1, 2. Jesusajj jaktkäna uka urojja, ¿kunjamsa arkirinakaparojj chʼamañchtʼäna?

KUNAPACHATÏ Jesusajj jaktkäna uka urojja, arkirinakapat paniniw mä jiskʼa markaru sarasipkäna, ukasti Jerusalenat niya tunka mayan kilometronak sarañankänwa. Jupanakajj kunanakatï paskäna ukanakat wali llaktʼatäsipkänwa, janiw Jesusan jaktatap yatipkänti. Ukham sarasipkipanwa Jesusajj akatjamata jupanakar uñstäna, ukatsti jupanakampi chikaw sararakïna. ¿Kunjamsa Jesusajj arkirinakapar chuymachtʼpachäna? Jesusasti amuytʼayañwa qalltäna “jupa toqet taqe qellqatanakajj parlki ukanakata, Moisesan libropat qalltasina, profetanakan taqe qellqatanakapat yatjjatasa” (Luc. 24:13-15, 27). Ukham qhana arunakampi qellqatanakat qhanañchtʼatapajj chuymanakaparuw purtʼäna (Luc. 24:32).

² Jesusan uka pä arkirinakapasti, uka arumpachaw Jerusalén markar kuttʼanipjjäna. Mayni apostolonakan ukar purisasti, kunatï paskäna ukwa yatiyapjjäna. Ukham parlasipkipanwa wasitampi Jesusajj uñstarakïna. Uk uñjasinjja, apostolonakapajj wal sustjasipjjäna. Ukatwa Jesusajj ‘¿kunatsa chuymanakaman pächasiñanakamajj utjapjjtamjja?’ sasin säna. Ukhamajj ¿kunjamsa  Jesusajj jupanakar chʼamañchtʼäna? ‘Qellqatanakatwa amuytʼayäna’ (Luc. 24:45).

3. 1) ¿Kuna llakinakansa Diosan arunakap yatiykasajj uñjassna? 2) ¿Kunas jan aynachtʼañatakejj yanaptʼistaspa?

³ Jesusan arkirinakapjamarakiw jiwasajj llakinakamp aynachtʼata jikjjatassna. Inas Diosan arunakapat yatiyañatak wal chʼamachasiskstan, ukampis jaqenakan jan istʼatajja, yatiyatasajj inamayakïkaspas ukhamwa amuyassna (1 Cor. 15:58). Ukat inas Bibliat yateqerinakasajj Diosar serviñan jan nayrar sartapkchispati, yamas yaqhepajj inas Diosat jan kunsa yatiñ munjjapjjchispati. Ukhamanakan uñjasisajja, ¿kunas Diosan arunakap yatiyaskakiñatak yanaptʼistaspa? Jesusan uñachtʼäwinakapat sum amuytʼañaw yanaptʼistani. Jichhajj kimsa uñachtʼäwinakapat yatjjatañäni ukat kunjamsa ukanakajj yanaptʼistani uksa uñjarakiñäniwa.

4. Phawantasin ikir sarjjer jaqet uñachtʼäwejja, ¿kun sañsa munpacha?

⁴ Marcos 4:26-29 liytʼañataki. Jesusajj phawantasin ikir sarjjer jaqet parlkäna ukajja, ¿kun sañsa munpacha? Phawantir chachajja, Diosan Reinopat sapa mayni yatiyirimpi sasiwa. Jathasti, Diosan Reinopat yatiyäwimpi sasirakiwa, ukasti suma chuyman jaqenakaruw purtʼi. Phawantir jaqejja, “utapar ikiriw sarjje, ukatsti sartjjarakiwa. Ukhamaw urus arumas pasawayi”. Jathasti phawantaski ukhat cosecha apthapiñkamaw jukʼat jukʼata alsunisin jiltaski. Maynejja, ukhamarakiw Diosar serviñan jukʼat jukʼata jiltaraki. Kunapachatï taqe chuyma Diosar serviñ amtjje ukhaw jiltatapajj qhan amuyasi, ukat jakäwip Diosar katuyasisa bautisasjje ukhajja, mä suma achsa churkaspa ukhamawa.

5. ¿Kunatsa Jesusajj phawantasin ikir sarjjer jaqet parlpachäna?

⁵ ¿Kunatsa Jesusajj uka uñachtʼäwit parlpachäna? Jehová Diosakiw ‘wiñay jakañatak wakichatäpki’ uka jaqenakan chuymapanjja cheqa yatichäw jiltayaspa, ukwa Jesusajj uñachtʼayaskäna (Hech. 13:48; 1 Cor. 3:7). Jiwasajja, phawantirimpi umampi irpjjatirimpi sasiktanwa, Jehová Diosaw jiltayirejja. Kunjamtï Jesusan uñachtʼäwipanjja phawir jaqejj jathan jiltaskatap jan amuykänjja, ukhamarakiw jiwasajj Bibliat yateqerinakan jiltaskatap jan amuyksnati. Ukampis tiempompejja, jathar uñtasit Diosan Reinopat yatiyäwejja, suma achunakwa churaspa. Cheqas mä machaq yatiyiriw jiwasampi chika yatiyjjaspa (Juan 4:36-38).

6. ¿Kunsa Diosar serviñan jiltayañat yateqtanjja?

⁶ Jesusajj phawantasin ikir sarjjer jaqet parlkäna uka uñachtʼäwitjja, ¿kunsa yateqsna? Maya: Bibliat yateqerinakaru Diosar serviñan jiltayañajja janiw jiwasar waktʼkistuti, ukwa yateqtanjja. Ukat jankʼaki bautisasiñapatakis janiw jariyañasäkiti, ukatakejj altʼat chuymanïñaw yanaptʼistani. Cheqas taqeniw jaqenakaru sum yanaptʼañataki chʼamachastanjja, ukampis sapa mayniw jakäwip Diosar katuyasiñ amtjjañapa. Jehová Diosajja, Jupar munasitap layku taqe chuyma jakäwip katuyasipjjaspa ukwa muni (Sal. 51:12; 54:5-6; 110:3).

7, 8. 1) Phawantasin ikir sarjjer jaqetjja, ¿kunanakampsa yateqsna? Uk mä uñachtʼäwimp qhanañchtʼam. 2) ¿Kunsa Jehová Diosampita Jesusampit yatichistu?

⁷ Paya: Diosan arunakapat yatiyatasajj inamayakïkaspas ukhamwa awisajj amuysna, ukampis Jesusan uñachtʼäwipat sum amuytʼañaw jan aynachtʼañatakejj yanaptʼistani. Ukat wali paciencianïñaw wakisiraki (Sant. 5:7, 8). Bibliat yateqerinakatï Diosar serviñan jan nayrar sartapkani ukhajja, janis suma yatichirïksna ukham janiw amuyañasäkiti. Jehová Diosajja, jan walinak jaytañatak jankʼakïpki ukat altʼat chuymanïpjjaraki uka jaqenakarukiw  yanaptʼi (Mat. 13:23). Jehová Diosar sum servitasajja, janiw qawqha jaqenakarus yanaptʼasktan ukarjamäkiti, jan ukasti taqe chuyma chʼamachasitasaw Diosatakejj wali askejja (Lucas 10:17-20; 1 Corintios 3:8 liytʼañataki).

⁸ Kimsa: Cheqa yatichäwejj kunjamsa maynin jakäwip mayjtʼayaski ukjja, janiw amuyksnati. Uk sum amuytʼañatakejj mä chacha warmit parltʼañäni, jupanakajj mä misionerompiw Bibliat yateqapjjäna. Mä kutejja, “yatiyir mistuñwa munapjjta” sasaw misioneror sapjjäna. Jilatasti sarakïnwa: “Ukatakejj cigarro fumañ (jan ukajj pitañ) jaytjjapjjañamawa” sasa. Ukampis jupanakajja, walja phajjsinakaw cigarro fumañ apanukjjapjjatayna, misionerojj janiw uk yatkänti. ¿Kunatsa cigarro fumañ jaytjjapjjpachäna? Jehová Diosajj kʼari chuyman jaqenakarojj uñisiwa, ukat cigarro fumasipkatapsa uñjanirakispawa, ukwa amuyapjjäna. Ukhamasti, cigarro fumasipkakiniti janicha ukwa amtapjjañapäna. Jupanakasti Jehová Diosaruw taqe chuyma munasipjjäna, ukaw mä suma amtar puriñatakejj yanaptʼäna. Janis misionerojj amuykchïnjja, Diosar serviñan jupanakajj jiltatäjjapjjänwa.

9. Chawlla katuñ qänat uñachtʼäwejja, ¿kun sañsa munpacha?

⁹ Mateo 13:47-50 liytʼañataki. Jesusajj chawlla katuñ qänat parlkäna ukajja, ¿kun sañsa munpacha? Diosan Reinopat yatiyäwejja, chawlla katuñ qänajj qotar jaqontaski ukampi sasiwa, ukwa Jesusajj uñachtʼayaskäna. Ukampis kunjamtï qänajj walja “taqe casta chawllanaka” katskejja, ukhamarakiw Diosan arunakapat yatiyäwejj walja millón taqe casta jaqenakar purtʼaskaraki (Isa. 60:5). Ukasti Jachʼa Tantachäwinakana ukhamaraki Jesusan jiwäwip amtañatak tantachäwinakanwa qhan amuyasi. ‘Suma chawllanakajja’, mä arunjja, suma chuyman jaqenakajja Diosan markaparuw mantjjapjje. ‘Jan wali’ chawllanakasti, mä arunjja, Diosar jan istʼir jaqenakasti, janiw Dios nayraqatan askit uñjatäpkiti.

10. ¿Kunatsa Jesusajj chawlla katuñ qäna uñachtʼäwit parlpachäna?

¹⁰ ¿Kunatsa Jesusajj uka uñachtʼäwit parlpachäna? Suma chawllanakampi jan wali chawllanakampejja, janiw jachʼa tʼaqhesiñ urun jalanoqaskaniti. Uka uñachtʼäwejja, kunanakatï aka qhepa urunakan pasaski ukwa uñachtʼayistu. Diosar uñtʼir jaqenakatjja, janiw taqpachanejj Jehová Dios toqet saytʼasipkaniti, ukwa Jesusajj uka uñachtʼäwimpejj qhanañchäna. Walja jaqenakaw tantachäwinakarus jutapjje, yaqhepanakajj Bibliatsa yatjjatapjjaraki, ukampis janiw Diosar serviñ amtapkiti (1 Rey. 18:21). Yaqhanakajj Diosan markapatsa jitheqtjjapjjarakiwa. Yaqhep wayn tawaqonakajj Diosar servir awk taykanakan uywataw jilsuwayapjje, ukampis janïraw Diosar serviñ amtapkiti. Cheqas sapa mayniw mä suma amtar puriñapa sasaw Jesusajj qhan ewjjtʼäna. Ukham luririnakarojja, Jehová Diosajj ‘wali askitwa uñji’ (Ageo 2:7, NM).

11, 12. 1) ¿Kunsa chawlla katuñ qäna uñachtʼäwit yateqsna? 2) ¿Kunsa Jehová Diosampita Jesusampit yatichistu?

¹¹ Jesusajj chawlla katuñ qänat parlkäna uka uñachtʼäwitjja, ¿kunsa yateqsna? Chʼamachasisktan ukasa, Bibliat yateqerinakasasa, jan ukajj wawanakasasa Diosar serviñ inas jan amtapkchispati, ukampis uka uñachtʼäwit sum amuytʼañaw llakinakampi jan aynachtʼañatakejj yanaptʼistani. Maynejja, Bibliatsa yatjjataskaspawa jan ukajj cristiano awk taykampisa uywataskaspawa, ukampis janiw Jehová Diosar serviñ amtapkapunispati. Khitinakatï Diosampi jan apnaqatäñ munapki ukanakajja, markapat jaqsutaw uñjasipjjani.

 ¹² Ukhamajj Diosan markapat jitheqtirinakarojja, ¿janit wasitampi taman katoqasjjaspa? ¿Diosar jan katuyasirinakasa, wiñayatak ‘jan walit’ uñjatäjjapjjeti? Janiw ukhamäkiti. Janïr jachʼa tʼaqhesïwi uru purinkipanjja, Diosan markaparojj kuttʼasinipkaspawa. Jehová Diosajj akhamwa jupanakar jawsaski: “¡Nayaru kuttanjjapjjam ukatsti nayajj jumanakaru kuttanjjarakïwa!” sasa (Mal. 3:7). Uka arunakajj Jesusan yaqha uñachtʼäwipatwa amtayistu. Ukasti herencia tukuntir waynawa (Lucas 15:11-32 liytʼañataki).

13. Herencia tukuntir waynat uñachtʼäwejja, ¿kun sañsa munpacha?

¹³ Jesusajj herencia tukuntir waynat parlkäna ukajja, ¿kun sañsa munpacha? Khuyaptʼayasir awkit aka uñachtʼäwin parlki ukajja, munasiri Jehová Diosampi sasiwa. Herencia tukuntir waynasti, Diosan tamapat jitheqtirinakampi sasirakiwa. Ukham lurasajja, Diosat jitheqtas ‘yaqha markarusa’, mä arunjja, Supayan apnaqat aka ñanqha pacharus sarapkaspa ukhamawa (Efe. 4:18; Col. 1:21). Mä qawqha tiempotjja, yaqhepajj sum amuytʼasisinwa, Jehová Diosan markaparu wasitampi kuttʼanjjapjje. Taqe chuyma arrepentisirinakarusa, altʼat chuymaninakarusa, Jehová Dios Awkisajj perdoniwa (Isa. 44:22; 1 Ped. 2:25).

14. ¿Kunatsa Jesusajj herencia tukuntir waynat parlaskäna?

¹⁴ ¿Kunatsa Jesusajj uka uñachtʼäwit parlpachäna? Jehová Diosajja, khitinakatï markapat jitheqtatäpki ukanakan wasitampi kuttʼanjjapjjañapwa muni, ukwa Jesusajj uka uñachtʼäwimpejj qhanañchaskäna. Herencia tukuntir waynan awkipajja, wawapan kuttʼaniñapat janiw pächaskänti. Kunapachatï ‘jayankkipan wawapar kuttʼanir uñjäna’ ukhajja, jankʼakiw katoqer saräna. Uka uñachtʼäwejj Diosat jitheqtirinakan kuttʼanipjjañapatakejj ¡wali chuymachtʼkiripuniwa! Inasa Diosat jitheqtatäkasin wali aynachtʼatasipkchi, ukat Diosan markapar wasitampi kuttʼaniñas wali chʼamarakïchi, ukhamäkchi ukasa, chʼamachasisipkakiñapawa. Kuttʼanjjapjjani ukhajja, Jehová Diosasa Jesusasa angelanakasa wal kusisipjjani (Luc. 15:7).

15, 16. 1) Herencia tukuntiri waynatjja, ¿kunsa yateqsna? Ukjja, uñachtʼäwinakampi qhanañchtʼam. 2) ¿Kunsa Jehová Diosampita Jesusampit yatichistu?

¹⁵ Jesusajj herencia tukuntir waynat parlkäna uka uñachtʼäwitjja, ¿kunsa yateqsna? Jehová Diosatwa yateqasiñasa. Janiw ‘sinti askïksnas’ ukham tukuñasäkiti, ukhamäsna ukhajja, janiw taqe chuyma arrepentisisin  kuttʼanirinakarojj katoqañsa munjjsnati. Ukatjja, jiwas pachpaw Diosar serviñansa aynachtʼaraksna (Ecl. 7:16, NM). Yaqha toqetjja, tamat jitheqtatäpki ukanakarojja, janis mayampis kuttʼanjjapjjaspa ukham janiw amuyañasäkiti, jan ukasti ‘chhaqat uwijakïpkaspas’ ukhamakwa uñjañasa (Sal. 119:176). Ukhamasti, tamat jitheqtatanakampi jikisiñäni ukhajja, ¿wasitampi kuttʼanipjjañapatakit wali munasiñampi yanaptʼañäni? ¿Irpir chuymaninakaruti yanaptʼapjjañapatak yatiyañäni? Jiwasatï Jesusan uñachtʼäwipat sum amuytʼañäni ukat ukarjam sarnaqarakiñäni ukhajja, tamat jitheqtatanakarojj yanaptʼañäniwa.

¹⁶ Diosan markapar kuttʼanirinakajja, Jehová Diosaruw khuyaptʼayasïritapata wal yuspärapjje, tamarus yanaptʼatapat yuspärapjjarakiwa. Mä jilatajja 25 maranakaw tamat jaqsuta uñjasïna, jupajj akham siwa: “Wasitampi tamar kuttʼanisinjja, wali kusisitapuniw jikjjatasta, ukhamatwa ‘kusiskañ urunak’ Jehová Diosat katoqawayta (Hech. 3:19). Jilat kullakanakajj taqeniw ¡wal yanaptʼapjjetu munasiñampiw sum uñjapjjarakitu! Jichhajj Diosan markapanjja mä suma familianëjjtwa” sasa. Mä tawaqo kullakasti phesqa maraw Jehová Diosan markapat jitheqtatäna, kuttʼanjjasinjja akham siwa: “Kunjamtï Jesusajj siskänjja, jilat kullakanakajj wali munasiñampiw katoqawayapjjetu. Jehová Diosan markapjamajja, ¡janipuniw yaqhajj utjkaspati!” sasa.

17, 18. 1) ¿Kunanaksa Jesusan kimsa uñachtʼäwinakapat yateqawaytanjja? 2) ¿Kun lurañsa amtañasa?

¹⁷ ¿Kunsa Jesusan aka kimsa uñachtʼäwinakapat yateqawaytanjja? Maya, Bibliat yateqerinakar Diosar serviñan jiltayañajja, janiw jiwasar waktʼkistuti, jan ukasti Jehová Diosakiw jiltayaspa. Paya, waljaniw jiwasamp chika tantachasisipkaspa, jan ukajj Bibliatsa yatjjatasipkarakispa, ukampis janiw taqenipunejj Jehová Dios toqet saytʼasipkaniti. Kimsa, Diosan markapat jitheqtawayapki ukanakajj ‘kuttʼanipjjaniwa’ sasaw taqe chuyma suyañasa. Kuttʼanipjjani ukhajja, Jehová Diosjamarakiw sum katoqañasa.

¹⁸ Uñtʼañsa, amuyañsa ukat yatiñanïñsa taqeni thaqasipkakiñäni. Kunapachatï Jesusan uñachtʼäwinakap liytʼkañäni ukhajja, akhamwa jisktʼasipjjañasa: “¿Kun sañsa munpacha? ¿Kunatsa Biblian qellqasiwayi? ¿Kunjamsa yanaptʼistaspa ukat kunjamsa ukampejj mayninakar yanaptʼarakiristjja? ¿Kunsa Jehová Diosampita Jesusampit yatichitu?” sasa. Ukham lurasaw Jesusan yatichäwinakap sum amuytʼañäni.