¿kamachtansa? “Walik ukham lurtajja”, ¿sasinti sistanjja? Romanos 16 jaljanjja, Pablojj pä tunka jila cristianonakaruw suma luratanakapat ayti (Rom. 16:3-7, 13). Amuytʼañataki, Andronicompi Juniasampejj nayat sipansa, ‘nayraw Cristor iyawsapjjäna’ sasaw säna, ukhamatwa walja maranak aguantapjjatap qhanstayäna. Ukatsti, Rufon mamapajj “nayatakejj mä taykjamarakiwa” sasaw sarakïna, inas uka kullakajj wali munasiñampi nayrajj jupar yanaptʼirïchïna.

16. ¿Kunatsa waynanakar chʼamañchtʼañajj wakisispa?

¹⁶ Jiwasajj ukhamarakiw arunakasampejja mayninakar yanaptʼsna. Francia markan jakasir Rico sat waynat parltʼañäni. Jupan awkipajj janiw cristianökänti, ukatwa kunapachatï bautisasiñ munkäna ukhajj jarkʼäna. Ukhaman uñjasisaw waynitojj wal llaktʼasïna, ukatjja akham amuyjjarakïna: ‘Jilïrëjjä ukhakiy Jehová Diosar servjjchï’ sasa. Ukhamarakiw yateqer masinakapas jupat sawkasipjjäna ukas llakisiyarakïnwa. Ukampis Frédéric sat irpir chuyman jilataw jupar chʼamañchtʼäna. Jilatasti siwa: “Dios toqet parlatapatwa ukham jan walinakan uñjasïna, ukatwa Ricorojj ‘walik ukham yatiytajja’ sasin chʼamañchtʼayäta” sasa. Uka arunakawa nayrar sartañapatakisa, tatapampi sum apasiñapatakis yanaptʼäna. Ukatsti 12 maraniw bautisasjjäna.

17. 1) ¿Kunjamsa jilat kullakanakar nayrar sartapjjañapatak yanaptʼsna? 2) ¿Kunjamsa mä misionerojj waynanakar yanaptʼäna, ukat kunsa jikjjatäna?

¹⁷ Jilat kullakanakarojj suma luratanakapat “walik ukham lurtajja” sasin sisktan ukhajja, Jehová Diosar jukʼamp servipjjañapatakiw  yanaptʼtanjja. Francia markankir Sylvie * kullakat parltʼañäni, jupajj walja maranakaw Betelan irnaqtʼaski. Kullakajj akham siwa: ‘Kullakanakajj mayninakarojj chʼamañchtʼapjjarakispawa, kuntï jilatanakajj jan amuyapkaspa ukwa kullakanakajj amuyapjjaspa’ sasa. Kullakasti saskakiwa: ‘Nayatakejj mayninakar chʼamañchtʼañajj wali wakiskiriwa’ sasa (Pro. 3:27). Jichhasti Jérôme sat jilatat parltʼarakiñäni, jupajj Guayana Francesa markanwa misionerjam serviski, jupasti walja waynanakaruw misioneröpjjañapatak yanaptʼawayi. Jupajj siwa: “Kunapachatï Diosan arunakapat sum yatichapjje ukhamarak tantachäwins sum arstʼapjjaraki ukhajja, ‘walik ukham lurtajja’ sasaw sirïta. Ukaw jan ajjsarayasis lurapjjañapatak yanaptʼawayi, ukatjja jukʼamp sumanakwa lurjjapjjaraki” sasa.

18. ¿Kunatsa wayna jilatanakamp irnaqañajj wali askejja?

¹⁸ Jupanakampi irnaqasaw jukʼamp nayrar sartapjjañapatakejj yanaptʼaraksna. Mä wayna jilatatï computadora sum apnaqañ yatchi ukhajja, jw.org sat cheqat chʼamañchkir qellqatanak imprimiñapatakiw mä irpir chuymanejj mayispa, ukhamat jan computadorani jilïr jilat kullakanakar churañapataki. Ukatjja, tantachasiñ uta qʼomachañataki jan ukajj askichañatakiw jupanakar jawstʼaraksna. Ukhamatwa kunanaktï sum lurañ yatipki uk uñjañäni, chʼamañchtʼarakiñäni, ukat kunjamsa nayrar sartasipki uks amuyarakiñäni (Pro. 15:23).

19, 20. ¿Kunatsa nayrar sartasipkakiñapatakejj mayninakar yanaptʼañasa?

¹⁹ Kunapachatï Jehová Diosajj Josué chachar Israel markap pʼeqtʼañapataki ajllkäna ukhajja, Moisesarojj akham sänwa: “Jichhajj churamay Josué chacharojj ewjjanaka, ukhamarak juparojj chʼamañcham” sasa (Deuteronomio 3:28 liytʼañataki). Jichhürunakanjja, Jehová Diosan markapajj jukʼampiw jiljjattaski, ukhamajj taqeniw jichhak bautisasirinakarusa wayn tawaqonakarusa nayrar sartapjjañapatak yanaptʼapjjañasa, janiw irpir chuymaninakakejj uk lurapjjañapäkiti. Ukhamatwa walja jilat kullakanakajja, sapüru Diosar serviñatak chʼamachasipjjani, ukatsti ‘mayninakar yatichañatakis’ wakichatäpjjarakiniwa (2 Tim. 2:2).

²⁰ Inas tamasajj wali jachʼächi, jan ukajj inas jiskʼa gruposajj tamaptañatak chʼamachasiskarakchi, ukampis taqeniw Diosan markapar yanaptʼaskakiñatakejj chʼamachasiñasa. Ukhamasti, Jehová Diosat yateqasisa, kunanaktï jilat kullakanakasajj lurañ yatipki ukanak amuyapjjañäni.