ESTADOS UNIDOS markankir Katherine kullakajja, 16 maraniw bautisasïna, jupasti Diosan arupat yatiyañ wal munäna, ukampis kawkhantï yatiykäna ukawjanjja, Diosan arunakapat yateqañ munirinakajj janiw utjkänti. Kullakajj akham siwa: “Jaqenakajj kunjamsa Jehová Diosar uñtʼañatak oración mayisipjjerïna ukwa qellqatanakan liyirïta, ukatwa nayajj ukham jaqenakar jikjjatañ munayäta, ukampis janiw jikjjatirïkti” sasa.

Walja maranak pachpa territorion yatiyasajja, Katherinejj kawkhantï Diosat yateqañ munapki uka cheqar sarañwa amtäna. Ukampis mayaw llakisiyäna. Mä kutejja, familiapat pä semanakiw jayankäna, ukampis sapüruw jupanakat wal llaki­sïna. Ukhamajj jichhajj familiapat walja tiempo jayankasajj ¿aguantaspänti? Cheqas jupajj Jehová Diosar thaqerinakaruw yanaptʼañ munäna. Ukatwa kawkharus saraspa uk sum amuytʼasajj Guam markankir sucursalar qellqäna, ukhamat uka lugaranakat sum yatjjatañataki. 2007 julio phajjsin kunapachatï 26 maranëjjäna ukhajja, Saipán islaruw sarjjäna, ukasti utapatjja 10.000 kilometronak jayankänwa. Ukan ¿kunjamas jikjjataspachäna?

Yaqha tamaru puritapatjja, mä qawqha tiempokiw pasaskäna, ukhaw Katherinejj 45 marani mä warmiru jikjjatäna, jupasti Doris satänwa, jupampiw Bibliat yatjjatañ qalltapjjäna. Kunsa yatichi sat librot niya kimsa jaljanak yatjjatkasajja, kullakajj llakthapisjjänwa. Jupasti siwa: “Dorisajj wali suma yateqerïnwa, janis jupar sum yatichkirista ukham amuyasiyäta. Ukhamarusa janipuniw mä kutis ukham estudio sarayirïkayätti, ukatwa akham amuyjjayäta: ‘Jupan mitapa experienciani mä kullakaw Dorisar yanaptʼaspa’ sasa”. Ukatwa kawkïr kullakas Dorisar sum yanaptʼaspa uk jikjjatañataki Jehová Diosar yanaptʼa mayisïna. Ukatsti Dorisamp uka toqet parlañatakiw amtarakïna.

Katherine kullakajj siwa: “Janïraw kunsa siskayätti, ukhaw Dorisajj mä problemapat parltʼitäna. Ukatwa kunjamsa Jehová Diosajj niya ukhaman uñjaskayäta ukhajj yanaptʼitäna uk avistʼarakiyäta” sasa. Dorisajja wal Katherineru yuspäräna ukatsti sänwa: “Jehová Diosaw khitantamjja. Kunürutï utajar purinkta ukhajja, walja horanakaw  Biblia liyiskayäta. Jachtʼasisaw Bibliat mä yatichiri khitanita sasin Diosar mayisiskayäta, ukhamaruw jumajj purintajja. ¡Jehová Diosaw mayisitajar istʼitäna!” sasa. Katherinejj uk amtasajj wal chuym chʼalljjtayasi. Ukatsti sarakiwa: “Oracionajaru Diosan istʼatapajja Dorisan arunakapanwa amuyasïna. Jehová Diosaw yatichaskakiñataki wakichtʼatätaj amuytʼayitäna” sasa.

Dorisajj 2010 maranwa bautisasjje, jichhajj waljaniruw Bibliat yatichaskaraki. Katherinejj siwa: “¡Kuntï munkayäta uk phoqañwa Jehová Diosajj yanaptʼawayitu, ukatwa wal yuspärta!” sasa. Katherinejj precursor especialjamaw Kosrae islan serviski, ukasti Pacífico sat lamar qotanwa jikjjatasi.

Yaqha markankir jilat kullakanakajja, patakanitsa jilaw Micronesia islar kawkhantï yatiyirinakajj wal munaski ukhar sarapjje, jupanakajj 19 maranit 79 maraninakäpjjewa. Erica sat kullakajja, 2006 maranwa Guam cheqar 19 marani purïna, jupajj wali kusisitajj akham siwa: “Jaqenakajj Diosan Arupat wal yatjjatañ munapki ukhajja, precursorjamajj wal kusista. Walpun Jehová Diosarojj yuspärta, Jupaw ukham serviñajatak yanaptʼawayitu. ¡Akapï cheqpacha jakañajja!” sasa. Jichhasti jupajj Ebeye sat cheqanwa Marshall sat islan precursor especialjam serviski. Cheqas yaqha markan Diosar serviñajj chʼamakïspawa. Ukampis Micronesiar saririnakajj kuna jan walinakansa uñjasipjjäna, ukat kunjamsa ukanakar saykatapjjäna, uk kimsa toqet yatjjatañäni.

Kunatï munaski ukampikiw jakañasa. 22 marani Simon jilatajja, 2007 maranwa Palaos sat islar saräna, jupajj Inglaterra markan walja qollqe ganäna, ukampis uka islanjja janiw ukham ganañjamäjjänti. Jupasti siwa: “Kuntï munkayäta uk janiw taqpach alañajäjjänti, ukwa yateqaña­jäna. Jichhajj manqʼañanak alkta ukhajja iraqtʼatäkis ukpunwa thaqta. Kun pʼakjkta ukhasa, usadonakakwa askichañatakejj alta, ukatjja yaqhampiw yanaptʼayasirakta” sasa. Kunatï munaski ukampik jakañajj ¿yanaptʼänti? Jupajj siwa: “Kunanakakis jakañatakejj wakisitayna uk sum yateqawayta ukat jukʼa qollqempi jakañsa yateqawayaraktwa. Paqallqo maranakaw akankjjta, janipuniw kunapachas manqʼasa ni utas faltawaykituti” sasa. Cheqas Jehová Diosajja, taqe khitinakatï Jupan Reinopa nayrar uchapki ukanakarojja yanaptʼapuniwa (Mat. 6:33).

Janiw sinti llakisiñasäkiti. Ericajj siwa: “Fami­liajampejj wali yatitayätwa, jupanakat llakisiñach aynachtʼaykitani sasaw ajjsarayäta, ukatwa janïr viajkasajja, kunjamatsa jan sinti llakiskirista uka toqet parlir qellqatanak liytʼayäta ukaw wal yanaptʼawayitu. Mä experiencianjja, mä kullakajj phuchaparojja ‘Jehová Diosaw nayat sipansa, jukʼamp sum uñjaskätam’ sasaw säna, uka arunakaw wal chuymachtʼitäna” sasa. Hannah kullakampi Patrick jilatampejja, Majuro sat cheqanwa  servisipki, Marshall sat islana. Kullakajj familiapat jan sinti llakisiñatakejja, tamankir jilat kullakanakar yanaptʼañatakiw chʼamachasi. Kullakasti siwa: “Aka Oraqpachan walja jilat kullakanakaw utji, jupanakajj familiajäpkaspas ukhamarakiwa, ukatwa Jehová Diosarojj wal yuspärta, jupanakan yanaptʼapampiw kawkhantï yanapajj munaski ukan serviskarakta” sasa.

Amigonakwa jikjjatañasa. Simon jilatajj akham siwa: “Taqe kunaw yaqha markan mayjajja, awisajj sawktʼasta ukhasa janiw khitis amuykituti” sasa. Erica kullakajj sarakiwa: “Qalltanjja, yaqhachataw amuyasiyäta, ukampis janiw nayan munañaj thaqeri sarkayätti, jan ukasti Jehová Diosaru jukʼampi serviñatakiw sartjja, uk amtañaw wal yanaptʼawayitu. Jichhajj walja amigonakanëjjtwa, jupanakarojj wal munasta” sasa. Simon jilatajj palauano sat aru yateqañatakiw chʼamachasïna, ukaw uka markankir jilat kullakanakampi parltʼasiñatak wal yanaptʼäna (2 Cor. 6:13). Uka aru yateqañ wal munatap uñjasaw jilat kullakanakajj jupar jukʼamp munasipjjäna. Jichhak purinirinakajj uka markankir jilat kullakanakampi mayachtʼata taman chʼamachasipjje ukhajja, wali sumwa apasipjje. Kawkhantï yanaptʼajj wal munaski ukar sarasajja ¿kunampsa jilat kullakanakajj jikjjatapjje?

Apóstol Pablojj akham sänwa: “Walja yapuchasiristi, waljaraki apthapini” sasa (2 Cor. 9:6). Diosar jukʼampi serviñ munirinakajj uka arunakarjamaw chʼamachasipjjarakispa. ¿Kunjamsa Micronesiar saririnakajj cosecha apthapiwayapjje?

Micronesianjja, waljaniw Bibliat yateqañ munirinakajj utjaski ukat Bibliat yateqasinjja ukarjamaw sarnaqjjapjjaraki. Angaur sat mä islanjja, ukhamarakiw Patrick jilatampi Hannah kulla­kampejj Diosan arunakap yatiyapjjäna, ukansti 320 jaqenakakiw jakasipjje. Uka jilat kullakajj pä phajjsiw uka islan yatiyjjapjjäna, ukhamaruw Bibliat yateqañ munir mä warmir jikjjatapjjäna, jupajj wawapamp sapakiw jakasïna. Jupasti Bibliat wali kusisitaw yateqäna, jakäwipsa qʼalwa mayjtʼayäna. Hannah kullakajj siwa: “Uka warmir Bibliat yatichasinjja, utarojj bicicletatwa kuttʼjjapjjerïta ukat purapat uñkattʼasisajja akham sasaw Jehová Diosar sapjjerïta: ‘¡Walpun yuspärapjjsma! sasa. Jehová Diosajja, uka uwijitarojj Jupan ukarojj kunjamatsa irpanipunispänwa, ukampis nanakaw jikjjatasin kunatï cheqäki uk yatiñapatak yanaptʼawayapjjta, yaqha markar jutasaw jupar jikjjatapjjta, ¡ukajj mä jachʼa bendicionaw nanakatakejja!” sasa. Erica kullakajj sarakiwa: “Jehová Diosar uñtʼañapataki maynir yanaptʼañajja, wali kusiskañapuniwa” sasa.

Diosan Reinopat yatiyirinakajja, walja markanakanwa munasi. Jumajj yaqha markar sarasin ¿yanaptʼasmati? Diosan Reinopat jukʼampi yatiyañ munañamatakejja, Jehová Diosaruw mayisiñama. Ukatjja, irpir chuymaninakampi, tamanak tumptʼir jilatampi jan ukajj yaqha markar yatiyir sarapki uka jilat kullakanakampiw parltʼarakisma. Sarañ amtäta ukhajja, kawkïr markaruy sarañ munsta uka sucursalaruw qellqasma, ukatjja kunjamas uka cheqajja uk yatiñatakis mayirakismawa. * Wayn tawaqonakatsa, casadonakatsa, jilïrinakatsa, walja jilat kullakanakaw yaqha markanakan yatiyasipki, mä arunjja, cosecha apthapisipki, jumas jupanakjam sararakismawa.