1, 2. Wayn tawaqonakasa jilïrinakasa, ¿kunjamsa Jehová Diosar serviñasa?

WAYN tawaqonakajja, Jehová Diosan markapan wali askit uñjatäpjjewa. Walja markanakanjja, bautisasirinakat jilapartejj wayn tawaqonakäpjjewa. Uk uñjañajj ¡wali kusiskañapuniwa!

² Walja wayn tawaqonakaw jupa mitanakapampejj wali kusisita jikjjatasipjje, jumatï wayn tawaqöstajja, ukhamarakiw jikjjatasirïpachätajja. Ukampis waynäkstansa jilïrïkstansa, Jehová Diosajj taqeni mayachtʼata Jupar sirvsna ukwa muni. Apóstol Pablojj Diosan munañapat akham sänwa: “Jupajj taqenin qhespiyatäñapwa muni, kunatejj cheqäki uk uñtʼapjjañaparaki” sasa (1 Tim. 2:3, 4). Diosan servirinakapajj taqe markanakatwa mistunipjje, “kunayman janchini, ukhamarak taqe casta [parlanïpjjarakiwa]” (Apo. 7:9).

3, 4. 1) Jichha tiempon walja wayn tawaqonakajj ¿kunjam chuymanïpjjesa? 2) ¿Kunjamsa yaqhep wayn tawaqonakajj Efesios 4:25 qellqatarjam sarnaqapjjaraki?

³ Jichha tiemponjja, walja wayn tawaqonakajj janiw Jehová Diosar serviñ munapkiti, munañanakapakwa thaqhapjje, ukampis  Jehová Diosar servir wayn tawaqonakajj janiw ukhamäpkiti. Yaqhep yatjjatatanakajj akham sapjjewa: “Jichha tiempo wayn tawaqonakajj jupanakan askipakwa thaqhasipki, parlatanakapampisa isisitanakapampisa, mayninakar jan respetapjjatapwa uñachtʼayapjje, yamas jilïrinakarojj jukʼampiw jan respetapkiti” sasa.

⁴ Cheqas ukham jan wali amuyunakampi phoqantat tiemponwa jaktanjja, ukatwa cristiano wayn tawaqonakajj ukamp jan apayasiñataki wal chʼamachasipjjañapa, ukatjja kuntï Diosajj amuyki ukarjam sarnaqañatakiw chʼamachasipjjañaparaki. Nayrïr cristianonakajja ukhamanwa jikjjatasipjjarakïna, ukatwa apóstol Pablojj “kawkïri ajayutejj ñanqha ajayunakaru apnaqki, ukhamarak chʼamañchki Diosar jan istʼirinakarusa” ukanakat amuyasipjjañapatak ewjjtʼäna. ¿Kunatsa? Jupanakasti ‘ukhamanwa nayrapachajj’ uñjasipjjäna (Efesios 2:1-3 liytʼañataki). Yaqhep wayn tawaqonakajja, janiw akapach ñanqha ajayurjam sarnaqapkiti, jan ukasti jilat kullakanakampi mayachtʼatäñatakiw chʼamachasipjje, uka wayn tawaqonakajj wali askit uñjatäpjjewa. Ukham lurasajj apóstol Pablon ewjjtʼaparjamaw sarnaqasipki, jupajj sänwa: “Taqenis mä sapa cuerpokïtanwa” sasa (Efe. 4:25, AB). Niyaw akapachajj tukusjjani, ukhamasti mayachtʼatäñajj wali wakiskiripuniwa. Jichhajj kunas ukham sarnaqañatakejj yanaptʼistaspa uk Diosan nayra servirinakapat mä qawqha uñjapjjañäni.

5, 6. Mayachtʼatäñ toqetjja, ¿kunsa Lot chachatsa phuchanakapatsa yateqsna?

⁵ Diosan servirinakapajj nayra tiemponjja, jan walinakar saykatañatakejj maynit maynikamaw yanaptʼasipjjerïna, ukatwa Jehová Diosajj jupanakar jarkʼaqerïna. Jichha tiemponjja, jupanakatwa wayn tawaqonakasa jilïrinakasa yateqasiraksna. Nayraqat Lot chachat yatjjatapjjañäni.

⁶ Lot chachasa familiapasa jan walinwa uñjasipjjäna, kawkhantï jakapkäna uka Sodoma markaw tʼunjasiñapäna. Ukatwa Diosajj angelanakapjja Lot chachar yatiyapjjañapatak khitäna, ukhamat qollu toqenakar ‘jaltjjañapataki’ (Gén. 19:12-22). Lot chachampi phuchanakapampisti, istʼapjjänwa. Ukampis mayni familiaranakapajj janiw istʼapkänti. Tollqanakapajj janiw Lot chachan arunakap ‘yäqapkänti’, sawkaskaspas ukhamakwa amuyapjjäna. Ukham jan istʼasipjjatap laykojj jiwapjjänwa (Gén. 19:14). Lot chachampi phuchanakapampikiw istʼasipjjatap laykojj qhespipjjäna.

7. ¿Kunjamsa Jehová Diosajj israelitanakar Egipto markat qhespiyäna?

⁷ Jichhasti israelitanakat yatjjatarakiñäni. Jupanakajj Egipto markat janiw sapa mayni munañanakaparjam tʼaqa tʼaqa mistunipkänti. Sañäni, kunapachatï Jehová Diosajj Wila lamar qota payar jaljtaykäna ukhajja, Moisesajj janiw sapakisa, ni mä qawqha israelitanakampikisa uka qotjja makatkänti, jan ukasti Jehová Diosan jarkʼaqatajj taqpachaniw makatapjjäna (Éxo. 14:21, 22, 29, 30). “Jupanakampi chikasti walja kunayman jaqenakarakiw sarapjjarakïna”, taqe ukampejj mayachtʼat sarnaqapjjatapwa uñachtʼayapjjäna (Éxo. 12:38). Inas mä qawqha wayn tawaqonakajj munañaparjamaki yaqha cheqnam sarapjjchispäna, ukampis ¿Jehová Diosajj jupanakar jarkʼaqaspänti? (1 Cor. 10:1.)

8. Josafat reyin urunakapanjja, ¿kunjamsa Diosan markapajj mayachtʼasipjjäna?

⁸ Josafat (Jehosafat) reyejj apnaqkäna uka tiemponjja, Jehová Diosan markapajj jan walinwa uñjasïna, ‘mä jachʼa ejercitow’ jan waltʼayañ munäna (2 Cró. 20:1, 2). Ukham jan walin uñjasisajja, Jehová Diosan servirinakapajj janiw chʼamanakaparuki atinisipkänti, jan ukasti Jehová Diosaruw confiyapjjäna  (2 Crónicas 20:3, 4 liytʼañataki). Janiw sapa maynejj munañaparjamak kuns lurapkänti. Diosan Arupanjja, jupanakat akham siwa: “Judá oraqenkir taqe jaqenakawa [Jehová] Tatitun nayraqatapankapjjäna, ukhamarak warminakapasa, wawanakapasa, jiskʼa wawanakapasa” sasa (2 Cró. 20:13). Wayn tawaqonakasa jilïrinakasa taqeniw Jehová Diosar confiyapjjäna, ukatjja ewjjanakaparjam sarnaqañatakis chʼamachasipjjarakïnwa, ukatwa Jehová Diosajj uñisirinakapat jarkʼaqäna (2 Cró. 20:20-27). Ukhamasti jupanakjamaraki jan walinakan uñjaskañäni ukhajj mayachtʼat saykatapjjañäni.

9. ¿Kunsa nayrïr cristianonakat mayachtʼat sarnaqañ toqet yateqsna?

⁹ Nayrïr cristianonakajja, Diosarojj mayachtʼataw servipjjerïna. Amuytʼañataki, kunapachatï walja judionakasa ukhamarak jan judiöpkis ukanakasa cristianor tukupkäna ukhajja, “taqeniw sum arkapjjäna kunjämtejj apostolonakajj yatichkäna ukhamarjama, maynit maynikama suman jakasisa. Ukhamarakiw tantachasipjjäna Diosat mayisiñataki, tʼantʼa pachjañatakisa” (Hech. 2:42). Arknaqat uñjasipkäna ukhaw kunja mayachtʼatäpjjänsa ukajj jukʼamp qhan amuyasïna (Hech. 4:23, 24). Ukhamasti jan walinakan uñjaskasajja, ¿janit mayachtʼatäñajj wakiskaspa?

10. ¿Kunapachas mayachtʼatäñajj wali wakiskirïni?

¹⁰ Jan wali urunakaw jakʼachasisinki. Uka ururusti Joel profetajj akham sänwa: “Chʼamaka lajja uruwa” sasa (Joel 2:1, 2; Sof. 1:14). Diosan markapasti uka tiempotakejj mayachtʼatäñapawa. Jesusan arunakapat amtapjjañäni, jupasti sänwa: “Mä marka apnaqeritejj jupa kikpa contra jaljtatäspajja ina chʼusaruw tukuspa” sasa (Mat. 12:25).

11. Salmo 122:3, 4 qellqatajja, ¿kunsa mayachtʼatäñat yatichistu? (22 janankir foto uñjjattʼam.)

¹¹ Jutïr urunakatak mayachtʼatäñajj wali wakiskirïniwa. Ukjja, kunjamsa Jerusalenan utanakajj lurasirïna ukatwa yateqsna. Uka markanjja utanakajj jakʼapurjjar luratänwa, ukatwa Salmo qellqerejj “Jerusalén markajj suma uttʼatawa”, mä arunjja, mayachtʼatawa sasin sirïpachäna. Jakʼapura jakasisajj maynit maynikamaw yanaptʼasipjjäna janirakiw ajjsarayasipkänti. Ukham jakasipjjatapajja, kunjamsa Israel tribunakajj Diosar mayachtʼat yupaychapjjerïna ukwa Salmonak qellqerirojj amtayarakpachäna (Salmo 122:3, 4 liytʼañataki). Ukhamajja, jichhürunakansa jutïr urunakansa ukham mayachtʼatäñasaw wakisirakini.

12. Diosan markapampi chik qhespiñatakejja, ¿kunas yanaptʼistani?

¹² ¿Kunatsa mayachtʼatäñajj wali wakisirejja? Ezequiel 38 qellqatan ‘Magog markankir Gog’ satäkis ukaw Diosan markap contra saytʼani sasaw qhanañchi. Ukhamasti uka tiempon mayachtʼatäñajj wali wakisiripunïniwa. Janiw ukhajj akapachan yanapap thaqañasäkiti, jan ukasti jilat kullakanakasampi mayachtʼatäñasawa. Ukampisa, janiw mayachtʼatäpki ukanaka taypinkatas laykukejj qhespkañäniti, jan ukasti sapa mayniw Diosar confiyatasa istʼasirïtas uñachtʼayañasa. Khitinakatï Jehová Diosan sutip aytasipkani ukanakarukiw Jehová Diosajj qhespiyani (Joel 2:32; Mat. 28:20). Diosan markapampi jan mayachtʼatäpki ukanakajj janiw qhespipkaniti (Miq. 2:12).

13. Yatjjatawayktan ukarjamajja, ¿kunsa cristian wayn tawaqonakajj yateqapjjaspa?

¹³ Cheqas qhan amuytanjja, akapachankir wayn tawaqonakjam munañasaruki sarnaqañajj janipuniw akchʼas walïkaspati. Jan wali tiemponakaw jakʼachasisinki ukatakejj wayn tawaqonakasa jilïrinakasa taqeniw maynit  maynikama mayachtʼasiñasa. Ukhamasti jichjatpacha taqeni mayachtʼata serviñataki chʼamachasipjjañäni, ukhamatakwa jutïrin qhespiyasiñäni.

14, 15. 1) ¿Kuna amtampis Jehová Diosajj wakichaskistu? 2) ¿Kuna ewjjanaksa Jehová Diosajj mayachtʼatäñatak churistu?

¹⁴ Jehová Diosajj ‘mayaki serviñatakiw’ yanaptʼaskistu (Sof. 3:8, 9). Jupajj kuntï aka Oraqetak amtki ukan sum jakasiñasatakiw wakichtʼaskistu, niyaw ‘taqe kunsa Criston munañapankañapataki’ alajjpachankirinaksa aka Oraqenkirinaksa mayachthapini, ukhamat mä familjam servipjjañapataki, uka amtapasti phoqasipuniniwa (Efesios 1:9, 10 liytʼañataki). Wayn tawaqonaka, ¿janit ukajj Jehová Diosan markapampi mayachtʼatäñataki chʼamañchapktamjja?

¹⁵ Jehová Diosajj wiñayans wiñayapatak mayachtʼatässna ukwa muni, ukatwa jichjatpach mayachtʼatäñasataki wakichaskistu. Biblianjja sapa kutiw akham sasin amtayistu: “‘Maynita maynikam llakisipjjam’ ‘maynit maynikam munasipjjam’ ‘maynit maynikama chuymachtʼasipjjam’ ukhamarak ‘maynit maynikama chʼamañchasipjjam’” sasa (1 Cor. 12:25; Rom. 12:10; 1 Tes. 4:18; 5:11). Pantjasir jaqenakjamajja, jilat kullakanakasampi mayachtʼatäñajj chʼamakïspawa, ukjja Jehová Diosajj yatiwa. Ukatwa akham sistu: ‘Maynit maynikama perdonasipjjam’ sasa (Efe. 4:32).

16, 17. 1) ¿Kunatsa tantachäwinakarojja sarañasa? 2) ¿Kunsa wayn tawaqonakajj Jesusat yateqasipjjaspa?

¹⁶ Ukhamarusa, Jehová Diosajj tantachäwinakwa churistu, ukhamat mayachtʼatäñasataki. Hebreos 10:24, 25 qellqatajja, tantachäwinakajj ‘munasiñanïñasataki, ukhamarak suma luräwinak uñachtʼayasiñatakiw’ yanaptʼistu. Ukat ‘maynit maynikam wayttʼasiñatakisa’ yanaptʼarakistuwa, ‘Jehová Diosan jutäwipa jakʼankjjatapa yatisinsti jukʼampwa’ mayachtʼatäñataki chʼamachasiñasa.

¹⁷ Jesusajj tantachäwinak wali askitwa uñjirïna. 12 maranïsajj awk taykapampi chikaw Jerusalén templor mä jachʼa tantachäwir saräna, ukanjja awk taykapajj Jesusaruw chhaqayapjjäna, ukampis kunapachatï Joseyampi Mariampejj thaqeri sarapkäna ukhajja, janiw Jesusarojj jupa mita wayn tawaqonakampi chika jikjjatapkänti, jan ukasti templon ley yatichirinak taypin Diosat parlaskirwa jikjjatapjjäna (Luc. 2:45-47).

18. ¿Kunjamsa Diosar mayiñajj mayachtʼatäñatak yanaptʼistaspa?

 ¹⁸ Kunjamtï yatjjatawayktanjja, mayachtʼatäñatakejj tantachäwinakaruw sarañasa, jilat kullakanakasarus munasiñasarakiwa, janirakiw jupanakatak Diosat mayiñsa armañasäkiti. Ukham lurasajj maynit maynikam llakisitaswa uñachtʼaytanjja. Uksti janiw jilïrinakakejj lurapjjañapäkiti jan ukasti wayn tawaqonakas lurapjjañaparakiwa. Wayn tawaqo, taqe ukanak phoqhañataki ¿chʼamachasisktati? Ukhamtï luraskstajja, jilat kullakanakampi mayachtʼatäñatakiw yanaptʼätam ukatjja Supayan apnaqata akapachat jitheqtañatakis yanaptʼarakïtamwa.

19-21. 1) ¿Kunjamatsa mayachtʼatätas uñachtʼaytanjja? Uk uñachtʼäwinakampi qhanañchtʼam. 2) Yanaptʼasir chuyman jilat kullakanakat ¿kunsa yateqsna?

¹⁹ Jehová Diosan markapankirinakajj Romanos 12:5 qellqatarjamaw phoqasktanjja, ukansti siwa: ‘Taqenis mä cuerpokïtanwa’ sasa. Kunja mayachtʼatätansa ukajj kunapachatï jan waltʼäwinakajj utjki ukhaw qhan amuyasi. Amuytʼañataki, 2011 maran diciembre phajjsinjja, jachʼa thayampi jallumpiw Filipinas markankir Mindanao sat islar jan waltʼayäna. Mä arumanakwa 40.000 utanakajj umampi apata uñjasïna, walja jilat kullakanakan utanakapaw uka taypinkarakïna. Sucursalankir jilatanakajj akham yatiyapjjäna: “Comité de socorro ukankirinakajj janïraw yanaptʼañatakis sarapkänti, ukhaw yaqha markanakat yanaptʼa apayanjjapjjäna” sasa.

²⁰ Niya ukhamarakiw Japón markankir jilat kullakanakajj terremotompi tsunamimpi jan waltʼayat uñjasipjjäna, yaqhepanakajj yänakapsa qʼalwa aptʼasipjjäna. Yoshiko kullakat parltʼañäni, jupasti qʼalwa utap aptʼasïna, Tantachasiñ Utat 40 kilometronak sarañanwa jakasïna. Kullakasti siwa: “Terremoto paskäna uka qhepürojj tamanak tumptʼir jilatampi, mayni jilatampiw nanakar thaqer jutapjjatayna” sasa. Kullakajj wali kusisitaw akham saskaki: “Diosat jan jitheqtañataki tama toqe yanaptʼapjjatapajj wali askipuniwa. Ukhamarakiw isinaksa zapatonaksa, bolsanaksa, ikiñ isinaksa apanipjjatayna” sasa. Comité de socorro taypinkiri mä jilatajj akham sarakiwa: “Japón markankir jilat kullakanakajja, taqeniw maynit maynikam yanaptʼasipjjäna. Estados Unidos markankir jilat kullakanakas yanaptʼirejj jutapjjarakïnwa. Kunatsa ukchʼa jayat jutapjjta sasin jisktʼapjjta ukhajja, jupanakasti akham sapjjetuwa: ‘Japón markankir jilat kullakanakampejj mayachtʼatäpjjtwa, ukatwa yanaptʼir jutapjjta’” sasa. Diosan markapajj maynit maynikamaw yanaptʼasipjje. Uk uñjasajj Jehová Diosajj wal kusispacha.

²¹ Maynit maynikam yanaptʼasir chuymanïñajja, jutïr urunakan jan walinakar saykatañatakiw yanaptʼistani. Inas yaqha markankir jilat kullakanakasat jarkʼata uñjaschiñäni, ukampis mayachtʼatäñajj aka ñanqha pacha tukuskani ukhaw yanaptʼistani. Japón markankir Fumiko kullakajja, jachʼa lamar qota llumstanïwitwa (tifón) qhespitayna, jupasti akham siwa: “Akapachan tukusiñapajj wali jakʼankjjewa. Niyaw jan walinakajj tukusjjani, ukhamajj janïr uka uru purinkipanjja, jilat kullakanakar yanaptʼaskakiñäni” sasa.

22. Diosan markapampi mayachtʼatäñatak chʼamachasitasatjja, ¿kunsa katoqañäni?

²² Wayn tawaqonakasa ukhamarak jilïrinakasa mayachtʼatäñatakiw wal chʼamachasisktanjja, ukhamatakwa aka ñanqhapachat qhespiñäni. Jehová Diosajj nayra tiemponjamarakiw jichhürunakan markapar qhespiyani (Isa. 52:9, 10). Jiwasatï Jehová Diosan markapampi mayachtʼatäñatak chʼamachasiskakiñäni ukhajja, qhespiyasiñäniwa. Kuntï katoqawayktan ukanak askit uñjañatakejj kunas yanaptʼistaspa, ukjja jutïr yatichäwinwa yatjjataskañäni.