1, 2. 1) Jehová Diosajj markapar wal munasi sasajja, ¿kunatsa jumajj sista? 2) Jaqenakajj ¿kunjam luratätansa?

JEHOVÁ DIOSAJJ sapa mayniruw munasistu sasajj ¿kunatsa sissna? Janïr uk qhanañchkasajja, Taylene, Brigitte ukhamarak Sandra kullakanakat parltʼañäni. Taylene kullakajja, taqe kunwa lurañ munirïna, ukampis jan ukanak lurirjamäsajj wali llakitaw jikjjatasirïna. Ukham jan jikjjatasiñapatakejja, jilat kullakanakajj munasiñampiw walja kuti ewjjtʼapjjäna. Kullakajj akham siwa: “Jehová Diosatï jan munaskitaspajja, janiw jilat kullakanak toqejj yanaptʼkitaspänti ni ewjjtʼkitaspänsa” sasa. Brigitte kullakanjja esposopaw jiwjjarakïna, ukatwa pä wawanakapar sapaki uywañapäna. Kullakajj akham siwa: “Supayampi apnaqat akapachanjja, wawanakaru sapaki uywañajj wali chʼamawa. Ukampis wali llakitas jikjjatasiwaystjja, jan waltʼäwinakampi jan aynachtʼañatakejj Jehová Diosaw yanaptʼawayitu. Ukatwa, Diosajj munasituwa sasin sistjja” sasa (1 Cor. 10:13). Sandra kullakajj jan qollkaña mä usuniwa. Kimsa uru mä jachʼa tantachäwinjja, wali uñtʼat mä jilatan esposapaw arunttʼasin parljjaytʼäna. Kullakan esposopajj akham siwa: “Janiw uka kullakampejj uñtʼasipkayätti, ukampis nanakat llakisitap uñjasajj wal kusisipjjayäta. Jilat kullakanakan mä jukʼa yanaptʼap uñjasajja, Jehová Diosajj qawqsa munasipjjetu ukwa amuyta” sasa.

 ² Jaqenakajja, jaqe masisar munañataki ukhamarak mayninakan munatäñataki luratätanwa. Uka munasiñatï jan utj-jjaspa ukhajja, llakitaw jikjjatassna. Akatjamat jan walin uñjasiñasa, chuyma ustʼayasiñasa, usuntañasa, qollqet pistʼañasa, jan ukajj jaqenakajj Diosan arunakap jan istʼañ munapjjatap uñjasasa, Diosajj janis munasjjestaspa ukhamwa amuyjjsna. Jumatï ukhaman uñjasirïsta ukhajja ak amtañamawa: Diosajj jumat llakisiwa, ukatjja yanaptʼañwa munaraktamjja. Diosat jan jitheqtäta ukhajja, Jupajj janiw jaytkätamti (Isa. 41:13; 49:15).

3. Jehová Diosajj munasistuwa sañatakejja ¿kuna toqenakatsa yatjjataskañäni?

³ Taylene, Brigitte ukhamarak Sandra kullakanakajj jan waltʼäwin uñjasipjjäna ukhajja, Jehová Diosan yanaptʼapwa uñjapjjäna. Diosajj ukhamarakiw jumar yanaptʼañ muntamjja (Sal. 118:6, 7). ¿Kunjamsa Jehová Diosajj munasitap uñachtʼayistu? 1) Luratanakap toqe, 2) Biblia toqe, 3) oración toqe, 4) Jesusan jiwatap toqe. Aka yatichäwinjja ukanakatwa yatjjataskañäni. Ukanakaw Jehová Diosajj qawqsa munasistu uk amuyañatakejj yanaptʼistani (Salmo 77:11, 12 liytʼañataki).

4. Taqe luratanakat lupʼisajja, ¿kunsa Jehová Diosat amuytan?

⁴ Jehová Diosan luratanakapat lupʼisajja qawqsa Jupajj munasistu ukwa amuysna (Rom. 1:20). Oraqejj wali suma lurtʼatawa, ukanjja taqe kunaw jakasiñatak utji. Ukampis Diosajj janiw aleq jakasiñasak munkiti, jan ukasti kusisita jakasiñaswa muni. Amuytʼañataki, jakañatakejja manqʼañaw munasi, ukampis aka Oraqenjja kunayman casta achunakaw manqʼañatak utji, uka achunak manqtʼasajj walpun kusistanjja (Ecl. 9:7). Canadá markan jakasiri Catherine kullakat parltʼañäni, jupajj Diosan luratanakap uñjasajj wal kusisi, yamas jallupachan panqaranakajj utjki uka tiempon jukʼampiw kusisi. Kullakajj siwa: “Taqe kunasa, wasitampis jakatatkaspa ukhamawa, ukanak uñjañajj wali muspharkañawa. Panqaranakajj wasitampi oraqet alsuniñataki luratawa, jamachʼinakasti wasitampirakiw kuttʼanjjapjje, jiskʼa lorenso jamachʼisa cocinaj anqan manqʼajj uchatäki ukarus wasitampiw kuttʼanjje. Jehová Diosajj walpun munasistu, ukatwa taqe ukanak churistu” sasa. Alajjpachankir Awkisajja luratanakap uñjasajj walpun kusisi, jiwasajj ukhamarak kusissna ukwa Jupajj muni (Hech. 14:16, 17).

5. ¿Kunjam lurtʼatäpjjesa jaqenakajja, ukat kunjamsa ukajj Jehová Diosan munasiñap uñachtʼayistu?

⁵ Jehová Diosajja, jaqerojj taqe kuns suma lurtʼiri ukat luratanakapat kusistʼiri ukhamwa lurawayi (Ecl. 2:24). Ukatsti aka Oraq phoqantapjjañapataki, yapuchapjjañapataki, taqe chawllanakarusa, jamachʼinakarusa, ukhamarak yaqha animalanakarus apnaqapjjañapatakiw Diosajj jaqer lurtʼawayäna (Gén. 1:26-28). Janiw ukakïkiti, jaqerojj Jupar uñtasitwa lurawayaraki, ukhamata Jupat yateqasis sarnaqapjjañapataki (Efe. 5:1).

6. ¿Kunatsa Diosan Arup wali askit uñjañasa?

⁶ Jehová Diosajj Arup toqew munasiñap uñachtʼayarakistu. Diosajj kunjam chuymanisa, kunjamsa jaqenakar uñji ukanakjja, Biblia liytʼasaw yateqtanjja. Amuytʼañataki, israelitanakajj janis istʼasirïpkchïnjja, ¿kunjamsa Diosajj jupanakar uñjaskakïna? Bibliajj siwa: “Diosajj khuyapayasiñapampejj ñanqhanakapatjja perdonänwa, janiw jupanakarojj tukjkänti; colerasiñapjja walja kutiw maysaru apanuküna, ukatsti janiw colerasiñampi atipjayaskänti” sasa (Sal. 78:38, Aymar Biblia).  Jiwasatï uka qellqatat amuytʼañäni ukhajja, Jehová Diosajj qawqsa munasistu ukhamarak qawqsa jiwasat llakisi ukwa amuyañäni. Jehová Diosatakejj wali valoranïtanwa janipun ukat pächasiñäniti (1 Pedro 5:6, 7 liytʼañataki).

7. ¿Kunatsa Diosan Arup wali askit uñjañasaraki?

⁷ Maysa toqetjja, ¿kunatsa Diosan Arup wali askit uñjañasaraki? Jehová Diosajj Biblia toqew parlistu. Amuytʼañataki, awk taykanakajj wawanakapampi sum parltʼasipjje ukhajja, jukʼampiw munasipjje confiyasipjjaraki. Jiwasajj janiw Diosar uñjktanti ni alajjpachat parlanirsa istʼkaraktanti, ukampis Jupajj Biblia toqew parlistu, ukatwa Biblia liytʼasajj wali sum amuytʼañasa (Isa. 30:20, 21). Ukhamatwa Diosajj jiwasar yanaptʼañ munatapsa, jan walinakat jarkʼaqañ munatapsa amuyañäni. Ukatsti jukʼampiw Jupar uñtʼañäni, confiyarakiñäni (Salmo 19:7-11; Proverbios 1:33 liytʼañataki).

8, 9. 1) ¿Kun yatiñassa Diosajj muni? 2) ¿Kunsa Josafat reyin sarnaqäwipajj yatichistu?

⁸ Jehová Diosajj munasistuwa, janiw pantjasitanakas uñchʼukkiti, jan ukasti kunjam suma chuymanïtansa ukwa uñji, uk yatiñaswa Jupajj muni (2 Cró. 16:9). Judá marka apnaqeri Josafat (Jehosafat) reyit amuytʼañäni. Jupajja, Israel marka apnaqer Acab reyimpi mayachasisaw sirionakan apnaqata Ramot-galaad marka katuntir saräna. Acab reyin 400 kʼari profetanakapajja sirionakar ‘atipjapjjätawa’ sasaw sapjjäna. Ukampis Jehová Diosan Micaya profetapajja, ‘Acab reyejj atipjataw uñjasini’ sasaw säna. Qhepatjja Micaya profetan arunakaparjamaw taqe kunas phoqasïna.  Acab reyirojj uka nuwasïwinwa jiwayapjjäna, Josafat reyirusti niyapuniw jiwayapjjarakïna. Josafat reyejj Jerusalenar kuttʼjjäna ukhajja, Jehová Diosajj Jehú profetap toqew Acab reyimpi mayachasitapat juchañchäna. Cheqas Acab reyimpi mayachasitapajj janipuniw walïkänti. Ukampis Jehová Diosajj Micaya profetap toqejj akham sänwa: “Yaqha suma luratanakamawa jumanjja utji” sasa (2 Cró. 18:4, 5, 18-22, 33, 34; 19:1-3).

⁹ ¿Kuna suma luräwinaksa Josafat reyejj luräna? Apnaqañ qalltkäna ukhajja, servirinakaparu, levitanakaru, ukhamarak sacerdotenakaruw Judá markpachar khitäna, ukhamat uka markankir jaqenakajj Diosan leyinakapat yatipjjañapataki. Ukham luratapasti, Judá markan jakasir jaqenakarojj wal yanaptʼäna, yaqha markan jakir jaqenakasa Jehová Diosarojj uñtʼapjjänwa (2 Cró. 17:3-10). Josafat reyejj pantjaskchïnsa, Jehová Diosajj janiw suma luratanakap armkänti. ¿Kunsa ukajj yatichistu? Pantjasirïkstansa, Jehová Diosar taqe chuyma serviñatak chʼamachasiñäni ukhajja, Diosajj munasiskakistaniwa.

10, 11 1) ¿Kunatsa oracionajj Diosan mä suma regalopajja? 2) ¿Kunjam toqenakatsa Diosajj mayisitanakas istʼaspa? (9 janankir foto uñjjattʼam.)

¹⁰ Kunapachatï mä wawajj awkipampi parltʼañ muni ukhajja, munasir awkejj ¿kunsa luri? Wawapar munasitap laykojja, awkejj taqe chuymaw istʼi, ukatjja kunjamas wawapajj jikjjatasi, kunanakas llakisiyi ukwa yatiñ munaraki. Alajjpachankir Jehová Dios Awkisajj ukhamarakiwa, kunapachatï oracionan mayistan ukhajja, Jupajj istʼistuwa.

¹¹ Oracionajj Jehová Diosan mä suma regalopawa ¿kunatsa? Taqe horasaw Jupampejj parlsna. Taylene kullakat qalltan parlkayätan uka kullakajj akham siwa: “Jehová Diosampejj taqe kunatwa parlsna” sasa. Ukhamasti, kunjamsa chuymasan jikjjatastan ukjja Diosar awistʼassnawa. Jupajj mayisitanakas istʼapunistaniwa, inas awisajj Bibliankir mä texto toqëchini, Bibliat apstʼat qellqatanak toqëchini, mä jilatana jan ukajj mä kullakan chʼamañchtʼir arup toqëchini. Diosajj wal munasistu ukatwa mayisitanakasar istʼi.

12. ¿Kunatsa Biblian qellqatäki uka oracionanakat yatjjatañasa? Uk qhanañchtʼam.

¹² Biblianjja Diosar taqe chuyma mayisiri chachanakana warminakana oracionanakapaw qellqata. Jupanakajja, kunjamas jikjjatasipjjäna ukanakwa Diosar yatiyapjjäna. Uka oracionanakajj jiwasan yateqasiñasatakiwa. Ukhamajja, ¿janit uka oracionanakat Familiana Diosar Yupaychañataki Aruman yatjjatañajj wakiskaspa? Amuytʼañataki, inas Jonás chachan oracionapat yatjjatsna, jupajj mä jachʼa chawllan purakap manqhatwa Diosar mayisïna (Jon. 1:17–2:10). Templojj Diosar katuyaskäna ukhajja, kunjamsa Salomón reyejj Diosar mayisïna uka oracionatsa, ukhamarak Jesusajj mayisiñ yatichkäna uka oracionatsa yatjjataraksnawa (1 Rey. 8:22-53; Mat. 6:9-13). Ukampis jiwasajj Diosar mayisiñasapuniwa. Ukhamtï lurañänejja, ‘Diosajj samarañapwa churistani, ukasti taqe kuntejj jaqejj amuytʼkaspas ukat jukʼamp jachʼawa. Uka samarañasti chuymanakassa, amuyunakassa imaniwa’. Ukatjja, Jehová Diosarus jukʼampirakiw munasiñäni (Fili. 4:6, 7).

13. Jesusan jiwas layku jiwatapajj ¿kunjamsa yanaptʼistu?

¹³ Jehová Diosajja, wali munat Yoqaparu aka Oraqer khitanisarakiw munasiñap uñachtʼayistu. Jesusasti jiwasan ‘wiñay jakañanïñasatakiw’ jakäwip loqtasiwayi (1 Juan 4:9). Apóstol Pablojj akham sänwa: “[Cristow] horasapar  jiwawayi jiwasan juchanakas layku. Janiw khitis jasakejj mä jaqe layku jiwkaspati, ni mä aski jaqe laykusa; inas maynejj jiwarakchispa mä suma aski jaqe layku. Ukampis Diosajj munasiñapwa uñachtʼayistu, kunapachatejj jiwasanakajj juchanïskäyätan ukapachaw Cristojj jiwasanak layku jiwawayi” sasa (Rom. 5:6-8). Jesusan jiwatapajja qawqsa Jehová Diosajj munasistu ukwa uñachtʼayistu, ukatsti Jesusan jiwatap toqew Diosampejj sum apasiraktanjja.

14, 15. Jesusan jiwatapajja, ¿kunjamsa ajllit cristianonakarusa, aka Oraqen jakañatak suytʼäwinïpki ukanakarus yanaptʼi?

¹⁴ Jesusan jiwatapajja ¿kunjamsa ajllit cristianonakar yanaptʼi? Jesusan jiwatap toqew jupanakajj Jehová Diosamp wali sum apasipjje (Juan 1:12, 13; 3:5-7). Jehová Diosaw uka cristianonakarojj qollan ajayupampi ajlliwayi, ukatwa jupanakajj ‘wawanakapjam’ uñtʼatäpjje (Rom. 8:15, 16). Uka ajllitanakajja, ‘Jesusamp chikaw alajjpachan qontʼatäpjje’ sasaw apóstol Pablojj säna (Efe. 2:6). Niyakejjay yaqhep ajllitanakajj aka Oraqenkasipkchejja, ¿kunatsa ajllitanakajj ‘Jesusamp chikaw alajjpachan qontʼatäpjje’ sasin Pablojj sispachäna? Ajllit cristianonakajja, ‘Diosankirinakjam qollan ajayumpi sellatäpjjewa’, jupanakajj wiñay jakañwa alajjpachan katoqapjjani, ukatwa Pablojj ukham sispachäna (Efe. 1:13, 14; Col. 1:5).

¹⁵ Alajjpachar sarañataki jan ajllitäpki uka cristianonakarojja, ¿kunjamsa Jesusan jiwatapajj yanaptʼaraki? Jesusan jiwatapar iyawsirinakajja, Diosampejj wali sum apasipjjaspa. Ukatsti aka Oraqen wiñay jakañwa katoqapjjarakispa, qhepatsti Diosan wawanakapjam uñtʼatäpjjaspawa. Kunjamtï uñjktanjja, Jehová Diosajj Yoqapar aka Oraqer khitanisajja, jaqenakar munasitapwa uñachtʼayäna (Juan 3:16). Jumatï Diosar taqe chuyma serviskakïtajja, jutïrin wali suma Paraisonwa jakasïta. Cheqansa, ukajj Jehová Diosan suma regalopawa, ukat sipan yaqha jukʼampi suma regalojj janiw utjkaspati.

16. Jehová Diosan munasiñapat amuytʼañajja, ¿kunatakis yanaptʼistani?

¹⁶ Jehová Diosajj kunayman toqetwa munasiñap uñachtʼayistu. David reyejj akham sänwa: “Juman amtatanakamajj jan amuykayawa, ukanakajj jan tukuskiriwa. Ukanaktejj jaktʼañ muniristjja, chʼallat sipan jukʼampïspawa” sasa (Sal. 139:17, 18). Jiwasatï Jehová Diosan munasiñapat amuytʼañäni ukhajja, jukʼampiw Jupar munasiñäni, ukatjja taqe chuymaw Jupar serviñ munarakiñäni.

17, 18. ¿Kunanak lurasas Jehová Diosar munasitas uñachtʼaysna?

¹⁷ Jehová Diosar munasitasjja walja toqenakatwa uñachtʼaysna. Ukanakat yaqhepajj akanakäspawa: Reino toqet taqe chuyma jaqenakar yatiyaña (Mat. 24:14; 28:19, 20). Ukatsti, jan waltʼäwinakan uñjaskasas Diosat jan jitheqtaña (Salmo 84:11; Santiago 1:2-5 liytʼañataki). Inas awisajj sinti jan waltʼäwinakan uñjassna, ukampis kunjamas jikjjatastan ukjja Diosajj yatiwa, ukatjja jiwasar wal munasitap laykojja, Jupajj yanaptʼistaniwa (Sal. 56:8).

¹⁸ ¿Kunanak lurasas Jehová Diosar munasitas uñachtʼaysna? Maya, luratanakapat lupʼiñataki tiempo apstʼasisa. Paya, Diosan Arupat yatjjatasa. Kimsa, Diosar jakʼachasiñatak jan jaytas Jupat mayisisa. Pusi, Jesusan jiwas layku jiwatapat lupʼisa (1 Juan 2:1, 2). Taqe ukanaktï lurañänejja, Jehová Diosajj jiwasar wal munasitapwa amuyañäni, ukatsti urut urutjamaw Juparojj jukʼampi munasirakiñäni.