1, 2. 1) ¿Kunsa Paraison lurañ munasma? (Aka janankir dibujo uñjjattʼam.) 2) ¿Kunanakas Paraison jukʼamp kusisiyistani?

APÓSTOL Pablojja, wiñay jakañ jikjjatañataki chʼamachasipjjam sasaw sistu (1 Timoteo 6:12, 19 liytʼañataki). Uka wiñay jakañjja, Diosan servirinakapat waljaniw aka Oraqen katoqapjjani. Jumatï ukanakat maynïrïsta ukhajja, wali kusisitaw uka uru puriniñap suypachätajja. Paraisonjja jan kuna llakini, wali kusisita, kʼumara ukham sapa alwa ikit sartañajj wali kusiskañäniwa (Isa. 35:5, 6). Familiasampi, amigonakasampi, jaktanirinakampi chikäsas wali kusisitaw jikjjatasirakiñäni (Juan 5:28, 29; Hech. 24:15). Kuntï munktan taqe ukanakwa yateqarakiñäni. Sañäni, ciencia toqet yateqañatakisa, music tocañ yateqañatakisa, uta lurañ yateqañatakisa, tiempojj utjaniwa.

² Ukampis taqe ukanakat sipansa, Jehová Diosar istʼiri ukhamarak qollan sutip jachʼañchiri jaqenakaru uñjasajj jukʼampiw kusisiñäni (Mat. 6:9, 10). Paraisonjja, jaqenakajj  janiw juchararäjjapjjaniti, cheqas kunjamtï Jehová Diosajj qalltan munkän ukhamäniwa. Urut urutjamaw jan juchanir tukjjañäni, Jehová Diosampis jukʼamp sumaw apasirakiñäni (Sal. 73:28; Sant. 4:8).

3. ¿Kunatakis jichhatpach wakichtʼasiñasa?

³ Jehová Diosajj kuntï jutïritak amtki ukjja phoqapuniniwa ¿kunatsa? Jupatakejj ‘janiw kunas chʼamäkiti’ sasaw Bibliajj qhanañchi (Mat. 19:25, 26). Apóstol Pablojja, wiñay jakañ jikjjatañatakejj wal chʼamachasipjjañamawa sasaw säna. Akapachajj niyaw tukusini, ukhamajja qhepa urunakan jakatas sarnaqatasampi uñachtʼayañäni. Jiwasatï Paraison jakañ munstan ukhajja, jichhatpach wakichtʼasiñasawa. ¿Kunjamsa wakichtʼassna? Uk jichhajj yatjjatañäni.

4. ¿Kunjamsa Paraison jakasiñatakejj wakichtʼassna? Uk mä uñachtʼäwimpi qhanañchtʼam.

⁴ ¿Kunjamsa Paraison jakasiñatakejj jichhatpach wakichtʼassna? Ak amuytʼañäni: maynejj yaqha markar sarjjañ amtaspa ukhajja, ¿kunjamsa wakichtʼasispa? Uka yaqha markansa jakjjaspa ukhamwa kuns luraspa. Inas uka markan parlaski uka aru yateqchispa, costumbrenakapatsa yatjjatarakchispa. Uka markan manqʼanakapsa malltʼarakispawa. Niya ukhamarakiw jiwasajj wakichtʼassna. Paraisonsa jakasjjsna ukhamwa jichhatpach jakasiñasa. Kunanaksa lursna uk mä qawqha uñjañäni.

5, 6. ¿Kunatsa Diosan markaparu jichhatpach istʼañ yatinoqtañasa?

⁵ Akapachanjja, jaqenakajj Supayan amtaparjamaw sarnaqapjje. Amuytʼañataki, Diosar istʼañajj janis wakiskaspa ukhamwa waljanejj amuyapjje, ukatwa munañanakaparjam sarnaqapjje. Ukham sarnaqasajja, waljaniw llakinakana, tʼaqhesiñanakana uñjasipjje (Jer. 10:23). Jehová Diosajja, wali munasiri suma apnaqer Diosawa, ukatwa munañaparjam sarnaqtanjja. Ukampis Paraisonjja, jakasiñajj wali sumäniwa, taqeniw Diosan munañap lurjjapjjani.

⁶ Paraison jakasiñatak jichhatpach wakichtʼasiñ munstan ukhajja, Jehová Diosan markapar jichhatpach istʼañaruw yatinoqtañasa. ¿Kunatsa ukham sistanjja? Paraisonjja, aka Oraq mä suma jardinar tukuyañatakisa, jaktanirinakar Jehová Diosar uñtʼapjjañapatak yanaptʼañatakisa, kamachinakwa katoqañäni. Cheqas Paraison walja lurañanakaw utjani. Ukatwa akham jisktʼasiñasa: “Jan gustkitu uka trabajo Jehová Diosan markapajj churitaspa ukhajja, ¿iyaw sasati taqe chuyma phoqeristjja?” sasa.

7, 8. 1) ¿Kunatsa jichhatpach istʼasirïñasa? 2) ¿Kuna luräwinaksa yaqhep jilat kullakanakajj katoqawayapjje? 3) Paraison jakasitasatjja, ¿kunjamas jikjjatasiñäni?

⁷ Paraison jakasiñatak jichhatpach wakichtʼasiñatakejja, janiw Jehová Diosan markapar istʼañ mayakejj wakiskiti, jan ukasti kuna luräwi katoqasas kusisitäñwa yateqañasa, ukatsti khitinakatï luräwinak churapkistu ukanakarus istʼañasarakiwa. Amuytʼañataki, Jehová Diosan markapan yaqha luräwi katoqasajj uk phoqañatakiw chʼamachasiñasa, ukatsti uka luräwisampejj kusisitäñasawa. Ukhamtï lurañäni ukhajja, kuna trabajtï Paraison katoqkañäni ukjja, kusisitaw phoqañäni (Hebreos 13:17 liytʼañataki). Israelitanakat amtañäni, kunapachatï jupanakajj Suma Oraqer mantapkäna ukhajja, janiw kawkhansa jakasipjjani uk jupanakajj ajllipkänti, jan ukasti kunjamtï Jehová Diosajj  siskäna ukhamarjamaw sapa maynejj oraq katoqäna (Núm. 26:52-56; Jos. 14:1, 2). Paraison inas ukhamarakïchini, kawkhansa jakasiñäni ukjja inas jiwasajj jan ajllkchiñäniti. Ukampis istʼasirïñatak jichhat chʼamachasiñäni ukhajja, kawkhansay Paraison jakaschiñänejja, Jehová Diosar servisajj wali kusisitaw jikjjatasiñäni.

⁸ Jehová Diosan apnaqata mä suma Paraison jakasisajj wali kusisitaw jikjjatasiñäni. Ukatwa jichhatpach Diosan markapar istʼañataki chʼamachastanjja. Ukampis Jehová Diosan markapajja, inas awisajj yaqha luräwinak phoqañatak maychistaspa. Amuytʼañataki, Estados Unidos markankir Betelan trabajir yaqhep jilat kullakanakajja, Betelat mistusin yaqha luräwinak phoqapjjañapatakiw mayisiwayi. Tamanak tumptʼirinakat yaqheparojja, chuymanïpjjatapata jan ukajj yaqha ukhamanakatwa precursor especialjam servipjjañapatak mayisiwayaraki. Ukham yaqha luräwinak katoqasajja, uka jilat kullakanakajj wali kusisitaw jikjjatasipjje, Jehová Diosas jupanakarojj wal bendici. Jiwasatï kusisita jakasiña, ukhamarak Jehová Diosan bendicionap katoqañ munstan ukhajja, ¿kunsa lurañasa? Jehová Diosaruw oracionan yanaptʼa mayiñasa, kuntï lurirjamäktan ukwa lurañasa, kuna luräwi katoqasas kusisitäñasarakiwa (Proverbios 10:22 liytʼañataki). Paraisonjja, inas mä cheqajj jakasiñatak wal gustchistaspa, ukampis yaqha cheqan jakasiñatak mayistaspa ukhajja, ¿kamachsnasa? Kawkha cheqsay jakañatak churchistani jan ukajj kuna trabajsay katoqchiñänejja, taqe chuymaw phoqañäni. Paraison jakasitasatjja Jehová Diosar walpun yuspärañäni (Neh. 8:10).

9, 10. 1) ¿Kunatsa paciencia chuymanïñajj Paraison wakisini? 2) ¿Kunjamsa jichhatpach paciencia chuymanïtas uñachtʼaysna?

⁹ Paciencia chuymanïñajj Paraison wakisirakiniwa. Sañäni, inas yaqhanakarojj jaktanit familiapampi amigonakapampi kusistʼir uñjchiñäni. Ukampis jiwasan munat masinakasar jaktanir uñjañatakejj inas suytʼañasächini. Mayninakaru kusisit uñjasajja, ¿jupanakamp chikati kusisirakiñäni? (Rom. 12:15.) Jichhatï Diosan arunakap phoqasir pacienciampi suyaskstan ukhajja, Paraison ukhamarakiw pacienciampi kuns suyañäni (Ecl. 7:8, NM).

¹⁰ Paraison jakasiñatakejja ¿kunjamsa jichhatpach wakichtʼasiraksna? Kunapachatï Biblian yaqhep yatichäwinakapajj sumpach qhanañchañatak mayjtʼayasi ukhajja, ¿sum amuytʼañatakit chʼamachastanjja? Jan sum amuytʼasajj ¿paciencianïtanti? Jichhatï paciencia chuymanïñäni ukhajja, kunapachatï Diosajj machaq kamachinak Paraison churkistani ukhajja, paciencianïñajj janiw chʼamäkaniti (Pro. 4:18; Juan 16:12).

11. 1) ¿Kunas Paraison jakasiñatakejj yanaptʼistaspa? 2) ¿Kunjamsa perdonasirïñajj Paraison yanaptʼistani?

¹¹ Paraison jakasiñatakejja, perdonasirïñ yateqañaw yanaptʼarakistaspa. Kunapachatï Jesusajj waranqa maranak aka Oraqer apnaqankani ukhajja, urut urutjamaw jan juchaniru tukjjañäni (Hech. 24:15). Uka tiempon mayninakajj pantjasipjjani ukhajja, ¿munasiñat perdonañäniti? Jichhatï perdonasirïñ yateqañäni ukhajja, Paraison taqenimpi sum apasiñajj janiw chʼamäkaniti (Efesios 4:32 liytʼañataki).

12. ¿Kunatsa Paraison jakañatakejj jichhatpach wakichtʼasiñasa?

¹² Jehová Diosajj suma chuymanïñatakiw  jichhürunakan yatichistu, ukham chuymanïñaw Paraison wakisirakini. ¿Kunatsa ukham sistanjja? Paraison inas taqe kun jan katoqkchiñäniti. Kuntï munktan uk katoqañatakejja, inas suyañasächini. Ukampis kunjamansay jikjjataschiñänejja, kunanaktï Paraison katoqkañäni ukanakat yuspärasirïñaw wakisini, ukatjja kusisit chuymanïñaw wakisirakini. Jichhatï ukham chuymanïñ yateqañäni ukhajja, Jehová Diosar serviri jilat kullakanakampi Paraison jakañatakejj wakichtʼatäñäniwa (Heb. 2:5; 11:1).

13. Paraison jakasjjañäni ukhajja, ¿kunas jakäwisan nayrankani?

¹³ Paraisonjja, kunatï kusisita jakasiñatakejj munaski taqe ukanakaw utjani. Ukampis taqe ukanakat sipansa, Jehová Diosampi sum apasiñaw jukʼamp kusisiyistani (Mat. 5:3). Uka tiemponjja Jehová Diosar serviñaw jakäwisan nayrankani, ukham lurasajj wali kusisitapuniw jikjjatasiñäni (Sal. 37:4). Ukhamasti jiwasatï Paraison jakasiñataki wakichtʼasiñ munstan ukhajja, Jehová Diosar serviñajj jichhatpachaw jakäwisan nayrankañapa (Mateo 6:19-21 liytʼañataki).

14. ¿Kunanak lurañsa wayn tawaqonakajj amtapjjaspa?

¹⁴ ¿Kunas Jehová Diosaru kusisit chuymampi serviñatakejj yanaptʼistaspa? Diosan markapan jukʼamp luräwinak lurañ amtañaw yanaptʼistaspa. Jumatï waynästa jan ukajj tawaqösta ukhajja, kunjamsa Jehová Diosar servïta uk amtañamawa. Inas Diosatak sapürunjam irnaqtʼañ amtchisma. Kunanak lurasas Diosar servisma ukjja, qellqatanakasanwa walja yanaptʼanak jikjjatasma. * Walja maranaka Diosar sapürunjam serviri jilat kullakanakampisa, parltʼarakismawa. Jumatï jakäwiman Diosar serviñ nayrar usküta ukhajja, taqe kuntï Diosar servisajj yateqkäta ukanakajj Paraison jakañatakiw wakichtʼätam.

15. Diosar jukʼamp serviñatakejja ¿kunanak lurañsa amtsna?

¹⁵ Jehová Diosar jukʼamp serviñatakejja, taqeniw chʼamachassna. Inas Diosan arunakap jukʼamp sum yatiyañatakisa, Biblian ewjjanakaparjam sarnaqañatakisa chʼamachassna. Ukatsti tantachäwinakan sum arstʼañatakisa, sum liytʼañatakisa, plataformat sum arstʼañatakis chʼamachasiraksnawa.  Ukanak lurañ amtañajja, Jehová Diosaru kusisit chuymampi serviñatakiw yanaptʼistani, ukatsti Paraison jakasiñatakiw wakichtʼarakistani.

16. Diosar servisakiw suma jakasiñajj utji sasajja, ¿kunatsa sistanjja?

¹⁶ Paraison jakasiñataki wakichtʼasisajja, ¿akapachan suma jakasiñti aptʼasisktanjja? Janiwa. Jehová Diosar servisakiw sum jakassna. Diosarojja, janiw maynin jariyatakisa, ni jachʼa tʼaqhesïwit qhespiñ laykukis sirvktanti. Jehová Diosampi sum apasisajj wali sumaw jakastanjja, ukatsti wali kusisitaw jikjjatasiraktanjja. Cheqas ukham luratätanwa. Jehová Diosjam yanaptʼasiri, munasiri ukhamajj janipuniw utjkaspati (Salmo 63:1-3 liytʼañataki). Jiwasatï taqe chuyma Diosar serviñäni ukhajja, wali kusisitaw jakasiñäni. Diosar servisakiw ukham jakassna, ukwa Diosar walja maranaka serviri jilat kullakanakajj amuyapjje (Sal. 1:1-3; Isa. 58:13, 14).

17. ¿Paraisonjja samartʼañasa, kusistʼañasa utjpachäniti? Uk qhanañchtʼam.

¹⁷ Paraisonjja, ¿kusistʼañasa samartʼañasa utjpachäniti? Jïsa. Jehová Diosajja, jakäwisan kusisit jakasiñ munirwa lurawayistu. Jupasti sistuwa: ‘Askinak jilarkirwa churapjjäma’ sasa (Sal. 145:16; Ecl. 2:24). Ukampis ak amtapuniñäni: Jehová Diosar servisakiw cheqpach kusisiñ jikjjatsna. Ukhamajja, samartʼañasa, kusistʼañasa Paraison utjkchinisa, Jehová Diosar serviñaw jakäwisan nayrankani. Ukhamasti jichhatpach Jehová Diosar serviñ nayraru uchapjjañäni, ukatsti kuna bendicionanaktï Diosar servisajj katoqktan ukanak janipun armañäniti (Mat. 6:33).

18. ¿Kunjamsa Paraison jakasiñatak jichhatpach wakichtʼassna?

¹⁸ Jutïr urunjja, Paraison jakasiñajj wali sumäniwa. Ukhamasti ukan jakasiñatakejj jichhatpach wakichtʼasipjjañäni. ¿Kunjamsa wakichtʼassna? Jehová Diosajj suma chuymanïñwa jichhürunakan yatichistu, ukhamasti ukarjam sarnaqasaw wakichtʼassna, ukatsti taqe chuyma Diosan arunakap yatiyir sarasaw wakichtʼasiraksna. Jakäwisan kusisit chuymampi Jehová Diosar servipjjañäni. Paraisonjja, Diosan taqe arsutanakapaw phoqasini. Ukhamasti, niyas Paraison jakasjjsna ukham jichhatpach jakasipjjañäni.