¿Kunjamsa irpir chuymaninakajj jilatanakar wakichtʼapjjaspa?
“Kuntejj [...] arsuri istʼkista ukjja, khitinakatejj churañjamäki, [...] ukanakarojj uka pachpa arunakampi ewjjtʼam.” (2 TIM. 2:2)
1. 1) Mayninakar wakichtʼañ toqetjja ¿kunsa Diosan servirinakapajj nayratpach amuyapjjerïna, ukat kunatsa ukajj jichhürunakan wakisi? 2) ¿Kunsa aka yatichäwin yatjjataskañäni?
‘TAQE kunas sum sarañapatakejja, mayninakar wakichtʼañajj wali wakiskiriwa’ sasaw Diosan servirinakapajj nayratpach amuyapjjerïna. Sañäni, Abram chachajj Lot chachar qhespiyañatakejja ‘suma wakichtʼat chachanakwa tantachthapïna’, (NM) ukatwa jupanakajj Lot chachar qhespiyapjjäna (Gén. 14:14-16). David chachan urunakapansti Diosan utapan qʼochurinakajj ‘wakichtʼatäpjjänwa’, ukhamatwa Jehová Diosar jachʼañchapjjäna (1 Cró. 25:7, NM). Jichhürunakanjja jiwasajj Supay contra ukat jupan apnaqat akapacha contraw nuwastanjja (Efe. 6:11-13). Ukatjja, Jehová Diosan sutip jachʼañchasiñapatakis chʼamachasiraktanwa (Heb. 13:15, 16). Kunjamatï nayra tiemponakan Diosan servirinakapajj wakichtʼatäpkänjja, jiwasajj ukham wakichtʼatäñasarakiwa, ukhamat sum jikjjatasiñataki. Tamanjja, Jehová Diosajj irpir chuymaninakaruw jilatanakar wakichtʼapjjañapatak confiyi (2 Tim. 2:2). ¿Kunjamsa irpir chuymaninakajj jilatanakar wakichtʼapjje? Ukwa aka yatichäwin yatjjataskañäni.
JEHOVÁ DIOSAR MUNASIÑAPATAKIW YANAPTʼAÑAMA
2. Mä jilatar wakichtʼkani ukhajja, ¿kunsa irpir chuymanejj luraspa, ukat kunatsa?
2 Irpir chuymaninakajj yapuchirïpkaspas ukhamäpjjewa. Yapuchirejja, janïr satantkasajj wanumpiw oraqer uchi, ukhamat jathajj sum alsuniñapataki. Niya ukhamarakwa mä irpir chuymani jilatajj luraspa, mä jilatar wakichtʼkani ukhajja Biblian jiskʼa tʼaqanakap liytʼayasaw yanaptʼaspa. ¿Kunatsa? Ukhamatwa jilatarojj yateqataparjam lurañapataki yanaptʼani (1 Tim. 4:6).
3. 1) Marcos 12:29, 30 qellqatampejj ¿kunjamsa irpir chuymanejj jilatar yanaptʼaspa? 2) Jilatatï irpir chuymaniru jupatak oración mayir istʼani ukhajja, ¿kunjamsa jikjjatasispa?
3 Jumatï irpir chuymanïsta ukhajja, kunjamsa jilatan chuymaparusa amuyuparusa Biblian cheqa yatichäwinakapajj yanaptʼaski ukwa amuyañama. Uk yatiñatakejja Marcos 12:29, 30 (liytʼañataki) qellqatwa jupamp liytʼasma. Ukatjja ‘¿kunjamsa Jehová Diosar katuyasitamajj jakäwimar yanaptʼawayi?’ sasaw jisktʼarakisma. Ukham jisktʼañajja, kunjamsa Jehová Diosar taqe chuyma loqtsna uka toqet parlañatakiw yanaptʼapjjeristam. Ukatsti jupamp chikaw oracionan Jehová Diosar qollan ajayup mayirakisma, ukhamat taman luräwinak jilatajj katoqkani uk phoqañapataki. Jupatak oración mayir istʼasajja, jilatajj taman jukʼamp lurañatakiw chʼamachasispa.
4. 1) Biblian qellqatäki uka sarnaqäwinakatjja, ¿kawkïrinakas jilatanakar nayraru sartapjjañapatak yanaptʼaspa? 2) ¿Kuna amtampis irpir chuymaninakajj jilatanakar wakichtʼapjjañapa?
4 Irpir chuymani, mä jilatar wakichtʼañ qalltäta ukhajja, Biblian qellqatäki uka sarnaqäwinakatwa jilatatak liytʼarapiñama, ukaw kunja wakiskirisa mayninakar yanaptʼañasa, altʼat chuymanïñasa, confiykayäñasa uk amuyañapatak yanaptʼani (1 Rey. 19:19-21; Neh. 7:2; 13:13; Hech. 18:24-26). Ukham chuymanïñajja, oraqerus yapuchirejj wanu uskkaspa ukhamawa. Ukaw jilatarojj ajay toqen jiltañapatak yanaptʼani. Francia markan jakasiri Jean-Claude sat mä irpir chuymanejj akham siwa: “Mä jilatar wakichtʼkta ukhajja, taqe kunsa Bibliarjam amtañapatakiw yanaptʼta. Ukatakejja, Bibliajj ‘muspharkañ arunakanïtap’ amuyañapatakiw Bibliat liytʼarapta” sasa (Sal. 119:18). Jehová Diosar jukʼamp munasipjjañapatakejja, ¿kunanakampi lurasas irpir chuymaninakajj jilatanakar yanaptʼapjjaspa?
KUNATAKISA UKAT KUNATSA CHʼAMACHASIÑAPA UK SAÑAMAWA
5. 1) Diosar jukʼamp loqtañatakejj kuna amtanakanïtasa sasin jilatanakar jisktʼañajj ¿kunatsa wakiskirejja? 2) ¿Kunatsa irpir chuymaninakajj jilatanakar waynitutpach wakichtʼapjjañapa? (Qhanañchäwi uñjjattʼäta.)
5 ‘Diosar jukʼamp loqtaskakiñatakejj ¿kuna amtanakanïtasa?’ sasaw jilatar jisktʼañama. Janitï kuna amtanïkchi ukhajja, kunsa lurirjamäspa uk lurañ amtañapatakiw yanaptʼañama. Diosar jukʼamp loqtaskakiñatakejj kun lurañsa jumajj amtayäta, ukat uka amta phoqasajj kunja kusisitas jikjjatasirïta ukanakatwa jupar parltʼasma. Ukham lurañajj janiw chʼamäkiti ukat jilatarojj yanaptʼaniwa. Irpir chuymanjama ukhamaraki precursorjam África markan servir Víctor jilatajja, kunatsa ukham lurañajj wali wakiskirejja uk akham siwa: “Waynitüskayäta ukhajja, mä irpir chuymaniw akham jisktʼitäna: ‘Diosar jukʼamp loqtaskakiñatakejj ¿kunanak lurañsa amtaskta?’ sasa. Ukaw Diosar taqe chuym loqtañatakejj yanaptʼitäna” sasa. Maysa toqetjja, 13 jan ukajj 14 maranïsipki ukhatpach jilatanakar wakichtʼañajj wali wakiskiriwa sasaw experienciani walja irpir chuymaninakajj sapjje. Waynitojj qawqha maranisa ukarjamaw taman lurañanakajj churasispa. ¿Kunatsa irpir chuymaninakajj jilatanakar waynitutpach wakichtʼapjjañapa? Ukham wakichtʼäta ukhajja, jukʼamp maranëjjapjjani ukhajj Diosar loqtasipkakiniwa, janirakiw akapachampis apayasipkaniti (Salmo 71:5, 17 liytʼañataki). *
Kunsa ukat kunatsa lurañapa ukwa jilatarojj sum qhanañchtʼañama, ukatsti ‘walik ukham lurtajja’ sasaw chʼamachasitaparojj sañamaraki (5-8 tʼaqanak uñjjattʼäta)
6. ¿Kunjamsa Jesusajj mayninakar wakichtʼirïna?
6 Taman jukʼamp lurañ munañapatakejja, irpir chuymaninakajj janiw kunsa lurañapa ukak jilatar sapjjañapäkiti. Jan ukasti, kunatsa uk lurañapa uksa sapjjañaparakiwa. Ukham lurasaw Jesusajj mayninakar wakichtʼirïna. Apostolonakapar janïr yatiyir khitkasajja, kunatsa yatiyir sarapjjañapa ukwa nayraqat qhanañchtʼäna. Jupasti akham sänwa: “Nayar churatawa taqe munañanïñajja alajjpachansa, akapachansa. Taqe akapachankir jaqenakar yatiyir sarapjjam, nayar arkir tukuyapjjam” sasa (Mat. 28:18, 19). ¿Kunjamsa irpir chuymaninakajj Jesusat yateqasipjjaspa?
7, 8. 1) ¿Kunjamsa irpir chuymaninakajj Jesusat yateqasipjjaspa? 2) ¿Kunatsa jilatar chʼamañchtʼañajj wakisi? 3) ¿Kuna ewjjtʼanakarjamas irpir chuymaninakajj jilatanakar wakichtʼapjjaspa? (“ Jilatanakar wakichtʼañatak ewjjtʼanaka” siski uka recuadro uñjjattʼäta.)
7 Mä jilatar kun lurañapatakis mayïta ukhajja, kunatsa lurañapa ukjja Bibliampiw qhanañchtʼañama. Ukhamatwa Bibliarjam lurañapataki yanaptʼäta. Sañäni, Tantachasiñ Uta mantaña pichañapataki jilatar mayïta ukhajja, Tito 2:10 qellqatwa jupar uñjjattʼayasma. Ukatjja, akham sasaw uka qellqatampejj qhanañchtʼasma: “Jumatï sum pichstʼäta ukhajja, Diosan yatichäwipajj sumätapwa jaqenakajj amuyapjjani. Ukatjja jilïr jilat kullakanakarus yanaptʼarakïtawa” sasa. Jupampi ukham parltʼasajja, mayninakan askip thaqañapatakiw yanaptʼäta. Kunapachatï luratanakapampi jilat kullakanakar yanaptʼatap amuyani ukhajja, kusisitaw jikjjatasini.
8 Jilatajj ewjjtʼamarjam lurani ukhajja, ‘walik ukham lurtajja’ sasaw chʼamañchtʼañamaraki. ¿Kunatsa ukajj wakisi? Ukhamatwa nayrar sartaskakiñapatak yanaptʼäta. Jilatar ukham chʼamañchtʼañajja, mä alirus jiltañapatak umamp warjjatʼkasma ukhamawa (Mateo 3:17 uñjjattʼarakisma).
¿KUNAS AWISAJJ PASASPA?
9. 1) ¿Kunas yaqhep qamir markanakan pasi? 2) Diosar serviñajj ¿kunatsa yaqhep waynanakatakejj jan nayrankki?
9 Yaqhep qamir markanakanjja, pä tunka maranit pusi tunka marankama jilatanakar chʼamañchtʼañajj irpir chuymaninakatak chʼamakiwa. Mä kutejja 20 markanakankir irpir chuymaninakarojj akham sasaw jisktʼasïna: “¿Kunatsa uka jilatanakar chʼamañchtʼañajj chʼamaki?” sasa. Jupanakat waljanejj sapjjänwa: “Waynitüsipkäna ukhajja, awk taykanakapajj janiw Jehová Diosar jukʼamp loqtapjjañapatak chʼamañchtʼapkänti. Jupanakat yaqhepajj chʼamachasiñ munapjjäna ukhajja, awk taykanakapajj qollqe ganapjjañapataki jachʼa yateqañ utanakar sarapjjañapatakiw chʼamañchapjjäna. Ukatwa jupanakatakejj Diosar serviñajj jan nayrankkänti” sasa (Mat. 10:24).
10, 11. 1) Taman luräwinak katoqañ munapjjañapatakejja, ¿kunjamsa irpir chuymaninakajj jukʼat jukʼat jilatanakar yanaptʼapjjaspa? 2) ¿Biblian kawkïr jiskʼa tʼaqanakapas jilatan chuymapar purtʼaspa, ukat kunatsa? (Qhanañchäwi uñjjattʼäta.)
10 Taman jukʼamp luräwinak katoqañataki jan chʼamachasipki uka jilatanakar yanaptʼañajj janiw faciläkiti, ukampis jupanakar yanaptʼasispawa. Ukatakejj pacienciaw munasi, chʼamachasiñas wakisirakiwa. Yapuchirit amuytʼaskakiñäni. Mä ali sum jilañapatakejja, yapuchirejj jukʼat jukʼatwa yanaptʼi. Irpir chuymaninakajj ukhamarakiw jilatanakar jukʼat jukʼata yanaptʼapjjañapa. Ukhamat taman luräwinak katoqañ munapjjañapataki. ¿Kunjamsa uk lurapjjaspa?
11 Jilatan amigopäñamatakiw tiempo apstʼasiñama. ‘Tamanjja yanaptʼamajj waliw munasi’ sasaw sañama. Jupamp qontʼasisinjja, Biblian jiskʼa tʼaqanakap uñjjattʼayam, ukanakasti Diosar jakäwip katuyaskäna ukhajj kunsa arsüna uk amuytʼañapatakiw yanaptʼañapa (Ecl. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5). Chuymapar purtʼañatakejj akham sasaw jisktʼasma: “Jehová Diosar jakäwim katuyaskayäta ukhajja, ¿kunsa arsuwayta? Bautisaskayäta ukhajja, ¿kunjamsa Jehová Diosajj jikjjataspachäna? ¿Kunjamsa Supayajj jikjjatasirakpachäna?” sasa (Pro. 27:11; 1 Ped. 5:8). ¿Kunatsa jilatatakejj Biblian jiskʼa tʼaqanakap liytʼañajj wakisi? Diosan Arupajj wali chʼamaniwa ukatsti jilatan chuymaparuw purtʼarakispa (Hebreos 4:12 liytʼañataki). *
YANAPTʼAYASIR JILATANAKA, ¿KUNJAM CHUYMANÏPJJAÑAMASA?
12, 13. 1) Elías profetampi wakichtʼatäkäna ukhajja, ¿kunjam chuymanïtapsa Eliseojj uñachtʼayäna? 2) ¿Kunjamsa Jehová Diosajj Eliseor bendicïna?
12 Wayna jilatanaka, tamanjj jumanakan yanaptʼanakamaw wal munasi. ¿Kunjam chuymanïñas Jehová Diosar serviñatak yanaptʼätam? Uk yatiñatakejj Diosar servir Eliseo chachat yatjjatañäni.
13 Niya 3.000 maranak nayrajja, Elías profetajj Eliseoruw yanapiripäñapatak invittʼäna. Eliseosti ukaratpachaw iyawsäna. Ukatjja jan jitheqtasaw profetar yanaptʼäna (2 Rey. 3:11). Eliasajj sojjta maranakaw Eliseor wakichtʼäna. Kunapachatï Eliasajj Israel markan lurañap niya tukuyañampëjjäna ukhajja, janiw yanapjjetätati sasaw Eliseor säna. Ukampis Eliseojj kimsa kutiw akham säna: ‘Janiw nayajj jumar jaytkämati’ sasa. Janiw jupajj Eliasar jaytañ munkänti, ukhamätap laykusti Jehová Diosajj bendicïnwa. Ukatsti kunjamsa Eliasar thaya tutukanjam apasjjäna uksa Diosajj Eliseor uñjayarakïnwa (2 Rey. 2:1-12).
14. 1) Wakichtʼatäsipki uka jilatanakajja, ¿kunjamsa Eliseot yateqasipjjaspa? 2) ¿Kunatsa wakichtʼatäsipki uka jilatanakajj taman luräwinak taqe chuyma phoqapjjañapa?
14 Jumatï mä irpir chuymanimpi wakichtʼatäsksta ukhajja, ¿kunjamsa Eliseo chachat yateqasisma? Taman kuna luräwi churatasa, taqe chuymaw katoqtʼasiñama. Ukhamarus ak amtañamarakiwa, wakichtʼktam uka irpir chuyman jilatajj amigomawa. Jumar yanaptʼañatak kuntï lurki ukatsa yuspärañamawa, ‘jumat jukʼamp yateqañ munaskaktwa’ sasaw sañamaraki. Taqe kunat sipansa, kuna luräwtï churkätam ukjja taqe chuymaw phoqañama. Ukham luratam uñjasajja, Jehová Diosajj jukʼamp luräwinak churañ munatapwa irpir chuymaninakajj amuyapjjani (Sal. 101:6; 2 Timoteo 2:2 liytʼañataki).
RESPETO UÑACHTʼAYAÑAMAWA
15, 16. 1) ¿Kunjamsa Eliseojj wakichtʼiripar respetatap uñachtʼayäna? (9 janankir dibujo uñjjattʼäta.) 2) ¿Kunatsa mayni profetanakajj Eliseor confiyapjjäna?
15 Irpir chuymanimp wakichtʼat jilata, ¿kunampsa Eliseo chachat yateqasisma? Irpir chuymaninakar respetañajj wali wakiskiriwa, ukwa uka sarnaqäwejj uñachtʼayi. Jericó markan mä qawqha profetanakar visittʼasajja, Eliasampi Eliseompejj Jordán jawiraruw sarapjjäna. “Ukatsti Eliasajj capapa llawtʼasinjja, ukampiwa umaru jisktäna, ukatjja jawir umajja payaruwa jaljtäna, ukatsti panpachaniw jawirjja waña oraqenjama makhatapjjäna.” Parlasisa sarasipkäna ukhajja, Eliseojj wali amuyumpiw Eliasan arunakap istʼäna ukat yateqarakïna. Janipuniw Eliseojj taqe kuns yatkaspa ukham amuykänti. Kunapachatï Jehová Diosajj thaya tutukanjam Eliasar apasjjäna uka qhepatjja, Eliseojj wasitampiw Jordán jawirar kuttʼäna, ukatjja Eliasan capapa katusinsti umaruw jisktäna, ukat akham artʼasïna: “¿Kawkinkis Eliasan [Jehová] Diosapajja?” sasa. Ukjjarojj mayampiw umajj payar jaljtäna (2 Rey. 2:8-14).
16 Eliseon nayrïr milagropajja, Eliasan qhepïr milagropjamänwa ¿uk amuytati? ¿Kunsa uka luräwit yateqasisma? Eliseojj profetjam uttʼayatäjjäna ukhajja, kunjamtï Elías profetajj lurirïkäna ukhamwa luraskakïna, janiw mayjtʼaykänti. Ukhamatwa wakichtʼiripar respetatap uñachtʼayäna. Ukham luratap uñjasaw mayni profetanakajj jupar confiyapjjarakïna (2 Rey. 2:15). Eliseojj 60 maranakaw profetjam servïna, ukatjja Jehová Diosajj Eliasat sipansa jukʼamp milagronak lurañapatakiw chʼam churäna. Irpir chuymaninakamp wakichtʼatäsipki uka jilatanakajj ¿kunsa uka sarnaqäwit yateqasipjjaspa?
17. 1) Wakichtʼatäsipki uka jilatanakajja, ¿kunsa Eliseot yateqasipjjaspa? 2) Tiempompejja ¿kunanak lurañatakis Jehová Diosajj yanaptʼätamjja?
17 Jumatï taman jukʼamp luräwinak katoqäta ukhajja, taman taqe kunsa mayjtʼayañamäkaspa ukham janiw amuyañamäkiti. Ak amtañamawa, taman mayjtʼayañajj wakiski, jan ukajj Diosan markapajj kuns mayjtʼayki ukhakiw mayjtʼayasispa. Janipuniw munañamarjamajj mayjtʼayañamäkiti. Eliseot amtaskakiñäni, jupajja kunjamtï Elías profetajj lurirïkäna ukarjamaw luraskakïna, ukhamatwa wakichtʼiripar respetatap uñachtʼayäna. Ukham luratap uñjasarakiw mayni profetanakas jupar confiyapjjäna. Jumatï irpir chuymaninakjam Biblian yatichäwinakaparjam lurarakïta ukhajja, jupanakar respetatamwa uñachtʼayäta. Ukampirusa tamankir jilat kullakanakas confiyapjjarakïtamwa (1 Corintios 4:17 liytʼañataki). Jukʼamp experiencianëjjäta ukhajja, taman nayrar sartañapatakejj kunanak mayjtʼayañas wakisispa ukanakwa lurarakïta. Ukat tiempompejja, kunjamtï Jehová Diosajj Eliseor yanaptʼkänjja ukhamarakiw jumar yanaptʼätamjja. Inas khitinakatï wakichtʼawayapktam uka jilatanakat sipansa jukʼampinak lurchïta (Juan 14:12).
18. ¿Kunatsa jilatanakar jankʼak wakichtʼasiñapa?
18 Aka yatichäwisa pasïr yatichäwisa, ak lurapjjañapatakiw irpir chuymaninakar yanaptʼi: jilatanakar wakichtʼañatakejj tiempo apstʼasipjjañapawa, ukat taman jukʼamp irnaqañ munapjjañapatakis yanaptʼapjjañaparakiwa. Uka ewjjanakarjam lurasispa ukwa munapjjta. Ukhamatwa taqpach tamanakajj jan walinakar saykatañatak wakichtʼatäpjjani. Ukatsti jan wali urunakajj jakʼachasisinki ukar saykatañatakiw sapa maynir yanaptʼarakistani.
^ tʼaqa 5 Mä wayna jilatatï Jehová Diosampi sum apasitap uñachtʼaychi, altʼat chuymanïchi, Biblian mayitanakaps phoqarakchi ukhajja, jilatajj janis 20 maranïkchejja, irpir chuymaninakan yanapiripat uttʼayatäspawa (1 Tim. 3:8-10, 12; La Atalaya julio 1, 1989 revistan 29 janap uñjjattʼäta).
^ tʼaqa 11 Mä jilatampejj aka qellqatanakarjamaw parltʼasma: Yatiyañataki abril 15, 2012 revista 14-16 jananakan 8-13 tʼaqanakapa, ukatjja “Diosan munasiñapan jakasipxañäni” sat libro 16 yatichäwin 1-3 tʼaqanaka.
