1, 2. 1) ¿Kunsa Jesusajj qhepa urunakat qhanañchäna? 2) ¿Kunsa aka yatichäwin yatjjataskañäni?

JESUSAJJA, Olivos qollunwa Pedro, Andrés, Santiago, Juan apostolonakapamp qontʼatäsipkäna, uka cheqatjj Jerusalén markan templopaw uñjasïna. Ukanjja, Jesusajj qhepa urunakan Diosan Reinopan apnaqjjañapäna ukhajj kunanakas pasañapäna uka toqet parlañwa qalltäna. Uka tiemponjja, nayan uttʼayata ‘amuyasiri cheqapa uywataw’ (MT) utjani sasaw Jesusajj säna. Ukhamasti, uka uywataw cristianonakarojj ajay toqet manqʼa horasapar churañapäna (Mat. 24:45-47).

² Ukjjarusti, Jesusajj tunka virgen tawaqonakatwa parläna (Mateo 25:1-13 liytʼañataki). Aka yatichäwinjja, uka toqetwa yatjjataskañäni. Ukatsti aka jisktʼanakaruw qhanañcharakiñäni: 1) Tunka virgen tawaqonakat parlasajja, ¿kunsa Jesusajj yatichañ munäna? 2) Uka uñachtʼäwirjamajja, ¿kunjamsa ajllit cristianonakajj sarnaqapjje? Ukham sarnaqasajja, ¿kunsa katoqapjjani? 3) ¿Kunjamsa uka uñachtʼäwejj jichhürunakan yanaptʼistu?

3. ¿Kunjamsa Bibliat apstʼat qellqatanakasan tunka virgen tawaqonakat nayrajj qhanañchasirïna, ukat kunas jan sum qhanstkäna?

³ Amuyasiri Cheqapa Uywatajja, Biblian utjki uka yaqhep sarnaqäwinak janiw nayrjam qhanañchjjeti sasaw pasïr yatichäwin yatjjatawaytanjja. Nayrajja, kunatï jutïr urunakan pasañapäkäna uka toqetwa jila partejj qhanañchasirïna. Jichhajja, mä sarnaqäwit kunsa yateqsna ukaw jilpach qhanañchasjje. Amuytʼañatakejj tunka virgen tawaqonakat Jesusajj parlkäna uka toqet parltʼañäni. Nayrajj uka uñachtʼäwit qhanañchkasajja, lamparasa, aceitesa, botellasa kun sañs munaspa uk sapa mayatwa Bibliat apstʼat qellqatanakasan qhanañchasirïna. Ukampis ukham qhanañchasajja, kunatï sapa maynir yanaptʼkistaspa ukajj janiw qhanäkänti. Ukhamajja, Jesusajj tunka virgenanakat parlkäna uka yatichäwit kunsa yateqsna ukat kunjamsa yanaptʼistaspa ukwa jichhajj yatjjataskañäni.

4. 1) ¿Khitis casarasir waynajja, ukat kunjamatsa uk yattanjja? 2) ¿Khitinakas virgen tawaqonakajja, ukat kunjamatsa uk yattanjja?

⁴ ¿Kunsa Jesusajj tunka virgen tawaqonakat parlasajj yatichañ munäna? Uk yatiñatakejj khitinakatsa parläna ukwa nayraqat amuyañasa. Ukhamajja, ¿khitïpachas casarasir waynajja? Jesusawa. ¿Kunjamatsa uk yattanjja? Mä kutejja, casarasir waynäkaspas ukhamwa Jesusajj jupa pachpat säna (Luc. 5:34, 35). ¿Khitinakäpachas virgen tawaqonakajja? ‘Jiskʼa tamawa’, mä arunjja, alajjpachar sarañatak ajllit cristianonakawa. ¿Kunjamatsa uk yattanjja? Mä kutejja, Jesusajj ajllit cristianonakat parlkasajj akham sänwa: ‘Wakichtʼasit suytʼapjjam, lamparanakams qhantayasisa. Kunjamatejj uywatanakajj uywiriparu casarasïwit kuttʼaniñap suytʼapkejja ukhama’ sasa (Luc. 12:32, 35, 36). Uka arunakajja, kunsa tunka virgenanakajj lurapjjañapäna ukwa amtayistu. Jupanakajja, casarasir waynan puriniñapatakejj wakichtʼataw lamparanakas qhantayat suyapjjañapäna. Pablosa, Juan apostolosa, ajllit cristianonakajj virgen tawaqonakäpkaspas ukhamäpjjewa sasaw sapjjarakïna (2 Cor. 11:2; Apo. 14:4). ¿Kunsa taqe ukanakajj amuytʼayistu? Mateo 25:1-13 qellqatan jikjjataski uka uñachtʼäwimpejja, Jesusajj ajllit cristianonakaruw yatichañ munaskäna, ukwa amuytʼayistu.

5. Jesusajj tunka virgen tawaqonakat parlkäna uka uñachtʼäwejja, ¿kunapachas phoqasi, ukat kunjamatsa uk yattanjja?

⁵ Jesusajj tunka virgen tawaqonakat parlkäna uka uñachtʼäwejj ¿kunapachas phoqasi? Aka qhepa urunakanwa phoqasi. Uka sarnaqäwin tukuyapasti, jachʼa tʼaqhesïwi tiemponwa phoqasirakini. ¿Kunjamatsa uk yattanjja? Virgenanakat parlañ tukuyasajja, casarasir waynajj ‘purinjjewa’ sasaw Jesusajj säna (Mat. 25:10). Mateo 24 ukat 25 jaljanakan utjki uka profeciajj kimsaqallq kutiw Jesusan puriniñapata jan ukajj jutañapat parli sasaw Yatiyañataki julio 15, 2013 revistan qhanañchäna. Ukatsti jachʼa tʼaqhesïwi tukuyaru juzgañataki ukat jan walinakar tukjañataki jutkani, ukhaw Jesusajj purinini sasaw uka revistajj sarakïna. Ukatwa tunka virgen tawaqonakat Jesusajj parlkäna ukajj qhepa urunakanwa phoqasi sasin sistanjja. Ukampis uka uñachtʼäwit jilapartejj jachʼa tʼaqhesïwi tiemponwa phoqasini.

6. Tunka virgen tawaqonakat parlkasajja, ¿kunsa Jesusajj yatichañ munäna?

⁶ ¿Kunsa Jesusajj uka sarnaqäwimp yatichañ munäna? Uk yatiñatakejja, kuna toqetsa parlaskäna uk amuytʼañäni. Mateo 24 jaljanjja, Amuyasiri Cheqapa Uywatatwa Jesusajj parläna, jupanakajj mä qawqhanikïpjjewa ukat aka qhepa urunakanwa mayni cristianonakar pʼeqtʼasipkaraki. Jupanakaruw Jesusajj tukuykam aguantapjjañapatak ewjjtʼäna. Cheqas tunka  virgen tawaqonakat parlasajja, Jesusajj niya ukhamarakwa yatichañ munäna. Ukampisa, uka uñachtʼäwejj qhepa urunakan aka Oraqen jakapki taqe uka ajllit cristianonakatakïnwa. ¿Kunsa jupanakar yatichañ munäna? Ajay toqet janiw ikjapjjañapäkänti, ukhamat alajjpachar sarañ jan aptʼasiñataki (Mat. 25:13). ¿Kunjamsa ajllitanakajj ukarjam sarnaqapjje? Uk jichhajj yatjjatarakiñäni.

7, 8. 1) ¿Kunatsa amuyasiri virgen tawaqonakajj wakichtʼatäpjjäna? 2) ¿Kunjamsa ajllitanakajj wakichtʼasiwayapjje?

⁷ Jesusajj tunka virgen tawaqonakat parlkasajja, phesqanejj ‘pisi amuytʼaninakawa’ sasaw säna. ¿Kunatsa ukham sispachäna? Casarasir waynajj purinkäna ukhajj janiw wakichtʼatäpkänti, ukatwa Jesusajj ukham sasin säna. Ukatsti, mayni phesqa virgenanakajj ‘wali amuyasirïpjjänwa’ sasaw Jesusajj sarakïna. ¿Kunatsa ukham sispachäna? Jupanakajj suma wakichtʼataw wali amuyump suyapjjäna, ukatwa Jesusajj ukham säna. Taqeniw arumajj lamparanakapas qhantayata suyapjjañapäna. Amuytʼasiri virgen tawaqonakajja, aceitjja jilpachwa apasipjjäna. Ukampis pisi amuytʼan virgen tawaqonakajj janiw ukham wakichtʼatäpkänti. Ukhamajja, Jesusajj jutkani uka urutakejja, ¿kunjamsa Diosat jan jitheqtir ajllitanakajj wakichtʼasipjje?

⁸ Alajjpachar sarañatak ajllitanakajja, Jehová Diosan munañapa tukuykama lurañatakiw wakichtʼasiwayapjje, ¿kunjamsa? Walja toqenakata. Maya, Jehová Diosar serviñatakejj taqe kunwa jaytapjjañapa, uk yatisajj taqe chuymaw uk lurapjje. Paya, akapachan tukusiñap janis yatipkchejja, Jehová Diosaru Jesusaru munasipjjatap laykuw tukuykam jan jitheqtas loqtañ amtapjje. Kimsa, janiw akapachankir jaqenakjam qollqe chuymäpkiti, janirakiw qʼañu lurañanakansa sarnaqapkiti, ni jupanakan askipaksa thaqhapkiti. Ajllit cristianonakajj amuytʼasir virgen tawaqonakjamäpjjewa, uka virgenanakajj lamparanakapas qhantayataw suyapjjäna. Ajllitanakajj ukham wakichtʼatäpjjarakiwa, casarasir waynajj janis jankʼak purinirjamäkchejja, pacienciampiw suytʼasipki (Fili. 2:15).

9. 1) ¿Kunsa Jesusajj ajllitanakar ewjjtʼäna? 2) “Niyaw casarasirejj juti” sasin artʼaski uk istʼasajja, ¿kunjamsa ajllitanakajj jaysapjje? (Qhanañchäwip uñjjattʼäta.)

⁹ Maysa toqetjja, amuyasiri virgenanakajj wakichtʼasisaw jan qarjtas suyapjjäna. Ukhamasti, ‘tunka virgenanakajj casarasir waynan jan jankʼaki purinitapat ikjapjjänwa’ sasajja, ¿kunatsa Jesusajj sispachäna? Ajllitanakajj jan ikjapjjañapataki, mä arunjja, puriniñap suykas jan akapachamp apayasipjjañapatakiw Jesusajj ukham ewjjtʼäna. Maynejj janis ikjañ amtkchejja, akapachamp apayasispawa, Jesusajj uk sum yatïna. Ukampis Diosar taqe chuyma serviri ajllitanakajja, jan akapachampi apayasiñatakiw chʼamachasipjje. ¿Kunjamsa? Jesusajj tunka virgen tawaqonakat parlkäna uka uñachtʼäwinjja, virgenanakajj akham sasin artʼasirwa istʼapjjäna: “Niyaw casarasirejj juti” sasa. Uk istʼasajj taqpachaniw jaysapjjäna, ukampis phesqanikiw wakichtʼat suyapjjäna (Mat. 25:5, 6; 26:41). Aka qhepa urunakanjja, niya ukhamarakiw Diosar taqe chuyma serviri ajllitanakajj “niyaw casarasirejj juti” sasin istʼasajj jankʼak jaysapjje. ¿Kunjamsa jaysapjje? Jupanakajja, Jesusan niya puriniñampïskatap amuyasaw wakichtʼat suyapjje. * Jesusajj tunka virgenanakat parlañ tukuykäna uka toqet jichhajj amuytʼarakiñäni.

10. Amuyasiri ukat jan amuytʼasiri virgen tawaqonakan parlapjjatapatjja, ¿kunsa jisktʼassna?

¹⁰ Jesusajj tunka virgen tawaqonakat parlkäna uka uñachtʼäwinjja, amuyasiri virgenanakajj janiw pisi amuytʼan virgenanakar yanaptʼañ munapkänti (Mateo 25:8, 9 liytʼañataki). Ukajja wal lupʼiyistu, alajjpachar sarañataki ajllitanakajj mayninakar yanaptʼapjjapuniwa. Ukhamajja, ¿Jesusan uñachtʼäwipajj kun sañsa munpacha? Ukatakejj kuna horasas casarasir waynajj purini uk amuytʼañaw wakisi. Kunjamtï uñjaniwayktanjja, Jesusajj juzgañatakisa juchañchañatakisa jachʼa tʼaqhesïwejj tukuykani ukhaw purinini. ¿Jesusajj juzgañataki niya jutañampïkani ukhati virgenanakajj parlapjjpachäni? Ukhamaw amuyasi, uka tiempotakejj Diosat jan jitheqtiri ajllitanakajj qhepïr sello katoqjjapjjaniwa.

11. 1) ¿Kunas jachʼa tʼaqhesïwi niya qalltkipan pasani? 2) Amuyasiri virgenanakajj jan amuytʼasirinakar ‘aceite alasir sarapjjam’ sasinjja, ¿kun sañsa munasipkäna?

¹¹ Ukhamajja jachʼa tʼaqhesïwi niya qalltkani uka tiempotakejja, Diosat jan jitheqtiri ajllit cristianonakat aka Oraqenkasipki ukanakajj taqeniw qhepïr sello katoqjjapjjani (Apo. 7:1-4). Ukaw alajjpachar cheqapun sarapjjañapätap uñachtʼayani. Ukampis ajllit cristianonakat khitinakatï jan amuyasipkani ukat jachʼa tʼaqhesïwi janïr qalltkipan Diosat jitheqtapkani ukanakajja, alajjpachar sarañ aptʼasipjjaniwa, janiw qhepïr sello katoqapkaniti. Jupanak lantisti Diosar taqe chuyma servir yaqha cristianonakaruw ajllisjjani. Jachʼa tʼaqhesïwejj qalltkani ukat taqpach kʼari religionanakar tukjat uñjasajja, Diosat jitheqtir ajllitanakajj wal muspharapjjani. Ukhaw Jesusan puriniñapatak jan wakichtʼatäpjjatap amuyasipjjpachäni. Ukapachatï jupanakajj yanap mayipjjani ukhajja, ¿kunas pasani? Tunka virgen tawaqonakat uñachtʼäwiw uk qhanañchi. Uka uñachtʼäwirjamajja, amuyasir virgenanakajj janiw aceite churañ munapkänti, jan ukasti akham sasaw jan amuytʼasir tawaqonakar sapjjäna: “Sarapjjamay kawkhantejj aljkis ukaru, ukatsti alasipjjarakim jumanakataki” sasa. Ukhajj chika arumänwa, janiw khiti aljiris utjkänti. Ukhamajja, ukham sasajj janiw horasäjjeti sañwa munasipkäna.

12. 1) Qhepïr sello jan katoqkasin Diosat jitheqtir ajllitanakarojja, ¿kunas jachʼa tʼaqhesïwi tiempon pasani? 2) Jan amuytʼasir virgen tawaqonakjamäpkani ukanakarojja, ¿kunas pasani?

¹² Jehová Diosat jan jitheqtir ajllitanakajj jachʼa tʼaqhesïwi tiemponjja, janiw Diosat jitheqtir ajllitanakar yanaptʼañ puedipkaniti, mä arunjja, janiw yanaptʼañatak tiempojj utj-jjaniti. Ukhamajja, ¿kunas Diosat jitheqtir ajllitanakarojj pasani? Jan amuyasir virgen tawaqonakjamarakiw uñjasipjjani. Uka tawaqonakajj aceite alir sarapkäna ukhaw casarasirejj purinjjäna. “Wakichtʼasitä[pkän] uka phesqa tawaqonakasti casarasïwirojj mantjjapjjänwa, ukatsti punkojj jistʼantasjjarakïnwa.” Kunapachatï Jesusajj jachʼa tʼaqhesïwi tukuyar purinkani ukhaw ajllitanakarojj alajjpachan tantachthapjjani (Mat. 24:31; 25:10; Juan 14:1-3; 1 Tes. 4:17). Ukampis Diosat jitheqtirinakarojj janiw katoqkaniti. Inas jupanakajj jan amuytʼasir virgen tawaqonakjam sapjjarakchini: “¡Tata, Tata, jistʼarapjjetaya!” sasa. Ukatsti kunjamtï Diosat jitheqtir jaqenakar siskani ukhamarakwa Jesusajj jupanakar sani: “Qhanakwa sapjjsma, janiw jumanakarojj uñtʼapksmati” sasa (Mat. 7:21-23; 25:11, 12).

13. 1) Jesusajj janiw walja ajllitanakan Diosat jitheqtapjjañapat parlkänti, ¿kunjamatsa uk yattanjja? 2) ¿Kunatsa Jesusajj ajllitanakar confiyänwa sasajj sissna? (12 janankir dibujo uñjjattʼam.)

¹³ ¿Walja ajllitanakaw Diosat jitheqtapjjani  ukat jupanak lantejj yaqhanakaruw ajllisini sañti Jesusajj munpachäna? Janiwa. Uk yatiñatakejja, Mateo 24 qellqatat amuytʼañäni. Jesusajj Amuyasiri Cheqapa Uywatar ‘janiw jan wali esclavor’ tukuñamäkiti sasin siskäna ukhajja, janiw ukhamapunis pasañapäkaspa ukham sañ munkänti, jan ukasti amuyasiñapatakiw ewjjtʼaskäna. Tunka virgen tawaqonakat parlkasajja, Jesusajj niya ukhamarakiw ajllit cristianonakarojj amuyasipjjañapatak ewjjtʼaskäna. Kunjamtï uñjawayktanjja, phesqa virgen tawaqonakajj amuytʼasis sarnaqañwa amtapjjäna, mayni phesqa tawaqonakasti, jan amuytʼasis sarnaqañwa amtapjjarakïna. Ajllit cristianonakajja, ukhamarakiw sapa maynejj Diosatakjamati sarnaqapjjani janicha uk amtapjjañapa. Apóstol Pablojj niya ukhamarakwa ajllit cristianonakarojj ewjjtʼäna (Hebreos 6:4-9 liytʼañataki; Deuteronomio 30:19 tʼaqa uñjjattʼarakïta). Pablojj qhana arunakampis jilanakapar ewjjtʼkchïnjja, qhepakamaw aguantapjjani sasaw confiyäna. Jesusajj tunka virgen tawaqonakat parlasin ajllitanakar ewjjtʼasajja, jupanakar confiyatapwa uñachtʼayarakïna. Cheqas Diosat jan jitheqtasa servipjjañapsa, alajjpachan wiñay jakañ katoqapjjañapsa Jesusajj yatiwa.

14. Jesusajj tunka virgen tawaqonakat parlkäna uka uñachtʼäwejja, ¿kunatsa ‘yaqha uwijanakar’ yanaptʼarakispa?

¹⁴ Jesusajj tunka virgen tawaqonakat parlkäna uka uñachtʼäwitjja, ¿kunsa yateqsna? Jan qarjtas wakichtʼat suyañasawa, ukwa yateqtanjja. Uka uñachtʼäwejj ajllit cristianonakatakïkchisa, ‘yaqha uwijanakajj’ yateqapjjarakispawa (Juan 10:16). ¿Kunatsa ukham sistanjja? Jesusajj akham sänwa: “Jumanakar sapksma ukjja, taqeniruw sarakta, amuyasipjjapunim” sasa (Mar. 13:37). Jesusajja, taqe cristianonakajj wakichtʼata jan qarjtas suyapjjaspa ukwa muni. Ajllitanakat yateqasisajja, jan qarjtasaw cristianonakajj Diosan Reinopat yatiyapjjañapa. Amtañäni, jan amuytʼasiri virgen tawaqonakajja, amuyasiri tawaqonakaruw ‘aceite churapjjeta’ sasin sapjjäna. Janipun jupanakjamäñäniti. Janiw khitis jiwas lantejj Diosar loqtkaspati, ni jiwas lantis wakichtʼat suykarakispati. Jiwasakiw uk lursna. Jesusajj niyaw taqeniru juzgañatak jutani, ukansti sapa mayniw cuenta churañäni. Ukhamasti, wakichtʼat suyañataki chʼamachasipjjañäni.

15. Jesusan casarasïwipajja, ¿kunatsa taqe cristianonakar kusisiyistu?

¹⁵ Jesusajj virgen tawaqonakat parlasinjja, mä casarasïwitwa parlarakïna, uka toqet amuytʼasajj taqeniw kusistanjja. Armagedón chʼajjwäwejj tukuyjjani ukhajja, ajllitanakajj alajjpachanwa Criston noviapar tukupjjani (Apo. 19:7-9). Aka Oraqen jakirinakas walja bendicionanakwa katoqapjjarakini. ¿Kunatsa ukham sistanjja? Uka casarasïwi utjatapatwa mä suma gobiernojj aka Oraqjjaru apnaqjjani. Ukhamajja, alajjpachar sarañataki ajllitästansa janisa, jan qarjtas wakichtʼata suyapjjañäni. Ukhamatwa jutïrinjja, Diosan bendicionap katoqasajj kusisita jakasiñäni.