JESUSAR jan uñtʼir tukusajj apóstol Pedrojj walpun jachäna, wasitampi Diosar sum yupaychjjañatakejj wal chʼamachasiñapänwa. Ukampis Jesusajja, cristian masinakapar Pedrojj yanaptʼaspa ukwa munäna. Ukatwa janïr pantjaskipan akham säna: “Jumasti nayaru kuttanjjät ukkhajj chʼamañchtʼam jilanakamaru” sasa (Luc. 22:32, 54-62). Qhepatjja, Pedrojj mä jilïrjamarakiw nayra cristianonak taypin yanaptʼjjäna (Gál. 2:9). Jichhürunakanjja, khitinakatï nayrajj irpir chuymanjam servipkäna uka jilatanakajja, niya ukhamarakiw wasitampi irpir chuymanjam jilat kullakanakar kusisit yanaptʼapjjaspa.

Jan irpir chuymanëjjapjje uka jilatanakajja, inas wali aynachtʼat jikjjatasipjjchispa. Julio jilatajja, * 20 maratsa jilaw Sudamérica toqenkir mä markan irpir chuymanjam serviwayäna. Jupasti siwa: “Taman arstʼañatak wakichasiñasa, jilat kullakanakar visittʼañasa, jilat kullakanakar Bibliamp chʼamañchtʼiri sarañasa wali askïnwa, ukanakan yanaptʼasaw jilapartejj sarnaqawayta. Ukampis mä akatjamatwa taqe ukanak aptʼawayta, ukanak jan lurjjas jakañajj nayatakejj wali chʼamapunïnwa” sasa. Jichhajj wasitampiw Juliojj irpir chuymanjam serviski.

Santiago discipulojj akham sänwa: “Jilatanakajja, jumanakajj wali kʼuchikïpjjañamawa kunapachatejj kunaymani yantʼanak pasapkta ukapachajja” sasa (Sant. 1:2). Santiagojja, Diosar yupaychirïtas layku jan ukajj pantjasirïtas layku yantʼanakan uñjasktan uka toqetwa parlaskäna. Qhepat akïr yantʼanakatwa Santiagojj arsüna: jan wali amtanakampita ukhamaraki mayninakar yaqhachañ munañampita (Sant. 1:14; 2:1; 4:1, 2, 11). Jehová Diosajj cheqañchistu ukhajja, chuymajj wal usustaspa, ukampis janiw llakimpejj aynachtʼañasäkiti (Heb. 12:11).

Irpir chuymanïñat apaqapjjchistojja, kunjamsa Diosar yupaychasktan uk amuytʼasiñasawa, Diosar  munasitassa sarnaqatasampiw uñachtʼayañasaraki. Ukat akham jisktʼasiñasarakiwa: ¿Kunatsa irpir chuymanjam serviñatak chʼamachasiwaytjja? ¿Munañaj thaqhañ laykukiti? Jan ukajj ¿Jehová Diosar munasitaj layku ukhamarak Diosan tamapankiri jilat kullakanakar yanaptʼañ laykucha? (Hech. 20:28-30.) Yaqhep jilatanakajja, janis irpir chuymanëjjapjjchejja, taqe chuymaw Diosar servisipkaki. Taqe jaqenak nayraqatanwa ukajj wali qhan amuyasi, Supayas ukjja amuyarakpachawa.

Diosajj David reyiru jachʼa juchanakar puritapat juchañchkäna ukhajja, Davitajj altʼat chuymampiw juchap uñtʼasïna, ukatjja perdonatäjjarakïnwa. Qhepatsti sänwa: “Kusisiñaniwa kawkïr jaqetï taqe juchanakapata perdonatäjje ukajja. Kusisiñaniwa kawkïr jaqetejj jan Diosan juchañchatäki kuna juchatsa ukajja” sasa (Sal. 32:1, 2, Aymar Biblia, [AB]). Uka cheqañchäwejj walpun Davitar yanaptʼäna. Qhepatjja, Diosan markapan jukʼamp suma awatirëjjänwa.

Wasitamp irpir chuymanjam servir jilatanakajja, nayrat sipansa, jilapartejj jukʼamp suma irpirinakäjjapjjewa. Mä jilatajj siwa: “Juchar purtʼasipki uka jilat kullakanakarojj nayrat sipansa jukʼamp sum yanaptʼjjerista” sasa. Yaqha jilatasti sarakiwa: “Jichhajj jilat kullakanakar yanaptʼañjja jukʼamp askitwa uñj-jjta” sasa.

Salmo qellqerejj akham sänwa: “Jupasti janiw wiñayataki chuyma usuyaskaniti, ni wiñayatakis coleratäkaniti” sasa (Sal. 103:9, AB). Ukhamasti, juch lurir mä jaqerojj Diosajj janis mayampsa confiyjjaspa ukham janiw amuyañasäkiti. Ricardo sat mä jilatajj walja maranakaw irpir chuymanjam serviwayäna, jupasti siwa: “Jan wal luratajatjja wali llakitapuniw uñjasiyäta. Janis jilat kullakanakajj wasitampi confiyjjapjjetaspa, janis kunatakis askëjjerista ukhamaw walja tiempo amuyasiyäta, ukaw irpir chuymanïñat jarkʼitäna. Mayninakar wal yanaptʼañ munataj laykojja, Bibliatjja waljaniruw yatichayäta, Tantachasiñ Utansa jilat kullakanakarojj wal chʼamañchirïta, jupanakamp yatiyiris misturakirïtwa. Ukaw jan ajjsarañatakejj yanaptʼawayitu, jichhasti wasitampiw irpir chuymanëjjarakta” sasa.

Maynitï chuyma ustʼatäskakinejja, wasitamp irpir chuymanëjjañajj jupatakejj chʼamäspawa.  Ukhaman uñjasisajj Davitat yateqasiñapawa. Saúl reyejj jupar jiwayañ munkäna ukhajja, jitheqjjänwa. Davitajj Saularojj jiwaykchispänsa, janiw kunjamtï jupar lurañ munkäna ukham lurkänti (1 Sam. 24:4-7; 26:8-12). Yamas Saulan jiwatapatjja, wal jachäna, sarakïnwa: “¡Saúl, Jonatán! Munat jaqenaka” sasa (2 Sam. 1:21-22; 2 Sam. 1:23, Qullan Arunaka, 2011). Janiw Saulan jan wali luratanakap amjjaskänti.

Ina chʼusatsa irpir chuymanïñat apaqapkiristam ukham amuyassta ukhajja, jan colerasiñamp apayasimti. William sat jilatajj ukhamwa yaqhep irpir chuymaninakatakejj colerasitayna. Jupasti Gran Bretaña markanwa 30 maranaka irpir chuymanjam serviwayäna. ¿Kunas amuytʼasiñapatakejj yanaptʼäna? Jupajj siwa: “Job libro liytʼañaw wal yanaptʼawayitu. Job chacharojj Jehová Diosaw kimsa amigonakapamp sumankthapiñ yanaptʼäna, ukhamajj ¿janit irpir chuymaninakamp sumankthapiñ Diosajj yanaptʼkarakitaspa? sayätwa” sasa (Job 42:7-9).

Irpir chuymanjam serviñ jaytawaysta ukhajja, kunatsa jaytawayta uk jisktʼasiñamaw wakisispa. ¿Llakinakamat utjäna? ¿Kuna yaqha lurañach nayrakjjäna? Jan ukajj ¿jilat kullakanakan pantjasitanakapach apaqawaytam? Ukjja jumakiw sum yatista, ukampis ak amtañamawa: irpir chuymanjamajj walja toqetwa jilat kullakanakarojj yanaptʼayätajja. Taman arstʼatamasa, luratanakamasa wal chʼamañchäna, visitir sarasas aguantapjjañapatakiw wal yanaptʼayätajja. Yamas luratanakamatjja Jehová Diosajj wal kusispachänjja, jumas ukhamaraki (Pro. 27:11).

Jehová Diosajj waljaniruw wasitamp irpir chuymanjam kusisit servipjjañapatakejj yanaptʼaski. Inas juma pachpa irpir chuymanjam serviñ jaytawaysta jan ukajj inas juchamat apaqapjjstam, ukampis ¿janit wasitamp chʼamachasiñamajj wakiskaspa? (1 Tim. 3:1.) Apóstol Pablojj Colosankir cristianonakatakejj Diosat wal mayirïna, ukhamat Diosan ‘munañapa amuytʼapjjañapataki’. ¿Kunatsa uk mayïna? Jupasti sänwa: “Tatitunkirjama sarnaqapjjañamataki, ukhamarak kunatejj jupatakejj askïki ukanak lurapjjañamataki” sasa (Col. 1:9, 10). Jumatï wasitamp irpir chuymanjam servjjäta ukhajja, Jehová Diosarojj paciencianïñataki, kusisitäñataki oracionan mayisiñamawa, jachʼa chʼamapsa ukhamaraki. Aka qhepa urunakanjja, Diosan markapanjja walja irpir chuymaninakaw munasi. ¿Janit jumajj jilat kullakanakamar chʼamañchtʼañ munkasma?