1. ¿Kunjamsa Levítico librojj yanaptʼistani?

BIBLIANKIR mayni libronakat sipansa, Levítico libronwa jilapartejj qollanäñat parli. Niyakejjay Jehová Diosan servirinakapjamajj qollana, mä arunjja, qʼoma sarnaqapjjañasächejja, Levítico librot yatjjatañasa ukat uka libror wali askit uñjañasa qʼoma sarnaqañasatakiw yanaptʼistani.

2. ¿Kuna toqenakatsa Levítico librojj parli?

² Moisesaw Levítico libro qellqäna, uka librosti Diosan ‘taqe Qellqatapa’ taypin uchatawa “askirakiw yatichañataki” (2 Tim. 3:16). Nayra Qollan Qellqatanakanjja, Levítico libron sapa jaljapanjja, niya tunka kutiw Diosan Jehová sutipajj uñsti. Uka librot yatjjatañajja, Diosan sutip janipun qʼañuchañasatakiw chʼamañchistani (Lev. 22:32). Ukatjja, uka libronjja, walja cheqanwa akïr arunakajj uñstaraki: ‘Nayätwa Jehová Diosamajja’ sasa. Ukasti Diosar istʼañasatakiw amtayarakistu. Aka yatichäwinsa jutïri yatichäwinsa, Levítico libron suma yatichäwinakapatwa yatjjataskañäni. Ukasti Diosaru qʼoma chuymamp yupaychañasatakiw yanaptʼistani.

3, 4. Aaronaru ukhamaraki wawanakaparu qʼomachaskäna ukajja, ¿khitinakarus uñtayi, ukat kunjamatsa qʼomäpjje? (Aka janankir dibujo uñjjattʼam.)

³ (Levítico 8:4-6 liytʼañataki.) Jehová Diosajja, Aaronaruw  Israel markaru jilïr sacerdotepjam serviñapatakejj ajllïna. Ukatjja, wawanakaparuw sacerdotenakjam serviñapatakejj uttʼayarakïna. Aaronajj kunjamtï Jesusajj serviñapäkäna uk uñachtʼayäna. Aaronan wawanakapasti kunjamtï ajllit cristianonakajj servipjjañapäkäna uk uñachtʼayarakïna. Niyakejjay Aaronarojj qʼomachaschïnjja, ¿Jesusar qʼomachañajj wakisirakïnti? Janiwa. Jesusajj “jan qʼañuchtʼata”, jan juchani ukhamänwa (Heb. 7:26; 9:14). Ukhamajj Aaronan qʼomätapajja, Jesusan wali qʼomätapa cheqapätapa uñachtʼayäna. Ukampis Aaronan wawanakapar qʼomachaskäna ukajja, ¿kunsa uñachtʼayarakïna?

⁴ Alajjpachar sarir ajllit cristianonakaruw qʼomachasiñapäna ukwa uñachtʼayäna. Ukampis ¿kunjamatsa qʼomachasipjjäna? ¿Bautisasisati? Janiwa. Bautismojj janiw juch apaqkiti, jan ukasti bautisasisajj Jehová Diosaruw jakäwis katuyastanjja. Ukhamajja, ajllit cristianonakajj Diosan ‘arupampiw qʼomachasipjje’. Ukatakejj Criston yatichäwinakaparjamaw taqe chuyma sarnaqapjjaraki (Efe. 5:25-27). Ukhamatwa qollanaptayata qʼomachata jikjjatasipjje. Ukampis “yaqha ovejanakajja”, ¿kunjam qʼomachatäpjjarakisa? (Juan 10:16.)

5. ¿Kunatsa yaqha uwijanakajj Diosan Arupampi qʼomachatäpjjewa sasajj sissna?

⁵ ‘Walja jaqenakajja’, mä arunjja, “yaqha ovejanakajja” janis Aaronan wawanakapar uñtayatäpkchejja, uka bautisat jilat kullakanakajj Diosan Aruparjam qʼomachatäpjjarakiwa (Apo. 7:9). Jesusan jiwatapajj kunja wakiskirisa uk Biblian liytʼapjje ukhajja, taqe chuymaw ukar iyawsapjje, ukatjja ‘uruy arumaw Diosar yupaychapjjaraki’ (Apo. 7:13-15). Ajllit cristianonakasa yaqha uwijanakasa sapürutjamaw ‘sum sarnaqasina’ jakäwinakap qʼomachasisipki (1 Ped. 2:12). Ajllitanakampi yaqha uwijanakampi wali mayachtʼata ukhamarak qʼoma sarnaqeri uñjasajja, Jehová Diosajj wal kusispacha. Jupanakajj Jesucristo Awatiriparojj taqe chuymaw arkapjje istʼapjjaraki.

6. ¿Kunatsa amuykiptʼasiñasa?

⁶ Israel markan sacerdotenakapar qʼomachasiñapa mayiskäna uk yatiñajja, Diosan jichha tiempo markapatakejj wali askiwa. Ukatwa tantachasiñ utanakasasa jiwasasa wali qʼoma sarnaqtanjja, sum isthaptʼasiraktanjja. Uksti Bibliat yateqerinakasajj sumwa amuyapjje. Ukatjja, Jehová Diosar yupaychañ munirinakajj “qʼoma chuyman” jaqëpjjañaparakiwa (Salmo 24:3, 4 liytʼasiñapawa; Isa. 2:2, 3). Ukhamajja, Jehová Diosar yupaychañatakejj amuyusasa, chuymasasa, cuerposasa suma qʼomäñapawa. Ukatakejj sapa kutiw kunjamäsktansa uk amuykiptʼasiñasa. Inas yaqhepajj qʼomäñatakejja, jan wali luräwinakap apanukuñatak wal chʼamachasipjjañapajj wakischini (2 Cor. 13:5). Sañäni, mä bautisat cristianotï yatkasin pornografianak uñchʼukchi ukhajja, akham jisktʼasiñapawa: “¿Nayajj qʼomäsktti?” sasa. Ukatjja, uka qʼañu uñchʼukiñanak jaytañatakejj yanaptʼwa mayiñapa (Sant. 5:14).

7. Levítico 8:22-24 qellqatarjamajja, ¿kunsa Jesusajj yatichawayistu?

⁷ Kunapachatï Israel markan sacerdotenakaru uttʼayaskäna ukhajja, mä orqo uwijan wilapampiw Aaronarusa wawanakaparusa kupi jiñchuta, kupi amparapana tayka lukʼanapata, ukhamarak kupi kayupan tayka lukʼanapata jawtʼasïna (Levítico 8:22-24 liytʼañataki). Sacerdotenakajj lurañanakapjja taqe chuymaw phoqapjjañapäna, ukwa wilampi jawtʼañajj uñachtʼayäna. Niya ukhamarakiw Jesusajja, Jilïr Sacerdotjamajj ajllitanakarusa yaqha uwijanakarusa taqe chuyma istʼasirïñ yatichawayistu.  Jesusajj Jehová Diosan arunakapjja wali sum istʼäna, Diosan munañapwa lurarakïna, ukatjja Diosan qollan thakipanwa sarnaqarakïna (Juan 4:31-34).

8. ¿Kunsa Diosan servirinakapajj lurapjjañasa?

⁸ Ajllit cristianonakasa yaqha uwijanakasa, Jesusat yateqasisaw Diosan thakipat jan jitheqtas sarnaqapjjañasa. Diosan servirinakapjamajja, taqeniw kuntï Diosajj Biblia toqejj yatichkistu uk sum istʼas phoqapjjañasa, ukhamat qollan ajayur jan llakisiyañataki (Efe. 4:30). Ukat ‘cheqap thakinwa’ sarnaqañasaraki (Heb. 12:13).

9. 1) Oraqpachan Jilïr Irpirinakampi trabajir kimsa jilatanakajja, ¿kamsapjjesa? 2) ¿Kunjamsa arunakapajj qollanäskakiñatakejj yanaptʼistaspa?

⁹ Oraqpachan Jilïr Irpirinakampi chika walja maranak trabajir kimsa jilatanakajj kamsapjjesa uk uñjapjjañäni. Maynïrejj akham siwa: “Uka jilatanakampi Diosar serviñajj wali askipuniwa. Jupanakajj ajllitäpkchisa, pantjasir jaqenakäpjjewa, ukwa jupanakamp chik sapür trabajisajj uñjawayta. Ukampisa, niyakejjay Diosajj markapar pʼeqtʼapjjañapatak jupanakar uttʼaychejja, jupanakar istʼañatakiw chʼamachasiwayta” sasa. Mayni jilatasti sarakiwa: “2 Corintios 10:5 qellqatasa yaqha qellqatanakasa, ‘Cristor istʼañasatakiw’ chʼamañchistu, ukham textonakaw Jilïr Irpirinakar yanaptʼañatakisa, istʼañatakisa yanaptʼawayitu. Jupanakarusti taqe chuymaw istʼawayarakta” sasa. Ukjjarusti, yaqha jilatajj akham sarakiwa: “Jehová Diosajj kuntï munki uk munirinakasa, kuntï uñiski uk uñisirinakasa, Diosar istʼirinakasa, Diosar kunatï kusisiyki uk luririnakasa, markaparojj istʼapjjapuniniwa, irpirinakaparusa ukhamaraki” sasa. Uka jilatarojja, Nathan Knorr jilatan taqe chuyma istʼasirïtapaw yanaptʼarakïna, qhepatjja Knorr jilatajj Jilïr Irpirinak taypinkjjarakïnwa. 1925 maran The Watchtower (jan ukajj Yatiyañataki) revistan “Nacimiento de la nación” sat yatichäwejj mistkäna ukhajja, janiw yaqhepajj ukar istʼañ munapkänti, ukampis Knorr jilatajj taqe chuymaw istʼäna. Ukhamajj qollanäñatakejj istʼasirïñaw wali wakiskirejja, ukwa uka jilatanakan arunakapajj yatichistu.

10. ¿Kunatsa wila toqet Diosan leyipar istʼañajj wali wakiskirejja?

¹⁰ (Levítico 17:10 liytʼañataki.) Jehová Diosajj Israel markarojj sänwa: ‘Janiw kuna wilsa manqʼapjjätati’ sasa. Cristianonakajj niya ukham kamachwa katoqaraktanjja, animalanakana jaqenakana wilapatjja jitheqtapjjañasawa, janiw manqʼañasäkisa ni uchayasiñasäkisa (Hech. 15:28, 29, MT). Jiwasatï ukar jan istʼksna ukhajja, Jehová Diosajj jiwas ‘contraw saytʼaspa’ ukat markapatsa jaqsurakistaspawa. Jehová Diosarojj wal munastanjja, ukatwa Jupar istʼañ munaraktanjja. Awisajj Diosar jan uñtʼirinakasa jan istʼañ munirinakasa, jan walin uñjastan ukhaw wil uchayasiñasatak mayipjjestaspa, ukampis janipuniw jupanakar istʼañasäkiti. Wil jan uchayasiñ munatasat jan walsa uñjapkchistanejja, Jehová Diosarupuniw istʼañasa (Jud. 17, 18). ‘Wil jan manqʼañatakisa’ ukat jan uchayasiñatakis ¿kunas yanaptʼistaspa? (Deu. 12:23.)

11. Kunanakatï Perdonayasiñ Urun luraskäna ukanakarojja, ¿kunatsa janiw aleq mä costumbrekïkänti sasajj sissna?

¹¹ Nayra Israel markanjja, jilïr sacerdotejj kunsa uywanakan wilapampejj Perdonayasiñ Urun luräna uk yatiñajja, kunjamsa Diosajj wilar uñji uk amuytʼañatakiw yanaptʼistu. Wilajj Jehová Diosampi perdonayasiñatak mayakiw apnaqasïna. Orqo wakan orqo uwijan wilapajja, Diosampi pactor mantat arcan tapapjjaruw patjjata  ukhamarak nayräjjata chʼalltʼasiñapäna (Lev. 16:14, 15, 19). Ukham lurasaw israelitanakajj juchanakapat Jehová Diosampi perdonayasipjjäna. Ukhamarusa Jehová Diosajj sarakïnwa: ‘Kawkïri jaqetï uywa manqʼañatak jiwayani ukapachasti, wilapjja oraqeruw wartjjañapa, ukatsti laqʼampiw imjjatjjañapa, uka wilajj taqe jakirinakaru jakaña churatap layku’ sasa (Lev. 17:11-14). Ukhamajja, Perdonayasiñ Urun wilajj apnaqaskäna ukasa, ukhamaraki uywanakan wilap oraqer wartaskäna ukasa, janiw aleq costumbrekïkänti. Jehová Diosajj kunjamsa wilarojj uñjasiñapa ukjja nayraw Noempiru wawanakapampirojj qhanañchjjäna, jupanakajj janiw wiljja manqʼapjjañapäkänti (Gén. 9:3-6). ¿Kunsa ukajj cristianonakar yatichistu?

12. Pablojj hebreo cristianonakar qellqkäna ukhajja, ¿kunsa wilampit perdonayasiñampit qhanañchtʼäna?

¹² Apóstol Pablojja, wila toqe perdonayasiñatjja akham sasaw hebreo cristianonakar säna: “Leyirjamajj niya taqe kunanakaw wilampi qʼomachatäñapa; janiw juchat qʼomachasiñajj utjkaspati, janitejj wilajj wartaskaspa ukkhajja” sasa (Heb. 9:22). Israelitanakajj loqtapkäna uka uywanakan wilapajj valoranïkchïnsa, israelitanakarojj juchararapjjatapa ukat taqpach juchanakap perdonayasiñatakejj jukʼamp mä jachʼa sacrificio wakisitapwa ukajj amtayäna, ukwa Pablojj qhanañcharakïna. “Moisesan leyinakapajj mä chʼiwjamakïnwa, taqe kunanakatejj utjañapäkatayna ukanakatjja, janiw kunjämäñapäkäntejj ukhamäkataynati” (Heb. 10:1-4). ¿Kunjamatsa taqpach juchanak perdonayasiñajj utjaspäna?

13. Jesusan jiwas layku jakäwip loqtasitapatjja, ¿kunjamas jikjjatastanjja?

¹³ (Efesios 1:7 liytʼañataki.) Khitinakatï Jesusaru Awkiparu munasipki ukanakatakejj Jesusan jiwatapajj wali askipuniwa (Gál. 2:20). Ukampis kuntï Jesusajj jiwatap qhepat lurkäna ukaw taqenir juchat qhespiyawayistu. Cheqas kunatï Perdonayasiñ Urun nayrajj luraskäna ukarjamajj Jesusaw phoqawayi. Uka urunjja, jilïr sacerdotew tabernaculor mantasajj  sacrificiot loqtat uywanakan wilapjja Qollanansa Qollanapa sat lugararu apirïna, ukanwa uywanakan wilap Diosar loqtäna, Jehová Diosan nayraqatapankkaspas ukhama. Qhepatjja, templonsa ukhamarakiw lurasïna (Lev. 16:11-15). Niya ukhamarakiw Jesusajja, jiwatat jaktasajj alajjpachar makatäna, ukanwa qawqha valoranis wilapajj uk Jehová Diosar loqtäna (Heb. 9:6, 7, 11-14, 24-28). Ukham luratapat ¡walpun yuspärtanjja! Jesusan wilaparu wali askit uñjatas laykuw Diosajj juchanakasat perdonistu, ukhamatwa qʼoma conciencianirakïtanjja.

14, 15. Wila toqet Diosan leyipat sum amuytʼañasa ukat ukar istʼañasa, ¿kunatsa wali wakiskirejja?

¹⁴ Jehová Diosajj ‘janiw kuna wilsa manqʼapjjätati’ sasin siskäna ukjja, jichhajj sum amuyjjtanjja (Lev. 17:10). Diosatakejj wilajj jakañampi sasiwa, ukatwa wali respetompi uñji (Gén. 9:4). Ukhamasti, kunjamtï Jehová Diosajj wilar uñjki ukhamwa uñjañasaraki, janiw wiljja manqʼañasäkiti, ni uchayasiñasäkisa. Jehová Diosampi sumankañatakejja, Jesusan loqtasitaparuw iyawsañasa, ukat Jehová Diosjamarakiw wiljja wali valoranit uñjapjjañasa (Col. 1:19, 20).

¹⁵ Akatjamatwa, familiasasa amigosasa jan ukajj jiwasasa jan walin uñjassna, ukhamanakanwa wilsa ukhamarak kunanakatï wilan utjki (glóbulos rojos, glóbulos blancos, plaquetas, plasma) ukanak uchayasiñasatak mayipjjestaspa. Jan ukajj qollañatakejj equiponakaru wilas apsusin wasitamp kutintayañatakiw mayipjjarakistaspa. Ukhamanakanjja suma amtanakaruw puriñasa, janipuniw kunatï jan walïki uk lurasin Jehová Diosar llakisiyañ munktanti. Ukatakejj Jehová Diosaruw mayisiñasa, qollayasiñjjatsa sum yatjjatañasa, janïräkipanwa suma amtar puriñasaraki, ukanak lurañajj wali wakiskiriwa. Ukhamtï lurañänejja, janiw wil uchayasiñarojj purkañäniti. Jichhürunakanjja, doctoranakasa ukat yaqha jaqenakasa, ‘wila uchayasiñajj walikïskiwa’ sasaw sapjje, ukatwa yaqha jaqenakar churañataki waljanir wil apsuyasipjjañap mayipjje. Ukampis taqe kun Lurir Jehová Diosakiw kunjamas wilajj apnaqasiñapa uk amtaspa, Jupajj wilarojj wali askitwa uñji, uk jiwasajj sum yattanjja. Ukatwa wila toqet Diosan leyiparojj istʼapjjañasa. Qʼoma sarnaqatasampiw Jesusan wilaparu wali askit uñjatas uñachtʼaytanjja, uka wila toqekiw juchanakasat perdonayassna ukat wiñay jakañsa katoqaraksna (Juan 3:16).

16. ¿Kunatsa qollanäñatak chʼamachasiñasa?

¹⁶ Kunapachatï Jehová Diosajj israelitanakar Egipto markan esclavopäñat qhespiykäna ukhajja, akhamwa jupanakar säna: “Nayätwa jumanakan [Jehová] Tatitu Diosamajja, nayarakiw jumanakarojj Egipto markat apsunipjjsma, jumanakan Diosamäñajjataki. Uka layku jumanakasti qollanäpjjañamawa, nayan qollanätajj layku” sasa (Lev. 11:45). Niyakejjay Jehová Diosajj qollanächejja, markapan qollanäñapwa munarakïna. Ukatwa jiwasajj Jupjam qollanäñataki chʼamachasiñasa, ukwa Levítico librojj qhan amuytʼayistu.

17. ¿Kunjamsa Levítico librojj yanaptʼistu?

¹⁷ Levítico librot mä qawqha textonakapat yatjjatasajja, walja askinakwa apsuwaytanjja. Levítico libror jukʼamp munasiñatakisa ukat kunatsa qollanäñasa uk sum amuytʼañatakisa wal yanaptʼistu. Ukampis Levítico libronjja walja yatichäwinakaw utjaski. Jutïr yatichäwinwa kunjamsa Jehová Diosar qʼoma sarnaqas sirvsna uk yatjjataskañäni.