1. ¿Kunatsa Diosan servirinakapajj tʼaqhesipjjaniw sasin sissna?

WIÑAY jakañ katoqañatakejja, ¿Diosan servirinakapan ‘tʼaqhesipjjañapajj wakisipuniti’? ¿Kamsasmasa? Inas jumajj jichhaki Diosar serviñ qalltasksta, jan ukajj inas walja maranak servjjaraksta, ukampis taqeniw yattanjja, Supayan apnaqat akapachanjja tʼaqhesiñanakajj utjakipuniniwa (Apo. 12:12).

2. 1) Taqe jaqenakat sipansa, ¿kuna yaqha tʼaqhesiñansa cristianonakajj uñjastanjja? (Aka janankir foto uñjjattʼam.) 2) ¿Khitis tʼaqhesiyistu, ukat kunjamatsa uk yattanjja?

² Juchanïtas laykojja taqe jaqew akapachan tʼaqhestanjja, ukampis cristianonakajja jukʼamp tʼaqhesiñanakanwa uñjastanjja (1 Cor. 10:13). Awisajja Diosan kamachinakap istʼatas laykuw uñisiñat arknaqata uñjastanjja. Jesusajj akhamwa arkirinakapar säna: “‘Janiw khiti uywatas uywiripat sipanjja jukʼampïkiti’ [...]. Nayarojj uñisipjjetuwa, jumanakarojj uñisipjjarakïtamwa” sasa (Juan 15:20). ¿Khitis tʼaqhesiñanak utjayi? Supayawa. Biblianjja “Supayasti mä leonar uñtataw” Diosan servirinakapar ‘manqʼantañataki’ sarnaqaski sasaw qhanañchi (1 Ped. 5:8). Ukhamasti,  kunayman toqetwa Supayajj Jehová Diosat jitheqtayañatakejj yantʼistu. Jichhajj kunas apóstol Pablorojj pasäna uk uñjañäni.

3-5. 1) ¿Kunjam tʼaqhesiyatas Pablojj Listra markan uñjasïna? 2) Tʼaqhesiñanakatsa Pablojj parlkchïnjja, ¿kunjamsa cristianonakar chʼamañchtʼäna?

³ Apóstol Pablojja, Diosar iyawsatap laykojj walja kutiw arknaqata uñjasïna (2 Cor. 11:23-27). Mä kutejja, Listra markanwa ukham tʼaqhesiyapjjäna. Pablojj nacïwitpach mä cojo jaqeruw qolläna, ukatwa walja jaqenakajj jupampiru Bernabeampirojj diosäpkaspas ukham yupaychañ munapjjäna, uk uñjasajj jan yupaychayasiñatakiw ruwtʼasjjapjjäna. Ukampis judionakan pʼeqtʼirinakapaw purinipjjäna ukat kʼarinakampi jaqenakaru mayjtʼayasinjja, Pablorojj qalampiw kʼupjayapjjäna, “jiwatäjjewa” sañkama (Hech. 14:8-19).

⁴ Derbe markar sarasinjja, wasitampiw Pablompi Bernabeampejj Listraru, Iconioru, Antioquiampiru kuttʼapjjäna. “Uka markanakansti Tatitur iyawsirinakarojj chʼamañchtʼapjjänwa. Sapjjarakïnwa: ‘Tatitur iyawsañanakamanjja chʼaman saytʼapjjam. Diosan markapar [jan ukajj “Reinopar”, NM] mantañatakejja, tʼaqhesiñajj wakisipuniwa’ sasa” (Hech. 14:21, 22). Uka arunak istʼasajj inas maynejj mayjtʼaschispa. Cheqas janiw khitis tʼaqhesiñ munktanti. Ukampis ¿kunjamatsa Pablompi Bernabeampejj tʼaqhesiñat parlasin mayni cristianonakarojj chʼamañchtʼapjjpachäna?

⁵ Uk sum amuytʼañatakejja, Pablon arunakap sum uñakiptʼañäni, Pablojja, janiw “walja tʼaqhesiñanakwa aguantañasa” sasakejj siskänti, jan ukasti ‘Diosan Reinopar mantañatakejja, tʼaqhesiñajj wakisipuniwaʼ sasaw säna. Mä arunjja, Diosat jan jitheqtapkäta ukhajja, bendicionjja katoqapjjätawa sasaw Pablojj cristianonakarojj chʼamañchtʼäna, uka bendicionajj janiw aleq arunakakïkänti. Jesusasti akham sarakïnwa: “Khititejj tukuykama saytʼkani ukawa qhespiyatäni” sasa (Mat. 10:22).

6. ¿Kuna bendicionsa tukuykam aguantirinakajj katoqapjjani?

⁶ Jiwasatï aguantañäni ukhajja, bendicionwa katoqañäni. Ajllit cristianonakajja, alajjpachan jakañatakejj jan jiwir cuerpwa katoqapjjani ukat Jesusamp chikarakiw apnaqanipjjani. “Yaqha ovejanakajja”, wiñay jakañwa aka Oraqen katoqapjjarakini, “ukansti taqe kunasa cheqapapunïniwa” (Juan 10:16; 2 Ped. 3:13). Ukampis uka bendición janïr katoqkasajja, kunjamtï Pablojj siskänjja, tʼaqhesiñanakan uñjasikipuniñäniwa. Jichhajj kunjamsa Supayajj yantʼistu uk pä toqet uñjañäni.

7. ¿Kuna tʼaqhesiñarusa amuykañ yantʼa sasispajja?

⁷ Jesusajj sänwa: “Autoridadanakaruw katuyapjjätam, sinagoganakansti jawqʼjataw uñjasipjjäta; jumanakarusti naya laykojj jilïrinakana, reyinakampin nayraqataparuw irpapjjätam” sasa (Mar. 13:9). Kunjamtï ukan siskejja, marka apnaqerinakana jan ukajj religión pʼeqtʼirinakana uñisiñat arknaqataw yaqhep cristianonakajj uñjasipjjañapäna (Hech. 5:27, 28). Pablot wasitamp amtañäni. Ukham arknaqatäñap yatiskchïnsa Pablojj janiw ajjsarayaskänti (Hechos 20:22, 23 liytʼañataki).

8, 9. 1) Tʼaqhesiñanak utjkipansa, ¿kun lurañsa Pablojj amtäna? 2) ¿Kunjamsa yaqhep cristianonakajj jichha tiempon aguantasipkaraki?

⁸ Pablojja jan ajjsartʼasaw Supayan sipitanakaparojj saykatäna. Ukatsti sarakïnwa: “Taqe akanakajj janiw llakisiykituti. Janirakiw jakañajjas kuna jachʼäkis nayatakejja, jan ukasti kuntejj Tatitojj: ‘Luram’ siskitu uk kusisiñamp phoqhañakiw waktʼitu. Ukasti  Diosan munasiñap utjatap jaqenakar qhanañchañakiwa” sasa (Hech. 20:24). Kunjamtï akan siskejja, Pablojj janiw ajjsarayaskänti. Jan ukasti aguantañatakiw chʼamachasïna. Jupatakejj Diosan Reinopat taqenir ‘qhanañchañaw’ wali wakiskirïnjja, janiw tʼaqhesiñanakarojj ajjsarkänti.

⁹ Jichhürunakanjja walja jilat kullakanakasaw Pablot yateqasisajj ukham aguantasipkaraki. Sañäni: mä markanjja, yaqhep jilatanakajj cuartelar jan mantañ munapjjatapatjja, niya 20 maranakaw carcelan llawintata aguantasipki. Uka markanjja, concienciar respetaña leyejj janiw utjkiti, ukatwa autoridadanakar jan quejasirjamäpkiti. Janirakiw kuna visitsa katoqapkiti, ni familianakapaksa; ukanjja yaqhepajj wali nuwjata ukat kunayman tʼaqhesiyataw uñjasipjje.

10. ¿Kunatsa akatjamat utjki uka tʼaqhesiñanakarojj jan ajjsarañasäki?

¹⁰ Yaqhep cheqanakanjja, jilat kullakanakasajj akatjamat utjki uka tʼaqhesiñanakanwa aguantasipki. Jumatï ukhaman uñjasïta ukhajja, jan ajjsaramti. Diosan José serviripat amtañäni. Jupajj esclavjam aljataw uñjasïna, ukampis Jehová Diosajj ‘taqe tʼaqhesiñanakapatwa’ qhespiyäna (Hech. 7:9, 10). Diosajj ukhamwa jumar yanaptʼarakiristamjja. Jehová Diosajj “wawanakapar jan walinakat qhespiyañ” yatiwa, uk janipun armasimti (2 Ped. 2:9). Ukhamajj Jupar confiyaskakiñäni, tʼaqhesiñanakarus jan ajjsaras saykataskakiñäni. Diosaw aka ñanqha pachatjja qhespiyistani, Juparakiw wiñay jakañsa Reinopan churarakistani (1 Ped. 5:8, 9).

11. Amuykañ yantʼanakampi jan amuykañ yantʼanakampejja, ¿kunansa jan pachpäki?

¹¹ Maysa toqetjja, jan amuykañ yantʼanakaw tʼaqhesiyarakistaspa. Uka yantʼanakajj amuykañ yantʼanakat sipansa, ¿kunansa jan pachpäki? Amuykañ yantʼanakajja chhijchhir uñtasitäspawa. Mä akatjamatwa jupha (jiwra) yapunakjja qʼal kʼutsuspa. Ukampis jan amuykañ yantʼanakajja, jamachʼinakar uñtasitarakïspawa. Jan amuykañakiwa jukʼat jukʼat uka yapunakjja qʼal tuksupjjaspa.

12. 1) Supayan jan amuykañ yantʼanakapatjja, ¿kawkïris mayajja, ukat kunatsa wal amuyasiñasa? 2) ¿Kunatsa Pablojj llakimp aynachtʼänjja?

¹² Supayajj Jehová Diosat jitheqtayañwa munistu, ukatakejj kunayman yantʼanakampiw tʼaqhesiyistu. Awisajja, uñisiñat arknaqataw uñjastanjja, ukaw Supayan amuykañ yantʼapajja. Awisasti, llakimp aynachtʼayasaw jukʼat jukʼat Diosat apaqestaspa, uka sipitaparojj waljaniw jaltʼapjje, ukasti Supayan jan amuykañ mä yantʼaparakiwa. Apóstol Pablojja, llakitajj jikjjatasirakirïnwa (Romanos 7:21-24 liytʼañataki). ¿Kunatsa ukham uñjasirïpachäna? Pablojj Diosar serviñanjja wali chʼamañchtʼat cristianönwa ukat jilïr irpirinak taypinkarakpachänwa, ukampis juchan jaqëtap laykuw ukham uñjasïna. Kunatï askïki uk lurañsa jupajj munkchïnjja, juchanïtap laykuw uk lurañajj wali chʼamäna. Jumatï ukham llakinakampi aynachtʼata jikjjatassta ukhajja, kunatï Pablorojj paskäna ukajj ¿janit chuymachtʼkiristamjja?

13, 14. 1) ¿Kunatsa yaqhep jilat kullakanakasajj llakinakampi aynachtʼapjje? 2) ¿Khitisa Diosat jitheqtayañ munistu, ukat kunatsa?

¹³ Walja jilat kullakanakaw wali llaktʼata, aynachtʼata, janis kunatakis askïpkaspa ukham awisajj jikjjatasipjje. Amuytʼañataki, mä precursora kullakajj akham siwa: “Pantjasitanakajat kutin kutin amtasta ukhajja, jukʼamp aynachtʼataw jikjjatasta. Jan wali luratanakajat amtasta ukhajja, janis khitisa, ni Jehová Diosasa munasjjetaspa ukhamwa amuyasta” sasa.

¹⁴ ¿Kunatsa Jehová Diosan yaqhep servirinakapajj uka kullakjama llakita jikjjatasipjje?  Walja toqenakatwa ukham jikjjatasipjjaspa. Yaqhepajja jupanak pachpakiw jakäwipatsa luratanakapatsa jan wal amuyas juchañchasipjjaspa (Pro. 15:15). Yaqhepasti usuntat uñjasisaw ukham llakita jikjjatasipjjarakispa. Ukampis kuna llakin uñjasisasa, ak amtañasapuniwa: ¿Khitisa jupjam jan kuna suytʼäwini jikjjatasiñas muni? (Apo. 20:10.) ¿Khitisa llakimp qʼal aynachtʼasin Diosat jitheqtañas muni? Supayaw sipitapar jaltʼañas muni. Sipitanakapajj amuykañäpasa janisa, Supayajj llakinakampi aynachtʼayasin Diosat jitheqtayañwa munistu. Janipun ak armasiñäniti: Jehová Diosan servirinakapajja, Supay contras mä guerran nuwasksna ukhamawa, ukatwa wal chʼamachasiñasa.

15. ¿Kun lurañatakis chʼamachasiñasa?

¹⁵ Janipuni qarjtañäniti. Kuna bendiciontï katoqkañäni uk amtasa chʼamachasisipkakiñäni. Pablojja Corinto markankir cristianonakarojj akham sänwa: “Ukatwa janipuni nanakajj mayjtʼasipkti: Janchinakajjajj sapürusa aynacharus sarjjchi ukasa, ajayunakajjajj sapürutjamarakiw machaqar tukuski. Kuntejj aka oraqen tʼaqhesipktan ukanakajj janiw kunäkisa, tukusirikiwa. Ukat sipan mä jachʼa aski jilarkir wiñay kusisiñwa apanirakejja” sasa (2 Cor. 4:16, 17).

16. ¿Kunatsa jichhjatpach wakichasiñasa?

¹⁶ Kunjamtï uñjaniwayktanjja, Supayajj kunayman ‘engañonakampiw’ yantʼistaspa (Efe. 6:11, Aymar Biblia). Sapa mayniw kuntï 1 Pedro 5:9 qellqatan siski ukar istʼañasa, ukansti akham siwa: “Supayatakisti wal saytʼasipjjam iyawsañanakamanjja” sasa. Ukatakejja jichhjatpachwa amuyussa chuymassa wakichañasa, ukhamatwa kunatï askïki uk lurañäni. Amuytʼañataki, soldadonakajj janïr guerrar sarkasajja, walja ejercicionak lurasaw wakichtʼasipjje. Jiwasajj niya ukhamarakiw  janïräkipan wakichtʼasiñasa. Jutïrin kuna jan walinakansa uñjasiñäni ukjja, janiw yatktanti. Ukhamasti janïr sinti tʼaqhesiñanakan uñjaskasina chuymas wakichapjjañäni. Diosan amuytʼayatajja, apóstol Pablojj Corinto markankir cristianonakarojj akham sänwa: “Jumanakpacharak yantʼasipjjam, iyawsañanakamanjja suma chʼamanïpjjtati janicha uk yatiñataki” sasa (2 Cor. 13:5).

17-19. 1) ¿Kunjamatsa sum amuykiptʼassna? 2) Cheqa yatichäwinak arjjatañatakejja, ¿kunjamsa wayn tawaqonakajj wakichtʼasipjjaspa?

¹⁷ Apóstol Pablon ewjjtʼapar istʼañatakejja, akanak jisktʼasiñaw wakisispa: “¿Sapüruti Diosar oración mayisisktjja? ¿Jan ajjsarasati Diosat qhanañchasktjja? Jaqenakar istʼañat sipansa, ¿Diosarupuniti istʼasktjja? ¿Taqpach tantachäwinakar sarañatakipuniti chʼamachasisktjja? ¿Kunjamtï nayar uñjapkitu ukham pacienciampiti jilat kullakanakan pantjasitanakaparojj uñjasktjja? ¿Tamankir irpir chuymaninakarusa ukat oraqpach Jilïr Irpirinakarusa taqe chuymati istʼasktjja?” sasa.

¹⁸ Uka jisktʼanakatjja, pä jisktʼaw jan ajjsarasa cheqa yatichäwinakaru arjjatañataki ukhamarak jaqenakan amuyunakapampi jan apayasiñataki yanaptʼistu. Walja cristiano wayn tawaqonakaw ukhamanakan escuelansa colegionsa uñjasipjje. Jupanakasti, revistanakasan mistki uka yanaptʼanakarjamaw jan ajjsarasa jan phenqʼasisa Diosan arunakapat parlañ yateqawayapjje. Sañäni, 2009 julio phajjsin mistkäna uka ¡Despertad! revistanjja, maynejj yateqer masipan jisktʼatajj kamsaspasa ukaw qhanañchasïna. Uka revistanjja sänwa: “‘¿Kunatsa jumajj evolucionar jan creykta?’ sasin jisktʼatajja, akhamwa sarakisma: ‘Ni cientificonakasa wali yatjjattʼat jaqenakjamajja, mä amtar puripkiti. Ukhamajj ¿kunatarak nayajj ukar creyiriststi?’” sasa. Awk taykanaka, wawanakamajj kunjamsa ukham jisktʼanakarojj sum qhanañchapjjaspa uk yatichapjjañamawa.

¹⁹ Cheqa yatichäwir arjjatañasa Jehová Diosan mayitapar istʼañasa awisajj chʼamakïspawa. Sañäni: jornälpach trabajasin wali qaritäktan ukhajja, tantachäwir sarañajj chʼamakïspawa. Yatiyir sarañataki wali alwat sartañasa chʼamakirakïspawa. Ukampis ak amtapuniñäni: jiwasatï ukanak phoqañar suma yatitäskstanjja, jutïrin kuna jan waltʼäwinakas utjkani ukhajja, aguantaskakiñäniwa.

20, 21. 1) Jesusan jiwatapat lupʼiñajja, ¿kunjamsa llakimpi jan aynachtʼañatakejj yanaptʼistaspa? 2) Tʼaqhesiñanak utjkipansa, ¿kun lurañsa amtañasa?

²⁰ ¿Jan amuykañ yantʼanakatjja kamsaraksnasa? ¿Kunjamsa llakinakampejj jan aynachtʼksna? Jesusan jiwäwipat lupʼiñaw yanaptʼistaspa. Apóstol Pablojj ukhamwa lurirïna. Janiw Jesusajj jan juchan jaqenak laykojj jiwawaykiti, jan ukasti juchan jaqenak laykuw jiwawayi, uk amtañaw Pablorojj llakita jikjjataskäna ukhajj yanaptʼäna. Jupasti sänwa: “Diosan Yoqaparu iyawsatajj laykukiw jakasktjja, nayar munasinwa jakañapa naya layku aptʼasiwayi” sasa (Gál. 2:20). Ukhamasti apóstol Pablojja, jupar qhespiyañatakis Jesusajj jiwkaspa ukhampunwa amuyirïna.

²¹ Jehová Diosajj sapa maynir qhespiyañatakiw Jesusarojj khitani, uk amuyañaw wal yanaptʼistaspa. Ukampis llakimp aynachtʼañajj janiw akatjamat chhaqtkaniti. Yaqhepajj inas akapachan tukusiñapkama, ukham jan amuykañ yantʼanakjja aguantaskakchiñäni. Tukuykam aguantirinakajj mä suma bendicionwa katoqapjjani, uk janipun armasiñäniti. Diosan Reinopanjja suma jakasiñaw utjani, jaqenakajj janiw pantjasjjañäniti. Uka urun puriniñapajj wali jakʼankjjewa. Ukhamasti walja tʼaqhesiñanakan uñjaskasasa, Diosan Reinopar mantañatakejj chʼamachasiskakiñäni.