1-3. ¿Kuna jan waltʼäwinakansa chacha warminakajj uñjasipjje? (Aka janankir foto uñjjattʼam.)

KIMSA tunka kimsaqallqoni maranak casado mä jilatajj akham siwa: “Maynitï jaqechasïwipan sumäñap munchi ukat ukatakirak chʼamachaschi ukhajja, Jehová Diosajj bendiciwa” sasa. Cheqas chachasa warmisa wali kusisitaw jakasipjjaspa, ukatsti jan waltʼäwinakan uñjasisajj yanaptʼasipjjarakispawa (Pro. 18:22).

² Chacha warminakajj jan walinakan uñjasipjjakipuniwa. Uka jan walinakarojj Bibliajj ‘jañchin llakisiñanakapa’ siwa (1 Cor. 7:28, MT). Cheqas kuna jan walinakantï sapüru uñjasipki ukaw chacha warmirojj jan waltʼayaspa. Yaqhep chacha warminakajj sapüruw trabajipjje, ukham trabajkasas wawanakaparuw uñjapjjaraki. Niyakejjay chachasa warmisa pantjasirïpjjchejja, awisajj chuyma ustʼayir arunakwa sasipjjaspa, janiw sums parltʼasjjapjjaspati, ukatwa maynejj chachapatsa jan ukajj warmipatsa jan wal amuyaspa (Sant. 3:2, 5, 8). Munasiñasa respetosa jukʼat jukʼatwa chhaqtaspa. Ukhamarusa, taqe casado chacha warminakaw yaqha jan walinakan uñjasipjje. Biblianjja  ukanakarojj ‘jañchin luräwinakapa’ siwa. Ukanakasti akanakawa: wachoqa jucha lurañanaka, qʼañu lurañanaka, uñisisiñanaka, celasiñanaka, colerasiñanaka, chʼajjwañanaka (Gál. 5:19-21). Taqe ukanakaw casadonakarojj jan waltʼayaspa.

³ Ukampis janiw ukakïkiti, aka ‘qhepa urunakanjja’, jaqenakajj jupatakik taqe kuns muniri ukhamäpjjewa, janiw Diosarus respetapkiti (2 Tim. 3:1-4). Ukanakaw casado chacha warminakarojj jan waltʼayaspa. Ukhamarusa, Supayaw casadonakan jaljtapjjañap muni. Ukatwa apóstol Pedrojj akham sasin ewjjtʼistu: “Wali amuytʼasirïpjjam, jankʼakïpjjarakim, jumanakar uñisir Supayasti mä leonar uñtataw warartʼasisa sarnaqaski khitiru manqʼantañatakisa” sasa (1 Ped. 5:8; Apo. 12:12).

4. Chacha warminakarojja, ¿kunas jan walinakar saykatas kusisit jakasipjjañapatak yanaptʼaspa?

⁴ Japón markankir mä jilatajj akham siwa: “Qollqe toqet wali llaktʼataw jikjjatasiyäta, janiw esposajarojj kamsirïktsa, ukampis uk amuyasajj jupajj llakisirakïnwa. Ukhamarus usutaw jikjjatasïna. Awisajja, ukham llakinakan uñjasisajj toqesjjapjjakirïtwa” sasa. Kunjamtï uñjktanjja, casadonakajj jan walinakanwa uñjasipjjani. Ukhamächini ukasa, Jehová Diosan yanaptʼapampejj taqe ukanakar saykatasajj kusisitaw jakasipjjaspa (Salmo 127:1 liytʼañataki). Aka yatichäwinjja, kunjamsa chacha warminakajj suma ukat kusisita jakasipjjaspa ukwa phesqa toqet yatjjataskañäni. Ukatjja kunjamsa munasiñajj chacha warmirojj yanaptʼi uksa yatjjataskarakiñäniwa.

5, 6. ¿Kunsa chachasa warmisa Jehová Diosampi yanaptʼayasiñatak lurapjjañapa?

⁵ Casado chacha warminakatï suma ukat kusisita jakasiñ munapjjchi ukhajja, Jehová Diosaruw munasipjjañapa ukat istʼapjjañaparaki. Ukhamatwa Jehová Diosampi yanaptʼayasisajj sum jakasipjjani (Eclesiastés 4:12 liytʼañataki). ¿Kunjamsa Jehová Diosampejj yanaptʼayasipjjaspa? Ewjjanakaparuw istʼapjjañapa. Khä nayra pachanjja, aka arunakwa Jehová Diosan markapajj katoqäna: “Kupi toqeru, jan ukajj chʼeqa toqerus saranukütajja, qhepäjjamatsti mä aru istʼäta, sarakïtamwa: ‘Aka cheqaw thakejja, sarasipkakim’ sasa” (Isa. 30:20, 21). Jehová Diosampi irpayasiñatakejja, casadonakajj panpachaniw Biblia liyipjjañapa (Sal. 1:1-3). Familjamas Bibliat yatjjatapjjañaparakiwa, ukhamatwa chʼamañchtʼata suma jikjjatasipjjani. Ukatsti sapürurakiw Diosat mayisipjjañapa. Ukanakaw Supayan ñanqha pachapar saykatapjjañapatakejj yanaptʼani.

⁶ Alemania markankir Gerhard sat mä jilatajj akham siwa: “Kunapachatï esposajampi jan waltʼayasipjjta ukhajja, Jehová Diosan ewjjanakapaw paciencianïñatakisa perdonasirïñatakis yanaptʼapjjetu. Ukham sarnaqasaw sum jakasipjjta” sasa. Chachasa warmisa Jehová Diosampi yanaptʼayasiñatakiw chʼamachasipjjañapa. Ukhamatwa panpachanejj sum apasipjjani.

7. ¿Kunjamsa chachajj esposapar uñjañapa?

⁷ Familia pʼeqtʼiritï esposapar sum uñjchi ukhajja, suma ukat kusisitaw chacha warmejj jakasipjjani. Bibliajj akham siwa: “Cristowa taqe chachan pʼeqepajja, chachasti warmin pʼeqeparakiwa” sasa (1 Cor. 11:3). Ukhamasti, kunjamtï Jesucristojj arkirinakapar uñjirïkänjja ukhamwa chachajj esposapar uñjañaparaki. Jesusajj janiw qhoru jan sinttʼasiri ukhamäkänti, jan ukasti wali munasiri, amuytʼiri,  jan jankʼak colerasiri, altʼat chuymani ukhamänwa (Mat. 11:28-30).

8. ¿Kunsa chachajj esposapampi munayasiñatakisa respetayasiñatakis lurañapa?

⁸ Mä cristiano chachajja, janiw esposaparojj kutin kutin jupar respetañap maykiti, jan ukasti “mä turpa pʼakisiri vasoru uñtatätap laykojja” sumwa uñji (1 Ped. 3:7, MT). Chachajja, jaqenak taypinsa, sapakïsipki ukhasa, esposaparojj respetompiw parltʼi ukat munasiñampirakiw uñji. Arsutapampisa luratapampisa qawqha wakiskiris jupatakejj ukwa uñachtʼayi (Pro. 31:28). Kunapachatï chachajj esposaparu wali munasiñampi uñji ukhajja, esposapajj wal jupar munasini ukhamarak respetani, ukatsti Jehová Diosajj jupanakar bendicirakiniwa.

9. ¿Kunjamsa esposajj Jehová Diosan munañaparjam sarnaqaspa?

⁹ Jehová Diosar cheqapuni munasiñäni ukhajja, altʼat chuymani, istʼasiri ukhamäñäniwa, Diosan munañaparjamarakiw sarnaqañäni (1 Ped. 5:6). ¿Kunjamsa esposajj Jehová Diosan munañaparjam sarnaqaspa? Chachaparuw yanaptʼañapa. Bibliansti siwa: “Warminaka, chachanakamaru istʼapjjam, ukham lurañanakamarakiw Diosankirjamajj waktʼapjjtam” sasa (Col. 3:18). Inas esposatakejj kuntï chachapajj amtki ukajj jan waljamäkchispati. Ukampis Jehová Diosan kamachinakap jan pʼakintkchi ukhajja, yanaptʼañapawa (1 Ped. 3:1).

10. ¿Kunjamsa esposajj chachapar istʼatap uñachtʼayaspa?

¹⁰ Familia taypinjja, esposajj mä aski luräwiniwa. Jupajj chachapan ‘compañerapawa’ (Mal. 2:14, NM). Kunapachatï esposopamp kun lurañs amtapjjani ukhajja, esposajj kuntï amuyki ukjja respetompiw sarakispa. Ukampis kuntï chachapajj amtkani uk respetañapawa. Esposan arsutapajj wali askiwa, ukatwa chachapajj wali amuyumpi istʼañaparaki (Pro. 31:10-31). Esposatï istʼasir chuymanïni ukhajja, familian kusisitaw jakasipjjani,  sumankañaw utjarakini. Ukhamarusa Jehová Diosar kusisiyapjjatap yatisajja, chacha warmejj kusisitaw jakasipjjani (Efe. 5:22).

11. ¿Kunatsa chacha warmejj perdonasirïpjjañapa?

¹¹ Kunapachatï chachasa warmisa perdonasipjje ukhajja, jukʼamp sumaw jakasipjje. Bibliansti perdonasipjjam sasaw ewjjtʼi (Col. 3:13). Ukampis pantjasitanakap yaqha horasan amtasipkakispa ukhajja, aynachtʼañaw utjaspa. Kunjamatï uta perqa kʼakʼatajj utar jan waltʼaykejja, ukhamarakiw chuyma ustʼayasiñasa, coler imjjasiñasa, chacha warmir aynachtʼayaspa, perdonasiñas chʼamäjjarakispawa. Ukampis chacha warmitï Jehová Diosat yateqasis perdonasipjjani ukhajja, sumwa apasipjjani (Miq. 7:18, 19).

12. ¿Kunatsa munasiñajj ‘walja juchanak perdoni’?

¹² Cheqpach munasiñajja, ‘janiw coler imjjaskiti’, jan ukasti ‘walja juchanakwa perdoni’ (1 Cor. 13:4, 5; 1 Pedro 4:8 liytʼañataki). Ukhamasti perdonasirïñasawa. Mä kutejja, apóstol Pedrojj akham sasaw Jesusar jisktʼäna: ‘¿Qawqha kutis nayajj perdonañajajja?’ sasa. Jesusasti akham sänwa: “Paqallq tunka paqallqo kuti” sasa (Mat. 18:21, 22). Uka arunakampejja, qawqha kutis perdonasktan uk cristianonakajj janiw jakhuñasäkiti, ukwa Jesusajj sañ munaskäna (Pro. 10:12). *

13. ¿Kunjamatsa perdonasirïsna?

¹³ Annette sat mä kullakajj akham siwa: “Chacha warmitï jan perdonasipkaspa ukhajja, coler imjjasiñajj jukʼampiw jiljjattaspa, janirakiw purapat confiyasiñas utj-jjaspati, chacha warmirojj qʼalwa aynachtʼayaspa. Ukampis perdonasirïñaw chacha warmir mayachthapi” sasa. Ukhamajja, ¿kunjamatsa maynejj perdonasirïspa? Panpachaniw yuspärasirïpjjañapa. Sapa mayniw maynin suma luratanakap uñjañataki chʼamachasipjjañapa, ukatsti “walik ukham lurtajja” sasaw chʼamañchtʼasipjjañaparaki (Col. 3:15). Chacha warmitï perdonasirïpjjani ukhajja, suma ukat mayachtʼataw jikjjatasipjjani, Jehová Diosas jupanakar bendicirakiniwa (Rom. 14:19).

14, 15. 1) ¿Kunsa Jesusan ewjjapajj sañ muni? 2) ¿Kunjamsa Jesusan ewjjapajj chacha warmir yanaptʼaspa?

¹⁴ Taqeniw respetatäñsa askit uñjatäñsa muntanjja. Kunjamsa jikjjatastan uk amuyapjjañapsa munaraktanwa. Ukampis inas akham arunak istʼirïsta: “Ukhamat ukhamwa kuttʼayäjja” sasa. Kunatsa ukham sapjje uk awisajj amuysnawa, ukhamarusa Bibliajj akham siwa: “Janipun kunapachas lupʼimti: ‘Kunjämtï nayar lurkitojja, ukhamarakwa nayajj lurarakëjja’” sasa (Pro. 24:29). Jan wal lurapjjestu ukhajja, kuns lurañasa uk Jesusajj sumwa ewjjtʼawayistu. Ukasti akawa: “Kunjämtejj jumanakajj mayninakampejj lurayasiñ munapktajja, ukhamarak jumanakajj jupanakarojj lurapjjam” sasa (Luc. 6:31). Kunjamtï jiwasajj uñjatäñ munktanjja, ukhamwa mayninakarojj uñjañasaraki, janiw jan walit jan wal kuttʼayañasäkiti, ukwa Jesusajj sañ munaskäna. ¿Kunjamsa chacha warmejj Jesusan uka ewjjaparjam sarnaqapjjaspa? Sapa mayniw kunjamtï uñjatäñ munki ukham maynir uñjañapa.

¹⁵ Chachasa ukatjja warmisa jan chuyma  ustʼayasiñataki chʼamachasipjjani ukhajja, sumaw jakasipjjani. Sudáfrica toqenkir mä jilatajj akham siwa: “Esposajampejj Jesusan ewjjaparjam sarnaqañatakiw chʼamachasipjjta. Awisajj colerasiñajj utjakipuniwa, ukampis respetompi ukat kunjamtï uñjatäñ munapkta ukham uñjasiñatakiw chʼamachasipjjta” sasa.

16. ¿Kunsa chachasa warmisa jan lurapjjañapäki?

¹⁶ Janipuniw kunapachas maynejj chachapana ni warmipan pantjasitanakapat yaqhanakar parlasiñapäkiti. Janiw sawkaskasas quejasiñapäkiti. Chacha warmi jakañajja, janiw khitis jukʼamp chʼamani, khitis jachʼat toqesi, jan ukajj khitis chuyma ustʼayir arunak parli ukanak yatiñatakïkiti. Pantjasir jaqenakjamajja, awisajj arsutampisa luratampisa maynirojj chuym ustʼaysnawa. Ukampis maynejj janiw chachaparusa warmiparusa phenqʼachañapäkiti, yamas janipuniw nuwañapäkiti (Proverbios 17:27; 31:26 liytʼañataki).

17. ¿Kunjamsa chachanakajj Jesusan ewjjapar istʼapjjaspa?

¹⁷ Yaqhep markanakanjja, warmir toqeri nuwiri chachaw respetayasirit uñjatajja. Ukampis Diosan Arupajj siwa: “Paciencianïñaw askejja, jan ajjsarir jaqet sipansa; markanakar katuntañat sipansa, jukʼamp askiwa jiwasa pachpa apnaqasiñajja” sasa (Pro. 16:32). Ukhamajja, warmir jan toqeñatakisa jan nuwañatakisa chachajj paciencianïñapawa. Jesusasti janipuniw colerampejj atipayasirïkänti, jupjamajj janipuniw khitis aka Oraqen utjkaspati. Bibliansti siwa: “Colerasisinjja jan juch lurapjjamti, uka colerasiñanakamajj jan jornalpachäpati” sasa (Efe. 4:26). Esposaparu arumpi chuyma ustʼayirinakasa, nuwirinakasa jan amuytʼasirïpjjewa. Janiw ukham chachanakajj Jehová Diosan amigopäpkaspati.

18. ¿Kunatsa chacha warmin munasipjjañapajj wali wakiskirejja?

¹⁸ (1 Corintios 13:4-7 liytʼañataki.) Chacha warmin khuyapayasiñampi, suma jaqëñampi, llampʼu chuymanïñampi, paciencianïñampiw utjañapa. “Ukatsipansa wali munasiñanïpjjam, munasiñasti mayaruw tukuyi, taqe kunsa phoqharakiwa” sasaw Bibliajj ewjjtʼi (Col. 3:12, 14). Cheqas chacha warmin munasiñaw utjañapa. Jesusajj jaqenakarojj wal munasïna, jupanak laykuw jakañapsa aptʼasïna. Ukhamarakiw chacha warmejj munasipjjañapa. Ukhamatwa pantjasiñanakarusa, usuntañanakarusa, qollqet pistʼañanakarusa, familiaranakampi jan waltʼayasiñanakarus saykatapjjani.

19, 20. 1) ¿Kunjamatsa chacha warmejj kusisita sum jakasipjjaspa? 2) ¿Kunsa jutïr yatichäwin yatjjataskañäni?

¹⁹ Chacha warmi sum jakasipjjañapatakejja, munasiñaw utjañapa, ukatsti jan jaljtas yanaptʼasiñatakiw chʼamachasipjjañaparaki. Jan waltʼäwinak utjani ukhajja, janiw ratuk jaljtañ amtapjjañapäkiti, jan ukasti panpachaniw nayrar sartañataki chʼamachasipjjañapa. Kunapachatï chacha warmejj wal munasipjje ukhamarak Jehová Diosarus munasipjje ukhajja, ‘munasiñ jan tukusirïtap laykojj’ jan waltʼäwinak askichañatakiw chʼamachasipjje (1 Cor. 13:8; Mat. 19:5, 6; Heb. 13:4).

²⁰ Aka “qhepa urunakanjja”, chacha warmi kusisita suma jakasiñajj chʼamakiwa (2 Tim. 3:1). Ukampis kunjamtï yatjjatawayktanjja, Jehová Diosan yanaptʼapampejj kusisitaw jakasipjjaspa. Ukhamäkchi ukasa, casadonakajj wachoq juchar jan purtʼasiñatakiw chʼamachasipjjañapa. ¿Kunatsa? Aka pachajj uka jan wali lurañanakamp phoqantatawa. Ukhamajja, kunjamsa chacha warminakajj uka jan walir jan purtʼasipjjaspa ukwa jutïr yatichäwin yatjjataskañäni.