1, 2. ¿Kunsa Moisesajj lurañapäna, ukat kunjamsa Diosajj chʼamañchtʼäna?

JEHOVÁ DIOSAN markapar arjjatañatakejj mä wali munañani apnaqerimpis parlañamäkaspa ukham amuytʼañäni. Inas jan aruni, sustjata ukham jikjjataschisma. Jupampi parlañatakejj ¿kunjamsa wakichtʼasisma? Taqe Chʼamani Diosan khitapjamajja, ¿kamsasmasa?

² “Llampʼu chuymani” Moisesajj ukhamanwa uñjasïna. Jehová Diosajj Egipto markankir faraonampi parlañapatakiw Moisesarojj khitañ amtäna, ukhamat tʼaqhesiñata esclavöñata markapar qhespiyañataki (Núm. 12:3). Faraonajja, jachʼa jachʼa tukuri qhoru jaqënwa. Ukampis Jehová Diosajja, Moisesarojj faraonar akham sañapatakiw khitäna: ‘Uka walja millón esclavonakaru antutam’ sasa (Éxo. 5:1, 2). Ukatwa Moisesajj Jehová Diosar akham jisktʼäna: “¿Khitïtsa nayajja, faraonan ukaru sarasina Egipto markat israelitanakaru apsuniñatakejja?” sasa. Moisesatakejj uk phoqañajj chʼamäpachänwa. Ukampis Diosajj sänwa: ‘Janiw sapak jaytkämati, nayawa jumampiskäjja’ sasa (Éxo. 3:9-12).

3, 4. 1) ¿Kunatsa Moisesajj ajjsarayasïna? 2) ¿Kunas Moisesarjam ajjsarayistaspa?

³ ¿Kunatsa Moisesajj ajjsarayasïna? Faraonajj janiw Jehová  Diosan khitataparjam katoqkitaspati ni istʼkitaspasa; janirakiw israelit masinakajasa, Egiptot irpsuñataki Diosan ajllitaparjam uñjapkitaspati sasaw Moisesajj amuyäna. Ukatwa Jehová Diosar akham säna: “Jupanakasti janiw creepkitaspati, ni arunakajjsa istʼañ munapkarakispati, jan ukasti sapjjaspawa: ‘[Jehová] Tatitojj janiw jumarojj uñstkpachätamti’ sasa” (Éxo. 3:15-18; 4:1).

⁴ Mä wali munañani apnaqerimpi parlañajj inas jan wakiskapunchiniti. Ukampisa ¿Diosata, Reinopata jaqenakar parlañ ajjsarayasirïtati? Cheqas ajjsarayasiñjamawa. Ukampis kuntï Jehová Diosajj Moisesar siskäna ukat kunanakas pasarakïna ukanak yatjjatañajja, taqeniruw yanaptʼistani.

5. 1) ¿Kunsa Moisesajj Jehová Diosat katoqäna? (11 janankir dibujo uñjjattʼam.) 2) ¿Kunjamsa ukajj Moisesar chʼamachtʼäna?

⁵ Moisesajja, janiw istʼapkitaniti sasin ajjsarayasïna ukhajja, kunanakas pasañapäna ukanakatakiw Diosajj wakichäna. Éxodo libronjja akham siwa: “[Jehová] Diosajj sarakïnwa: ‘¿Kunas amparamankejja?’ sasa. Moisesajj sarakïnwa: ‘Mä jachʼa thujruwa’ sasa. Diosasti sarakïnwa: ‘Thujruma oraqer jaqnoqam’ sasa. Moisesajj iyaw sasawa oraqer jaqnoqäna, thujrojja mä katariruw tuküna. Moisesasti ukham katari uñjasinjja ajjsarayasisaw jaltjjäna. Ukampis [Jehová] Tatitojj Moisesarojj saskakïnwa: ‘Amparampi wichʼinkhat katthapim’ sasa. Moisesajj iyaw sasaw katarirojj wichʼinkhat katthapïna ukatsti katarejj thujrukiw tukuwayjjäna. ‘Ukhamatwa iyawsapjjani Abraham, Isaac, Jacob uka nayra awkinakaman Tatitu Diosapajj jumaru uñstatapatjja’” sasa (Éxo. 4:2-5). Jehová Diosan chʼamapampejja, ¡mä thujrojj asiruruw tuküna! Uka chʼamampiwa Moisesajj milagro luraspäna, ukhamat Diosajj jupar khitatapa ukhamarak yanaptʼatapa uñachtʼayañataki. Jehová Diosajj saskakïnwa: “Apasïtawa aka jachʼa thujruma, ukampiwa jumajj milagronak luräta” sasa (Éxo. 4:17). Ukham lurañataki Jehová Diosat chʼam katoqasajja, Moisesajj faraón nayraqatansa, israelitanak nayraqatansa jan ajjsartʼasaw cheqpach Jehová Diosat parlañapäna (Éxo. 4:29-31; 7:8-13).

6. 1) Diosan arunakap parlir sartan ukhajja, ¿kunsa apastanjja, ukat kunatsa? 2) ¿Kunatsa Pablojj “Diosan arupasti jakaskiwa, jachʼa chʼamanirakiwa” sasin sispachäna?

⁶ Diosan arunakap yatiyir sarktan ukhajja, ¿kunsa aptanjja? Cheqansa, Bibliampipuniw yatiyir sartanjja, Biblia liytʼañatakisa sum wakichtʼasiwaytanjja. Yaqhep jaqenakatakejj Bibliajj aleq librokïkaspas ukhamawa, ukampis ukajj janiw cheqäkiti: Bibliajj Diosan Arupawa, Diosaw uka toqe parlistu (2 Ped. 1:21). Diosan Reinopajj kunsa lurani ukwa Bibliajj qhanañchi. Ukatwa apóstol Pablojj akham qellqäna: “Diosan arupasti jakaskiwa, jachʼa chʼamanirakiwa” sasa (Hebreos 4:12 liytʼañataki). ¿Kunatsa “Diosan arupasti jakaskiwa” sasin Pablojj sispachäna? Diosan arsutanakapajja, janiw inamay arunakäkiti, jan ukasti Diosaw uka arunakap sum phoqasiyaski (Isa. 46:10; 55:11). Maynejj Biblia liytʼasin ukanak sum amuyi ukhajja, Diosan chʼamani arunakapajj chuymaparuw purtʼi, ukatjja ukarjamaw sarnaqjjaraki.

7. ¿Kunjamsa ‘Diosan arunakap cheqaparu parlsna’?

⁷ Jehová Diosajja, jakkiri Arupwa churistu, ukajj Biblia satawa. Ukampiw kuntï yatichktan ukajj cheqapätapa ukhamarak Diosat jutatapa uñachtʼaysna. Ukatwa Pablojj Hebreos sat cartapa qellqkäna uka qhepatjja, Timoteor akham ewjjtʼarakpachäna: ‘Cheqaparuw Diosan arunakap parläta’ sasa (2 Tim. 2:15). ¿Kunjamsa jiwasajj uka ewjjtʼarjam lursna? Chuymar purtʼañatakejja, kawkïr qellqatanaksa Bibliat liytʼañäni ukjja sum ajlltʼañasawa. 2013 maran tratadonak katoqawayktan ukanakajj uka amtampi lurtʼatawa.

8. Mä irpir chuyman jilatajja, ¿machaq tratadonakat kamsänsa?

⁸ Machaq tratadonakajja, taqpachajj kikpakïpjjewa, ukhamajj jiwasatï mä tratado sum apnaqañ yateqañäni ukhajja, taqpachwa sum apnaqañäni. Hawái (Estados Unidos) markankir yatiyañ toqet mä irpir chuyman jilatajj akham sänwa: “Uka machaq tratadonakajja, utat uta yatiyañatakisa, kawkjantï walja jaqenakajj utjki uka cheqanakan yatiyañatakisa walpun yanaptʼapjjetu, janiw ukhamäniw sapkayätti” sasa. ¿Kunatsa uka jilatajj ukham säna? Jilatasti saskakiwa: ‘Tratadonakajj suma waktʼayatawa, ukamp yatiykta ukhajja, waljanimpiw sum parltʼasipjjta. Uka qellqatanakan qalltapanjja, mä jisktʼaw utji, ukar qhanañchañatakis yanaptʼanakaw utjaraki. Ukhamajj jaqenakajj jan ajjsartʼasaw ukarjam arstʼapjje’ sasa.

9, 10. 1) ¿Kunjamsa tratadonakajj Biblia sum apnaqañatakejj yanaptʼistu? 2) ¿Kuna tratadonakampi yatiyasas askinak jikjjatawayta, ukat kunatsa?

⁹ Sapa tratadonjja, kawkïr cheqas Bibliat liytʼasiñapa ukajj suma ajlltʼatawa. ¿Tʼaqhesiñanakajj tukusjjpachäniti? sat tratadot parltʼañäni. Uka jisktʼarojj utanejj kunjjay sischini, ukampis “¿Kunsa Bibliajj yatichi?” siski uka cheqwa uñjjattʼayañama. Ukatsti “Bibliajj akham siwa” sasaw Apocalipsis 21:3, 4 qellqat liytʼañamaraki.

¹⁰ ¿Kunsa jumajj Bibliat amuyta? sat tratadompejj ukham lurarakisma. Qalltankki uka jisktʼarojj kunjjay utanejj sischini, ukampis tratado janatatasajja, akham sañamawa: “Bibliajj akham siwa: ‘Taqe Qellqatasti Diosan amuytʼayatawa’ sasa”. Ukatjja sarakismawa: “Aka toqetjja Bibliajj jukʼampwa qhanañchi” sasa. Ukjjarusti, 2 Timoteo 3:16, 17 qellqatwa liytʼañamaraki.

11, 12. 1) Machaq tratadonakamp yatiyasajja, ¿kunjamas jikjjatasïta? 2) ¿Kunjamsa tratadonakajj kuttʼañatakejj yanaptʼiristam?

¹¹ Utanitï sum istʼanejja, inas tratado liytʼasin jukʼamp yatjjatapjjchisma. Ukampis tratado churasasa, Bibliat mä pä texto liytʼarapisasa wali kusisitaw jikjjatasïta. Ukatjja yaqha urusa jukʼamp yatichañatakejj kuttʼarakismawa.

¹² Sapa mayni tratadonakan qhep qhepa janapanjja, “lupʼiñataki” sat cheqaw utji, ukansti mä jisktʼaw utjaraki, Bibliat liytʼañatakis textonakajj utjarakiwa, ukanakampiw utanin ukar kuttʼasajj yatichasma. Amuytʼañataki, ¿Kunsa jutïr urunakat suyta? sat tratadonjja, aka jisktʼaw “lupʼiñataki” siski uka  cheqan utji: “¿Kunjamsa Diosajj aka Oraq sumaptayani?” sasa, ukjjarusti Mateo 6:9, 10 ukat Daniel 2:44 qellqatanakaw utjaraki. ¿Jiwatanakajj jaktanipjjpachäniti? sat tratadon jisktʼapasti akham sarakiwa: “¿Kunatsa chuymankipstan ukat jiwaraktan?” sasa, ukjjarusti Génesis 3:17-19 ukat Romanos 5:12 qellqatanakaw utjaraki.

13. ¿Kunjamsa tratadonakampejj Bibliat yateqerinakaru jikjjatsna?

¹³ Machaq tratadonakajja, Bibliat yateqerinakaru jikjjatañatakiw yanaptʼistani. Qhep qhepa jananjja, QR * (código de respuesta rápida) sat chʼejje recuadrow utji. Kunapachatï celularanakampi jan ukajj tableta sat aparatonakampi ukar mä fotjam apsuski ukhajja, Internetankiri jw.org sat cheqaruw manti. Ukansti, Bibliat yatjjatañataki mä chʼamañchkiri videow utji. Ukhamarus tratadonakan qhep qhepa janapanjja, Diosan apayanit suma yatiyäwinaka sat folletow uñachtʼayasi, ukanjja mä yatichäwip yatjjatasiñapatakiw chʼamañchasiraki. Sañäni, ¿Khitis aka Oraqe apnaqaski? sat tratadojja, folleton 5 yatichäwiparuw api. ¿Kunas kusisit familianïñatakejj wakisi? sat tratadosti, 9 yatichäwiruw aparaki. Ukhamajj jiwasatï akan ewjjtʼkistu ukarjam uka tratadonakamp yatiyañäni ukhajja, qalltansa kuttʼkañäni ukhasa, sumwa Bibliampejj yatichañäni. Ukatjja, Bibliat walja yateqerinakaruw jikjjatarakiñäni. ¿Kuna yaqha yanaptʼas utji?

14, 15. Pablot yateqasisajj ¿kunjamsa yatiyir sarsna?

¹⁴ Pablojj Diosan arunakapat yatiykäna ukhajja, “walja jaqenakar jikjjatañ” laykojj kunjamtï jaqenakajj jakasipkäna uk amuyañatakiw chʼamachasïna (1 Corintios 9:19-23 liytʼañataki). ¿Kunatsa? Pablojj ‘judionakaru, leyir phoqerinakaru, jan leyin jaqenakaru, aynachtʼatanakaru’ yanaptʼañatakiw chʼamachasïna. Jupajj taqe jaqenakan qhespiyasipjjañapwa munäna (Hech. 20:21). Jiwasajj taqenir yatiyir sarañataki wakichtʼaskasajja, ¿kunsa Pablot yateqassna? (1 Tim. 2:3, 4.)

¹⁵ Diosan Apnaqäwipat Yatiyañataki sat qellqatanjja, sapa phajjsiw kunjamsa yatiysna ukatakejj yanaptʼanakajj mistu. Ukanakampiw yanaptʼayasisma. Ukampis yatiykta uka cheqanakantï jaqenakajj yaqha toqenakat parltʼañ munapjjchi ukhajja, ¿kamachasmasa? ¿Kunjamsa Bibliat jukʼampi yateqañ munapjjañapatakejj parltʼasma? Inas akham jisktʼasiñajj wakischispa: “Khitinakampitï parlkä ukanakajja, ¿kunjamsa jakasipjje? ¿Kunas jupanakar llakisiyi?” sasa. Tamanak tumptʼir mä jilatajja, kunjamsa esposapampejj Bibliat yatiyapjje uk akham siwa: ‘Kuntï yatichañ munapkta uk mä qawqha arunakamp cheq sapjjta ukhajja, jaqenakajj Bibliat liytʼarapitajj sum istʼapjjetu. Janïr aruntkasaw Bibliat kawkïr cheqsa liytʼarapipjjä uk janjapjjta. Ukhamajj sum arunttʼasinjja, cheqakwa Bibliat liytʼarapipjjta’ sasa. Jichhajja, kuna toqet parltʼañasa, kun jisktʼañasa, Bibliat kawkïr cheq liytʼañasa wal yanaptʼawayi uk mä qawqha uñjañäni. Jumasti ukarjamaw lurarakisma.

16. ¿Kunjamsa Isaías 14:7 qellqatampejj yatiysna?

¹⁶ Jumatï sinti jan walinakajj utjki uka cheqan jakassta ukhajja, akham utanir sasma: “Mä periodicon akham yatiyäwi mistuspa: ‘Taqe akapachaw jichhajj sumankjje, kusisiñat arnaqasiraki’ sasa. Uk liytʼasajja, ¿kamsasmasa? Isaías 14:7 qellqatanjja, aka Oraqejj ukhamäjjaniw sasaw qhanañchi. Cheqas Diosajj jutïrinjja, walja bendicionanak churistani, niyaw aka Oraqen sumankañajj utj-jjani” sasa. Ukatjja kuna bendicionsa churistani ukwa may qhanañchtʼasma.

17. ¿Kunjamsa Mateo 5:3 qellqatampejj parltʼsna?

¹⁷ Jumatï qollqe jikjjatañajj wali chʼamäki uka cheqan jakassta ukhajja, aka jisktʼampiw  parlañ qalltasma: “Familian kusisita jakasiñatakejja, ¿qawqha qollqes munasi?” sasa. Utanir istʼasajj akhamwa sarakisma: “Yaqhepajja, ukhat sipansa, walja qollqenïpjjewa, ukampis janiw kusisit jakasipkiti. Ukhamajj ¿kunas kusisit jakasiñatakejj munasi?” sasa. Ukjjarusti, Mateo 5:3 qellqat liytʼarapïta, ukatsti ‘¿Bibliat yateqañ munasmati?’ sasaw jisktʼarakïta.

18. ¿Kunjamsa Jeremías 29:11 qellqatampejj jaqenakar chuymachtʼasma?

¹⁸ Jumajj jakaskta uka cheqanjja, ¿jan waltʼäwinakat pasawayi? Ukhamächi ukhajja, akham sasaw parlañ qalltasma: “Jumar chuymachtʼiriw jutta” sasa. Ukatsti Jeremías 29:11 qellqat liytʼarapïta (liytʼañataki). Ukatjja akham sarakismawa: “Kunjamtï akan uñjktanjja, Diosajj jichhasa jutïrinsa sum jakasiñaswa muni. Ukampis ¿kunjamatsa kusisit jakassna?” sasa. Ukjjarusti, Suma yatiyäwinaka sat folletot thaqtasinwa uka toqet jukʼamp qhanañchtʼasma.

19. ¿Kunjamsa Apocalipsis 14:6, 7 qellqatampejj yatiysna?

¹⁹ Jumajj jakaskta uka cheqanjja, religionat yatiñ munirinakajj waljani utjchi ukhajja, akham sasmawa: “Mä angelatï jumar parlir jutaspa ukhajja, ¿istʼasmati?” sasa. Ukatsti Apocalipsis 14:6, 7 liytʼarapïta (liytʼañataki). Ukatjja sarakismawa: “Kunjamtï akan uñjktanjja, angelajj ‘Diosaru ajjsartapjjam’ siwa. Ukampis ¿khiti Diosar ajjsartapjjam sispachänsa? Angelasti sänwa: ‘Khititejj alajjpachsa, akapachsa [...] lurki ukaru’ sasa. Ukampis ¿khitïpachas jupajja?” sasa. Ukjjarusti, Salmo 124:8 qellqatwa liytʼarakisma, ukansti siwa: “Yanaptʼajj Tatitut * juti, jupaw alajjpach akapach lurirejja” sasa. Ukatjja, khitis Tatitojja ukwa jukʼamp qhanañchtʼarakisma.

20. 1) Proverbios 30:4 qellqat uñjjattʼayasajja, ¿kunjamatsa mayniru Diosan sutipat yatichasma? 2) Jaqenakan chuymapar purtʼañatakejja, ¿Bibliat kawkïr cheqsa liytʼirïta?

²⁰ Mä waynampis jan ukajj mä tawaqompisa akhamwa parlañ qalltarakisma: “Bibliat mä cheqwa liytʼarapiñ munsma, ukanjja wali wakiskiri jisktʼanakaw utji” sasa. Ukatsti Proverbios 30:4 qellqatwa liytʼarapïta (liytʼañataki). Ukatjja akham saskakismawa: “¿Aka qellqatan khititsa parlaski? Janiw mä jaqet parlkiti, jan ukasti taqe kun Lurir Diosatwa parlaski. ¿Jupajj sutinïpachati? Uk yatichtʼañ munsma” sasa.

21, 22. 1) ¿Kunjamsa mä suma ajlltʼat qellqatajj maynir yanaptʼaspa? 2) Diosat parlir sarkäta ukhajja, ¿kunsa luräta?

²¹ Kunapachatï Bibliat kawkïr cheqsa liytʼañäni uk sum ajlltan ukhajja, kunjamsa maynin chuymapar purtʼani uk janiw yatksnati. Sañäni, Australia markanjja, pä jilataw mä warmir visittʼapjjatayna. Jupanakat maynïrejj akham sasaw jisktʼäna: “¿Kunas Diosan sutipajj uk yattati?” sasa. Ukjjarusti, Salmo 83:18 qellqatwa liytʼarapïna. Uka warmejj jichhajj akham siwa: “Janiw kuns kamsirjamäkayätti, kunapachatï jilatanakajj sarjjapjjäna ukhajja, libronak aljapki uka utaruw 56 kilometronak autot sarta, ukanwa yaqha Biblianakatsa mä diccionariotsa Diosan sutip thaqtta. Diosajj Jehová sutinipunïskatap yatisajja, ‘jukʼampi yatiñaw utjaskpacha’ saraktwa” sasa. Mä qawqha tiempotjja, jupampi uñtʼatapampejj Bibliat yateqañwa qalltapjjäna, ukatsti bautisasjjapjjarakïnwa.

²² Walja jaqenakaw Diosan Arup liyisasa, Diosan arsutanakapar confiyasasa, nayra jakäwinakap jaytasina sum jakasjjapjje (1 Tesalonicenses 2:13 liytʼañataki). Bibliajja, jiwasan arunakasat sipansa, jaqenakan chuymapar purtʼañatakejj wali chʼamaniwa, jakkirirakiwa. Ukhamajj Diosan Arupampipuni yatichapjjañäni.