1. 1) Jaqenakajja ¿kunjam jakasiñatak luratätansa? 2) ¿Khitinakarus jakʼachasiñasa?

JAQENAKAJJ janiw sapaki jakasksnati, mayninakampipuniw jakastanjja. Kunapachatï familiaranakasasa amigonakasasa munasipjjestu, wali askit uñjapjjestu ukat kunjamas jikjjatastan uksa amuyapjjaraki ukhajja, wal kusistanjja. Ukampis taqe kun Luriri Jehová Diosaruw taqenit sipansa jukʼamp jakʼachasiñ muntanjja (Ecl. 12:1).

2. 1) ¿Jehová Diosajj kamsistusa? 2) ¿Kunatsa waljanejj ‘janiw Diosajj jakʼachaskistaspati’ sasajj sapjje?

² Jehová Diosajj Biblian akham sistuwa: ‘Jakʼachasipjjeta, nayasti jakʼachasipjjarakïmawa’ sasa (Sant. 4:8). Uka arunakajj walpun chʼamañchistu. Ukampis waljanejja, janiw Diosajj jakʼachaskistaspati sasaw amuyapjje: Diosatakejj janis kunäpkaspa, jan ukajj Diosajj wali jayankkaspasa ukhamwa amuyasipjje. ¿Cheqpachapuniti Jehová Diosarojj jakʼachassna?

3. ¿Diosar jakʼachassnati?

³ Jehová Diosajj jupar thaqerinakatjja “janiw jayankkiti”, ukhamasti Juparojj uñtʼsnawa (Hechos 17:26, 27 ukat Salmo 145:18 liytʼañataki). Jehová Diosajja, juchararäkstansa, jupar jakʼachassna ukat amigoparakïsna ukwa muni (Isa. 41:8; 55:6). Salmonak mä  qellqerejj akham sasaw Jehová Diosar säna: “Jumasti mayisitanakjja istʼaraktawa, taqe jaqenakarakiw jumarojj jutapjjtam. Kusisiñaniwa khitirutejj juma Diosajj, juma jakʼan utjañapataki ajllista ukajja” sasa (Sal. 65:2, 4, Aymar Biblia). Jichhajj kunjamsa Asa reyejj Jehová Diosar jakʼachasïna, ukhamaraki kunjamsa Jehová Diosajj jupar uñjarakïna uk yatjjatañäni. *

4. ¿Kunjamsa Asa reyejj luratanakapampi markar yanaptʼäna?

⁴ Asa reyejj Jehová Diosar sum yupaychasiñapatakiw wal chʼamachasïna. Templotjja qʼañu luräwinaksa, kʼari diosanakar yupaychañanaksa qʼal chhaqtayäna, ukham jan wali lurañanakajj taqe cheqanwa utjäna (1 Rey. 15:9-13). Asa chachajj Jehová Diosaruw jakʼachasïna leyinakapsa phoqarakïnwa, ukatjja “arsünwa Judá markajj [Jehová] Tatituru makhatjjañapataki nayra awkinakapan Diosaparu, ukhamarakiw leyinakapsa mandamiento arunakapsa phoqhayäna”. Jehová Diosajj wal jupar bendicïna, kunapachatï Asa chachajj nayrïr tunka mara apnaqkäna ukhajja, Judá markpachanwa sumankañajj utjäna. Ukatwa akham sarakïna: “Jiwasasti [Jehová] Diosasaruw thaqtanjja, ukatwa jupajj marka jakʼanakasampejja sumana sarnaqañ churistu” sasa (2 Cró. 14:1-7). Kunampis ukjjarojj pasäna uk uñjaskakiñäni.

5. 1) ¿Kunjaman uñjasisas Asa reyejj Jehová Diosar confiyäna? 2) ¿Kunjamsa Diosajj yanaptʼäna?

⁵ Judá markampi “nuwasiñatakisti etiopenkiri Zera chachawa jutantäna mä jachʼa ejercitompi, mä millón jaqenakamp wakichtʼata, kimsa pataka nuwasiñ carronakampi” (2 Cró. 14:8-10). Asa chachasti 580.000 soldadonakanikïnwa. Etiopenakasti, jupanakat sipansa, mä ukhampïpjjänwa. Jichhajja, Asa chachäkasmas ukham amuytʼasim. Ukhaman uñjasisajj ¿kamachasmänsa? ¿Kunatsa Diosajj ukham uñjasiyitu sasmänti? ¿Juma pachpati confiyasismäna, jan ukajj Diosaw yanaptʼitani sasmäncha? Asa reyejj Jehová Diosampejj wali sum apasïna ukat juparojj wal confiyarakïna. Ukatwa akham sas mayisïna: “¡Yanaptʼapjjetaya, nanakan [Jehová] Diosajja, nanakasti jumaruwa iyawsapjjsma, juman sutimarurakiw aka ejercitompi nuwasiñatakejj jutapjjarakta! Tata, jumaw nanakan Diosajjätajja. ¡Jumasti uñachtʼayasimaya jan khitis jumataki saytʼasiñapjja!” sasa. ¿Jehová Diosajj oracionap istʼpachänti? Jïsa, etiopenakarojj qʼal tukjäna, janiw maynis qhespkänti (2 Cró. 14:11-13).

6. ¿Kunsa Asa reyit yateqassna?

⁶ Asa chachajj Jehová Diosampiw irpayasïna, jupampirakiw jan walinakatsa jarkʼaqayasïna, ¿kunatsa ukham taqe chuyma Diosar confiypachäna? Kunjamtï Bibliajj siskejja, Asa reyejj ‘kunatï askïki ukpun Jehová Dios nayraqatan lurirïna’, ukatjja ‘taqe chuymaw Diosarojj servirakirïna’ (1 Rey. 15:11, 14, NM). Jiwasanakajj ukhamarakiw Diosarojj taqe chuyma serviñasa. Ukhamatakwa jichhasa jutïrinsa jupampejj wali sum apasiñäni. Jehová Diosaw nayraqatjja jupar jakʼachasiñ yanaptʼawayistu, juparakiw jakʼapankañasatakejj yanaptʼaskakistu. ¡Ukham luratapatjja walpun yuspärtanjja! Jichhajja, kunjamsa Diosajj uk lurawayi uk pä toqet uñjañäni.

7. 1) ¿Jehová Diosajj kunanaksa jupar jakʼachasiñatakejj lurawayi? 2) Diosan taqe bendicionanakapat sipansa, ¿kuna toqes Jehová Diosajj jupar jakʼachasiyistu?

⁷ Diosajj munasiñapatwa aka suma Oraqe lurawayi, sapürurakiw kunatï jakañatakejj  wakiski ukanaksa churistu, uka luratanakapanwa qawqsa Diosajj munasistu uk uñjtanjja (Hech. 17:28; Apo. 4:11). Taqe ukanakat sipansa, Diosajj kunanakatï jupamp sum apasiñatak wakiski ukanakwa churarakistu (Luc. 12:42). Ukatjja, ‘mayisipjjetäta ukhajja, istʼapjjämawa’ sasaw sarakistu (1 Juan 5:14). Ukampis taqe uka bendicionanakat sipansa, Diosajj Jesusan loqtasitap toqew jupar jakʼachasiyistu ukatwa Jupa jakʼankaraktanjja (1 Juan 4:9, 10, 19 liytʼañataki). Diosajj munat Yoqaparuw aka Oraqer khitaniwayi, juchampit jiwañampit qhespiyañataki (Juan 3:16).

8, 9. ¿Kunjamsa Jesusajj Diosar jakʼachasiñatak yanaptʼistu?

⁸ Janïr Jesusajj aka Oraqenkkäna uka tiempon jakir jaqenakarusa ukhamarakiw Jehová Diosajj qhespiyawayi. Kunapachatï mä Qhespiyiriw jutani sasin arskäna ukhajja, uka arunakajj niyas phoqasjjaspa ukhamwa Diosajj uñj-jjäna. Jupan amtanakapajj phoqasipuniwa (Gén. 3:15). Walja maranak qhepatjja, apóstol Pablojj qawqsa Diosar yuspäräna ukjja akham sänwa: “Diosasti Jesucristoruw juchan pagopjama uchi”, ‘llampʼu chuymapajj uñstañapataki nayra juchanak perdonatapata’ sasa (Rom. 3:21-26). Janitï Jesusäkaspajja, janiw Diosarojj kunjamatsa jakʼachasksnati.

⁹ Altʼat chuymani jaqenakajj Jesucristo taypikiw Jehová Diosarojj uñtʼapjjaspa ukhamarak jakʼachasipjjaspa. ¿Kunjamsa Bibliajj uk qhanañchistu? Pablojj sänwa: “Diosajj munasiñapwa uñachtʼayistu, kunapachatejj jiwasanakajj juchanïskäyätan ukapachaw Cristojj jiwasanak layku jiwawayi” sasa (Rom. 5:6-8). Jehová Diosampi Jesusampejja, janiw chʼamachasitas layku qhespiykistuti, jan ukasti jiwasar wal munasitap laykuw qhespiyistu. Jesusajj akham sänwa: “Janiw khitis nayaru jutkaspati, janitejj khitankitu uka Awkejj apankaspa ukajja” sasa (Juan 6:44). Yaqha horasajj akham sarakïnwa: “Naya toqekiw Awkin ukar puriñajj utji” sasa (Juan 14:6). ¿Kunjamsa Jehová Diosajj Jesús toqejj jupar jakʼachasiyistu? Qollan ajayupampi. Uka chʼamapampirakiw Jupa jakʼan jakasiñataki yanaptʼistu, ukhamat wiñay jakañ katoqañasataki (Judas 20, 21 liytʼañataki). Kunjamsa Diosajj jupar jakʼachasiyistu uk yaqha toqet yatjjataskakiñäni.

10. ¿Kunjamsa Bibliajj Diosar jakʼachasiñ yanaptʼistu?

¹⁰ Aka yatichäwinjja, jichhakamajj Bibliankir 14 libronakatwa aytasiwayjje. Janitï Bibliajj utjkaspäna ukhajja, taqe kun Luriri Diosasar kunjam jakʼachasiñsa janiw yatkasänti. Janirakiw kunjamsa Diosajj qhespiyistu ukat kunjamsa Jesusajj Diosar jakʼachasiyistu uksa yatkasänti. Ukatwa Jehová Diosajj qollan ajayup toqejj Biblia qellqayäna, ukhamat kunjam chuymanis Jupajja, kuna amtanakanisa ukanak yatiñasataki. Amuytʼañäni, Éxodo 34:6, 7 qellqatanjja akham sasaw Jehová Diosajj jupjjat Moisesar säna: ‘Diosasti khuyapayasiriwa, janiw jankʼaki colerasirïkiti, jan ukasti jachʼa munasiriwa, ukhamarak cheqaraki. Waranqa wawanakaman wawanakapatakisa pachpa cheqa aski munasirikïskaniwa, ukhamarak perdonarakiwa jan wali luratanaksa, jan wali amtäwinaksa, taqe juchanaksa’ sasa. Taqeniw ukham Diosar jakʼachasiñ muntanjja. Jiwasatï Biblia liyisina jupa toqet yatjjatañäni ukhajja, juparojj sum uñtʼañäni, ukatjja jukʼampirakiw jakʼachasiñäni, uk yatisaw Jehová Diosajj Biblia churistu.

11. Jehová Diosajj kunjam Diosasa uk yatjjatañatakejja, ¿kunatsa chʼamachasiñasa? (16 janankir foto uñjjattʼam.)

¹¹ Kunjamatsa Diosan amigopäsna uk qhanañchañatakejj Jehová Diosar jakʼachasipjjañäni sat libron kimsïr janapanjja akham siwa: “Kunapachatï mä amigompi wali sum apasiñ muntan ukhajja, sum nayraqat uñtʼtanjja, ukat wali respetompiw uñjaraktanjja. Ukhamasti, Jehová  Diosar jakʼachasiñatakejj Bibliat sum yatjjatañasawa, uka qollan Libronwa kunjam Diosas ukajj sum qhanañchasi” sasa. Diosajj arunakapjja amuytʼkañwa qellqayäna, ukhamat taqeni sum amuytʼapjjañapataki, ukatwa Jehová Diosarojj wal yuspärtanjja.

12. ¿Kunatsa Jehová Diosajj jaqenakampi Biblia qellqayäna?

¹² Jehová Diosajj angelanakampiw Biblia qellqayaspäna. Jupanakajj jiwasatsa luratanakasatsa wal llakisipjje (1 Ped. 1:12). Angelanakajj Diosan arunakap jaqenakatakejj qellqapjjaspänwa. Ukampis kunjamtï jiwasajj amuyktan ¿ukhamti qellqapjjaspäna? Kunjamas jikjjatastan, kunanaksa muntan, kunanakas aynachtʼayistu ¿ukanak qellqapjjaspänti? Janiwa. Jehová Diosajj uk sum yatïna, ukatwa jaqenakampi Biblia qellqayäna. Biblia qellqerinakan arunakap liytʼañasa, ukhamaraki khitinakattï qellqapkäna ukanak liytʼañasa, jiwasatakjamawa. Ukhamatwa kunjamas jikjjatasipjjäna, kunanaksa amuyapjjäna ukanak jankʼaki amuytanjja. Kunjamsa kusisipjjäna, aynachtʼapjjäna, pächasipjjäna, ajjsarapjjäna, pantjasipjjäna taqe ukanak suma amuytanjja. Biblia qellqerinakajja, kunjamäkänti Elías profetajj ukhamäpjjänwa, jupajj “jiwasjam jaqekirakïnwa” (Sant. 5:17).

13. ¿Kunjamas Jonás profetan mayisitap liytʼasajj jikjjatasta?

¹³ Amuytʼañatakejj Jonás profetat parltʼañäni. Kunapachatï Diosajj arunakap parlañapatak Jonasar khitkäna ukhajja, Jonasajj maysaruw sarjjäna. Ukham lurasajj ¿kunjamakis jikjjataspachäna? ¿Mä angelajj jupjamti qellqaspäna? Janiwa. Ukatwa Jehová Diosajja, kunjamas Jonasajj jikjjatasïna uk jupa pachpar qellqayäna. Jupasti chuymar purtʼkir suma arunakampiw Biblia qellqäna. Qota manqhan Diosar mayiskäna ukhajj akham sänwa: “Niya jiwjjayäta, ukkhaw juma [Jehová] Tatitut amtasta” sasa (Jon. 1:3, 10; 2:1-9).

14. Isaías profetajj kunjamsa jikjjatasïna ukjja, ¿kunatsa sum amuysna?

 ¹⁴ Jichhajj Isaías profetat parltʼarakiñäni. Mä visionan Jehová Diosar uñjkäna ukhajja, kunja jucharar jaqënsa ukwa amuyasïna, ukatwa akham säna: “¡Ay, kunakïkan nayatakejja, jichhajj jiwapunchëjjaya! Nayrajjampiw taqe chʼamani Tatitu Reyirojj uñjta, nayasti jucharar jaqëstjjaya jucha parliriraki, jucha parliri marka taypinrak jakaraktsa” sasa (Isa. 6:5). Mä angelajj janiw ukham siskaspänti. Ukatwa Diosajj Isaías profetar qellqayäna. Jiwasajj jucharar jaqjamajja, Isaiasajj kunjamas jikjjatasïna uk sumwa amuytanjja.

15, 16. 1) Jaqe masinakasajj kunjamsa jikjjatasipjje ukjja, ¿kunatsa sum amuysna? 2) ¿Kunas Jehová Diosar jakʼachasiñatakejj yanaptʼistani?

¹⁵ Jacob chachajj “janiw kuna askïktsa” sasaw säna, apóstol Pedrosti “juchararätwa” sasaw sarakïna, ¿mä angelajj ukhamti saspänjja? (Gén. 32:10; Luc. 5:8.) Kunjamtï Jesusan arkirinakapajj ajjsarayasipkäna ¿ukhamti angelanakajj ajjsarayasipjjaspänjja? Kunjamtï Pablosa mayni cristianonakasa, uñisitpachas Diosan arunakap yatiyañataki wal chʼamachasipkäna ¿ukhamti mä angelajj chʼamachasispänjja? (Juan 6:19; 1 Tes. 2:2.) Angelanakajj jaqenakat sipansa wali chʼamanïpjjewa, ukat janirakiw kunansa pantjasipkaspati, ukampisa jiwasajj pantjasiri jaqekïtanwa. Ukhamajj jiwasjam pantjasir jaqenakajj kunjamsa chuymapan jikjjatasipjje uk sapjjestu ukhajja, sumwa amuytanjja. Diosan Arunakap liyisajja, kusisirinakampejj kusistanwa, jachirinakampisti jacharaktanwa (Rom. 12:15).

¹⁶ Jehová Diosajj kunjamsa nayra tiemp servirinakaparojj uñjäna uk sum amuytʼañäni ukhajja, Jupajj kunjam Diosasa ukwa sum amuyañäni. Diosajj jucharar jaqenakarojj wali pacienciampiw uñjäna ukat jakʼachasirakïnwa. Ukhamajj jiwasatï uka toqenakat lupʼiñäni ukhajja, jukʼampiw Jupar uñtʼañäni, munasiñäni, ukatjja jakʼachasirakiñäni (Salmo 25:14 liytʼañataki).

17. 1) Azarías profetajj ¿kamsänsa Asa reyirojja? 2) ¿Kunapachas uka reyejj Azarías profetar jan istʼkäna, ukat kunas pasäna?

¹⁷ Asa reyejj etiopenakar atipjkäna ukhajja, Azarías profetajj jupampiru judionakampirojj akham sänwa: “[Jehová] Tatitusti jumanakampïskiwa, jumanakatejj jupampïpjjäta ukajja. Jumanakatejj jupar thaqapjjät ukajja, jikjjatapjjätawa, ukampis jumanakatejj jupar apanukupjjätajja, jupajj jumanakarojj apanukupjjarakïtamwa” sasa (2 Cró. 15:1, 2). Mä qawqha tiempotjja, Asa reyejj janiw profetan arunakaparojj istʼjjänti. Kunapachatï alay toqenkir 10 tribunakajj Judá marka contra jutapkäna ukhajja, Asa reyejj Jehová Diosar yanap mayiñat sipansa, Diosar jan uñtʼiri Siria markaruw yanap mayïna. Ukatwa Diosajj akham säna: “¡Jumasti mä loqjamawa ukham lurtajja! ¡Jichhat uksarusti jukʼampi guerranakawa jumataki utjani!” sasa (2 Cró. 16:1-9). ¿Kunsa ukajj yatichistu?

18, 19. 1) Jehová Diosat jitheqtatjam amuyasstan ukhajja, ¿kunsa lurañasa? 2) ¿Kunjamatsa Jehová Diosar jakʼachassna?

¹⁸ Janipuni Jehová Diosat jitheqtapjjañäniti. Jiwasatï mä jukʼa jitheqtatjam amuyasstan ukhajja, Oseas 12:6 qellqatan jikjjataski uka arunakar istʼapjjañäni. Ukanjja siwa: “Diosamar kuttanjjam; cheqpach chuymamampi askimpiraki sarnaqam, ukatsti Diosamarupuni confiasirakim” sasa. Kunjamsa Diosajj qhespiyawayistu ukanak toqet lupʼipjjañäni ukhamaraki Bibliatsa sum yatjjatapjjañäni, ukhamatwa Jehová Diosar jukʼamp jakʼachasiskakiñäni (Deuteronomio 13:4 liytʼañataki).

¹⁹ Salmonak mä qellqerejj akham sänwa: “Nayasti Diosaruw jakʼachasï, ukaw nayarojj kusisiyitu” sasa (Sal. 73:28). Ukhamasti Jehová Diosat jukʼamp yatjjataskakiñäni, ukhamatwa jukʼamp jupar munasiñäni. Jiwasatï jupar jakʼachasiñäni ukhajja, jupajj ukhamarakiw jiwasarojj jichhasa wiñayan wiñayapatakisa jakʼachasistani.