Soltero yaqhep jilat kullakanakajj ukhamwa arsuwayapjje. Ukampis Diosar ‘iyawsirimpi’, mä arunjja, bautisat jilat kullakanakampi casarasiñatak Jehová Diosajj ewjjtʼkistu uk sumwa jupanakajj yatipjje (1 Cor. 7:39). Ukhamajj ¿kunatsa ukham amuyapjjpacha?

Jilatanakat sipansa, kullakanakaw jukʼamp utji sasaw yaqhepanakajj amuyapjje. Walja markanakanjja ukajj cheqäskapuniwa. Sañäni, Corea markanjja, sapa 100 jilat kullakanakatjja, 57 kullakanakäpjje ukat 43 jilatanakäpjjarakiwa. Colombia markanjja, sapa 100 jilat kullakanakatjja, 66 kullakanakäpjje ukat 34 jilatanakäpjjarakiwa.

Yaqhep markanakanjja, casarasiñ munir chachajj qollqe jan ukajj regalonakwa warmin awk taykapar churañapa. Diosar jan yupaychiri awk taykanakajja, walja qollqe jan ukajj jila alani regalonakwa mayipjjaspa. Soltero walja jilatanakajj janiw uka regalonak alirjamäpkiti. Ukatwa uka markanakankir soltera yaqhep kullakanakajja, ‘janiw kunapachas mä jilatamp casaraskäti’ sasin amuyapjje. *

Inas jumajj ukhaman jikjjatasirïsta. Ukhamächi ukhajja, ak amtañamawa, kunjamsa jikjjatasta uk Jehová Diosajj sum yati (2 Cró. 6:29, 30).

Jehová Diosajja, ‘nayar servipkitu ukanakampikiw casarasipjjañama’ sasinwa ewjjtʼistu, ¿kunatsa? Jiwasan askisataki ukat jan walinakat jarkʼaqañatakiw ukham ewjjtʼistu. Diosajj janiw jan  wali amtanakar purisin tʼaqhesiñas munkiti. Nehemías profetajj jakkäna uka urunakanjja, walja judionakaw Diosar jan servir warminakampi casarasipjjäna. Ukatwa Nehemías profetajj kunarus Salomón reyejj purtʼasïna uk akham sasin jupanakar amtayäna: ‘Diosajj Salomonar wal munasïna ukatwa Israel markan reyit uttʼayäna. Ukampis Salomonajj Jehová Diosar jan servir warminakampiw casarasïna, jupanakaw juchanakar purtʼasiyäna’ sasa (Neh. 13:23-26). Diosajj kunatï jiwasatak askïki ukwa muni, ukatwa Jupar yupaychapki ukanakampik casarasiñatak ewjjtʼistu (Sal. 19:7-10; Isa. 48:17, 18). Kunsa lurañasa ukat kunsa jan lurañasäki ukjja Jehová Diosakiw sistaspa, uk sumwa yattanjja. Jehová Diosajj askisataki ukat munasiñat jiwasar ewjjtʼatapat wal yuspärtanjja (Pro. 1:5).

Jehová Diosar jan munasir mä jaqemp casarasïta ukhajja, Jehová Diosar serviñatwa jitheqtayiristamjja. Cheqas janiw ukar purtʼasiñ munktati (2 Cor. 6:14). Jehová Diosan ewjjtʼanakapajj jiwasan askisatakiwa, uk janipuniw armañamäkiti. Jichhürunakanjja, walja jilat kullakanakaw suma amtanakar purisajj Jehová Diosan ewjjtʼap istʼawayapjje. Ukampis yaqhepajj janiw istʼawayapkiti.

Australia markankir Maggy sat mä kullakajja, Diosar jan yupaychir chachampiw uñtʼasiñ qalltäna. * ‘Jupamp jikisiñatakejj walja kutiw tantachäwinakat faltasiyäta’ sasaw uka kullakajj säna. Ukhamatwa Jehová Diosat jukʼat jukʼat jitheqtjjäna. India markankir Ratana sat mä tawaqo kullakajja, yateqer masipampiw uñtʼasiñ qalltäna. Uka waynasti, kullakamp uñtʼasiñ laykukiw Bibliat yateqarakïna. Mä qawqha tiempo pasatatjja, kullakajj janiw Jehová Diosar sirvjjänti ukat uka waynamp casarasiñatakejj yaqha religionar kunaw sarjjäna.

Camerún markankir Ndenguè sat mä kullakajja, 19 maranïkäna ukhaw Diosar jan yupaychir mä chachamp casarasïna. ‘Diosar serviskätawa’ sasaw uka chachajj kullakar säna. Ukampis casarasitapat pä semana pasatatjja, ‘janiw tantachäwinakar sarjjätati’ sasaw kullakar jarkʼjjäna. Kullakajj akham siwa: “Sapakiw jikjjatasjjayäta ukat wal jacharakiyäta” sasa. Jakäwipajj janiw nayrjamäjjänti, ukwa jupajj amuyasïna ukat jupa pachpaw wal juchañchasirakïna.

Diosar jan yupaychir mä suma jaqejj utjaspawa. Ukampis jupamp casarasisma ukhajja, ¿Jehová Diosamp sum apasiskakïtati? Juman askimatak Jehová Diosan ewjjtʼapar jan istʼatamatjja, ¿kunjamsa jikjjatasïta? Ukat ¿kunjamsa Jehová Diosajj jikjjatasirakini? (Pro. 1:33.)

Walja jilat kullakanakaw Jehová Diosan ewjjtʼapar istʼasajj Diosar servir jilat kullakamp casarasiñ amtawayapjje. Ukham lurañaw jukʼamp askejja sasinwa jupanakajj amuyapjje. Ukat Jehová Diosar kusisiyañwa munapjjaraki. Amuytʼañataki, Japón markankir Michiko sat kullakajja, Diosan ewjjtʼanakaparjamaw sarnaqañ munäna, ukampis familiaranakapajj Diosar jan yupaychir chachamp casarasiñapwa munapjjäna. Ukat kunjamsa tamankir amigonakapajj Diosar yupaychirinakamp casarasipjjäna uk uñjasaw kullakajj llakit jikjjatasirakïna. ¿Kunas yanaptʼpachäna? ‘Kusisitäñatakejj janiw casarasiñapun wakiskiti sasin amtañaw yanaptʼawayitu’ sasaw kullakajj säna. Cheqas Jehová Diosar serviñaw taqe kunat sipansa jukʼamp askejja, Diosasti kusisit Diosawa (1 Tim. 1:11, NM). ‘Jehová Diosajja, kunanakatï jiwasatak wakiski ukanak churapunistuwa’ sasinwa kullakajj jan pächasis saraki. Ukatwa, maynitï casarasiñ munchi ukat janirak khitimp casarasiñsa jikjjatkchi ukhajja, sapakïskakiñaw jukʼamp askejja sasin saraki. Tiempompejja, Michiko kullakajj Diosar taqe chuym servir mä jilatampiw casarasjjäna. Ukat Jehová Diosar istʼatapatjja wali kusisitaw jikjjatasi.

Yaqhepajj jupjam amtanakani mä jilatampi jan ukajj mä kullakamp casarasiñatakiw suytʼawayapjje. Sañäni, Australia markankir Bill sat jilatajja, awisajj Diosar jan yupaychir warminakaruw uñchʼukirïna. Ukampis jupajj janiw Diosar jan yupaychir mä warmimp casarasiñ munkänti ukatwa uka warminakarojj jan sint parljjayirïkänti.  Qhepatjja, Bill jilatajj yaqhep kullakanakaruw casarasiñatak uñchʼukirakïna. Ukampis uka kullakanakajj janiw jupamp casarasiñ munapkänti. Bill jilatajj 30 maranakaw jupjam amtani mä kullakamp casarasiñatak suyawayi. ‘Ukham suytʼatajat janiw chuym pisayaskti’ sasaw jilatajj saraki. Bill jilatajj wali kusisitaw jikjjatasi, cheqas esposapamp chikaw Diosan arunakap yatiyiris sarapjje, Bibliatsa yatjjatapjje ukat mayachtʼataw Jehová Diosar servipjjaraki. Esposapan amigonakapampis sumwa apasiraki, jupanakajj Diosar servirïpjjarakiwa. Bill jilatajj akham siwa: “Biblian yatichäwinakap istʼañajj chacha warmjam sum jakasiñatakiw yanaptʼapjjetu” sasa.

Jehová Diosar istʼañ laykutejj jan casarasksta ukhajja, ¿kunas suma chuymamp suytʼaskakiñatak yanaptʼiristam? Jehová Diosajj kunja kusisitas Jupar istʼatamat jikjjatasi ukwa amtañama (1 Sam. 15:22; Pro. 27:11). Kunjamsa jikjjatasta uk oracionan Diosar sapa kuti yatiyañaw yanaptʼätam (Sal. 62:8). Yantʼanakaru ukat jan wali amuyunakar atipjañatak chʼamachasïta ukhajja, sapürutjamaw Jehová Diosamp sum apasïta. Jehová Diosajj wali askitwa uñjtamjja uk janipun armamti. Kunatï jumatak wakiski uk sumwa Jupajj yati. Cheqas janiw mä esposa jan ukajj mä esposo churäma sasin sisktamti, ukampis ukatï jumatak wakischi ukhajja, yanaptʼätamwa (Sal. 145:16; Mat. 6:32).

Awisajj David chachjamaw jikjjatasisma. Mä kutejj wali llakit jikjjatasisaw akham sasin Diosar maytʼasïna: “Tatay, mayisitajjarojj jankʼakiy istʼam, samanajjajj tukstañampïskiwa” sasa (Sal. 143:5-7, 10). Ukham jikjjatasisajj jan aynachtʼamti. Kunjamsa Jehová Diosajj mayisitanakamar istʼani ukwa suytʼañama. Kuntï Bibliat liytʼkta uka toqet sum lupʼiñamawa. Ukhamatwa Jehová Diosajj kunsa jumat suyi ukat kunjamsa nayrajj servirinakapar yanaptʼawayi uk amuyäta. Ukaw Jehová Diosar confiyañataki ukat Jupar istʼañatak yanaptʼätam.

¿Kunanakampsa suytʼkasajj lurarakisma? Jehová Diosamp sum apasiñataki ukat suma jaqet uñtʼatäñatakiw chʼamachasisma. Ukat mayninakamp sum apasiñataki, wajjtʼasirïñataki, suma trabajtʼirïñataki ukat Jehová Diosat jan jitheqtañatakiw chʼamachasirakisma. Ukham chuymanïñaw casarasïta ukhajj chacha warmjam sum jakasiñatak yanaptʼätam (Gén. 24:16-26; Rut 1:16, 17; 2:6, 7, 11; Pro. 31:10-27). Diosan arunakap taqe chuym yatiyañataki ukat tama taypin jukʼamp yanaptʼañatakiw chʼamachasisma. Ukham lurañaw suma amtanakar puriñatak yanaptʼätam. Bill jilatajj akham siwa: “Maranakajj ratukiw pasawayi. Solterökasajj precursorjamaw irnaqtʼayäta” sasa.

Jehová Diosar yupaychirimpikiw casarasipjjañama sasin Bibliajj ewjjtʼkistu ukarjam phoqasksnawa. Diosar yupaychirimp casarasiñäni ukhajja, Jehová Diosaruw jachʼañchañäni ukat wali kusisitaw jikjjatasirakiñäni. Jehová Diosar istʼir jaqejj wiñayatakiw kusisit jakasini sasaw Bibliajj qhanañchi (Sal. 112:1, 3). Ukhamasti, Diosar yupaychirimp casarasiñatak ewjjtʼarojj istʼapjjapuniñäni.