1. ‘Cristojj Diosan chʼamaparakiwa’ sasajja, ¿kunatsa Pablojj sispachäna?

JEHOVÁ DIOSAJJA, qawqha chʼamanisa ukjja Jesucristo toqew uñachtʼayäna. Jesusajj walja milagronak luräna, ukampis ukanakat mä qawqhakiw Biblian jikjjatasi, ukanakaw Diosar jukʼampi confiyañatak yanaptʼistu (Mat. 9:35; Luc. 9:11). Cheqas Jehová Diosajj qawqha chʼamanisa ukajj Jesús toqew uñachtʼayasïna. Ukatwa apóstol Pablojj akham sispachäna: “Cristojj Diosan [...] chʼamaparakiwa” sasa (1 Cor. 1:24). Ukampis ¿kunjamsa Jesusan milagro luratanakapajj jakäwisan yanaptʼistaspa?

2. ¿Kunsa Jesusan milagro luratanakapajj amuytʼayistu?

² Jesusajj ‘muspharkañ uñachtʼäwinaka’, jan ukajj milagronak luri sasaw Pedrojj säna (Hech. 2:22). Kunapachatï Jesusajj aka Oraqjjaru apnaqankani ukhajja, walja milagronakwa lurani, ukwa milagro luratanakapajj uñachtʼayäna. Ukatjja, Jehová Diosasa Jesusasa kunjam chuymanïpjjesa uk sum amuyañatakiw yanaptʼarakistu. Ukhamajja, kunjamsa Jesusan milagro  luratanakapajj jichhasa, jutïrinsa yanaptʼistaspa uk yatjjatapjjañäni.

3. 1) ¿Kunatsa Jesusajj nayrïr milagrop luräna? 2) Caná markan khuyaptʼayasirïtapjja, ¿kunjamsa Jesusajj uñachtʼayäna?

³ Jesusajj nayrïr milagropjja, Caná markanwa mä casarasïwin luräna. Uka casarasïwinjja vinow pistʼäna, inas walja jaqenak utjipan pistʼchïna. Vino pistʼatapajj casarasir chacha warmitakejj mä phenqʼasapänwa, ¿kunatsa? Wajjtʼasirïñajj uka tiempon wali wakiskirïnwa. Jesusan María taykapajj uka casarasïwinkänwa. Vino tukusjjepansti Mariajj Jesusar sänwa: “Janiw vinopajj utjkjjeti” sasa. Mariajj ¿Jesusan milagronak lurañataki chʼamanïtap yatpachänti? Inas ukhamächïna. Jupajj kuna profecianakatï Jesusan phoqasiñapäkäna uka toqet lupʼirïpachänwa, ukatsti Jesusajj “alajjpach Diosan Wawapaw” satäñapsa yatirakïnwa (Luc. 1:30-32; 2:52). Mariamp Jesusampejj casarasir chacha warmit khuyaptʼayasipjjänwa, ukatwa Jesusajj walja litro umjja suma vinor tukuyäna (Juan 2:3, 6-11 liytʼañataki). ¿Uka milagro lurañapajj wakisipunpachänti? Janiwa. Jupajj Awkipat yateqasisaw jaqenakat khuyaptʼayasiskäna.

4, 5. 1) ¿Kunsa Jesusan nayrïr milagro luratapajj uñachtʼayistu? 2) Jesusan milagro luratapajj ¿kunsa jutïr pachat uñachtʼayistu?

⁴ Jesusajj milagro lurasaw walja jaqenakatak vino utjayäna. ¿Kunsa Jesusan uka milagro luratapajj uñachtʼayistu? Jesusatakisa ukhamarak Jehová Diosatakisa, mayninakan askipaw nayrankejja, ukwa Jesusan milagro luratapajj uñachtʼayistu. Jehová Diosasa, Jesusasa janiw michʼäpkiti. Jutïr pachanjja, Jehová Diosajj “taqe markanakatakiw” walja manqʼañanak utjayani (Isaías 25:6 liytʼañataki).

⁵ Jehová Diosajj niyaw suma manqʼanaksa, mä suma utsa, ukhamarak yaqha ukhamanaksa Paraison churistani. Uka toqenakat lupʼisajj wali kusisitaw jikjjatastanjja.

6. ¿Khitinakan askip thaqhasas Jesusajj milagronak luräna, ukat kunsa yateqsna?

⁶ Mä kutejja, Supayajj akham sasaw Jesusar säna: “Aka qalanakarojj tʼantʼar tukuyam” sasa. Jesusajj janiw jupan askip thaqkänti, ukatwa qalanak tʼantʼar jan tukuykänti (Mat. 4:2-4). Ukampis mayninakan askip thaqhasaw milagronak lurirïna. ¿Kunsa ukajj yatichistu? Jesusajj arkirinakaparojj akham sänwa: “Yaqhanakarojj churapjjam” sasa (Luc. 6:38). Ukhamajja, ¿kunanak lurasas khuyaptʼayasirïtas uñachtʼaysna? Utasaruw manqtʼasiñataki mayninakar jawstʼsna. Tantachäwi tukuyarus jilat kullakanakarojj yanaptʼaraksnawa, sañäni: mä jilataruw taman arstʼañapataki yanaptʼsna. Ukatsti Diosan arunakap yatiyañatak yanaptʼa munapki ukanakarus yanaptʼaraksnawa. Kunjam yanaptʼañay  wakischini ukarjam yanaptʼasaw Jesusat yateqasitas uñachtʼaytanjja.

7. Aka ñanqha pachan tukusiñapkamajj ¿kunas utjaskakini?

⁷ Akapachanjja, pisin jakasiñajj utjakipuniwa. Jehová Diosajj Israel markar akham sänwa: “Pobrenakajj utjapuniniwa” sasa (Deu. 15:11). Walja maranak qhepatjja, Jesusajj sarakïnwa: “Pobrenakajj jumanakampïskapuniniwa” sasa (Mat. 26:11). Uka arunakampejja, ¿aka Oraqen wiñayatakiw pobrenakajj utjani sañti Jesusajj munaskäna? Janiwa. Jan ukasti aka ñanqha pachan tukusiñapkamakiw utjani sañwa munäna. Kunapachatï Jesusajj aka Oraqeru apnaqjjani ukhajja, janiw pisin jakasiñajj utj-jjaniti, taqeninwa manqʼañajj utj-jjani.

8, 9. 1) ¿Kunatsa Jesusajj walja waranqa jaqenakar manqʼayäna? 2) ¿Kunjamas Jesusan uka milagro luratapat jikjjatasta?

⁸ Salmo qellqerejj Jehová Diosat akham sänwa: “Jumaw amparam loqatattajja, taqe jakirinakarusti askinak jilarkir churtajja” sasa (Sal. 145:16). Jesusajj Awkipat yateqasisajj arkirinakapar yanaptʼapunirïnwa. Janiw wali chʼamanïtap uñachtʼayañ laykukejj milagronak lurirïkänti, jan ukasti mayninakat llakisitap laykuw lurirïna. Ukatakejj Mateo 14:14-21 qellqatat amuytʼañäni (liytʼañataki). Jesusarojj kunayman markanakatwa walja jaqenakajj arkapjjäna, jupanakaru qarita, manqʼat awtjata uñjasajja Jesusan discipulonakapajj llakisipjjänwa, ukatwa Jesusan ukar manqʼa toqet parlir sarapjjäna, inas jupanakas manqʼat awtjatäpjjarakchïna (Mat. 14:13). ¿Kunsa Jesusajj lurpachäna?

⁹ Jesusajja, phesqa tʼantʼampi pä chawllampikiw phesqa waranqa chachanakar manqʼayäna, janirakiw wawanakas ni warminakas jakhutäkänti. ¿Kunatsa Jesusajj uka milagro lurpachäna? Jaqenakarojj wal munasïna jupanakan askipwa thaqharakïna, ukatwa uka milagro luräna. Taqeniw sistʼasiñkam manqʼasipjjäna. Cheqas walja manqʼañaw utjäna. Janiw mä jukʼaki malltʼapkänti, jan ukasti utanakaparojj uka chʼamampiw kutʼjjapjjäna (Luc. 9:10-17). Ukhamarus puchunakjja 12 canastanakwa apthapipjjarakïna.

10. ¿Kunanakas jutïrin jan utj-jjani?

¹⁰ Jichhürunakanjja, gobiernonakajj jupanakan askipakwa thaqhapjje, ukhamïpanwa walja jaqenakajj jan utani jan manqʼani jikjjatasipjje. Yaqhep jilat kullakanakasajj janis sinti pisin jakasipkchejja, janiw sistʼasiñkampun manqʼasipkiti. Ukampis niyaw taqe ukanakajj tukusjjani, mayninakat jan llakisiri jaqenakasa, pisin jakasiñasa janiw utj-jjaniti. Jumatï jaqenakar yanaptʼañataki chʼamanïsma ukhajja, ¿janit yanaptʼkasma? Jehová Diosajj Taqe Chʼamaniwa, jaqenakar yanaptʼañsa munarakiwa, ukhamajj niyaw tʼaqhesiñanak chhaqtayjjani (Salmo 72:16 liytʼañataki).

11. ¿Kunatsa Jesusajj jutïrin taqe jaqenakaruw yanaptʼani sasin sistanjja, ukat kun lurañatakis ukajj chʼamañchtamjja?

¹¹ Jesusajj kimsa mara chikani Diosan arunakap aka Oraqen yatiyasajja, janiw aka Oraqpachan milagronak lurkänti (Mat. 15:24). Ukampis Jesusajj alajjpachat aka Oraqer apnaqanjjani ukhajja, taqe jaqenakaruw yanaptʼani (Sal. 72:8). Ukatsti sum jakasiñatakiw yanaptʼarakistani, ukwa milagro luratanakapajj uñachtʼayistu. Jiwasajj janis Jesusjam milagronak lurirjamäkstanjja, Diosan arunakapatwa jaqenakar yatichsna. Akat mä jukʼa tiemporojj wali sumaw jakasjjañäni, ukwa Biblian profecianakapajj uñachtʼayistu.  Jehová Diosan servirinakapajj uk sum yattanjja, ukhamajj ¿jaqenakan jutïrit yatipjjañap janit munkaraksna? (Rom. 1:14, 15.) Uka toqet sum amuytʼañajja, jaqenakar Diosan Reinopat yatiyañatakiw chʼamañchistani (Sal. 45:1; 49:3).

12. Aka Oraqejj kunjam lurtʼatasa uk Jesusajj sum yati sasajja, ¿kunatsa sissna?

¹² Jehová Diosajja, Jesusan yanaptʼapampiw aka Oraqsa ukan utjirinaksa lurawayi (Pro. 8:22, 30, 31, NM; Col. 1:15-17). Ukhamasti aka Oraqejj kunjam lurtʼatasa ukjja Jesusajj sum yati. Jupajj cheqaparjamaw thaysa umsa yaqha ukhamanaksa apnaqaspa.

13, 14. ¿Kun lurasas Jesusajj chʼamanïtap uñachtʼayäna?

¹³ Jesusajj aka Oraqenkkäna ukhajja, jachʼa thayar tʼakurayasa ukhamarak yaqha ukhamanak lurasaw chʼamanïtap uñachtʼayäna. Kunjamsa Jesusan discipulonakapajj jachʼa thaya utjatap laykojj qotan niy jiwarapjjäna uk uñjañäni (Marcos 4:37-39 liytʼañataki). Marcos 4:37 qellqatan ‘jachʼa thayat’ parlki ukajj janiw aleq thayakïkänti, jan ukasti qʼejjo qʼejjompi jallumpi jan waltʼayir jachʼa thayampi ukhamänwa.

¹⁴ Uñjksnas ukham amuytʼañäni: qota umajj maysar maysaruw boter jaqnaqe, umas mantarakiwa. Ukhamäkchi ukasa, Jesusajj wali qaritätap laykojj iktʼaskakiwa. Jesusan arkirinakapajj wal sustjasisajj akham sasaw sartayapjje: “Yatichiri, ¿janit amuykta jiwaraskakiñäniti?” sasa (Mat. 8:25). Sartasinjja, Jesusajj thayarojj toqenoqänwa, qotarusti sarakïnwa: “¡Amuktʼam! ¡Tʼakurarakim!” sasa (Mar. 4:39). Thayajj tʼakuränwa, mathapinakas chhaqtawayjjarakïnwa. Uka milagro lurasajja, Jesusajj qawqha chʼamanisa ukwa uñachtʼayäna.

15. ¿Kunjamatsa Jehová Diosan Taqe Kunjjar Chʼamanïtap yattanjja?

¹⁵ Jehová Diosajj thayarusa, yaqha ukhamanakjjarus wali chʼamaniwa, Jupaw Jesusarus milagronak lurañapatak chʼam churäna. Kunjamsa Jehová Diosajj Taqe Chʼamanïtap uñachtʼayi uk mä qawqha uñjañäni. Janïr Uma Juicio purinkipanjja, Diosajj sänwa: “Akat paqallqo ururusti nayajj mä jachʼa jallu puriyanï, ukasti pusi tunka urumpi, pusi tunka arumampiw jallurakini” sasa (Gén. 7:4). Éxodo 14:21 qellqatajj siwa: “[Jehová] Tatitojj inti jalsu toqeta arum paqara wali thaytʼayanisasti qotjja payaruw jaljtayäna” sasa. Ukatjja, Jonás 1:4 qellqatajj sarakiwa: “[Jehová] Tatitojj mä wali jachʼa chʼaman thaya sartayäna, uka jachʼa qotansti thayajja barcorojj qʼala tʼunjirpachänwa” sasa. Jehová Diosajj Taqe Kunjjaru Chʼamaniwa, ukhamajj Paraison janiw jachʼa thayanakasa, ni yaqha ukhamanakas jan waltʼayjjestaniti.

16. Jehová Diosana, Jesusana chʼamanïpjjatap yatiñajja, ¿kunjamsa chʼamañchtʼistu?

¹⁶ Jehová Diosana, Jesusana chʼamanïpjjatap yatisajja, wali chʼamañchtʼataw jikjjatastanjja. Kunapachatï Jesusajj aka Oraqjjaru waranqa maranak apnaqkani ukhajja, janiw jaqenakajj jachʼa thayanakarusa, lamar qotat uma llumstäwinakarusa, terremotonakarusa ni yaqha ukhamanakarus ajjsarjjapjjaniti. ¡Taqe ukanakajj jan mayampitaki chhaqtayatäjjaniwa! Cheqansa, Diosaw taqe jaqenakaru yanaptʼani (Apo. 21:3, 4). Jesusajja, Jehová Diosat chʼama katoqasajj wali sumwa waranqa maranakajj aka Oraq apnaqani.

17. ¿Kun lurasas Jehová Diosampita Jesucristompita yateqasitas uñachtʼaysna?

¹⁷ Jehová Diosata Jesucristot sipansa jiwasajj janiw jachʼa thayanakjjarusa, terremotonakjjarusa yaqha ukhamanakjjarus chʼamanïktanti. Ukampis jupanakat yateqassnawa, ¿kunjamsa? Kuntï Proverbios 3:27 qellqatan siski ukarjam lurasa (liytʼañataki). Kunapachatï jilat kullakanakasajj jan waltʼäwinakana uñjasipjje ukhaw jupanakar yanaptʼsna (Pro. 17:17). Sañäni, inas jachʼa thayanakan apata, uman apata, jan ukajj yaqha ukhamanakan uñjasipjjchi, ukapachaw jupanakarojj yanaptʼsna. Amuytʼañataki, mä viuda kullakan utapajj jachʼa thayampi jan waltʼayataw uñjasïna, uka qhepatjja kullakajj akham sänwa: “Jehová Diosan markapankatajat walpun kusista, jilat kullakanakaw yanaptʼawayapjjetu, Jehová Diosat jan jitheqtañatakis jupanakaw yanaptʼawayapjjarakitu” sasa. Mä soltera kullakarojj niya ukhamarakiw pasäna, mä jachʼa thayaw utap jan waltʼayatayna, ukatwa wali llakit jikjjatasïna. Jilat kullakanakajj yanaptʼapjjäna ukhajja, jupajj sänwa: “Kunja kusisitas jikjjatasta uk sañatakejj janiw arunakajajj utjkituti [...] ¡Jehová Diosarojj walpun yuspärta!” sasa. Diosan markapanjja jilat kullakanakajj walpun mayninakat llakisipjje, yanaptʼañs munapjjarakiwa. Ukatwa jupanakamp chika Diosar yupaychasajj wal kusistanjja. Cheqansa, Jehová Diosampiru Jesucristompiruw yuspärtanjja, jupanakajj cheqpachapuniw jiwasat llakisipjje.

18. Jesusan milagro luratanakapat ¿kunas muspharkañajja?

¹⁸ Aka Oraqenkkasin Diosan arunakapat yatiyasajja, Jesusajj ‘Diosan chʼamapätapwa’ uñachtʼayäna. Ukampis janipuniw jupa pachpa jachʼañchasiñatakisa ni jupan askipak thaqhasas milagronak lurirïkänti, jan ukasti jaqenakar munasiñatwa lurirïna. Jutir yatichäwinwa uka toqet jukʼamp yatjjataskañäni.