ANA * kullakajj Jehová Diosan Testigopjam bautisasjjäna ukhajja, esposopajj wal coleräna. Jupajj siwa: “Esposojajja, tantachäwinakar sarañajsa Diosan sutip aytañajsa janipuniw munkänti. Diosan Jehová sutip aytir istʼitäna ukhajja, wal colerasirïna” sasa.

Uka kullakan esposopajja, Jehová Diosat wawanakapar yatichañapsa, tantachäwinakar irpañapsa janirakiw munkänti.Ukajj jupatak wali chʼamänwa, wawanakaparojj jamasatakwa Diosat yatichañapäna.

¿Uka kullakjam jikjjatasirïtati? Inas familiaranakamat maynejj Jehová Diosar serviñam jan munkchispati. Jan ukajj inas walja maranaka usuta jikjjatassta. Maysa toqetjja, inas wawamasa, esposomasa jan ukajj esposamas jiwchi. Jan ukajj inas familiamat maynejj Jehová Diosar jan sirvjjchiti. Ukhamanakan uñjassta ukhajja, ¿kunas Diosar serviskakiñatakejj yanaptʼiristam?

Apóstol Pablojj akham sänwa: ‘Aguantapjjañamaw wakisi’ sasa (Heb. 10:36, NM). Ukhamajja, ¿kunas aguantañatak yanaptʼistaspa?

Kunayman jan walinakan jikjjatasiñäni ukhajja, Jehová Diosatwa aguantañatakejj yanaptʼa mayisiñasa. Ukwa Andrea kullakajj luräna. Kunapachatï esposopajj akatjamat jiwäna ukhajja, Diosatwa yanaptʼa mayisïna, jupanakasti 30 mara casadopjjänwa. Kullakajj akham siwa: “Esposojajj trabajopat janiw mayampis utar kuttʼanjjänti, jupajj 52 maranikïskänwa” sasa.

Andrea kullakajja, jan añcha llakisiñatakejj jan tiemponis trabajkchïnjja, janiw llakipat armaskänti. Ukampis ¿kunas uka kullakar yanaptʼpachäna? Jupajj siwa: “Kunjamsa jikjjatasiyäta uk Jehová Diosaruw yatiyirïta, ukatsti nayar yanaptʼañapatakiw mayisiyäta” sasa. ¿Jehová Diosajj mayisitanakap istʼpachänti? Kullakajj siwa: “Jehová Diosaw chuymajan sum jikjjatasiñatakisa jan llakisiñatakis yanaptʼawayitu. Jutïrinjja, Diosaw esposojar jaktayjjani” sasa (Fili. 4:6, 7).

Servirinakapan mayisitanakapjja Diosajj istʼapuniwa, janiw pächasiñasäkiti (Sal. 65:2). Ukatsti Jupar serviskakiñatakejj kunanakatï munaski ukanaksa churarakistuwa. Ukhamajja, jan walinakansa uñjaskchiñänejja, Jehová Diosaw nayrar sartaskakiñatakejj yanaptʼistani.

Jehová Diosajj jilat kullakanakas toqew aguantañatakejj yanaptʼarakistu. Amuytʼañataki, Tesalónica tamankir jilat kullakanakajj tʼaqhesiyat uñjasipkäna ukhajja, apóstol Pablojj jupanakar akham sänwa: “Chʼamañchasipjjam maynit maynikama, kunjämtejj jichhas lurapktas ukhama” sasa (1 Tes. 2:14; 5:11). Ukatakejja, jupanakajj tantachasipjjañapänwa, jupanakkamas sum apasisaw yanaptʼasipjjañapäna. Uka cristianonakat yateqasiñatakejj ¿kun lurañasasa?

Tama taypin suma amigonakanïñasawa ukatsti maynit maynikamaw chʼamañchtʼasiñasaraki (Rom. 14:19). Yamas jan walinakan jikjjatasktan ukhaw ukajj jukʼamp wakiskirejja. Pablojj arknaqata, kunayman tʼaqhesiyataw uñjasïna. Ukampis Jehová Diosajj jilat kullakanak toqew aguantañ yanaptʼäna. Ukatwa Colosas markankir jilat kullakanakat Pablojj akham sispachäna: “Jupanakasti nayatakejj wali chuyma jarjarakiwa” sasa (Col. 4:10, 11). Uka jilat kullakanakajja, munasiñatwa Pablor chʼamañchtʼapjjäna ukat wakiskäna ukhas yanaptʼapjjarakïna. Inas jumarojj ukhamarak mä jilatasa jan ukajj mä kullakas arumpisa, yaqha ukhamanakampis chʼamañchtʼawaystam.

Jehová Diosajj irpir chuymaninak toqew yanaptʼarakistu. Jupanakajj Bibliampiw chʼamañchtʼapjjestu  ewjjtʼapjjarakistu. Ukatwa Bibliajj irpir chuymaninakat akham qhanañchi: “Thayat imantasiñjama samaräwïniwa, jachʼa mathapi thayatsti jupajj imaniwa, waña oraqen uma irpañ qʼawanakjama, wasaran mä jachʼa qalan chʼiwipäniwa” sasa (Isa. 32:2). Tamasana irpir chuymaninak utjatapat wal kusistanjja. Ukhamajja, jan walin jikjjatasïta ukhajj jupanakampiw parltʼañama, uka jilatanakasti Jehová Diosar serviskakiñatakiw yanaptʼapjjätam.

Ukampis ak amtañasajj wali wakiskirirakiwa, irpir chuymaninakajj jiwasjam pantjasirïpjjewa (Hech. 14:15). Ukhamajj janiw taqe jan waltʼäwinakas askichapkapuniniti. Ukampis jiwasamp chikaw Diosat mayipjjaspa, ukaw chuymasan sum jikjjatasiñatak yanaptʼistani (Sant. 5:14, 15). Italia markanjja, mä jilatajj walja maranakaw wali usuntata jikjjatasi, ukhamäkchi ukasa aguantaskakiwa. Jupajj akham siwa: “Jilatanakajj sapa kutiw visittʼapjjetu, ukatsti munasiñampiw uñjapjjarakitu, ukaw jichhakam aguantañatakejj yanaptʼitu” sasa. Ukhamajj jan walinakan jikjjatasisajja, irpir chuymaninakamp yanaptʼayassna ukwa Jehová Diosajj muni.

Jan walin jikjjataskasas Jehová Diosar serviskakiñäni ukhajja, Jupajj yanaptʼistaniwa. Ukwa Juan jilatat amuysna. Juparojja, 39 maranïkäna ukhaw doctoranakajj canceranïtawa sasin sapjjäna. Jilatajj akham siwa: “Janiw cheqaw sañjamäkänti, nayajj janiw añcha jilïrïkayätti” sasa. Jupajj esposapatsa, kimsa marani wawapatsa wal llakisïna. Juan jilatajj siwa: “Esposajajja, janiw wawajatak llakisiñapäjjänti nayatsa llakisjjañaparakïnwa. Doctoramp uñjayasir sarañajatakis amtayañaparakïnwa” sasa. Cancerataki qollanak umasajja, qarita, manqʼa kutsuyirjama ukhamaw jilatajj jikjjatasïna. Janiw ukakïkänti, Juan jilatan awkipajj usuntata, niya jiwirjama ukhamaw jikjjatasïna, ukhamajj jilatan uñjañapaw wakisirakïna.

¿Kunas Juan jilatarusa familiaparus yanaptʼäna? Jilatajj akham siwa: “Qaritas jikjjataschiyätjja, Diosar servisipkakiñapatakiw familiajar yanaptʼayäta. Awisajj chʼamakïnwa, ukampis taqpach tantachäwinakaruw sarapjjayäta, yatiyiris ukhamaraki, Familiana Diosar Yupaychañataki Arumsa apapjjarakiyätwa” sasa. Uka jilatatakejja, Jehová Diosampi sum apasiñaw wali wakiskirïnjja. Qalltan walsa sustjaskchïnjja, Jehová Diosan chʼam churatapa, yanaptʼatapwa amuyawayi. Uka jilatajj saskakiwa: “Kunjamtï Jehová Diosajj nayar chʼam churitojja ukhamarakwa taqe chuyma servirinakapar chʼam churaspa” sasa. Cheqansa Jehová Diosajj jan waltʼäwinakar saykatañatakis yanaptʼarakiristamwa.

Ukhamajj jan walinakan jikjjataskäta ukhajja, Pablon aka arunakap amtañamawa: ‘Aguantapjjañamaw wakisi’ sasa. Ukhamasti, Jehová Diosat yanaptʼa mayisipunim, jilat kullakanakatsa jan jitheqtamti, irpir chuymaninakampis yanaptʼayasirakim, ukatsti Jehová Diosarojj serviskakim. Jan walinakansay jichhasa jutïrinsa jikjjataskchïtajja, Jehová Diosajj yanaptʼapunïtamwa.