JAN WALI urunakanwa jaktanjja (2 Tim. 3:1-5). Ukatjja Diosar munasis sarnaqañasa, Diosan kamachinakapar phoqañasa sapüruw jukʼamp chʼamäjje. Jesusasti taqe ukanakajj utjapuniniwa sasaw säna, ukatwa arkirinakapar tukuykama yanaptʼaña amtawayäna (Mat. 24:3, 13; 28:20). ¿Kunjamsa yanaptʼaski? ‘Amuyasiri cheqapa uywataruw’ uttʼayawayi, ukhamat ‘horasaparu manqʼa churañapataki’ (Mat. 24:45, 46, MT).

Amuyasiri cheqapa uywatarojj 1919 maranwa uttʼayasiwayi, ukhat jichhakamajj kunayman parlani walja jaqenakaw Diosan markaparu mantasipki, ukatsti horasaparurakiw Bibliat apstʼat qellqatanaksa katoqasipkaraki (Mat. 24:14; Apo. 22:17). Ukampis Bibliat apstʼat qellqatanakajj janiw taqpachapunejj yaqha arurojj jaqokipaskiti, ukhamarus janirakiw Internetankiri archivonak liyiñatakejj taqeni computadoranïpkiti, ni jw.org cheqan utjki uka videonaksa, qellqatanaksa apaqerjamäpkiti. Ukhamajj khitinakatï jan Internetanïpki ukanakajja, ¿kunatï Diosar sum yupaychañatakejj wakiski ukjja janiw taqpach katoqapkiti sissnati? Uk sum amuytʼañatakejj pusi jisktʼanakar qhanañchañäni.

Kunapachatï Supayajj “aka qalanakarojj tʼantʼar tukuyam” sasin Jesusar siskäna ukhajja, Jesusajj sänwa: “Janiw jaqejj tʼantʼa sapampikiti jakkani, jan ukasti taqe kuntejj Diosajj siski uka arunakampiw jakarakini” sasa (Mat. 4:3, 4). Ukampis Diosan arunakapajj ¿kawkinsa jikjjataspacha? Cheqas Biblianwa jikjjatasi (2 Ped. 1:20, 21). Ukhamajj ukaw Diosat jan jitheqtañatakejj jukʼamp yanaptʼistani (2 Tim. 3:16, 17).

Jehová Diosan markapajja, Traducción del Nuevo Mundo de las Santas Escrituras sat Bibljja, 120 jila arunakaruw chikatsa jan ukajj phoqatpachsa apsuwayi. Ukampis sapa maraw jukʼamp jiljjattaskaki. Ukhamarusa, walja millón yaqha Biblianakaw utjaraki, taqe ukanakajj walja arunakat apstʼatarakiwa. Ukasti Jehová Diosan munañaparjamaw phoqasiski, “Jupajj taqenin qhespiyatäñapwa muni, kunatejj cheqäki uk uñtʼapjjañaparaki” (1 Tim. 2:3, 4). Kunjamtï yatktanjja, Jehová Diosajj taqe jaqen chuymapwa yati, ukhamajj jupaw “khitinakatejj ajay toqen aynachtʼatäpjjatap amuyasipjje” ukanakarojj jawsthapiski, ukat horasaparuw manqʼsa churaskaraki (Heb. 4:13; Mat. 5:3, 6; Juan 6:44; 10:14).

Jiwasatï Diosar taqe chuyma iyawsañ munstanjja, janiw Bibljja aleqaki liyiñasäkiti, jan ukasti sumwa amuytʼañasa ukat ukarjamarakiw sarnaqañasa (Sant. 1:22-25). Ukhamwa nayra patak maranakan jakir mä etíope jaqejj amuyarakïna. Mä kutejja, Diosan Arupwa liyiskäna, ukhamaruw Diosan arunakapat yatiyir Felipe chachajj akham jisktʼäna: “¿Kuntï leekta ukjja amuytati?” sasa. Uka etíope jaqesti sänwa: “¿Kunjämarak nayast amuyästi, jan khitis nayar yatichkitan ukkhasti?” sasa (Hech. 8:26-31). Ukatwa Felipejj Diosan Arupat sum amuytʼañapatakejj yanaptʼäna, qhepatsti uka chachajj bautisasjjänwa (Hech. 8:32-38). Jiwasampejj niya ukhamarakiwa. Bibliat apstʼat qellqatanakaw Diosan Arupat sum amuytʼañatakejj yanaptʼawayistu, ukat chuymar purtʼjjestu ukhajja, ukarjamarakiw sarnaqjjtanjja (Col. 1:9, 10).

Jehová Diosan servirinakapajja, Bibliat apstʼat walja qellqatanakwa katoqtanjja (Isa. 65:13). Sañäni, Yatiyañataki sat revistajja, Biblian profecianakapatwa qhanañchistu, cheqa yatichäwinak sum amuytʼañatakisa ukarjam sarnaqañatakisa wal yanaptʼarakistu. Uka revistajja 210 arunakats jilaw apsusiski. Ukatjja, ¡Despertad! sat revistajj niya 100 arunakaruw apsusiskaraki. Uka revista liyisajja Jehová Diosan muspharkañ luratanakapatwa yateqtanjja, ukatjja kunjamsa Biblian ewjjanakaparjam sarnaqsna uksa amuyaraktanwa (Pro. 3:21-23; Rom. 1:20). Amuyasiri cheqapa uywatajj 680 arunakat walja qellqatanakwa apsuski. Jumajj ¿sapüruti Biblia liyiskta? ¿Revistanaksa, jichhak mistki uka qellqatanaksa liyisktati?

Ukampis janiw uka qellqatanakaki utjkistuti, jan ukasti Bibliat apstʼat bosquejonakaw utjarakistu, ukanakarjamaw tamansa jachʼa tantachäwinakansa arstʼasi. Uka tantachäwinakan arstʼäwinaka, dramanaka, demostracionanaka, entrevistanaka istʼasajja ¿kunjamsa jikjjatasirïta? Cheqas wal kusisirïpachätajja, Jehová Diosajj walja ukham yanaptʼanakwa churistu (Isa. 25:6).

Janiw aynachtʼkañäniti. Cheqas yaqhepanakajj walja yanaptʼanakwa katoqapjje, yaqhepanakasti janiraki. Ukatakejj Jesusan apostolonakapat amuytʼañäni. Jupanakajj mayni arkirinakat sipansa, jukʼamp yatichäwinakwa katoqapjjäna (Mar. 4:10; 9:35-37). Ukhamätap laykojj janiw mayni arkirinakajj aynachtʼapkänti, jan ukasti qawqhatï wakiskäna ukwa katoqapjjäna (Efe. 4:20-24; 1 Ped. 1:8).

Kunapachatï Jesusajj aka Oraqenkkäna ukhajja, walja toqenakatwa parläna ukat kunaymaninakwa lurarakïna, ukampis janiw taqpachajj Mateo, Marcos, Lucas, Juan qellqatanakan jikjjataskiti. Uka toqet apóstol Juanajj sänwa: “Utjarakiwa waljanakampi Jesusan luratanakapajja. Sapa mayatejj qellqasispajja, amuyatajja uka qellqatanakajj aka oraqpachatsa jilaraspawa” sasa (Juan 21:25). Nayra patak maranakan jakir cristianonakajja, jiwasanakat sipansa, jukʼampwa Jesusjjat yatipjjäna. Ukampis jan jupanakjam yatisajj janiw aynachtʼktanti, jan ukasti Jehová Diosajj kunatï wakiski ukwa churistu, ukhamat Jesusan kayup arkañasataki (1 Ped. 2:21).

Jichhajj kuna cartanaktï apostolonakajj cristiano tamanakar qellqapkäna uka toqet parltʼarakiñäni. Sañäni, apóstol Pablojj walja cartanakwa qellqäna ukampis mayajj janiw Biblian jikjjataskiti (Col. 4:16). Uk jan utjatapat janis suma yanaptʼatäksna ukhamjja, janiw amuyañasäkiti. Jehová Diosajj sumwa uñjaskistu ukhamarus ajay toqen jan aynachtʼañasatakejj horasaparuw yanaptʼanak churistu (Mat. 6:8).

Yaqhep jilat kullakanakajj inas mayninakat sipansa walja yanapanakanïpjjchi. Parlkta uka arut ¿mä qawqha qellqatanakakit utji? Ukhamächi ukhajj jan llakisimti, Jehová Diosaw sum uñjasktam. Ukampis kuna qellqatanakatï utjktam ukanakat yatjjatam, ukat kuna artï yatkta uka tantachäwinakar sararakim. Ukhamtï lurätajja, Jehová Diosajj jupar serviskakiñamatakejj yanaptʼaskätamwa (Sal. 1:2; Heb. 10:24, 25).

Jw.org sat cheqar mantasinjja, revistanakwa liytʼasma ukat yaqha ukham qellqatanak liytʼasaw Bibliat yatjjatarakisma. Ukatjja, chacha warmitaki, wayn tawaqonakataki, awk taykanakataki yanaptʼanakas utjarakiwa, uka toqenakat familiansa yatjjatasirakispawa. Ukhamarusa, wali aski yatiyäwinakaw utjaraki. Ukanwa Galaad Escuelat misturinakatsa jan ukajj maran mä kuti reunión anual sat tantachäwejj apaski ukatsa yatiyasiraki. Ukatjja, kunjamsa jan waltʼäwinakar saykatasipki ukhamaraki kunjamsa quejanaksa atipasipki ukanakaw ukan uñachtʼayasiraki (1 Ped. 5:8, 9). Internetan jw.org cheqajj utjkistu ukajja, Diosan arunakap yatiyasiñapatakejj wal yanaptʼaski, kawkïr markanakantï yatiyañajj jarkʼatäki uka markanakarus puriskarakiwa.

Jan Internetanïsajja, ¿Diosar serviñan aynachtʼsnati? Janiwa, amuyasir cheqap uywatajj sapa maynitakiw qellqatanak apayanistu, ukhamatwa Diosar sum yupaychañatakejj chʼamañchistu. Ukhamajj janiw jw.org sat cheqar mantañ laykukejj mä aparato alasiñasäkiti, inas yaqhep jilat kullakanakajj Internetat apaqasin imprimipjjchispa, ukhamat jan Internetaninakar churañataki. Ukampis janiw tamajj uk lurañapäkapuniti.

Jesusajj arsutaparojj sum phoqaski, Diosar sum yupaychañasatakejj wal yanaptʼaskistu. Ukatwa juparojj wal yuspärtanjja. Jehová Diosajj akapachan tukusiñapkamaw horasapar “manqʼa” churaskistani, ukhamajj Diosar confiyasipkakiñäni.