1, 2. ¿Kunjamsa Jehová Diosajj servirinakapampejj parli?

JEHOVÁ DIOSAJJA kunayman toqenakat servirinakaparojj yanaptʼawayi. Sañäni, yaqhepanakarojja, kunas jutïrin pasani ukat kuns lurapjjañapa ukanakjja, angelanak toqew yatiyäna, jan ukajj samkanak toqe visionanak toqew qhanañchäna (Núm. 7:89; Eze. 1:1; Dan. 2:19). Yaqhepanakarusti aka Oraqenkir servirinakap toqerakiw kuns lurapjjañapa ukanak yatiyarakïna. Ukampis Diosajj kunjamsay yatiykchïnjja, istʼasirinakajj walja bendicionanakwa katoqapjjäna.

² Jichhürunakanjja, Jehová Diosajj Bibliampi, qollan ajayupampi, tamapampi yanaptʼasaw irpistu (Hech. 9:31; 15:28; 2 Tim. 3:16, 17). Yanaptʼapajj wali qhanawa, aka arunaksa istʼksna ukhamawa: “Aka cheqaw thakejja, sarasipkakim” sasa (Isa. 30:21). Ukatjja, Diosajj Jesús toqew irparakistu. Juparusti Diosajja, ‘amuyasiri cheqap uywata’ toqnama markapar irpañapatakiw uttʼayi (Mat. 24:45, MT). Jehová Diosan yanaptʼapjja wali askitwa uñjañasa, ukatjja istʼasirïñasarakiwa, ukhamatakwa wiñay jakañsa katoqarakiñäni (Heb. 5:9).

3. ¿Kunanakas Diosar jan istʼaykistaspa? (Aka janankir foto uñjjattʼam.)

³ Jiwasatï Diosar istʼsna ukhajja, qhespiyassnawa. Ukatwa Supayajj Diosar jan istʼañasatakejj wal chʼamachasi. Maysa toqetjja, chuymasarakiw Diosar istʼañatjja apaqestaspa (Jer. 17:9). Aka  yatichäwinjja, kunanakas Diosan arup jan istʼaykistaspa ukanakwa uñjañäni. Ukatjja, Jehová Diosaru sum istʼañasa, jupamp sum parlasiñasa, kunjamsa jupat jan jitheqtasañatakejj yanaptʼistani uksa yatjjatarakiñäniwa.

4. ¿Kunjamsa Supayajj jaqenakan amuyunakapjja mayjtʼayi?

⁴ Supayajj kʼari yatichäwinakampi, jan wali yatiyäwinakampiw jaqenakan amuyunakap mayjtʼayi (1 Juan 5:19 liytʼañataki). Ukatjja, oraqpachanwa kunayman qellqatanakajj utji, televisionasa, radiosa, Internetasa ukhamaraki. Taqe ukanakajj askïkchisa, jilapartejj Dios contra jan wali sarnaqañanakaruw chʼamañchi (Jer. 2:13). Sañäni, chachapura warmipura casarasiñajj walikïkaspas ukhamwa sapjje, ukatwa walja jaqenakajj kuntï Bibliajj uka toqet siski ukarojj jan walit uñj-jjapjje (1 Cor. 6:9, 10).

5. ¿Kunjamatsa Supayan amuyunakapampejj jan apayasksna?

⁵ Jehová Diosan leyinakapar munasirinakjamajja, ¿kunjamatsa Supayan kʼari amuyunakapamp jan apayasksna? ¿Kunjamatsa kunatï walïki, kunatï jan walïki ukanak yatsna? ‘Diosan arunakapar’ istʼasa (Sal. 119:9). Diosan arunakapaw kawkïris kʼari yatichäwejja, kawkïris cheqa yatichäwejj ukanak amuytʼañ yanaptʼistani (Pro. 23:23). Qellqatanakat parlkasajja, Jesusajj akham sänwa: ‘Taqe kuntejj Diosajj siski uka arunakampiw jaqejj jaki’ sasa (Mat. 4:4). Ukhamajja, Diosan arunakaparjam sarnaqañ yateqañasawa. José waynat amuytʼañäni, jupajj janïr leyejj utjkäna ukhaw wachoq jucha lurañajj Dios contra jachʼa juchätap amuyäna. Kunapachatï Potifaran warmipajj jan wali amtampi arjjaykäna ukhajja, Joseyan chuymapanjja janipuniw Dios contra juch lurañajj mä jukʼas utjkänti (Génesis 39:7-9 liytʼañataki). Ukatwa jariyatpachas uka warmirojj jan istʼkänti, Jehová Diosarukiw istʼäna. ¿Kunsa Joseyat yateqsna? Kunatï walïki, jan walïkaraki ukanak yatiñatakejja, Jehová Diosaruw istʼañasa, janipuniw Supayan kʼari yatichäwinakaparojj istʼañasäkiti.

6, 7. ¿Kunjamatsa Supayan amtanakapampejj jan apayasksna?

⁶ Akapachajj kunayman kʼari yatichäwinakampi phoqhantatawa, ukatwa waljanejj cheqa yupaychäwi thaqañajj inamayäkaspas ukham amuyapjje. Ukampisa, Jehová Diosampi irpayasiñ munirinakatakejj cheqa yatichäwi jikjjatañajj janiw chʼamäkiti. Ukhamajj sapa mayniw Jesusaruti jan ukajj kʼari yatichäwirucha istʼañäni ukjja amtjjañasa, janiw pä yatichäwirojj istʼksnati. Jehová Diosajj Jesusaruw uwijanakap awatiñapatakejj uttʼayi, ukhamasti kunjamas Jesusan arupajj ukwa amuyañasa, ukatjja istʼañasarakiwa (Juan 10:3-5 liytʼañataki).

⁷ Jesusajj akham sänwa: “Kuntejj istʼapktas ukatjja amuytʼasipjjam” sasa (Mar. 4:24). Jehová Diosan ewjjanakapajj wali qhanawa, ukatjja jiwasatakjamarakiwa. Ukampis sum istʼañatakejja, suma chuymanïñaw wakisi. Janitï sum amuytʼasksnajja, janiw Diosan arunakaparojj  istʼjjsnati, jan ukasti Supayan ñanqha amtanakapampiw apayasjjsna. Akapachan utjki uka musicanakasa, videonakasa, amigonakasa, yatichirinakasa, wali yatiñani amuyasir jaqenakasa, jan waliruw apistaspa, ukhamasti janipuni ukanakampejj apayasiñäniti (Col. 2:8).

8. 1) ¿Kunjamatsa chuymasajj Supayan sipitanakapar jaltʼayistaspa? 2) Jan amuyasksna ukhajja, ¿kunarus purtʼassna?

⁸ Chuymasan munañanakapajj jan wali lurañanakaruw apistaspa, ukjja Supayajj sumwa yati. Ukatwa jañchin munañanakapampi pantjasiyañ munistu, ukhaman uñjasisajja, Jehová Diosar serviñajj chʼamakëjjaspawa (Juan 8:44-47). Amuytʼañataki, inas maynejj Diosat jan mayisjjchispati, janiraki yatiyiris nayrjam sarjjchispati, inas tantachäwinakatsa faltasjjarakchispa. Taqe ukanakajj chuymasajj kunjamäskis ukwa uñachtʼayistu, ukham jikjjatasisajj janiw ukhamak uñchʼukiñasäkiti. Janitï amuyasksna ukhajja, jukʼat jukʼatwa Jehová Diosan arunakapar jan istʼjjsnati. Qhepatsti, munañanakasampi apayasisajj kuntï janipun lurañ munkayätan ukaruw purtʼassna (Rom. 7:15). Jiwasatï uka jachʼa juchar jan purtʼasiñ munkstanjja, kunjamäskisa chuymasajj uk amuyasiñasawa ukat jankʼakiw jan walinakjja apanukuñasa. Jehová Diosan arunakap sum istʼañäni ukhajja, janiw kuna kʼari amuyunakampis apayaskañäniti (Pro. 11:9).

9. ¿Kunatsa jan wali amtanakat jankʼaki amuyasiñasajja?

⁹ Maynitï kuna usunisa uk horasapar yatisispa ukhajja, qollasispawa, jukʼamp usuntañatsa qhespirakispawa. Jiwasatï jan wali amtanaka chuymasan utjatap jankʼaki amuyassna ukhajja, ukhamarakiw Supayan sipitapatsa munañap lurañatsa qhespsna (2 Tim. 2:26, NM). Ukhamajja, amuyunakasasa munañanakasasa jan Diosatakjamäjjchi ukhajja, ¿kuns lurañasa? Jankʼakiw Jehová Diosarojj llampʼu chuymampi kuttʼjjañasa, ewjjanakapsa taqe chuymarakiw istʼjjañasa (Isa. 44:22). Jiwasatï jan amuytʼasis kuns lurañäni ukhajja, jachʼa llakinakanwa uñjassna, Jehová Diosar kuttjjañäni ukhasa, uka juchasatjja tʼaqhesiskaksnawa. Ukhamajja, janïr Supayan sipitapar jaltʼkasa amuyasipjjañäni.

10, 11. 1) ¿Kunjamas mä jachʼa jachʼa tukur jaqejja? 2) ¿Kunsa Coré, Datán, Abiram chachanakan jan wali luratanakapat yateqsna?

¹⁰ Chuymasajja Jehová Diosat jitheqtayistaspawa, ukatwa wal amuyasiñasa. Sañäni, jachʼa jachʼa tukuñasa, maynitakik taqe kun  munañasa, Jehová Diosan arup janiw istʼaykistaspati, ukatjja jan waliruw purtʼasiyistaspa. Jachʼa jachʼa tukuri mä jaqejja, jupakis askïkaspa ukhamwa amuyasispa. Ukatwa munañaparuk taqe kuns lurañ munjjaspa, janirakiw khitirus istʼañ munjjaspati. Cristiano masinakaparusa, irpir chuymaninakarusa, Diosan markapan ewjjanakaparusa, janis istʼañajj wakiskaspa ukhamwa amuyasispa. Ukham jaqetakejja, Jehová Diosajj wali jayatsa parlankaspa, janis istʼañjamäkaspa ukhamäspawa.

¹¹ Kunapachatï israelitanakajj wasarnam sarasipkäna ukhajja, Coré, Datán, Abiram chachanakajja Moisés ukhamarak Aarón contraw saytʼasipjjäna. Jachʼa jachʼa tukusaw Jehová Diosarojj munañaparuk yupaychañ munjjapjjäna. Uk uñjasajj ¿kunsa Jehová Diosajj lurpachäna? Jupanakarusa arkirinakaparusa jiwarayänwa (Núm. 26:8-10). Ukhamajj Jehová Dios contra saytʼasiñajj jan waliruw puriyistaspa ukwa uka sarnaqäwejj yatichistu. Ukatjja, “jachʼa jachʼa tukuñanjja aynachtʼañawa utji” uksa amtayarakistuwa (Pro. 16:18; Isa. 13:11).

12, 13. 1) Taqe kun munañajj kunjamsa maynirojj jan walir puriyaspa uk qhanañchtʼam. 2) Taqe kun munañajj jan jankʼaki apanukutajj kunjamsa jiljjattaspa uk qhanañchtʼam.

¹² Jichhajja, maynitakik taqe kuns munañat parltʼarakiñäni. Ukham chuyman jaqejja, Jehová Diosan mayitanakapajj janis jupatakïkaspa ukhamwa amuyaspa, ukat kunatï jan jupankki ukanakwa apnaqarakispa. Kunapachatï Eliseo profetajj Siria markankir Naamán chachar lepra usupat qollkäna ukhajja, soldadonak pʼeqtʼir Naamanajj regalonakwa Eliseor churañ munäna. Eliseosti janiw ukanak katoqasiñ munkänti. Ukampis Giezi serviripajj wal uka regalonak munäna, ukatwa chuymapan akham säna: “Nayajj juramentwa lurta jupar mäki jikjjatir sarañajjataki, ukatsti kunsa [Naamanatjja] katoqapunïwa” sasa. Giezisti Eliseor jan yatiyasaw Naamanan qhepap tʼijüna, kʼarinakampirakiw “kimsa waranqa qollqenaka, ukhamarak pä troksusiña” isinakampi apaqaniwayäna. Qhepatsti, Jehová Diosan profetaparusa kʼarinakwa parlarakïna. Ukham lurasajja, ¿kunarus Giezi chachajj purtʼasïna? Naamanan lepra usupampiw usuntjjäna (2 Rey. 5:20-27).

¹³ Maynitakik taqe kuns munañajja, jukʼat jukʼatwa jiljjattaspa. Maynitï uk jan apanukkaspa ukhajja, jankʼakiw uka munañajj maynir jan walir puriyaspa. Amuytʼañatakejj Acán chachat parltʼañäni. Jupasti akham sänwa: “Jericó markar mantasinjja, nayajj Babiloniat apanit mä suma manto [uñjta, NM], ukatsti mä kilo qollqempi, ukhamarak mä qori barrampi kawkïritï chika kilo peskäna uka. Ukanaksti sintpunwa munayäta ukat ukanak aptasinta” sasa. Acanajj uka jan wali munañapa apanukuñat sipansa, kuntï uñjkäna ukanakwa lunthatasïna, ukatjja carpap manqharuw ukanakjja allintäna. Kunapachatï Acanan juchapajj qhanstjjäna ukhajja, Josué chachajj ‘Jehová Diosaw juchañchätam’ sasaw säna. Ukhamajj ukürpachaw Acán chachampi familiapampejj qalamp kʼupjata jiwjjapjjäna (Jos. 7:11, 21, 24, 25). Maynitakik taqe kuns munañajja, jan walirojj kunapachasa puriyakistaspawa. Ukatwa “taqe kuns munañjjata” amuyasiñasa (Luc. 12:15). Awisajj jan wali munañanakasa qʼañu amuyunakasa pʼeqesan utjakispawa, ukampis jankʼakiw ukanakjja apanukuñasa, janiw ukanakamp apayasisajj juchar puriñasäkiti (Santiago 1:14, 15 liytʼañataki).

14. Jachʼa jachʼa tukuñasa, jiwasatakik taqe kun munañasa chuymasan utjani ukhajja, ¿kamachañasasa?

¹⁴ Jachʼa jachʼa tukuñasa, maynitakik taqe kun munañasa kuna jan walinakarus purtʼasiyistaspa ukanakat lupʼiñaw Jehová Diosar sum istʼañatakejj yanaptʼistani (Deu. 32:29). Biblianjja, Jehová Diosajj janiw kawkïris suma  thakejj ukak uñachtʼaykistuti, jan ukasti ukarjam sarnaqasajj kunjamsa sum jakassna, ukhamaraki jupar jan istʼasajj kuna jan walinakansa uñjassna uksa qhanañcharakistuwa. Chuymasatï jachʼa jachʼa tukuñaru jan ukajj jiwasatakik taqe kuns munañaru apañ munistani ukhajja, kuna jan walinakansa uñjassna, ukhamaraki familiasasa Jehová Diosasa kunjamas jikjjatasipjjaspa ukwa amuytʼasiñasa.

15. ¿Kunsa Jesusat yateqassna?

¹⁵ Jehová Diosajj sum jakasiñaswa muni (Sal. 1:1-3). Ukatwa walja yanapanak horasaparu churistu (Hebreos 4:16 liytʼañataki). Jesusajj janis pantjasirïkchïnjja, alajjpachankir Awkipatjja mayisipunirïnwa, ukhamatwa Jehová Diosajj kunayman toqet yanaptʼäna ukat irparakïna. Sañäni, angelanakapwa jupar yanaptʼañakejj khitanïna, qollan ajayupsa churarakïnwa, 12 apostolonakapar ajlliñapatakis yanaptʼarakïnwa. Ukatjja, Jesusar ajllitapsa yanaptʼatapsa Diosajj alajjpachatwa qhanañchanirakïna (Mat. 3:17; 17:5; Mar. 1:12, 13; Luc. 6:12, 13; Juan 12:28). Jiwasajja, Jesusjamarakiw Jehová Diosarojj kunanakatï chuymasan utjki ukanak oración toqe yatiyañasa (Sal. 62:7, 8; Heb. 5:7). Ukhamatakwa Jehová Diosampejj sum apasiñäni, ukhamarak Diosar jachʼañchasas sum sarnaqarakiñäni.

16. Jehová Diosan arunakap sum istʼañatakejja, ¿kunjamsa Jupamp yanaptʼayassna?

¹⁶ Jehová Diosajj taqeniruw ewjjanak churistu, ukampis janiw munkir jan munkir ukar istʼañas maykistuti. Jiwasatï istʼañ munstan ukhajja, qollan ajayupwa mayiñasa, Jupasti churistaniwa (Lucas 11:10-13 liytʼañataki). Ukampis Biblianjja “sum istʼapjjam” sarakistuwa (Luc. 8:18). ¿Kunjamatsa sum istʼsna? Amuytʼañataki, jiwasatï qʼañu amuyunak armañ yanaptʼita sasin Jehová Diosar mayissna, ukat pornografía jan ukajj ukham jan wali videonaka uñchʼukiskaraksna ukhajja, janipuniw walïkaspati, kʼari chuymani jaqëksnasa ukhamäspawa. Jehová Diosamp yanaptʼayasiñatakejja, kawkjanakantï qollan ajayup toqe yanaptʼkistaspa ukanakaruw sarañasa, mä arunjja, tantachäwinakasanwa yanaptʼayasiñasa. Walja jilat kullakanakajja, uka tantachäwinakanwa Jehová Diosan arunakap istʼasajj jan wali amtanakapat amuyasipjje, ukatsti jankʼakirakiw apanukupjje, ukhamatwa tʼaqhesiñanakatsa qhespipjjaraki (Sal. 73:12-17; 143:10).

17. ¿Kunatsa chuymasar jan confiyañasäki?

¹⁷ Israel marka apnaqer David reyit amuytʼañäni. Waynitüskäna ukhajja, Goliat sat filisteo jachʼa jaqeruw atipjäna. Tiempompejja, Israel markan soldadopäñatakiw ajllipjjäna, ukatsti reyit uttʼayapjjarakïna. Ukhamatwa uka markarojj jan walinakatsa jarkʼaqäna, markan askipatakis jachʼa amtäwinakar purïna. Qhepatsti, chuymapamp apayasitap laykojja, jachʼa jucharuw purtʼasïna, Batseba (Betsabé) sat warmimpiw wachoqa juchar purïna, uka warmin Urías chachaparus jiwayayarakïnwa. Ukampis kunapachatï Jehová Diosajj cheqañchkäna ukhajja, altʼat chuymampiw juchap uñtʼasïna, wasitampirakiw Diosamp sum apasjjäna (Sal. 51:4, 6, 10, 11).

18. ¿Kunas Diosar istʼañatakejj yanaptʼistani?

¹⁸ Kuntï 1 Corintios 10:12 qellqatan siski ukar istʼapjjañäni, janipuni chuymasar confiyasipjjañäniti. Jiwaspachpajj ‘janiw munañasar apnaqasksnati’, ukhamajj ¿khitirus istʼañäni, Jehová Diosaruti jan ukajj Supayarucha? (Jer. 10:23.) ¡Jehová Diosaruw istʼañasajja! Ukhamasti, Jehová Diosarojj mayisiskakiñäni, qollan ajayupampis irpayasiskakiñäni, ukhamatakwa juparojj sum istʼañäni.