JEHOVÁ DIOSAJJA, sapa mayniruw kunatï walïki jan walïki uk ajlliñasatak jaytawayistu, cheqas ukajj Jupan mä regalopawa. Jiwasatï cheqa yatichäwiru yanaptʼañataki, Diosan sutip jachʼañchañataki, munañap phoqasiñapataki yanaptʼañ amtañäni ukhajja, Jehová Diosajj bendicistaniwa. Maynin jariyataki, ajjsarañataki sirvsna uk janiw Diosajj munkiti, jan ukasti taqe chuyma serviñaswa muni.

Amuytʼañataki, israelitanakajj Sinaí wasaran jikjjatasipkäna ukhajja, Jehová Diosajj templop lurapjjañapatakiw walja ewjjanak churäna. Akham sänwa: “[Jehová] Tatitutakejj mä ofrenda apthapipjjam. Taqe khitinakatejj Tatituru chuymapat ofrenda churañ munapki ukanakajja taqe chuymaw churapjjañapa” sasa (Éxo. 35:5). Sapa mayni israelitaw utjataparjam churapjjañapäna, ukatjja sapa maynirakiw jukʼsa jan ukajj waljsa chuymapat ofrendanaka churapjjañapäna, taqe ukanakasti Diosan amtanakap phoqasiñapatakiw yanaptʼirïna. ¿Kunjamsa Diosan markapajj uka mayitar phoqapjjäna?

‘Chuymanakapan amthapisirinakajja’, taqe chuymaw “ofrendanaka” churapjjerïna. ‘Taqe chachanaka, warminakaw apanipjjäna tʼirtʼasiñ ganchonaka, sortijanaka, argollanaka, qorit lurat brasaletenaka, yaqha qorit luratanaka, azul telanaka, wila morado tela, wila tela, lino sat suma hilo, cabriton tʼawrapa, wilar teñita uwij lipʼichi, tejón sat animalanakan lipʼichinakapa, acacia sat lawanaka, suma qalanaka, suma qʼapkir perfumenaka, suma aceitenaka’. “Apanipkäna uka ofrendanakasti waljapuniw jiltʼarakïna” (Éxo. 35:21-24, 27-29; 36:7).

Jila valorani ofrendanaksa churapkchïnjja, wajjtʼasir chuymanïpjjatapaw Diosatakejj wali askïnjja. Cheqa yupaychäwir yanaptʼañatakejja, Diosan markapajj tiempo ukat kuna lurañanaktï yatipkäna ukanakampiw yanaptʼapjjäna. “Taqe suma amuytʼan warminakasti amparanakapampejj qapup[jjerïnwa]”. Ukhamarak ‘kawkïr warminakatejj chuymanakapan kunsa lurañ munapkäna ukanakajja cabriton tʼawranakapatwa qapupjjarakïna’. Ukhamarusa Jehová Diosajj Bezaleel chacharuw yatiñsa, suma amuytʼanïñsa churäna, ukhamarak ‘taqe kunanak lurirïñapatakisa’ yanaptʼarakïnwa. Jehová Diosajj Bezaleel, Aholiab chachanakarojj lurañanak sum phoqapjjañapatakiw yatiñ kankaña churäna (Éxo. 35:25, 26, 30-35).

Jehová Diosajj israelitanakar ofrendanak churapjjañapataki maykäna ukhajja, ‘taqe chuyma churirinakajj’ cheqa yupaychäwir yanaptʼapjjaniwa sasaw confiyäna. Ukampis ukham wajjtʼasirinakarojja, Diosajj suma thakinjam irpäna, kusisit jakasipjjañapatakis yanaptʼarakïnwa. Jehová Diosajja, wajjtʼasir chuymaninakarojj yanaptʼiwa, suma amuytʼanakwa churaraki, ukhamat Jupan munañap phoqapjjañapataki (Sal. 34:9). Ukhamasti wajjtʼasir chuymampitï Jehová Diosar serviñäni ukhajja, Jupajj wal bendicistani.