1, 2. 1) ¿Kuna mayjtʼäwisa 33 maran Pentecostés urun utjäna? 2) ¿Khitinakampis uka machaq markajj qalltäna? (Aka janankir dibujo uñjjattʼam.)

KHÄ 33 maran Pentecostés urunjja, mä mayjtʼäwiw utjäna. Uka urunjja, Jehová Diosajj mä machaq markwa qollan ajay toqe uttʼayasïna, ukasti “Diosan Israelapa” satawa (Gál. 6:16, NM). Nayrajja, kunapachatï Abrahamajj jakkäna uka urunakat qalltasajj Diosan markapankir yoqall wawanakajj circuncidatäpjjañapänwa. Ukampis machaq markankirinakarojj janiw ukajj mayisjjänti. Apóstol Pablojj akham sänwa: “Circuncidatäñapasti chuyman circuncidatäñawa” sasa (Rom. 2:29).

² Diosan uka machaq markapajja, apostolonakampi ukat patakatsa jila cristianonakampiw qalltäna. Jupanakajj Jerusalén markanwa, mä altus utan tantachasisipkäna (Hech. 1:12-15). Diosajj jupanakarojj qollan ajayumpiw ajllïna, wawanakapatwa katoqarakïna (Rom. 8:15, 16; 2 Cor. 1:21). Ukhamatwa Jehová Diosajj Jesusan jiwatapar askit uñjatap uñachtʼayäna. Ukhamatarakwa machaq pactojj qalltarakïna (Luc. 22:20; Hebreos 9:15 liytʼañataki). Ukankiri taqe cristianonakajja, Diosan machaq markaparuw tukjjapjjäna. Jupanakarojj Diosan qollan ajayupaw yaqha arunak parlañ yanaptʼarakïna, ukhamatwa Jerusalén markanjja nacïwitpach judionakarusa ukhamaraki judionanakan religionapar  mantirinakarusa “Diosan jachʼa muspharkañ luräwinakapjjata” yatichapjjäna. Taqe uka jaqenakajj walja markanakatwa jutapjjäna, Semananakan fiestapa jan ukajj Pentecostés uru amtiri (Hech. 2:1-11).

3-5. 1) Pentecostés urunjja, ¿Pedrojj judionakar kamsänsa? 2) ¿Kunjamsa qalltanjja Jehová Diosan machaq markapajj jiltäna?

³ Jehová Diosajj nacïwitpach judionakarusa ukhamaraki judionanakan religionapar mantirinakarusa apóstol Pedro toqew machaq markar jawsayäna. Pentecostés urunjja, Pedrojj jan ajjsartʼasaw judionakarojj akham säna: ‘Khitirutï jiwayapkta uka Jesusaruw Cristo Tatiturjam iyawsapjjañama’ sasa. Ukat “¿kuns lurapjjäjja?” sasin jisktʼasipjjäna ukhajja, akham sarakïnwa: “Sapa mayni jumanakajja [arrepentisipjjam], ukhamarak bautisasipjjam Jesucriston sutiparu, juchanakamata perdonatäpjjañamataki. Ukatwa Diosajj Qollan Ajayu churapjjätam” sasa (Hech. 2:22, 23, 36-38). Uka urojja, mä kimsa waranqa jaqenakaw Diosan Israelaparojj mantapjjäna (Hech. 2:41). Apostolonakasti taqe chuymaw yatiyasipkakïna, waljaniruw Diosan markapar mantañ yanaptʼapjjäna (Hech. 6:7). Ukhamatwa uka machaq markajj wal jiljjattaskäna.

⁴ Qhepatjja, Samaria markankirinakaruw Diosan arunakapajj yatiyasirakïna. Jupanakatjja waljaniw cheqa yatichäwinakarojj iyawsapjjäna. Ukatjja, Felipe sat cristianow jupanakarojj bautisäna. Ukampis janïraw qollan ajayu katoqapkänti. Ukatwa Jerusalenankiri jilïr irpirinakajj uka jilat kullakanakaru uñjanipjjañapatakejj Pedrompiru Juanampiru khitapjjäna. Ukar purisajj uka pä apostolonakajj “amparanakapwa jupanakjjar uchapjjäna”, qollan ajayu katoqapjjañapataki (Hech. 8:5, 6, 14-17). Ukhamatwa uka samaritanonakajj Diosan Israelap sat machaq markaru mantapjjäna.

⁵ Jehová Diosajj 36 maranjja, wasitampiw Pedro toqejj machaq markapar mantapjjañapatakejj yaqha jaqenakaru jawsarakïna. Pedrojj romanonakan ejercitop pʼeqtʼiri Cornelio sat mä oficialan utaparuw saräna, Diosan arunakap yatichañataki. Ukansti Corneliompi familiapampi suma munat amigonakapampiw tantachasipjjäna (Hech. 10:22, 24, 34, 35). Biblianjja siwa: “Pedrojj ukham parlkïpanwa, jupan arunakap ischʼukirinakarojj Qollan Ajayojj jutäna. Pedrompi chik jutir judío iyawsirinakasti muspharataw uñjasipjjäna, jan judiöpkis uka jaqenakjjar Qollan Ajayojj jutatapatjja” sasa (Hech. 10:44, 45). Uka urut aksaruwa, yaqha markankir jan circuncidat jaqenakas Diosan markaparojj mantawayapjje.

6, 7. ¿Kunsa cheqa cristianonakajj Jehová Diosan sutip apirinakjamajj lurapjjäna?

⁶ Kunapachatï jilïr irpirinakajj 49 maran tantachasipkäna ukhajja, Santiagojj akham sänwa: “Simón Pedrojj yatiyistuw kunjämtï Diosajj jichhakipuni aski lurkatayna jan judiöpkis ukanakaru, ukhamarak jupanak taypita mä marka [‘sutipataki’, NM] ajllisïna”  ukanaka sasa (Hech. 15:14). Ukhamajja, Jehová Diosan sutip apiri uka machaq markanjja, judionakampi jan judío jaqenakampiw ukankapjjäna (Rom. 11:25, 26a). Qhepatjja, Pedrojj akham sänwa: “Jumanakajj nayrajj janiw mä markäpkäyätati, jichhasti Diosan markapäjjapjjtawa” sasa. Ukatjja, kunsa lurapjjañapa ukjja akham sasaw qhanañcharakïna: “Jumanakajj ajllit jaqenakäpjjtawa, reyir serviri tukuyat sacerdotenakäpjjaraktawa; mä qʼoma markäpjjtawa; Diosan ajllisit markapäpjjaraktawa. Akasti lurasiwa, jumanakajj Diosan muspharkañ luräwinakap yatiyapjjañamataki. Uka Diosarakiw jumanakarojj chʼamakat irpsusinjjapjjtam, suma muspharkañ qhanapar mantjjapjjañamataki” sasa (1 Ped. 2:9, 10). Ukhamajj Jehová Diosaruw jachʼañchapjjañapäna, sutipatwa yatiyapjjañaparakïna. Taqe Kunjjar Munañani Jehová Diosatwa jan ajjsartʼas qhanañchapjjañapäna.

⁷ Kunjamtï nayra Israel markarojj siskänjja, ukhamarakiw Diosan Israelapa sat machaq markaparojj akham säna: ‘Jumanakaruw nayajj uywasipjjsma nayan sutejja yupaychapjjañamataki’ sasa (Isa. 43:21). Uka cristianonakajj jan ajjsartʼasaw Jehová Diosaw cheqpach Diosajja ukat mayni diosanakajj kʼarikiwa sasin qhanañchapjjäna (1 Tes. 1:9). Ukhamaw Jehová Diosatsa Jesusatsa “Jerusalén markana, Judeana, Samariana, taqe aka oraqpachana” qhanañchapjjäna (Hech. 1:8; Col. 1:23).

8. ¿Kamsänsa apóstol Pablojj Diosan markaparojja?

⁸ Diosan sutip apir markankirinakajj wal chʼamachasipjjäna. Jupanakat maynïrejj apóstol Pablönwa. Akapachan yatiñan jaqenakarusa jan ajjsartʼasaw Taqe Kunjjar Munañani Jehová Diosat qhanañchäna, “Jupankiw alajjpachas akapachasa. Juparakiw akapachsa ukhamarak taqe ukan utjirinaksa lurejja” sasa (Hech. 17:18, 23-25). Kimsïr kutin misionerjam sarkäna ukhajja, Pablojj akham sasaw cristianonakar amuyasipjjañapataki sarakïna: “Naya sarjjä uka qhepatjja, yaqhanakaw jutapjjani [tamar] tʼunjañ munasa, kunjämtejj qamaqenakajj ovejanakar tukjañataki jutapkejja ukhama. Jumanaka taypitwa mayninakajj sartapjjani kʼarinak yatichasa, cheqäkaspas ukhama, iyawsirinakar jupanak toqer apaña munasa” sasa (Hech. 20:29, 30). Ukhamapuniw pasäna. Janïr apostolonakajj jiwarapkäna ukhaw uka kʼari yatichirinakajj utj-jjäna (1 Juan 2:18, 19).

9. Apostolonakajj jiwarjjapjjäna uka qhepatjja, ¿kunas Diosan markapampejj pasäna?

⁹ Apostolonakajj jiwarjjapjjäna ukhajja, Diosan markapat jitheqtir walja kʼari yatichirinakaw jiljjattäna, ukhamatwa kʼari cristiano religionanakajj uñstawayi. Uka kʼari cristianonakajj Diosan sutip apañat sipansa, Jehová Diosan sutipjja Bibliatsa chhaqtayapjjänwa. Ukatjja, akapachan costumbrenakaparjamaw sarnaqapjjäna, kʼari yatichäwinakampiw Diosar jiskʼachapjjäna, Diosan guerrapaw sasaw nuwasiñanakan sarnaqapjjäna, ukatsti wachoq qʼañu juchanakwa lurapjjarakïna. Uka tiemponjja, Jehová Diosan servirinakapajj mä qawqhanikiw aka Oraqen utj-jjäna, janiw mä markäjjänti.

10, 11. 1) Jesusajj trigompit jan wali qorampit parlkasajja, ¿kamsänsa? 2) ¿Kunjamsa Jesusan arunakapajj 1914 mara qhepat phoqasïna?

¹⁰ Kʼari cristianonakajj kunjamsa cheqa religionarojj chhaqtayani uka toqet parlkasajja, Jesusajj trigompit jan wali qorampitwa parläna. Akham sänwa: “[Jaqen Yoqapajj trigo phawäna.] Ukampis kunapachatejj taqeni ikisipkäna ukapachawa [Supayajj] jutasina jan wali qora jathampi phawantawayi” sasa. Ukhamajj uka trigompi jan wali qorampejj “akapach tukuskan uka” urunakkamaw jilapjjañapäna. Ukatjja, Jesusajj akham sasaw qhanañchaskakïna: ‘Trigojj Diosan ajllit wawanakapawa,  jan wali qorasti Supayan wawanakapäkis ukarakiwa’ sasa. Ukatjja sarakïnwa: ‘Jaqen Yoqapasti angelanakaparuw apthapiñapatakejj khitanirakini. Ukhamat jan wali qora taypit trigor apsupjjañapataki’ sasa. Ukhamaw Diosan Reinopan wawanakapajj apthapisiñapäna (Mat. 13:24-30, 36-43). ¿Kunjamsa ukajj phoqasïna? ¿Kunjamatsa Jehová Diosajj aka Oraqen wasitamp markanëjjarakïna?

¹¹ Akapachajj 1914 maratwa tukusiñ qalltawayi. Ukapachajj niya phesqa waranqa ajllit cristianonakakiw aka Oraqen utjäna. Kunapachatï uka maran Jachʼa Chʼajjwäwejj qalltkäna ukhajja, ‘Diosan ajllit wawanakapajj’ Jachʼa Babiloniana, mä arunjja, kʼari religionanakan katuntatäsipkänwa. Ukampis 1919 maranwa Jehová Diosajj jupanakar qhespiyjjäna, ukhamatwa khitinakas cheqa cristianonakasa ukhamaraki khitinakas kʼari cristianonakasa ukajj qhanstjjäna. Kunjamtï Isaías profetajj siskänjja, ukhamaw wasitampi ‘Diosan ajllit wawanakapajj’ mä markar tukjjapjjäna. Isaías 66:8 qellqatajj siwa: “¿Mä markajj mä urukiti nasjjaraki? ¿Mä markas mä jukʼa horasanakti nasjjaraki? Ukampisa kunapachatejj Sionajj usunakap sartayasïn ukspachaw wawachasjjaraki” sasa. Sión sasajj Jehová Diosan angelanakapatwa parlaski. Ajllit cristianonakajj jupanakan wawanakapäpkaspasa ukhamawa, ukatjja mä markaruw tukupjjaraki.

12. ¿Kunjamsa ajllit cristianonakajj Jehová Diosan sutip apapjjatap uñachtʼayapjje?

¹² ‘Diosan ajllit wawanakapajja’, nayrïr cristianonakjamarakiw Jehová Diosat qhanañchapjjäna (Isaías 43:1, 10, 11 liytʼañataki). Jupanakasti, suma sarnaqerinakata ukhamarak ‘Diosan Reinopat yatiyirinakata’ uñtʼatäpjjewa (Mat. 24:14; Fili. 2:15). Ukhamatwa walja millón millón jaqenakar Diosamp sum apasipjjañapatak yanaptʼawayapjje (Daniel 12:3 liytʼañataki).

13, 14. 1) Jehová Diosar yupaychañatakejja, ¿kunsa khitinakatï alajjpachar sarañataki jan ajllitäpki uka cristianonakajj lurapjjañapa? 2) Uka toqet Bibliajj ¿kamsänsa?

¹³ Kunjamtï pasïr yatichäwin yateqktanjja, nayra Israel markanjja, yaqha markankirinakajj  Jehová Diosarojj yupaychapjjarakïnwa. Ukampis ukatakejj Israel markampiw chikachasipjjañapäna (1 Rey. 8:41-43). Jichhürunakanjja, khitinakatï alajjpachar sarañataki jan ajllitäpki uka cristianonakajja, Jehová Diosar yupaychañ munasajj ukhamarakiw Jehová Diosan ajllit Qhanañchirinakapampi mayachasipjjañapa.

¹⁴ Aka qhepa urunakanjja, walja jaqenakaw Jehová Diosan markaparojj mantapjjani sasaw pä profetanakajj qellqapjjäna. Isaías profetajj sänwa: “Walja jaqenakarakiw purinipjjani sapjjarakiniwa: ‘Jutapjjam, [Jehová] Tatitun qollupar makhatapjjañäni, Jacobun Diosapan temploparu, jupajj jiwasar sarnaqäwinakap yatichañapataki, ukat uka thakipanjam sarañasataki’ sasa. Sión markatwa Tatitun yatichäwipajj mistuni, Jerusalenatwa arunakapajj jutarakini” sasa (Isa. 2:2, 3). Ukatjja, Zacarías profetajj sarakïnwa: “Jerusalenarusti jutapjjaniwa walja jaqenaka, chʼamani markanakasa, taqe chʼamani [Jehová] Tatitur thaqeri, jupanakjjaru bendicionap mayiri” sasa. Uka jaqenakasti ‘yaqha arunak parliri markanakatwa’ jutapjjañapäna. Jupanakajj Diosan Israelapamp chikaw Diosar yupaychapjjañapäna, ukat sapjjañaparakïnwa: “¡Jumanakamp saraña munapjjta, nanakasti istʼapjjtwa Diosajj jumanakampïtapa!” sasa (Zac. 8:20-23).

15. ¿Kunjamsa “yaqha ovejanakajj” Diosan Israelapamp chikajj sarapjje?

¹⁵ “Yaqha ovejanakat” uñtʼatäpki uka jilat kullakanakajja, Diosan Israelapamp chikaw Diosan Reinopat yatiyir sarapjje (Mar. 13:10). Jupanakasti Diosan markaparuw mantapjjaraki. Ukatjja, ajllit cristianonakamp chikajja, ‘mä sapa tamarukiw’ tukupjje, jupanakan ‘suma awatiripajj’ Jesucristorakiwa (Juan 10:14-16 liytʼañataki).

16. ¿Kunjamatsa Jehová Diosajj Armagedón apanini?

¹⁶ Jachʼa Babiloniajj tʼunjaskani uka qhepatjja, Diosan markapajj mä jan waltʼäwinwa uñjasini. Ukatwa qhespiñatakejj Jehová Diosampi imantayasiñajj wakisini. Gog siski ukaw “kawkïri markatejj yaqha markanak taypita jutasin wasitat tantachtʼasjjapjjäna” uka markarojj nuwantani. Uka jan waltʼäwi utjipanwa Armagedonajj purinini, ukampiw ‘jachʼa tʼaqhesiñajj’ tukusini. Jehová Diosaw taqe ukanak wakichani, uka urojj horasaparuw jutarakini (Mat. 24:21; Eze. 38:2-4, 10-12). Ukhaw Jehová Diosajj servirinakaparojj qhespiyani. Ukatjja, Gog siski ukarusa ukhamaraki yanapirinakaparusa qʼal tukjarakini. Ukhamatwa Jupan Taqe Kunjjar Munañanïtapasa uñachtʼayasini, ukhamatarakwa Sutipasa qʼomachasini. Jehová Diosasti siwa: “Nayaw jupanakampi uñtʼayasirakëjja, jupanakasti nayan [Jehová] Tatitütajja yatipjjarakini” sasa (Eze. 38:18-23).

17, 18. 1) Kunapachatï Gog siski ukajj jan waltʼaykistani ukhajja, ¿kunsa Jehová Diosajj yatiyistani? 2) Jiwasatï Jehová Diosamp jarkʼaqatäñ munstan ukhajja, ¿kunsa lurañasa?

¹⁷ Kunapachatï Gog siski ukajj Diosan markapar nuwantkani ukhajja, Jehová Diosajj servirinakaparojj akham saniwa: “Nayan markajja, sartasim, ukatsti utamar mantam, ukatsti punkum jistʼkatasinim, imantasirakim, Tatitun colerasiñapajj pasañapkama” sasa (Isa. 26:20). Ukapachajja, kunjamatsa qhespsna ukwa Jehová Diosajj yatiyistani. “Utama” sasinjja, inas tamanakasat parlaskchi.

¹⁸ Ukhamasti, jiwasatï jachʼa tʼaqhesiñan imantatäña munstanjja, Jehová Diosajj aka Oraqen mä suma markaniwa ukat uka markapasti walja tamanakaru suma uttʼayatarakiwa, ukjja amtapuniñäni. Ukhamajj ¡janipun tamanakasatjja jitheqtapjjañäniti! Kunjamtï Salmonak qellqerejj siskäna ukham sapjjañäni: “[Jehová Dios], jumaw qhespiyirïtajja; ¡markamarojj askinakampiy phoqhantam!” sasa (Sal. 3:8).