¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼma:

¿Cristianonakajj Jesusarut oración mayisipjjañapa?

Janiwa. Jesusajj Jehová Diosar oración mayisiñwa yatichawayistu (Mat. 6:6-9; Juan 11:41; 16:23). Jesusan discipulonakapajj janiw Jesusar oración mayisipjjerïkänti, jan ukasti Diosaruw mayisipjjerïna (Hech. 4:24, 30; Col. 1:3). (1/1, 14 jana.)

Jesusan jiwäwip amtañatakejja, ¿kunjamsa sapa mara wakichtʼassna?

Biblia liyisaw wakichtʼassna. Uka urunakan jukʼamp yatiyir mistuñatakis chʼamachasiraksnawa. Ukatsti kuntï jutïrin katoqkañäni uka toqetsa lupʼiñasarakiwa (1/15, 14-16 jananaka).

Joseyar samkanakap yatiyapkäna uka pä prisioneronakarojja, ¿kunas pasäna?

Joseyasti coperorojj sänwa: ‘Faraonajj nayra trabajomaruw wasitat uchjjätam’ sasa. Ukampis panaderorojj sarakïnwa: ‘Faraonajj jiwayätamwa ukatjja mä lawarurakiw warkkatätam’ sasa. Uka arunakapajj phoqasipunïnwa (Gén. 40:1-22). (2/1, 12-14 jananaka.)

¿Kuna regalsa Japón markankir jilat kullakanakajj katoqapjjäna?

Mateo librwa katoqawayapjje, ukasti Traducción del Nuevo Mundo Bibliat japonés arur jaqokipatawa. Uka librompiw jilat kullakanakajj yatiyapjje, Bibliat jan yatirinakasa uka libro liytʼapjjarakiwa (2/15, 3 jana).

Diosan arunakap yatiyañatakejja, ¿kunanakas nayrïr cristianonakarojj yanaptʼäna?

Maya, romanonakan sumankañapaw utjäna. Paya, walja jaqenakaw griego aru parlapjjäna. Kimsa, jarkʼaqer leyinakaw utjäna. Pusi, jaya cheqanakar sarañatak suma thakinakaw utjäna (2/15, 20-23 jananaka).

Domingo de resurrección sapki ukjja, ¿kunatsa cristianonakajj jan amtapki?

Jesusajj janiw jaktäwip amtapjjañap discipulonakapar maykänti, jan ukasti jiwäwip amtapjjañap mayïna (Luc. 22:19, 20). (3/1, 8 jana.)

Bibliankir yaqhep sarnaqäwinakasa, jaqenakasa kunanakampi jan ukajj khitinakamp sasipjjesa uka toqetwa nayrajj qellqatanakasan jukʼamp parlirïna, ukampis jichhajj ¿kunatsa ukanakat jan sint parlasjje?

Bibliajj parlki uka yaqhep jaqenakajja, jutïr urunakan khitinakamp sasipjjanisa uk Bibliajj yatichiwa, ukanakat mayajja, Gálatas 4:21-31 qellqatanwa jikjjatasi. Ukhamajj uka jaqenakajj khitimpi sasipjjanisa ukanak thaqhañajj janiw wakiskiti. Ukampis Biblian jikjjataski, uka chachanakana warminakana sarnaqäwinakapasa ukhamarak kunanakatï paskäna ukanakasa, jiwasan yateqasiñasatakiwa (Rom. 15:4). (3/15, 17, 18 jananaka.)

Egipto markan nayra papiro qellqata basuranaka taypin jikjjataskäna ukajja, ¿kunatsa wali wakiskirejja?

Khä 1900 maranakanjja, Juan qellqatat mä cheqaw jikjjatasïna. Ukasti inas Juan discipulojj qellqkäna ukhat mä qawqha maranak qhepat qellqaschïna. Ukan qellqatäki ukampi Biblian utjki uka arunakampejj pachpakiwa. Ukaw Bibliar confiyañatak yanaptʼistu (4/1, 10, 11 jananaka).

Maynirojj munasiñatwa tamat jaqsusi sasajja, ¿kunatsa sistanjja?

Jucha luririru tamat jaqsusitapajja, taqeniruw yanaptʼi sasaw Bibliajj qhanañchi (1 Cor. 5:11-13). Jaqenakajj Jehová Diosat sum parlapjje, jilat kullakanakarus jan walinakatwa jarkʼaqe, juchachasirirusa Jehová Diosatakjam sarnaqañatakiw yanaptʼaraki (4/15, 29, 30 jananaka).