1. ¿Kuna tiemponsa jaktanjja?

JAN wali tiemponakanwa jakasktanjja. Cheqas 1914 marat aksaruw ‘qhepa urunakan’ jakjjtanjja. Uka marat aksarojja jan walinakajj jukʼampiw jiljattawayi (2 Tim. 3:1-5). Uka jan walinakajj jiljjattaskakiniwa. Bibliajj akham siwa: “Jan wali jaqenakajj ukhamarak sallqjirinakasa jan walit jukʼamp jan waliruw sarapjjani” sasa (2 Tim. 3:13).

2. Jichhürunakanjja, ¿kunanaksa jaqenakajj uñchʼukipjje, jan ukajj lurapjje? (Aka janankir foto uñjjattʼam.)

² Jichhürunakanjja jaqenakajj kunanaktï Jehová Diosajj uñiski ukanakwa uñchʼukipjje, jan ukajj lurapjje. ¿Kunanakas ukanakajja? Nuwasiñanaka, wachoq jucha lurañanaka, layqasiñanaka. Ukanakajj walikïkaspas ukhamaw Internetansa, televisionansa, peliculanakansa, libronakansa, revistanakansa uñachtʼayasi. Yaqhep markanakanjja leyinaksa mayjtʼayapjjewa, kunanakatï nayrajj jan walit uñjatäkäna ukanakajja jichhajj askit uñjatäjjewa. Ukampis Jehová Diosajj janiw leyinakap mayjtʼaykiti, jan walinakarojj uñisiskakiwa (Romanos 1:28-32 liytʼañataki).

3. Jehová Diosan leyinakaparjam sarnaqerinakarojja, ¿kunjamsa jaqenakajj uñjapjje?

 ³ Nayra patak maranakanjja, jaqenakajj ukhamarakiw nuwasirinaka, jan ukajj wachoq jucha luririnaka uñchʼukipjjerïna. Ukampis cristianonakajj janiw ukanak lurapjjerïkänti, jupanakajj Jehová Diosan leyinakaparjamaw sarnaqapjjerïna. Ukatwa jaqenakajj cristianonakar mayja jaqenakäpkaspasa ukham uñjapjjerïna, jupanakatsa sawkasipjjerïnwa, ukatjja arknaqapjjerïnwa (1 Ped. 4:4). Jichhürunakanjja, jiwasajj Diosan leyinakaparjamarakiw sarnaqtanjja, ukatwa jaqenakajj mayjäksnas ukham uñjapjjestu. Bibliajj akham siwa: “Taqe khitinakatejj Cristo Jesusar katuyat jakañ munapki ukanakajj tʼaqhesiyatäpjjaniwa” sasa (2 Tim. 3:12).

4. Jehová Diosan munañaparjam sarnaqañatakejja, ¿kunarus jan munañasäki?

⁴ Jehová Diosan munañaparjam sarnaqañ munstan ukhajja, janiw ‘akapacharusa ni akapachan yänakaparus’ munañasäkiti (1 Juan 2:15, 16 liytʼañataki). Akapachajj Supayan munañapankiwa sasaw Bibliajj qhanañchi. Supayajja kunaymanitwa jaqenakar engañji, sañäni: religionanakampi, gobiernonakampi, jachʼa alakip luririnakampi, ukatsti radio toqesa, televisión toqesa engañjarakiwa (2 Cor. 4:4; 1 Juan 5:19). Akapachampi jan engañjayasiñ munstan ukhajja, janiw jan wali jaqenakampi sarnaqañasäkiti. Bibliajj akham sasaw ewjjtʼistu: “Jan wali jaqenakampi sarnaqañajj suma luräwinaka chhaqhayañawa” sasa (1 Cor. 15:33).

5, 6. ¿Khitinakarus amigosarjam jan ajlliñasäki, ukat kunatsa?

⁵ Jehová Diosampi sum apasiskakiñ munstan ukhajja, janiw jan wali lurir jaqenakampejj sarnaqañasäkiti. Janirakiw ‘Diosaruw sirvta’ sasin jan walinak lurapki uka jaqenakan amigopañasäkiti. Ukhamajja, kunapachatï maynejj jachʼa juchar purtʼasisin jan arrepentiskani ukhajja, janiw jupampejj parlañasäjjeti (Rom. 16:17, 18).

⁶ Jan walinak luriri jaqenakan amigopäsna ukhajja, jupanakjamarakiw jan walinak lurjjsna. ¿Kunatsa? Niya taqeniw amigonakasjamäñ muntanjja, amigonakasampis suma uñjatänwa munaraktanjja. Amuytʼañataki, wachoq juchanak luriri jaqenakampi sarnaqsna ukhajja, jupanakjamarakiw wachoq jucha lurañar purtʼassna. Walja jilat kullakanakajj ukhamanwa uñjasiwayapjje. Yaqhepanakajj arrepentisipjjewa, ukampis yaqhepasti janiw arrepentisipkiti, ukatwa tamat jaqsuta uñjasipjje (1 Cor. 5:11-13). Jupanakatï jan arrepentisipkani ukhajja, kuntï apóstol Pedrojj siskäna ukhamanwa uñjasipjjani (2 Pedro 2:20-22 liytʼañataki).

7. ¿Khitinakakis amigosäñapa?

⁷ Cheqansa taqeniruw munasiñampi uñjañasa, ukampis Diosan aruparjam jan sarnaqapki ukanakampejj janiw amigoñasäkiti. Sañäni, mä cristiano waynasa, jan ukajj tawaqosa, Diosar jan serviri, jan respetiri jaqempejj janipuniw casarasiñataki parlañapäkiti. Diosar jan servipki ukanakan amigopäñat sipansa, Jehová Diosan amigopäñaw jukʼampi wakiskirejja. Diosan leyinakaparjam sarnaqerinakakiw amigosäñapa. Jesusajj sänwa: “Khitinakatejj Diosan munañapa phoqhapkejja, ukanakaw jilajjasa, kullakajjasa, taykajjasa” sasa (Mar. 3:35).

8. Jan wali jaqenakampi sarnaqapjjatapatjja, ¿kunas israelitanakar pasäna?

⁸ Jan wali jaqenakampi sarnaqerinakajja, jan walinakaruw purtʼasipjjaspa. Sañäni, kunapachatï israelitanakajj Suma Oraqer mantañampïpkäna ukhajja, uka markanakan jakir jaqenakampi jan chikachasipjjañapatakiw  Jehová Diosajj ewjjtʼäna. Moisés toqejj akham sänwa: “Uka markanakajj kuna jan walinaktejj lurki ukanakjja janirakiw lurarakïtati. Jumasti diosanakaparojj janiw killtʼasisa yupaychätati, jan ukasti uka diosanakapjja pʼakinoqasaw taq tukjäta; ukhamarak jachʼa qalanakapsa. Jumasti [Jehová] Tatitu Diosamarukiw yupaychäta” sasa (Éxo. 23:24, 25). Jila parte israelitanakajja, janiw uka arunakarojj istʼapkänti, ukatwa jachʼa juchanakaru purtʼasipjjäna (Sal. 106:35-39). Ukatsti israelitanakajj janiw Jehová Diosan ajllit markapäjjänti, jan ukasti Diosajj cristiano tamaruw markapäñapatak ajllisjjäna (Mat. 23:38; Hech. 2:1-4).

9. Akapach munañaru apkistaspa ukanak liyiñasa, ischʼukiñasa, uñchʼukiñasa, ¿kunatsa jan walïkaspa?

⁹ Peliculanakasa, akapachan utjki uka qellqatanakasa, televisionan yaqhep programanakapasa, musicasa, Internetasa Diosatwa jitheqtayistaspa. Ukanakajj jan wali amigonakamp sasiwa, Jehová Diosan arsutanakapar confiyañat sipansa, Supayan akapachapar confiyañatakiw chʼamañchistaspa. Ukhamajj amuyasiñasawa, akapach munañaru apkistaspa uka peliculanak janipuni uñchʼukiñäniti, jan wali musicanaksa ischʼukiñäniti, janiraki akapachan utjki uka qellqatanaksa liyiñäniti (Tito 2:12).

10. Jan wali peliculanakampisa, libronakampisa, Internetampisa ¿kunas pasani?

¹⁰ Supayan apnaqat akapachajj niyaw tʼunjatäjjani. Ukhamajja, janiw jan wali peliculanakasa, libronakasa, ni Internetan jan walinakas utj-jjaniti. Bibliajj akham siwa: “Akapachajj tukusirikiwa jan wali luräwinakapamppacha, ukampis kawkïritejj Diosan munañap lurki ukajj wiñayatakiw jaki” sasa (1 Juan 2:17). Salmonak qellqeristi akham sarakïnwa: “Ñanqha luririnakajj oraqet jaqonukutäpjjaniwa, [...] llampʼu chuymaninakasti oraq katoqapjjani, jilarkir sumankañampiw kusisipjjarakini” sasa. ¿Qawqha tiempos ukham jakasipjjani? Bibliajj saskakiwa: “Aski jaqenakajj oraq katoqapjjani, wiñayatakiw ukan jakapjjarakini” sasa (Sal. 37:9, 11, 29).

11. ¿Kunjamsa Jehová Diosajj jupat jan jitheqtañatak yanaptʼistu?

¹¹ Kunanakatï akapachan utjki ukanakajja, janiw Diosar jakʼachasiñatak yanaptʼkistuti. Ukampis Jehová Diosajja, markap toqew Jupar uñtʼañatakisa, Jupat jan jitheqtañatakisa yanaptʼistu. Mä kutejja akham sasaw Jesusajj Awkipar mayisïna: “Aka wiñay jakañajj juma sapa cheqpach Diosar uñtʼañanwa utji, ukhamarak Jesucristoru kawkïrirutejj jumajj khitankta ukaru” sasa (Juan 17:3). Ukatakejja, Diosan markapajj Bibliat apstʼat qellqatanaka, videonaka, ukat yaqha ukhamanakwa lurawayi. Internetansa jw.org sat cheqas utjarakiwa, ukanakaw Diosar serviskakiñatakejj yanaptʼistu. Ukatsti, tantachäwinak toqew Diosajj Bibliat yatjjatañatak yanaptʼarakistu. Oraqpachanjja, 110.000 jila tamanakaw utji. Kunanakatï uka tantachäwinakana ukhamarak jachʼa tantachäwinakan yatichaski ukanakajja, Jehová Diosaru ukat arsutanakaparu confiyañatakiw yanaptʼistu (Heb. 10:24, 25).

12. ‘Diosar iyawsirimpikiw casarasipjjañama’ siski uka arunakajja, ¿kamsañsa muni?

¹² Jumatï casarasiñ amtaskstajja, wali sumwa amuytʼasiñama. Bibliajj akham siwa: “Jan jumanakajj Tatitur jan iyawsirinakampejj chikachasipjjamti, [...] jupanakampi chikachasipjjasmajja, mä chʼulla chʼulla yuntar uñtatäpjjasmawa. ¿Kuna lurañaparak utji askimpi ñanqhampisti? Jan ukajj ¿kunjämaraki qhanasti  chʼamakampïspasti?” sasa (2 Cor. 6:14). Ukatjja, ‘Diosar iyawsirimpikiw casarasipjjañama’ sasaw Bibliajj ewjjtʼarakistu (1 Cor. 7:39). ¿Kamsañsa uka arunakajj muni? Casarasiñ amtapki uka jilat kullakanakajja, Jehová Diosan leyinakapar respetapki uka bautisat jilatampi, jan ukajj kullakampikiw casarasipjjañapa. Ukham lurapjjani ukhajja, Diosat jan jitheqtañatakiw purapat yanaptʼasipjjani.

13. ¿Kamsasas Jehová Diosajj israelitanakar ewjjtʼäna?

¹³ Kunjamatsa servirinakapajj kusisit jakasipjjaspa ukjja Jehová Diosajj sum yati. Nayra maranakatpachsa, servirinakaparojj Jupar servirinakampik casarasipjjañapwa mayïna. Amuytʼañataki, israelitanakajj janiw Diosar jan servirinakampejj chikachasipjjañapäkänti, ukatwa Diosajj Moisés toqe akham sasin ewjjtʼäna: “Janirakiw jumanakajj jupanakampi parientechasipjjätati ni yoqall wawamaru ni imill wawamarusa jupanakan wawanakapampi casarapjjätati. Ukham lurapjjasma ukkhasti jupanakajj jumanakan wawanakamarojj Tatitu Diosat armasiyapjjaspa, yaqha diosanakaruw yupaychapjjarakispa. Ukatsti Tatitu Diosan colerasiñapaw jumanak contra sartani ukat mä ratukiw tʼunjapjjätam” sasa (Deu. 7:3, 4).

14, 15. Jehová Diosar jan istʼasinjja, ¿kunarus Salomonajj purtʼasïna?

¹⁴ Salomonajj Israel marka apnaqañatak reyjam uttʼayatäkäna ukhajja, Jehová Diosarojj yatiñ kankañwa mayïna. Jehová Diosajj mayisitapar istʼänwa. Ukatwa Salomonajj wali yatiñanïna, Israel markarus wali sum apnaqarakïna. Ukhamätap laykuw wali uñtʼatäna. Kunapachatï yaqha markankir mä reinajj Salomonar visitir saräna ukhajja, jupajj akham sänwa: “Nayajj janiw iyawskäyätti, jutasina nayrajjampi uñjañajjkamajja. Cheqpachansa janiw ni chikatsa yatiyapkitütuti, juman yatiñ kankañamatjja, ukhamarak yänakamasa jukʼamp jilawa, nayajj yatkäyäta ukat sipansa” sasa (1 Rey. 10:7). Qhepatsti Salomonajj jan walinakwa lurjjäna. Diosar jan servirinakampi casarasisajj kuna jan walinakansa uñjassna, ukwa Salomonan sarnaqäwipat yateqsna (Ecl. 4:13).

¹⁵ Jehová Diosat walja bendicionanaksa Salomonajj katoqkchïnjja, Diosarojj janiw istʼjjänti, yaqha markanakankir warminakampiw casarasïna. Jupajj 1.000 warminakanïnwa. Jehová Diosar jan istʼasajj ¿kunarus purtʼasïna? Awkëjjäna ukhasti, warminakapajj chuymapjja yaqha diosanak toqeruw uñtayapjjäna, ukat Salomonajj janiw Jehová Diosar yupaychjjänti (1 Rey. 11:1-6). Salomonajj wali yatiñanïkchïnsa, jan walinakaruw purtʼasïna. Jiwasas ukhaman uñjasiraksnawa. Ukhamajja, Jehová Diosar jan servirimpi casarasiñ janipun amtañäniti.

16. Diosar jan servirimpi casarata jilat kullakanakajj ¿kunsa lurapjjañapa?

¹⁶ Casarat chacha warminakat maynitï Jehová Diosar serviñ qalltaspa ukhajja, ¿kunsa Diosar serviñ qalltki uka jilatasa jan ukajj kullakas lurañapa? Bibliajj akham sasaw warminakar ewjjtʼi: “Jumanakajj warminaka, chachanakamar istʼasa sarnaqapjjam, ukhamata inas kawkïri chachas jan Tatitur iyawskchi ukajj jumanakan sarnaqäwinakam toqe Tatitutaki jikjjatatäñapataki jan kuna arumpisa” sasa (1 Ped. 3:1). ¿Kunsa uka arunakajj sañ muni? Mä warmitï suma esposäñatakisa, Biblian ewjjanakaparjam sarnaqañatakisa chʼamachasini ukhajja, inas esposopajj warmiparu sum sarnaqeri uñjasajj Diosar serviñ amtchispa. Ukhamanakajj waljaw uñjasiwayi. Maysa toqetjja, Diosar jan servir esposani jilatanakajj ukhamarakiw apóstol Pedron ewjjanakaparjam sarnaqapjjañapa.

17, 18. 1) Uma Juiciot qhespiñatakejja, ¿kunas Noé chacharojj yanaptʼäna? 2) Jerusalenat qhespiñatakejja, ¿kunas nayrïr cristianonakarojj yanaptʼäna?

¹⁷ Jan wal sarnaqeri jaqenakajja, Jehová Diosatwa jitheqtayistaspa. Ukampis Diosar servirinakasti Diosar serviskakiñatakiw yanaptʼistaspa. Noé chachat amuytʼañäni, jupan urunakapanjja jaqenakajj jan walinakakwa lurapjjerïna (Gén. 6:5). Jaqenakajj sinti jan walinakänwa, ukatwa Diosajj jupanakar tʼunjañ amtäna. Ukampis Bibliajj Noé chachat akham siwa: “Noesti wali suma jaqënwa, Diosar jaysasapuniw sarnaqarakirïnjja. Jaqenak taypinsti jupa sapakiw Diosan munañaparjamajj sarnaqäna” sasa (Gén. 6:7-9).

¹⁸ Noé chachajj janipuniw jan wali jaqenakampejj sarnaqerïkänti. Antisas warmipampi, yoqanakapampi, yoqanakapan warminakapampikiw chikachasïna. Ukatsti taqeniw arca lurapjjäna, Diosan arunakapsa yatiyapjjarakïna (2 Ped. 2:5). Ukhamatwa Uma Juiciot qhespipjjäna. Jiwasanakajj Noé chachampita familiapampita jutirïtanwa. Jupanakatï Diosar jan istʼapkasapäna, ukhamarak jan wali jaqenakampi sarnaqapjjasapäna ukhajja, janiw qhespipkasapänti, jiwasas janirakiw utjkasänti. Maysa toqetjja, nayrïr cristianonakajj Diosar istʼasarakiw sarnaqapjjäna, Diosar jan servirinakampejj janiw chikachasipkänti. Ukaw Jerusalenajj 70 maran tʼunjaskäna ukat qhespiñatakejj yanaptʼäna (Luc. 21:20-22).

19. ¿Jehová Diosar serviskakiñ munstan ukhajja, ¿kunsa lurañasa?

¹⁹ Aka qhepa urunakana Jehová Diosar serviskakiñatakejj ¿kun lurañasasa? (1 Cor. 16:13; Pro. 13:20.) Noé chachampita, familiapampita, nayrïr cristianonakampitwa yateqasiñasa. Diosaru jan servipki ukanakarojj janipuniw amigosarjam ajlliñasäkiti. Aka Oraqpachanjja, Diosar serviri walja millón millón jilat kullakanakaw utjistu, jupanakaw amigosäspa. Jupanakaw Diosar serviskakiñatakisa, akapachat qhespisin wiñay jakañ katoqañatakis yanaptʼapjjestaspa. Ukhamasti, aka qhepa urunakan suma amigonak ajllipjjañäni.