Taqeniw uk yatiñ muntanjja. Ukampis khitinakantï warmipasa jan ukajj chachapasa jiwawayjje jupanakaw jukʼamp uk yatiñ munapjje. Yaqhepajj inas jutïrpachan jaktankani uka warmipampi jan ukajj chachapampi wasitampi casaratäñ munasipkchi. Mä viudojj sänwa: “Janiw munañanakajat jaljtawayapkti, nanakajj wiñayataki Diosar serviñ amtapjjayäta. Jichhas pachpak amuyaskta” sasa. ¿Jaktanirinakajj casarasipjjpachäniti? Janiw ukjja yatktanti.

Walja tiempow qellqatanakasanjja, kuntï Jesusajj siskäna ukajja, Oraqen jaktirinakatsa parlkaspa ukat janis casarasiñajj aka Oraqen utj-jjaspa ukham qhanañchasïna (Mat. 22:29, 30; Mar. 12:24, 25; Luc. 20:34-36). * Ukampis ¿janit Jesusajj alajjpachar jaktirinakat parlkpachäna? Janiw ukhamäniw siskapunsnati, ukampis kuntï Jesusajj siskäna uk yatjjatañäni.

¿Kunapachas Jesusajj uka arunak arsüna? (Lucas 20:27-33 liytʼañataki). Saduceonakajja janis jiwatanakajj jaktanipkaspa ukhamwa amuyapjjäna, ukatwa Jesusarojj yantʼañ laykojj jaktañ toqeta cuñadompi casarasiñ toqeta * jisktʼapjjäna. Ukapachaw Jesusajj jupanakar säna: “Aka oraqenjja, chachanakamp warminakampiw casarasipjje. Ukampis khitinakatejj khä yaqha jakañar puriñapajj wakischi jiwatanak taypit jakatatasina ukanakajja, chachäpasa warmïpasa, janiw khayanjja casarasipkaniti. Janiw jukʼamp jiwkjjapjjaniti uka layku. Angelanakjamäjjapjjewa, ukhamarak Diosan wawanakapäjjapjjewa jakatatapjjatap layku” sasa (Luc. 20:34-36).

Jesusajj Oraqen jaktanirinakatwa parlpacha sasajj ¿kunatsa nayrajj sasïna? 1) Saduceonakajj Oraqen jaktaniñatwa parlasipkäna. 2) Jesusajj Diosat jan jitheqtiri Abraham, Isaac, Jacob chachanakatwa arsurakïna, jupanakajj aka Oraqenwa jaktanipjjani. Ukarjamaw Oraqer jaktaniñatsa Jesusajj parlkaspa ukham sasïna (Luc. 20:37, 38).

Ukampis inas Jesusajj alajjpachar jaktañat parlaskchïna. ¿Kunatsa ukham sissna? Jesusan arsutanakap sumpach amuytʼañäni.

‘Khitinakatï khä yaqha jakañar puriñapajj wakischi jiwatanak taypit jakatatasina ukanaka’. Traducción del Nuevo Mundo sat Biblianjja, ‘khitinakatï jiwatat jaktañataki askit uñjatäpki ukanaka’ sarakiwa. Ukhamajj alajjpachar sarañataki ajllitanakajja, Diosan Reinopataki “askit” uñjatäpjjewa (2 Tes. 1:5, 11). Jupanakajj Jesusan jiwatap toqew aski jaqenakat uñtʼatäpjje. Jiwjjapjje ukhajja, Diosajj jupanakarojj jan juchanitwa uñj-jje (Rom. 5:1, 18; 8:1). Ukatsti Biblianjja jupanakat akham siwa: “Kusisiñanïpjjewa, Diosar katuyatäpjjarakiwa” sasa. Jupanakaw alajjpachar jaktañataki askit uñjatäpjje (Apo. 20:5, 6). Ukampis aka Oraqen jaktanirinak taypinjja, ‘jan  aski jaqenakas’ jaktarakiniwa, ukhamasti janiw jupanakarojj ‘jiwatat jaktañataki askit uñjatäpjjewa’ sasajj saskaspati (Hech. 24:15, NM).

“Janiw jukʼamp jiwkjjapjjaniti”. Yaqha Biblianjja akham sarakiwa: “Janiw jukʼampi jiwapkaspati” sasa. Alajjpachar sarañataki ajllitanakajja, aka Oraqen jiwjjasinjja, alajjpachan jan jiwir cuerpo katoqapjje, mä arunjja, jakäwinakapajj janiw tukuskaniti (1 Cor. 15:53, 54). Janirakiw jiwañajj jupanakjjarus chʼamanëjjeti. *

Ukhamajja, Jesusajj alajjpachar jaktañjjatwa parlaskpachäna, ukwa yatjjataniwayktan ukarjamajj amuytanjja. Ukhamächi ukhajja, alajjpachar jaktirinakajja, 1) janiw casarasipkiti, 2) janiw jiwapkaspati, 3) angelanakjamäpjjarakiwa. Ukampis yaqha jisktʼanakaw utjaraki.

Nayrïri. Saduceonakatï aka Oraqen jaktañat lupʼisipkchïnjja, ¿kunatsa Jesusajj alajjpachar jaktañat parlpachäna? Jesusajja, janiw kuntï uñisirinakapajj amuyapkäna ukhamarjamapuni jisktʼanakaparojj qhanañchirïkänti. Sañäni, mä kutejj judionakajj akhamwa jisktʼapjjäna: “¿Kuna munañampitï akanak lurkta ukatjja uñachayapjjetasmati?” sasa. Jesusasti sarakïnwa: “Tʼunthapipjjam aka templo, nayasti kimsürunwa machaqat saytʼayä” sasa. Judionakan cheqa templota amuyapjjatapjja sum Jesusajj yatiskäna, ukampis “kawkïr templottejj [...] parlkäna ukajja, jupan janchipänwa” (Juan 2:18-21). Ukhamajja, Jesusajj janiw saduceonakan jisktʼaparjamajj arskpachänti, jupanakajj kʼari chuymanipjjänwa, janiw jaktañarusa ni angelanakan utjatapsa creyipkänti. Antisasa kunjamas alajjpachar jaktañajja uk arkirinakapan amuyapjjañapwa Jesusajj munpachäna, uka suma chuymani arkirinakapaw qhepat ukham jaktapjjañaparakïna (Pro. 23:9; Mat. 7:6; Hech. 23:8).

Payïri. Niyakejjay Abraham, Isaac, Jacob chachanakajj aka Oraqen jaktapjjchinejja, ¿kunatsa tukuyañatakejj jupanakat Jesusajj arspachäna? (Mateo 22:31, 32 liytʼañataki.) Janïr jupanakat arskasajja akham arunakampiw parlañ qalltäna: “Jiwatanakan jaktañapatsti” sasa. Inas Jesusajj aka Oraqen jaktañjjat parlañataki ukham arunakamp qalltchïna. Saduceonakajj Moisesan qellqatanakap wali askit uñjapjjäna, ukatwa kuntï Diosajj Moisesar mä nina aqkir ali toqejj siskäna uk Jesusajj arspachäna, ukhamat aka Oraqen jiwatat jaktayañajj Diosan amtapapunïskatap uñachtʼayañataki (Éxo. 3:1-6).

Kimsïri. Jesusatï alajjpachar jaktirinakat parlaskchïna ukhajja, ¿aka Oraqen jaktirinakatakejj casarasiñajj utjaskpachäniti? Bibliajj janiw uka toqet kamskisa. Jesusatï alajjpachar jaktirinakatpun parlaskchïna ukhajja, aka Oraqen jaktirinakajj casarasipjjaniti janicha ukjja arunakapajj janiw qhanañchkiti.

Ukampis Biblianjja, maynitï jiwjjchi ukhajja, viudasa jan ukajj viudosa librëjjew yaqhampi casarasiñatakejj siwa. Ukhamajj maynitï wasitampi casarasiñ amtchejja, janiw juchsa lurkaspa ukham amuyasiñapäkiti. Ukajj sapa maynitäjjewa. Janirakiw wasitampi casarasiñ munirinakarojj jan walitsa uñjañasäkiti (Rom. 7:2, 3; 1 Cor. 7:39).

Kunjamänis jutïrpachan jakañajja, ukjjat jisktʼasiñajj waljaw utjaspa, ukampis janïr sum yatkasin parlañajj janiw walïkaspati. Kuntï yatiñ munktan ukanakjja, ukankjjasakiw sum yatjjañäni. Ukampis jan armasiñäniti, Diosajj taqe chuyma servirinakaparojj wal bendicini, kunatï jupanakatakejj wakiski ukat kuntï munapki ukanakwa churani (Sal. 145:16).