1. Jerusalén markanjja, ¿kunas 66 maran pasäna? (Aka janankir dibujo uñjjattʼam.)

KHÄ 66 maranjja, romanonakan ejercitop pʼeqtʼiri Floro sat chachaw Jerusalenankir templot walja qollqe lunthatsutayna. Uk yatisinjja judionakajj walpun colerasipjjäna, ukatwa romano soldadonakat waljanir jiwarayapjjäna, ukatjja romanonak contraw saytʼapjjäna. Ukham lurapjjatapat janïraw kimsa phajjsis paskänti, ukhaw Roma marka apnaqer Cestio Galo chachajj 30.000 soldadonakamp Jerusalén marka muyuntäna. Romanonakar kutkatasir judionakajj temploruw imantasipjjäna. Ukjjarojja romano soldadonakajj jankʼakiw templon anqäjja perqanakapar purintapjjäna. Uka markan jakasiri jaqenakajj walpun ajjsarayasipjjäna. Jumatï ukankasamäna ukhajj ¿kunjamakis jikjjatasismäna?

2. 1) Jerusalenaru ejercitonakan muyuntata uñjasinjja, ¿kunsa cristianonakajj lurapjjañapäna? 2) ¿Kunjamatsa Jerusalenat cristianonakajj qhespipjjäna?

² Jerusalenan kunas pasañapäna ukjja Jesusajj walja maranak nayraw arkirinakapar yatiyjjäna. Akham sänwa: “Jerusalén markaru ejercitonakan muyuntata uñjapkäta ukkhajja, yatipjjam uka  markajj jankʼaki tʼunjatäñapa. Ukapachasti Judeankirinakajj qollunakar jaltjjapjjañapawa; Jerusalén markankirinakasti ukatjja mistjjañanakapawa, ukhamarak pampankirinakajja janiw markarojj kuttʼapjjañapäkiti” sasa (Luc. 21:20, 21). Niyakejjay Jerusalenajj romano soldadonakampi muyuntatächïnjja, ¿kunjamaraki uka markat mistupjjasapänsti? Jesusan arunakaparjamajja, ‘uka urunakajj jiskʼaptayatäñapänwa’, mä arunjja, saytʼayatäñapänwa (Mat. 24:22). Taqe kunas ukarjamaw phoqasïna. Romanonakan ejercitopajj akatjamatwa Jerusalenat sarjjapjjäna. Ukhamatwa cristianonakajj Jordán jawira paskatasin qollunakar sarjjapjjäna. * 70 maranjja, romanonakajj wasitampiw kuttʼanipjjäna, ukapachaw Jerusalenar tʼunjapjjäna. Ukampis Jesusan arunakapar istʼirinakajj qhespipjjänwa janiw jiwarayat uñjasipkänti.

3. 1) ¿Kunanakas jutïrin pasani? 2) ¿Kuna toqetsa aka yatichäwin yatjjataskañäni?

³ Jiwasajj niyaw ukhaman uñjasirakiñäni. “Jachʼa tʼaqhesïwejj” akatjamatwa qalltani. Kunanakatï Jerusalenan pasañapäkäna ukhamarak kunsa uka markankirinakajj qhespiñatak lurapjjañapäna ukanakwa Jesusajj arkirinakapar parläna. Uka arunakasti jiwasampejj jutïrin phoqasirakiniwa (Mat. 24:3, 21, 29). Jerusalenajj tʼunjaskäna ukhajja, taqe chuyma Diosar servir cristianonakajj qhespipjjänwa. Jutïrinjja ukhamarakiw ‘walja jaqenakajj’ akapachat qhespipjjani (Apocalipsis 7:9, 13, 14 liytʼañataki). Jiwasatï qhespiñ munstanjja, Bibliarjamajj kunanakas jutïrin pasani ukanakat sum amuyañasawa. Aka yatichäwinjja, kunanakas jutïrin pasani ukat kunsa qhespiñatakejj lurañasa ukanakwa yatjjataskañäni.

4. ¿Kunjamsa jachʼa tʼaqhesïwejj qalltani?

⁴ Taqpach kʼari religionanakar tukjañ qalltaskani ukhaw jachʼa tʼaqhesïwejj qalltani. Taqpach kʼari religionanakarojja, Bibliajj “Jachʼa Babilonia, juchararanakan taykapa” sasaw sutiñchi (Apo. 17:5-7). ¿Kunatsa ukham sutiñchaspacha? Uka religionanakan pʼeqtʼirinakapajj janiw Diosarojj taqe chuyma serviwayapkiti, Jesusaru ukhamarak Reinoparu yanapañat sipansa akapach gobiernonakaruw yanapawayapjje. Politicar mitisiñatakejja, Biblian yatichäwinakapsa maysaruw apanukuwayapjje. Jupanakajj janiw ajllit cristianonakjam qʼoma chuymampi Diosarojj servipkiti (2 Cor. 11:2; Sant. 1:27; Apo. 14:4). Ukampis ¿khitis taqe uka kʼari religionanakarojj tʼunjani? ‘Tunka wajjranakani mä jachʼa wila ajjsarkañ animalaw’ tʼunjani sasaw Bibliajj qhanañchi. Uka jachʼa animalajj Naciones Unidas organizacionawa, tunka wajjranakapasti uka organizacionar yanaptʼapki taqe gobiernonakarakiwa. Bibliarjamajja, uka gobiernonakampiw Jehová Diosajj taqe kʼari religionanakar tʼunjayani (Apocalipsis 17:3, 16-18 liytʼañataki).

5, 6. Jachʼa tʼaqhesïwinjja, kʼari religionanakar saririnakajj janiw taqenejj tʼunjatäkaniti sasajj ¿kunatsa sistanjja?

⁵ Kʼari religionanakar tʼunjaskani ukhajja, ¿uka religionanakar saririnakajj taqenit jiwarayatäpachani? Janiwa. ¿Kunatsa ukham sistanjja? Zacarías profetan arunakaparjamajja, kʼari religionanakar saririnakajj akham sapjjaniwa: “‘Nayajj janiw profetäkti, jan ukasti yapuchirikïtwa. Wawatpachwa pampan trabajañaru uskusta’ sasa. Khititejj jisktʼanejja: ‘¿Kuna chhojjrinakas janchiman apkta ukajja?’ sasajja, jupasti sarakiniwa: ‘Amigonakajjan utapanwa ukham lurapjjetu’” sasa (Zac. 13:4-6). Ukhamajja, kʼari religionanakan yaqhep pʼeqtʼirinakapajja, janipunis kunapachas uka religionanakar sarapkasapäna ukham sapjjaniwa.

⁶ Kʼari religionanakar tʼunjaskani ukhajja, ¿kunas Jehová Diosan markapampejj pasani? Jesusajj sänwa: “Diosatejj uka urunakjja jan  jiskʼaptaykaspa ukajja, janiw khitis qhespiyaskaspati, ukampis Tatitojj jiskʼaptayaniwa jupan ajllitanakapar munatap layku” sasa (Mat. 24:22). Nayrïr patak maranakan romanonakajj Jerusalén markar tʼunjañ munapkäna ukhajja, Jehová Diosajj urunak jiskʼaptayänwa, jan ukajj saytʼayänwa. Ukhamatwa “ajllit cristianonakajj” Jerusalenat mistjjapjjäna. Akat mä jukʼarojja, jachʼa tʼaqhesïwin niya ukhamarakïniwa. Jehová Diosajj janiw ‘ajllitanakaparojj’ gobiernonakamp tʼunjaykaniti. Markapar jarkʼaqañatakejja, jachʼa tʼaqhesïwi qalltkani uk saytʼayaniwa, ukatsti sumankañaw mä jukʼa tiempo utjani.

7, 8. 1) Kʼari religionanakar tʼunjañajj saytʼkani ukhajja, ¿kun lurañasas wakisini? 2) Uka tiemponjja, ¿kunsa jiwasajj mayni jaqenakat sipansa luraskakiñäni?

⁷ ¿Uka sumankañ tiempojj kunatakïnisa? Jehová Diosar cheqapunit munastanjja janicha ukwa uka sumankañ tiempon uñachtʼayañäni. Ukampis akapachankir jilapart jaqenakajja, ‘qarqa pʼiyanakar imantasiñwa’ thaqhapjjani, mä arunjja, akapachan organizacionanakajj utjki ukanakamp jarkʼaqayasiñwa munapjjani (Apo. 6:15-17). Ukampis jiwasajj Jehová Diosampiw jarkʼaqayasiñäni. Uka tiempon ¿waljaniw Diosar serviñ qalltapjjani sissnati? Janiwa. Romanonakajj nayrïr kutin Jerusalén marka tʼunjir sarapkäna ukhajja, jan tʼunjasakiw kuttʼawayjjapjjäna. Uka qhepat sumankañ utjkäna ukhajja, judionakajj janiw cristianor tukupkänti, jan ukasti cristianöjjapjjäna jupanakaw Jesusan arunakapar istʼasin Jerusalenat mistupjjäna. Jutïrin niya ukhamarakïniwa, Diosajj religionanakar tʼunjañ saytʼaykani ukhajja, janiw jaqenakajj Jehová Diosar serviñ qalltapkaniti, antisas cristianonakan Diosar munasitapa ukhamaraki ajllit cristianonakar yanaptʼatapa uñachtʼayañatak tiempöniwa (Mat. 25:34-40).

⁸ Kʼari religionanakar tʼunjañajj saytʼayatäkani uka tiemponjja kunanakas pasani uk janiw yatktanti. Inas chʼama tiemponakächini, inas utanakassa jan ukajj yänakassa aptʼaschiñäni. Jerusalenat sarjjañatakejja, cristianonakajj utanakapsa yänakapsa jaytanukupjjänwa, ukat kunayman jan waltʼäwinakanwa uñjasipjjarakïna (Mar. 13:15-18). Ukatwa jiwasajj akham sas jisktʼasiñasa: “Kunanakatï utjkitu ukanakat mä qawqhampiki qheparañatak ¿wakichtʼatätti? Jehová Diosat jan jitheqtañatakejj kunanak lurañay wakischini ukanak lurañatakejj ¿wakichtʼatätti?” sasa. Uka tiemponjja, kuna jan walinakansay uñjaschiñänejja, jiwasakiw Jehová Diosar yupaychaskakiñäni. Ukham lurasasti Daniel profetat yateqasitaswa uñachtʼayañäni (Dan. 6:10, 11).

9, 10. 1) Jachʼa tʼaqhesïwinjja, ¿kuna toqetsa yatiyañäni? 2) ¿Kunsa uñisirinakasajj lurapjjani?

⁹ Jachʼa tʼaqhesïwi tiemponjja, “Diosan reinopat” suma yatiyäwinakajj janiw yatiyasjjaniti. ¿Kunatsa? Uka toqet yatiyañajj tukuyatäjjaniwa. ‘Akapachan tukusiñapakiw’ suyatäjjani (Mat. 24:14). Ukäñkamasti juchañchäwi arunakakwa jan ajjsartʼas yatiyjjañäni. Inas akham sas yatiychiñäni: “Supayan akapachapajj niyaw tʼunjatäjjani” sasa. Uka yatiyäwisti jaqenakatakejj chhijchhinakäkaspas ukhamäniwa sasaw Bibliajj qhanañchi. Cheqas uka juchañchäwi arunak istʼasinjja, jaqenakajj Diosaruw maldicipjjani (Apo. 16:21).

¹⁰ Uka yatiyäwinak istʼasajja, ¿kunsa uñisirinakasajj lurapjjani? Magog markankir Gog sat sutimpi uñtʼatäki uka mayachtʼat markanakajj kun lurañsa munapjjani ukjja, Jehová Diosajj Ezequiel profeta toqew akham säna: “Naya Tatitusti akham sistwa: Uka urunakansti ñanqha amtäwinakaw pʼeqemarojj jutani. Ukatsti sarakïtawa: Mä pisi chʼama markar nuwjiriw sarä, kawkhantejj jaqenakapajj kʼuchiki ukhamaraki samarata jakasisipki, taqe kawkïri markanakatejj jan perqanakampi muyuntayatäki, punkunakanïkarakisa, trancanakapas utjkarakiti ukanakaruw nuwjä. Jupanakarusti lunthatjarakïwa, wasitat  saytʼayata markanaksti qʼalwa tʼunjarakëjja, kawkïri markatejj yaqha markanak taypita jutasin wasitat tantachtʼasjjapjjäna ukanaka, jupanakasti uywanakani ukhamaraki yaqha oraqenakanïpjjarakiwa, uka markasti aka oraqenjja chika taypinwa jakasiraki” sasa (Eze. 38:10-12). Jehová Diosan servirinakapajj ‘aka oraqenjja chika taypinwa jakasipjjani’, mä arunjja, yaqha jaqenakat sipansa mayjäpjjatapajj qhanaw amuyasini. Gog sat sutimpi uñtʼatäki uka mayachtʼat markanakajj walpun alajjpachar sarañatak ajllitanakarusa jupanakar yanapapki ukanakarus tukjañ munani.

11. 1) ¿Jachʼa tʼaqhesïwin kuna profecianakas nayraqat phoqasini uk yatsnati? 2) Alajjpachan unañchäwinak uñjasajja, ¿kunjamas Diosan uñisirinakapajj jikjjatasipjjani?

¹¹ Kunanakas ukjjarojj pasani ukjja Bibliajj sumwa qhanañchi, ukampis kuna profecianakas nayraqat phoqasini ukjja janiw qhanañchkiti. Inas yaqhepajj mä tiemponak paschini. Aka pachan tukusiñapat parlkasajja, Jesusajj akham sänwa: “Ukapachasti unañchanakaw utjani intina, phajjsina, warawaranakana; oraqensti markanakajj mayjtʼatäpjjaniwa, ukhamarakiw sustjasipjjani qota mathapinakan ajjsarkañ qhothutitanakapatjja. Jaqejj ajjsarañatwa thayjtani kunatejj oraqen paskani ukat yatisina; ukatsti alajjpachanjja jachʼa chʼamanakapamppachaw khathatini. Ukapachaw Jaqen Yoqaparu uñjapjjani, qenay patan chʼamampi, jachʼa kankañapampi jutaskiri” sasa (Luc. 21:25-27; Marcos 13:24-26 liytʼañataki). ¿Kunanakäpachanis uka unañchanakajja? ¿Kunanakatï alajjpachan paskani ukanak uñjpachañäniti? Ukanak yatiñatakejj suyañasawa. Uka unañchanakajj kunanakänis uk janis yatkstanjja, Diosan uñisirinakapajj walpun ajjsarapjjani.

12, 13. 1) Jesusajj ‘chʼamampi jachʼa kankañapampi jutkani’ ukhajja, ¿kunsa lurani? 2) ¿Kunsa Diosan servirinakapajj uka tiempon lurapjjani?

¹² Jesusajj ‘chʼamampi jachʼa kankañapampi jutkani’ ukhajja, ¿kunsa lurani? Diosan taqe chuyma servirinakaparojja wiñay jakañwa churani, ukampis jan wali jaqenakarusti tʼunjaniwa (Mat. 24:46, 47, 50, 51; 25:19, 28-30). ¿Kunjamsa uk lurani? Jesusajj akham sänwa: “Kunapachatejj Jaqen Yoqapajj reyjama jutkani ukapachajja, angelanakapampi muyuntataw jupajj qontʼasini tronoparojja taqe chʼaman kankañapampi. Taqe markanakankir jaqenakarakiw jupan nayraqataparojj tantachtʼasipjjani. Jupasti jupanakarojj jaljarakiniwa, kunjämtejj awatirejj ovejanakarojj cabritonakat jaljkejj ukhama. Ovejanakaparusti kupëjjaparuw ucharakini, cabritonakarusti chʼeqäjjaparuraki” sasa (Mat. 25:31-33). ¿Kunsa uka arunakajj sañ muni? Jesusajj taqe jaqenakaruw juzgani. Diosatakjam jan sarnaqawayapki ukanakajja ‘cabritonakjam’ uñtʼatäpjjaniwa, ukatsti jupanakarojj wiñayataki tʼunjatäñatakiw Jesusajj juchañchani. Ukampis Diosatakjam sarnaqawayapki ukanakarusti, ‘uwijanakatwa’ uñtʼasini, ukatjja jupanakajj wiñay jakañwa aka Oraqen katoqapjjani (Mat. 25:46).

¹³ Kunapachatï ‘cabritonakjam’ uñtʼat jaqenakajj tʼunjatäpjjañap amuyasipjjani ukhajja walpun “jachapjjani” sasaw Bibliajj qhanañchi (Mat. 24:30). Ukampis alajjpachar sarañatak ajllit cristianonakasa aka Oraqen wiñay jakañataki suytʼäwinïpki uka cristianonakasa ¿kunsa uka tiempon lurapjjani? Jesusasti sänwa: “Kunapachatï akanakajj pasañ qalltani ukkhajja, chʼamachasipjjam, ukhamarak suyapjjam jankʼakirakiw qhespiyatäjjapjjäta” sasa (Luc. 21:28).

14, 15. 1) Magog markankir Gog sutimpi uñtʼatäki ukajj Diosan markaparu tukjañ qalltkani uka qhepatjja, ¿kunas pasani? 2) Jesusajj ‘ajllitanakapar taqe toqetwa anthapini’ sasin Biblian qellqatäki uka arunakajja, ¿kamsañs munpacha?

¹⁴ Magog markankir Gog sutimpi uñtʼatäki  ukajj Diosan markaparu tukjañ qalltkani uka qhepatjja, ¿kunas pasani? Bibliajj akham siwa: “[Jesusasti] angelanakaparuw khitanini, ajllitanakapar taqe toqet anthapiyasa, akapach thiyatpacha, alajjpach thiykama” sasa (Mar. 13:27; Mat. 24:31). ¿Kunsa uka arunakajj sañ munpacha? Alajjpachar sariri cristianonakajj janiw uka tiempon ajllitäpkaniti, janirakiw uka tiemponsa qhepïr sello katoqapkaniti, jupanakajj jachʼa tʼaqhesïwi niya qalltkipanwa qhepïr sello katoqjjapjjani (Mat. 13:37, 38; Apo. 7:1-4). Ukhamasti Jesusajj ‘ajllitanakapar taqe toqetwa anthapiyani’ sasinjja ¿kun sañsa Bibliajj munpacha? Aka Oraqenkasipkani uka ajllit cristianonakar Jesusajj alajjpachar apasjjani uka tiempotwa uka qellqatajj parlaski (1 Tes. 4:15-17; Apo. 14:1). ¿Kunapachas ukajj pasani? Kunapachatï Magog markankir Gog sutimpi uñtʼatäki ukajj Diosan markapar tukjañ qalltkani uka qhepatäniwa (Eze. 38:11). Ukhaw kuntï Jesusajj siskäna uka arunakapajj phoqasini, jupasti sänwa: “Diosan munañap phoqherinakasti, intjamawa qhanapjjarakini Awkipan markapanjja” sasa (Mat. 13:43). *

¹⁵ Kʼari religionanakar saririnakat waljanejj akham sapjjewa: “Jesusajja, aka Oraqjjar apnaqañatakejj uñjkayaw kuttʼanini, ukatjja jaqenakajj jañchi cuerponiw alajjpachar apatäjjapjjani” sasa. Uka creenciajja “rapto” jan ukajj “arrebatamiento” sasin uñtʼatawa. Ukhamasti aka Oraqenkasipki uka ajllit cristianonakajj ¿jañchi cuerponit alajjpacharu apatäpjjpachani? Janiwa. ¿Kunatsa ukham sistanjja? Jesusajj jan uñjkayaw kuttʼanini sasaw Bibliajj qhanañchi, akham sasa: “Jaqen Yoqaparusti uñjapjjarakiniw qenayjjan jutaskiri” ukatsti ‘alajjpachanwa mä chimpojj uñstanini’ sasa (Mat. 24:30). Ukhamarusa “janchejj janiw Diosan  reinoparu mantkaspati” sasaw Bibliajj qhanañchi. Ukhamasti ¿kunjam cuerponis ajllit cristianonakajj alajjpachar apatäpjjani? Bibliajj saskakiwa: “Taqeniw yaqha cuerponi tuku[pjja]ni. Ukasti mä nayra chʼipjjtanakiw lurasirakini, kunapachatï trompetan qhepa phustʼasitapajj istʼaskani ukkha” sasa (1 Corintios 15:50-53 liytʼañataki). * Aka Oraqenkasipki uka ajllit cristianonakajja mä nayra chʼipjjtanakiw ajay cuerponi alajjpachar apatäpjjani. Ukhamasti “raptowa” jan ukajj “arrebatamientow” utjani sasin janiw sisktanti, ukham sissna ukhajja kʼari religionanakan yatichäwinakaparus iyawsksna ukhamäspawa.

16, 17. Corderojj alajjpachan janïr casaraskipanjja, ¿kunas pasani?

¹⁶ Kunapachatï 144.000 ajllitanakajj alajjpachankjjapjjani ukhati ¿Corderojj mä arunjja Jesusajj casarasini? Janiwa (Apo. 19:9). Nayraqatajja, yaqha profecianakaw phoqasiñapa. Amtañäni, ajllit cristianonakat yaqhepajj aka Oraqenkasipkani ukhaw Gog satäkis ukajj Diosan markap tʼunjañ qalltani (Eze. 38:16). Ukajj paskani ukhajja, ¿kunsa jiwasajj lurañäni? Diosan Arupajj akham sasaw qhanañchi: “Janiw jumanakati nuwasipkätajja, ukampis jumanakajj sum wakichasipjjam, aleqtʼapjjakirakim, ukatsti uñjapjjätawa kunjämtï Tatitojj jumanakar qhespiyapkätam uka. [...] Jan ajjsarapjjamti, janirak sustjasipjjamsa” sasa (2 Cró. 20:17). Kunjamtï yatjjataniwayktanjja, Gog satäkis ukajj Diosan markapar tʼunjañ qalltkani uka tiemponwa aka Oraqenkasipkani uka ajllit cristianonakajj alajjpachar apatäjjapjjani. ¿Kunas ukjjarojj pasani? Apocalipsis 17:14 qellqatajj akham sasaw qhanañchi: “[Diosan uñisirinakapajj] Corderompiw nuwasipjjani, ukampis Corderojj jupanakarojj atipjaniwa, jupasti munañaninakans Munañanipa, reyinakansa Reyiparakiwa. Khitinakatejj jupampïki ukanakasti Diosan jawsata ajllitanakapawa, suma arkirinakäpjjarakiwa” sasa. Ukhamajja Jesusasa 144.000 alajjpachankir reyinakasa Diosan aka Oraqenkir markaparojj qhespiyapjjaniwa.

¹⁷ Armagedón jachʼa chʼajjwäwinwa Diosan qollana sutipajj jachʼañchatäni (Apo. 16:16). Khitinakatï ‘cabritonakat’ uñtʼatäpkani ukanakajj tʼunjatäpjjaniwa. Jan walinakas aka Oraqen janiw utj-jjaniti, khitinakatï ‘walja jaqenakjam’ uñtʼatäpki ukanakas qhespiyatäpjjaniwa. Ukatsti kunjamtï Apocalipsis 21 qellqatan siskejja, Corderow alajjpachan casarasini (Apo. 21:1-4). * Ukatjja aka Oraqen wiñayataki jakapkani ukanakarojja Jehová Diosajj walja bendicionanakwa churani, ukhamatwa Diosajj qawqha munasirisa uk uñjapjjani. Uka uru puriniñap walpun suytanjja (2 Pedro 3:13 liytʼañataki).

18. Kunanakatï akat mä jukʼa tiemporojj paskani ukanak yatisajj ¿kun lurañasasa?

¹⁸ Kunanakatï akat mä jukʼa tiemporojj paskani ukanak yatisajj ¿kun lurañasasa? Apóstol Pedrojj akham sasaw ewjjtʼistu: “Taqe kunas ukham tukjaschini ukajja, jumanakajj ¡kunja Tatit chuymas jupar wali katuyasita jakapjjañamajja! Tatitun jutañap ursti suytʼapjjam, jankʼakïñapa munasa. [...] Ukatpï munat jilatanaka, akanak suytʼkasajja taqe kunsa askpun lurapjjam, ukhamata Diosajj jumanakar sumana jikjjatañapataki, jan juchani ni kuna qʼañunsa” sasa (2 Ped. 3:11, 12, 14). Ukhamasti, kʼari yatichäwinakampi jan qʼañuchasis Jehová Diosar servipjjañäni, sumankañ utjayir Jesucristo Reyirus yanaptʼapjjarakiñäni.