‘Bibliajj parlki uka yaqhep sarnaqäwinakasa ukat jaqenakasa, jutïr urunakan kunanakampi jan ukajj khitinakamp sasïpjjanisa ukwa uñachtʼayi’ sasaw Yatiyañataki mayo 15, 1951 maran mistkäna uka revistajj qhanañchäna. Amuytʼañataki, Jefté, Job chachanakasa ukat Rebeca warmisa ajllit cristianonakamp sasiwa, ukhamarak Débora ukat Rahab warminakas ‘walja jaqenakampi’ sasirakiwa sasaw Bibliat apstʼat qellqatanakasajj nayra maranakan qhanañchäna (Apo. 7:9). Ukampis aka qhepa maranakanjja, janiw uka toqenakat qhanañchasjjeti, ¿kunatsa?

Bibliajj parlki uka yaqhep jaqenakajja, jutïr urunakan khitinakamp sasïpjjanisa uk Bibliajj yatichiwa. Sañäni: Gálatas 4:21-31 qellqatanjja, apóstol Pablojj pä warminakatwa parläna. Nayrïrejja, Agar sat Abrahaman esclavapänwa. Maynïristi, Sara sat Abrahaman esposapänwa. Agar warmejj Israel markampi sasiwa sasaw apóstol Pablojj qhanañchäna, uka markajj Moisesan leyinakap utjatap laykuw Diosamp sum apasïna. Sara warmisti, Jehová Diosan esposapampi sasirakiwa sasaw Pablojj qhanañcharakïna, mä arunjja, Diosan alajjpachankir markapa. Maysa toqetjja, Melquisedec chachajj Jesusampi sasiwa, profeta Isaiasampi ukat wawanakapampejj Jesusampi ukat ajllit cristianonakampi sasirakiwa sasaw Pablojj qhanañcharakïna (Heb. 2:13, 14; 6:20; 7:1-3). Uka qhanañchäwinakajj cheqäskapuniw sasin ¿kunatsa sissna? Jehová Diosaw ukanak qollan ajayupampi amuytʼayas Pablor qellqayawayi.

Biblian qellqatäki uka jaqenakat yaqhepajj khitinakamp sasïpjjanisa uka toqets Bibliajj parlkchejja, janiw taqpach sarnaqäwinakapajj jutïr urunakat parlkapuniti. Amuytʼañataki, ‘Melquisedec chachajj Jesusamp sasiwaʼ sasaw Pablojj  qhanañchäna. Ukampis mä kutejja, pusi reyinakar atipjatapatwa Melquisedec chachajj tʼantʼamp vinompi Abrahamar churäna. Ukajj ¿kamsañsa munpachäna? Pablojj janiw uka toqet kamskänsa. Ukhamajj uka sarnaqäwejj kamsañsa muni uk jukʼamp yatjjatañ munañajj janiw wakiskiti (Gén. 14:1, 18).

Jesusajj jiwjjäna uka qhepatjja, religión toqet yaqhep qellqerinakajj akhamwa yatichapjjäna: ‘Biblian qellqatäki taqe uka sarnaqäwinakaw jutïr urunakat parli’ sasa. Uka toqet parlkasinjja, wali uñtʼat mä qellqatajj akham siwa: ‘Orígenes, Ambrosio ukat Jerónimo chachanakajja, Biblian qellqatäki uka sarnaqäwinakajj jutïr urunakatwa parli sasaw kunjamatsa qhanañchañ munapjjerïna. Aleq sarnaqäwinakas wali wakiskirïpkaspas ukhamwa amuyapjjäna. Amuytʼañataki, Jesusajj jiwatat jaktasin arkirinakapar uñstäna uka arumajja, 153 chawllanakwa arkirinakapajj katsupjjäna sasaw Bibliajj qhanañchi. “Uka 153 numeronakajj jutïr urunakat kun sañsa munapunpachawa” sasaw Orígenes, Ambrosio ukat Jerónimo chachanakajj jan pächasis sapjjäna’ (The International Standard Bible Encyclopaedia).

Agustín de Hipona sat chachajja, Jesusan 5.000 jaqenakar pä chawllanakampi, cebadat lurat phesqa tʼantʼampi manqʼayatapat akham sasaw qhanañchäna: ‘Cebadat lurat phesqa tʼantʼanakajja, Biblian nayrïr phesqa libronakapawa’ sasa. Ukat akham sarakïnwa: ‘“Cebadajj trigot sipans menos valoraniwa” sasaw jaqenakajj khä tiempon amuyapjjerïna. Ukhamajj Nuevo Testamento qellqataw Antiguo Testamento qellqatat sipansa jukʼamp valoranejja’ sasa. Ukat ‘pä chawllanakajj mä reyimpi mä sacerdotempi sasiwa’ sasaw sarakïna. Religión toqet yaqha qellqerejja, Jacobojj Esaú chachat mä plato manqʼampi jilïr yoqäñap alaskäna uka toqetwa parläna. Bibliarjamajja, Jacobojj Esaú chachar churkäna uka manqʼajj “wila” coloränwa, ukajj ‘jaqenakan alajjpachar sarapjjañapatak Jesusajj wilapamp alawayki ukamp sasiwa’ sasaw uka qellqerejj qhanañchäna.

Uka qhanañchäwinakajja, ¿janejjay cheqaw sañjamäkitejja? Ukhamajj Biblian qellqatäki uka sarnaqäwinakat kawkïrinakas jutïr urunakat parli uk ¿kunjamatsa yatsna? Mä sarnaqäwisa jan ukajj mä jaqesa jutïr urunakan kunampi jan ukajj khitimp sasïnisa uk Bibliatï qhanañchchejja, ukarojj iyawstanwa. Ukampis Bibliatï jan kuns siskchejja, janiw uka sarnaqäwejj kun sañsa munpacha sasin thaqhañajj wakiskiti.

Ukhamasti, Biblian qellqatäki uka sarnaqäwinak liytʼasajj ¿janit kuns yateqsna? Romanos 15:4 qellqatan akham sasaw apóstol Pablojj ajllit cristianonakar qellqäna: “Taqe kunatejj nayratpach Qellqatan uchatäkän ukanakajj jiwasanakaruw yatichistu, llampʼu chuyma toqe suytʼañasataki, ukanrakwa mä samarañsa jikjjattanjja” sasa. Cheqas janiw ajllit cristianonakaruk uka sarnaqäwinakajj yanaptʼawaykiti, jan ukasti, taqe cristianonakaruw yanaptʼawayi (Juan 10:16; 2 Tim. 3:1).

Biblian qellqatäki uka sarnaqäwinakajj taqe cristianonakatak qellqatawa. Alajjpachar sarañatak ajllitanakarusa, yaqha uwijanakarusa, nayra tiempon jakasiri ukat jichha tiempon jakasir cristianonakarusa yanaptʼarakiwa. Amuytʼañataki, Job chachan tʼaqhesitapajja, janiw Nayrïr Jachʼa Chʼajjwäwin ajllit cristianonakajj tʼaqhesipkäna ukamp sasikïkiti, jan ukasti, walja jilat kullakanakaw ajllit cristianonakatsa jachʼa tamankirinakatsa, Job chachjamajj jan waltʼäwinakan uñjasiwayapjje. Jupanakajja, ‘Tatitun wali munasirïtapa khuyapayasirïtapwa’ uñjawayapjje (Sant. 5:11).

Jichhürunakanjja, chuymankipstat walja kullakanakaw Débora warmjam Diosat jan jitheqtas servisipki. Ukatjja, Elihú chachjamaw walja wayna jilatanakajj irpir chuymanjam wali yatiñamp irnaqtʼasipki. Ukat Jefté chachjamarakiw jan ajjsariri ukat taqe chuym irnaqtʼir precursoranakajj utji. Diosan yaqhep servirinakapajja, Job chachjamaw wali paciencianïpjjaraki. Uka jaqenakan sarnaqäwinakap Bibliar qellqayatapatjja, walpun Jehová Diosar yuspärtanjja, uka sarnaqäwinak liytʼasaw chuymachtʼata chʼamañchtʼata jikjjatastanjja ukat mä suytʼäwis utjarakistuwa.

Taqe ukanak amuyasaw Bibliat apstʼat qellqatanakasan sapa sarnaqäwejj kamsañsa munpacha ukanak jan qhanañchasjjeti. Antisas uka sarnaqäwinakat kunsa yateqassna ukaw jukʼamp qhanañchasjje.