GUY HOLLIS PIERCE jilatajja, Jehová Diosan Qhanañchirinakapan Oraqpachan Jilïr Irpirinakapa taypinkänwa. 2014 marzo phajjsin 18 uru saraqataruw aka Oraqen Diosar serviñ tuktʼayawayjje, jupasti 79 maranïnwa. Niyakejjay Jesucriston maynïr jilapächïnjja, alajjpachan jakañataki jaktayatäjjewa (Heb. 2:10-12; 1 Ped. 3:18).

Guy Pierce jilatajja, Auburn (California, Estados Unidos) markanwa 1934 noviembre 6 uru saraqataru nacïna, 1955 maranwa bautisasirakïna. 1977 maranjja, Penny kullakampiw casarasïna, jupampirakiw walja wawanakapar uywawayapjje. Jilatasti wali munasir awkipunïnwa. 1982 maranjja, esposapampiw precursorjam serviñ qalltapjjäna. 1986 maransti, tamanak tumptʼirjamarakiw Estados Unidos markan sirvjjapjjarakïna, 11 maraw ukham serviwayapjje.

1997 maranjja, Estados Unidos markankir Betelanwa sirvjjapjjäna, jilatasti Departamento de Servicio ukanwa yanaptʼaskäna. 1998 maransti, Betelitanak uñjirinakapan yanapiripjamaw irnaqäna. 1999 octubre 2 uru saraqatarojja, Watch Tower Bible and Tract Society of Pennsylvania uka jachʼa tantachäwejj maran mä kuti apaski ukanwa, Pierce jilatan Oraqpachan Jilïr Irpirinak taypin uttʼayasjjatapajj yatiyasïna. Aka qhepa maranakanjja, Betelitanakan uñjirinakapjama, qellqerinakan uñjirinakapjama, qellqatanak toqet uñjirinakapjama, uñjirinakan pʼeqtʼirinakapjama ukhamaw serviwayi.

Wali kʼuchi jilatänwa, ukatwa taqenis juparojj jan ajjsartʼas jakʼachtʼasipjjerïna. Wali munasiri, altʼat chuymani ukhamänwa, Jehová Diosan kamachinakapsa wali respetompiw uñjäna, Diosarus confiyarakïnwa, ukatwa taqenis jupar wal munasipjjäna. Guy Pierce jilatajj akham sirïnwa: “Intejj janis jalsunikispawa, ukampis Jehová Diosan amtanakapajj phoqasipuniniwa” sasa. Uksti taqpach jaqenak yatipjjaspa ukwa munäna.

Pierce jilatajja, Diosarojj taqe chuymaw servirïna. Wali alwatwa sartasirïna ukat awisajj arumkamaw trabajirakirïna. Taqe oraqpachankir markanakaruw jilat kullakanakar chʼamañchtʼir sarawayi. Betelitanakampi parltʼañatakejj tiemp apstʼasipunirïnwa, khitinakatï ewjjtʼanakapsa yanaptʼapsa mayipkäna jan ukajj jupamp aleq parltʼañaksa munapkäna ukanakatakisa tiemp apstʼasirakirïnwa. Cheqas jupar uñtʼirinakajja, suma katoqtʼasirïtapsa, suma amigötapsa ukat Bibliarjam chuymachtʼkir ewjjtʼanakapsa, janipuniw armapkaniti.

Esposapasa sojjta wawanakapasa allchhinakapasa allchhinakapan wawanakapasa ukhamarak awkiparjam uñjirinakasa, janipuniw jupat armasipkaniti. 2014 marzo 22 sábado urojja, Mark Sanderson jilataw Brooklyn Betelan jiwat imjjañataki mä discurso arstʼäna, jupasti Oraqpachan Jilïr Irpirinak taypinkarakiwa. Ukanjja, Pierce jilatajj alajjpachan jakañataki mä suytʼäwiniwa sasaw qhañanchäna, ukatsti Jesusan aka arunakapwa liytʼarakïna: “Awkejjan utapanjja walja utjäwinakaw jakañatak utji [...]. Sarasinsti ukat mä utjäw wakichasinjja, wasitampiw jutä jumanakaru irpasjjañataki, kawkhankkätï nayajj jumanakajj ukkhankapjjañamatakiraki. Jumanakajj yatipjjtawa kawkharutejj sarktjja uka, kunjäm puriñsa yatipjjaraktawa” sasa (Juan 14:2-4).

Pierce jilatat amtasipuniñäniwa. Jupasti kawkharus puriñapäna ukjja sumwa yatïna, ukaw wali kusiskañajja.