MÄ QAWQHA cristiano wayn tawaqonakaw película uñtir sarañ amtapjje. Yateqer masinakapat waljaniw uka película uñtir sarapjjatayna ukat wali sumarakwa ukjjat parlapjjäna. Ciner purisajj peliculan cartelanakapanjja, nuwasirinaka jukʼa isin warminak uñjapjje. ¿Kunsa lurapjjpachäni? ¿Uka película uñtasipkakpachäniti?

Taqeniw ukhamanakan uñjasisajj mä amtar puriñasa, amtatasarjamaw ajay toqensa Jehová Diosampi sum apasiñansa walinsa jan walinsa uñjassna. Awisajja, inas kun lurañs munsna ukampis sum amuytʼasisinjja, janiw qhepat uk lurañ munjjaraksnati. Ukhamajj ukajj ¿pächasirïtasti uñachtʼayi jan ukajj ukhamäñajj walikïskicha?

Jehová Diosar munasitas laykuw jakäwisa Jupar katuyasis bautisasiraktanjja. Jupat jan jitheqtasa serviñwa amtawaytanjja, ukjja taqe chuymaw phoqañ muntanjja. Ukampis Supayajj janiw uk lurañas munkiti, kuntï amtawayktan ukwa pʼakintayañ munistu (Apo. 12:17). Jiwasajj Jehová Diosar serviña, kamachinakap phoqañwa amtawaytanjja, janipuniw uka amtas mayjtʼayañasäkiti, ukhamtï lursna ukhajja, jakäwissa aptʼassnawa. Ukajj ¡wali llakkañäspawa!

2.600 jila maranak nayrajja, Babilonia apnaqer Nabucodonosor reyiw qorita mä kʼari dios lurayäna. Taqenin ukar yupaychapjjañapwa mayirakïna. Uk jan luririnakarojja, aqkir hornoruw jaqontasiñapäna. Sadrac Mesac Abednego waynanakajja, taqe chuymaw Jehová Diosar servipjjäna, jupar istʼañwa amtapjjarakïna. Kʼari diosar jan killtʼasipjjatap laykojja, aqkir hornor jaqontataw uñjasipjjäna. Jehová Diosan kamachip jan pʼakintañ laykojja, jiwañwa ajllipjjäna, ukampis Diosaw jupanakar qhespiyäna (Dan. 3:1-27).

 Ukhamarakiw Daniel profetajj Jehová Diosar serviña amtäna. Diosar mayisirtï jupar uñjapjjaspäna ukhajja, leonanakan uyupar jaqontataw uñjasispänjja, ukjja jupajj sumwa yatiskäna. Yatkchïna ukasa, kunjamarutï yatitäkänjja, Diosarojj urun kimsa kuti mayisiskakïnwa. Ukham luratapatjja, Jehová Diosajj ‘leonanakan lakapatwa’ qhespiyäna (Dan. 6:1-27).

Jichhürunakanjja, ukhamarakiw taqe chuyma Diosar servirinakajj utjaraki. África cheqankir mä escuelanjja, Jehová Diosan Qhanañchirinakapan mä qawqha wayn tawaqonakajj janiw banderar aruntañ munapkänti. Mayni yateqer masinakapjam jan aruntapjjatap laykojja, escuelat jaqsuñwa amtapjjäna. Mä qawqha tiempo qhepatjja, ministro de educacionaw uka markar purïna, ukatjja uka cristiano wayn tawaqonakampiw parltʼarakïna, jupanakasti wali respetompi ukat jan ajjsartʼasaw kunatsa banderar jan aruntapki ukjja qhanañchtʼapjjäna. Ukhat jichhakamajja, janiw cristiano wayn tawaqonakajj uka cheqan ukham jan walinakan uñjasjjapjjeti, janirakiw Jehová Diosan kamachinakap pʼakintayañatakejj waytʼjjapjjeti.

José jilatat parltʼarakiñäni, warmipaw cancer usumpi jiwjjäna. Joseyan familiaranakapajj jiwatar imañatak amtanakapjja, respetapjjänwa, ukampis warmipan familiaranakapajj janiw Jehová Diosar servipkänti, ukatwa kunatï Diosatak jan walïki uka costumbrenakaparjam imañ munapjjäna. Jilatasti akham siwa: “Nayajj janiw ukham lurayañ munkayätti, ukatwa wawanakajar costumbrenakaparjam lurayañ mayipjjäna, ukampis wawanakajajj janiw ukar iyawsapkänti. Ukhamäkchïna ukasa, jupanakajj utajan velorio lurañ munasipkakïnwa, ukatwa ‘velorio lurañpun munapjjsta ukhajja, janiw utajan lurapkasmati’ sasaw sistjja. Diosar servipjjataj layku velorio jan lurapjjataj-jja yatisipkänwa. Ukhamasti uka toqet wal parlakiptʼasajja, yaqha cheqanwa velorio lurjjapjjäna” sasa

Jilatajj saskakiwa: “Ukham llakin uñjasisajja, Diosaruw nayampiru familiajampiru yanaptʼañapataki mayisirïta, ukhamat kamachinakap jan pʼakintañataki. Jehová Diosajja, mayisitajarojj istʼänwa jan walinakar atipañatakis ewal yanaptʼawayapjjetu” sasa. José jilatampi yoqanakapampejja, janipuniw Diosat jitheqtapkänti, ni kamachipsa pʼakintapkarakïnti.

32 maran Pascua fiesta mä qawqha uru pasatatjja, fenicia markat jutir mä warmiw Jesusar Sidón markan jakʼachasïna, phuchapat ñanqha ajayu jaqsuñapatakiw kutin kutini Jesusar mayïna. Qalltansti Jesusajj janiw uka warmir jayskänti, arkirinakaparusti akham sänwa: “Diosajj khitanituwa Israel markan chhaqatäkis uka ovejanakar thaqeri” sasa. Warmisti mayiskakïnwa, ukatwa Jesusajj akham säna: “Janiw walïkiti wawanakat tʼantʼa apaqasin anqankir anunakar churañajja” sasa. Ukampis warmejj iyawsäwimpiw Jesusar säna: “Jïs, Tata. Ukampis anunakajj uywirinakan mesapat jalaqtkis uka tʼantʼa puchunaksa manqʼasirakiwa” sasa. Jesusasti warmin mayitap istʼänwa, phuchaparusti qollarakïnwa (Mat. 15:21-28).

Ukham lurasinjja, Jesusajj Jehová Diosatwa yateqasiskäna, Diosasti wakiski ukhajj kunanaksa mayjtʼayarakiwa. Amuytʼañataki, kunapachatï israelitanakajj qorit wakaqallu lurapkäna ukhajja, Diosajj jupanakar jiwarayañ amtäna, ukampis Moisesaw Diosar wal achiktʼasïna, ukatwa Diosajj amtatap mayjtʼayäna (Éxo. 32:7-14).

Apóstol Pablosti Jehová Diosata Jesusat yateqasisaw sarnaqarakïna. Misionerjam yaqha markanakar viajkäna ukhajja, janiw Marcosar irpañ munkänti, ¿kunatsa? Nayrïr kuti misionerjam sarkäna ukhaw juparusa Bernabearusa jaytjatayna. Qhepatjja Marcosajj janiw nayrjamäjjänti, taqe chuymaw chʼamachasjjäna, Diosarus sumarakwa sirvjjäna, ukanak yatisaw Pablojj Timoteor akham säna: “Marcosaru  thaqtam ukatsti jumamp chika irpanim, irnaqäwejjanjja nayarojj yanapitaniwa” sasa (2 Tim. 4:11).

¿Jiwasat kamsasirakispasa? Awisajja, Jehová Diosjam amuyunakas mayjtʼayañaw wakisispa. Sañäni, inas kuntï jaqenakat amuyktan ukanak mayjtʼayañajj wakischini. Jehová Diosasa Jesusasa, jan pantjasirïkasasa awisajj amuyunakap mayjtʼayapjjerïnwa. Jiwasajj pantjasir jaqjamajja, ¿janit ukham lurañajj wakiskarakispa? Kunatsa ukham lurapjje, kunjamanakansa jikjjatasipjje ukanak yatisaw amuyus mayjtʼayaraksna.

Awisajj inas Diosar serviñatakejj amtanakas mayjtʼayañajj wakischispa. Bibliat yaqhep yateqerinakajja, walja maranakaw tantachäwinakar sarjjapjje, ukampis janiw bautisasiñ amtapkiti. Yaqhep jilat kullakanakajj tiemponïkasas janiw precursorjam serviñsa amtapkiti. Yaqhep jilatanakasti janirakiw taman jukʼamp yanaptʼañatakis chʼamachasipkarakiti (1 Tim. 3:1). ¿Jumajj ukhaman uñjasiraktati? Jehová Diosasti uka amtanak phoqañatakiw wali munasiñampi invittʼasktam. Ukhamasti, amuyunakam mayjtʼayasin Jehová Diosar jukʼamp serviñatak chʼamachasiskakim.

Ella sat kullakat parltʼañäni, jupasti África cheqanwa Betelan irnaqtʼaski, kullakasti siwa: “Kunapachatï Betelar purkayäta ukhajja, qawqha tiempos ukan irnaqäjja uk janiw yatkayätti, ukampis taqe chuymaw Diosar serviñ munayäta. Qalltanjja, familiajatwa wal llakisirïta, jupanakampi yatitayätwa. Compañerajaw jan sinti llakisiñajatak chuymachtʼirïtu, ukatwa ukan qheparañ amtawayta. Jichhasti tunka maraw ukanjjta, janiw mistuñ munjjti jilat kullakanakaruw jukʼamp yanaptʼañ munta” sasa.

Cainajj jilaparusti wal envidiasïna ukat colerampirakiw apayasïna. Jehová Diosajja,  ukhamäskakïta ukhajja jan waliruw purtʼasïta sasaw Cainar säna. Ukatsti ‘juchajj jakʼamankaskiwa’ sarakïnwa. Cainajj amuyup mayjtʼayaspänwa, ukampis janiw Diosan ewjjapar istʼkänti. Ukatwa jilaparu jiwayäna, ukhamatwa nayrïri jaqe jiwayiriru tuküna (Gén. 4:2-8).

Kunas Uzías reyimpejj pasäna uk jichhajj uñjarakiñäni. Qalltanjja, Jehová Dios nayraqatan wali sum sarnaqäna, sumwa Diosampis apasirakïna, ukampis qhepatjja, jachʼa jachʼaw tukjjäna. Mä kutejja, temploruw incienso loqtiri mantäna, ukjja sacerdotenakakiw lurapjjañapäna. Kunapachatï uk jan lurapjjañapataki mayipkäna ukhajja, janiw amtap mayjtʼaykänti, wal ‘colerasïna’ janirakiw istʼkänsa. Ukham jan wal luratapatjja, Jehová Diosajj lepra usumpiw castigäna (2 Cró. 26:3-5, 16-20).

Awisajja, amuyunakas mayjtʼayañaw wakisispawa, ukwa uka saranaqäwinakajj uñachtʼayistu. Joachim jilatat parltʼañäni, jupajj 1955 maranwa bautisasïna, ukampis 1978 maranjja, Diosan markapat jaqsutaw uñjasïna. 20 jila maranak qhepatsti, arrepentisisajj Jehová Diosan markaparuw wasitampi kuttʼanjjäna. Jichhakiw mä irpir chuymanejj akham jisktʼatatayna: “¿Kunatsa walja maranak kuttʼaniñatak suyayätajja?” sasa. Joachim jilatajj akham sänwa: “Chuyma ustʼataw jikjjatasiyäta, jachʼa jachʼarakiw tukurïyäta. Janiw uk jaytañ puedkayätti. Diosan markapat jaqsutäkchiyäta ukasa, Jehová Diosan Qhanañchirinakapaw cheqa yatichapjje sasaw sirïta” sasa. Joachim jilatajj taqe chuymaw arrepentisiwayi, ukat kunjam chuymanïkänti uksa apanukuwayarakiwa.

Awisajj amtanakas mayjtʼayañasa, kuna lurañanak jaytañasa wakisiwa. Ukhamasti, taqe kunsa Jehová Diosar kusisiyañataki lurapjjañäni (Sal. 34:8).