1, 2. ¿Kunsa Diosan servirinakapajj suyapjjapunirïna?

JEHOVÁ DIOSAN servirinakapajja, profecianakan phoqasiñap suyapjjapunirïnwa. Sañäni, Jeremías profetajj babilonionakaw Judá marka tʼunjani sasaw säna. Uka profeciajj 607 janïr jichha pacha maranwa phoqasïna (Jer. 25:8-11). Isaías profetajja, akham sasaw mä profecía qellqarakïna: ‘Jehová Diosan yanaptʼataw judionakajj Babiloniat mistusin markapar kutʼjjapjjani’ sasa. Ukatsti sarakïnwa: “¡Kusisiñanïpjjew jupar suytʼirinakajja!” sasa (Isa. 30:18). Miqueas profetasti ukhamarakiw Jehová Diosan profecianakap phoqasiñap suyäna, jupajj sänwa: “Nayajj [Jehová] Tatiturukiw suytʼä” sasa (Miq. 7:7). Diosan nayra servirinakapajja, Mesiasjjat profecianaka phoqasiñap walja maranakarakiw suyapjjäna (Luc. 3:15; 1 Ped. 1:10-12). *

² Jichhürunakanjja ukhamarakiw jiwasajj Diosan Reinop toqet profecianaka phoqasiñap suyasktanjja. Uka Reino toqew Jehová Diosajj tʼaqhesiñanaksa, jan wali jaqenaksa chhaqtayani, ukatsti Supayan apnaqat aka ñanqhapachatsa markapar  qhespiyaniwa (1 Juan 5:19). Akapachajj niyaw tukusini, ukhamasti wakichtʼat suyañasawa.

3. Akapachan tukusiñap walja maranak suyasipki ukanakajja, ¿kunsa jisktʼasipjjaspa?

³ Kunjamatï ‘Diosan munañapajj alajjpachan luraskejja ukhamarak aka Oraqen munañapajj lurasispa’ uk uñjañwa Diosan servirinakapajj suyasktanjja (Mat. 6:10). Ukampis yaqhepa jilat kullakanakajja walja maranakawa akapachan tukusiñap suyjjapjje, ukhamätap laykojj inas akham jisktʼasipjjchispa: “¿Wakichtʼata suyañajj wakisiskakpachati?” sasa.

4. ¿Kunatsa Diosan urup suytʼaskakiñasa?

⁴ Akapachan tukusiñapjja kunjamsa suyañasa uk Bibliajj sum qhanañchi. Jesusajj arkirinakapar akham ewjjtʼäna: “Jumanakajj suyapjjapunim”, “jumanakajj jankʼakïpjjamaya” sasa (Mat. 24:42; Luc. 21:34-36). Jesusan uka arunakapar istʼasajja suyaskakiñasawa. Diosan markapas uka arunakaparjam sarnaqañatakiw chʼamachasiraki, ukatwa sapa kutejj akham ewjjtʼistu: “[Jehová] Tatitun jutañap ursti suytʼapjjam, jankʼakïñapa munasa” sasa. Ukatsti, Diosan arsutaparjamaw aka Oraqejj mä paraisor tukuyatäni, uk jan armasa suytʼañatakiw Diosan markapajj ewjjtʼarakistu (2 Pedro 3:11-13 liytʼañataki).

5. ¿Kunatsa wakichtʼat suyañasa?

⁵ Nayrïr patak maranakan jakasir cristianonakajja, Jehová Diosan urup wakichtʼataw suyapjjañapäna. Ukampis jichhürunakanjja uka uru wakichtʼat suyañajj jukʼamp wakiskiriwa. ¿Kunatsa? 1914 maranwa Jesusajj alajjpachan apnaqañ qalltjje. ¿Kunjamatsa uk yattanjja? Uka marat aksaruw Jesusan profecianakapajj phoqasiñ qalltawayi. Cheqansa, Oraqpachanwa jan waltʼäwinakajj sapürutjam jiljjattawayi, ukatjja Reino toqet suma yatiyäwinakasa taqe cheqanwa yatiyasjjaraki. Ukhamajj qhana amuykayawa, qhepa urunakanwa jakasktanjja (Mat. 24:3, 7-14). Uka qhepa urunakajj qawqha tiempönisa ukjja Jesusajj janiw qhanañchkänti, ukatwa wakichtʼat suyañasa.

6. Jan walinakajj jiljjattaskakiniwa sasin ¿kunatsa sistanjja?

⁶ Ukampis inas maynejj akham jisktʼaschispa: “¿Akapachan tukusiñapatakejj walja tiempo faltaskchisti? ¿Janit jukʼamp jan walinakajj uñjasiñapäki?” sasa. Aka “qhepa urunakanjja” jan walinakajj jukʼampiw jiljjattani sasaw Bibliajj qhanañchi (2 Tim. 3:1, 13; Mat. 24:21; Apo. 12:12). Ukhamajja, akapachan jan walinakajj jiljjattaskakchisa, jiljjattaskakiniwa.

7. Mateo 24:37-39 qellqatarjamajja, ¿‘jachʼa tʼaqhesïwi’ puriniñapkamajj sintipunit jan walinakajj jiljjatpachäni?

⁷ Ukampis ‘jachʼa tʼaqhesïwi’ uru puriniñapatakejja, ¿jukʼamp jan walinakat utjpachäni? (Apo. 7:14, NM.) ¿Manqʼat pistʼañasa, guerranakasa, usuntañanakasa sapa familianti, jan ukajj sapa markanti utjpachäni? Ukhamäspa ukhajja, taqeniw Biblian qellqatäki uka profecianak phoqasiskatapsa, akapachan tukusiñapajj jakʼankatapsa amuyapjjaspa. Ukampis Jesusajj akham sänwa: ‘Qhepa urunakan jakapjjatapjja jaqenakajj janiw sum amuyapkaniti, Jehová Diosan urupa puriniñapkamajj janis kunas paskaspa ukhamwa amuyapjjani’ sasa (Mateo 24:37-39 liytʼañataki). Kunjamtï uñjktanjja, akapachan jan walinakajj janiw sintipun jiljjatkaniti (Luc. 17:20; 2 Ped. 3:3, 4).

8. ¿Kunsa Jesusan arunakapar istʼirinakajj amuyapjje?

 ⁸ Aka qhepa urunakan kuna profecianakas phoqasiñapa ukjja, Jesusan ewjjtʼanakaparjam sarnaqapki ukanakakiw kuna tiemponsa jaktan uk amuyapjje (Mat. 24:27, 42). Jesusan profecianakapajj 1914 marat aksaruw sumpach phoqasiñ qalltawayi. Ukhamajja, qhepa urunakanwa jakasktanjja. Kunapachas aka ñanqhapach tʼunjani uk Jehová Diosajj amtjjewa.

9. ¿Kunatsa akapachan tukusiñapajj niyaw purinini sasin suytanjja?

⁹ Kunjamtï uñjktanjja, akapachan tukusiñap wakichtʼataw suyaskakiñasa. ¿Kunatsa? Maya, Criston arunakaparuw istʼañ muntanjja. Paya, aka qhepa urunakatakejj kuna profecianakatï qellqatäkäna ukanak phoqasiskatapsa sumwa amuytanjja. Ukhamarusa, uka profecianakajj Biblian qellqatawa, ukatwa akapachan tukusiñapajj niyaw purinini sasin wakichtʼat suytanjja.

10, 11. 1) Wakichtʼataw suyapjjañama sasajja, ¿kunatsa Jesusajj arkirinakapar säna? 2) Akapachan tukusiñapajj janis jankʼak purinkchejja, ¿kunsa Jesusan arkirinakapajj lurapjjañapa? (14 janankir dibujo uñjjattʼam.)

¹⁰ Akapachan tukusiñap walja maranakaw jiwasat waljanejj suyasktanjja. Ukampisa, walja maranak suykasasa, akapachan tʼunjatäñap suyaskakiñasawa. Jesusajj akapach tukjiri jutkani ukhakamajja, wakichtʼataw suyaskakiñasa. Jesusajj arkirinakapar akham sänwa: “Jumanakajj suyapjjam, amuyasipjjam, Diosat mayisipjjarakim janirakiw yatipktati kuna horasar puriniñapsa. Ukajj akhamar uñtatawa: Kunapachatejj mä jaqejj jayar sarañ amtejja, janïr sarkasaw uywatanakaparojj ewjjtʼi, ukhamarak sapa maynirus lurañanakapa jaytawayaraki. Ut uñjirirusti sum uñjañapatakiw jaytaraki. Ukhamajj amuyasipjjamaya, janiw yatipktati utanin kunüru puriñapsa, inas arumarüchini, chika arumarüchini, wallpa artʼarüchini, qhantatirüchini. Ukatrak akatjamat purinisin ikiskir katjasipkiristam. Jumanakar sapksma ukjja, taqeniruw sarakta, amuyasipjjapunim” sasa (Mar. 13:33-37).

¹¹ Jesusajj 1914 maran Reyjam apnaqañ qalltatapwa jilat kullakanakajj amuyapjjäna, ukatwa akapachajj niyaw tukusini sasin wakichtʼasipjjäna. ¿Kunjamsa wakichtʼasipjjäna? Diosan Reinopat taqe chuyma yatiyasa. Marcos 13 qellqatarjamajja, Jesusajj sänwa: “Janiw yatipktati utanin kunüru puriñapsa, inas arumarüchini, chika arumarüchini, wallpa artʼarüchini, qhantatirüchini” sasa. ¿Kunsa Jesusan arkirinakapajj ukäñkamajj lurapjjañapäna? Jesusajj saskakïnwa: “Amuyasipjjapunim” sasa. Ukhamajja, wali jayas akapachan tukusiñap suyjjstanjja, janiw walja tiempos faltkaspa ukham amuyañasäki, ni ‘uka urojj janiw purinjjaniti’ sasins amuyañasäkarakiti.

12. ¿Kunsa Habacuc profetajj Diosar jisktʼäna, ukat kunsa Jehová Diosajj säna?

¹² Habacuc profetat amuytʼañäni. Juparojja, Jerusalenajj tʼunjatäniwa sasin yatiyañapatakiw Diosajj uka markar khitäna. Uka pachpa yatiyäwjja yaqha profetanakas walja maranak nayraw yatiyapjjatayna. Ukampis uka markan jukʼamp jan walinakajj utjaskakïnwa. Jan wali jaqenakajj suma jaqenakaruw tʼaqhesiyapjjäna, janirakiw mayniru cheqaparjam uñjañas utj-jjänti. Ukatwa Habacuc profetajj Diosar akham sasin jisktʼäna: “¿Kunapachkamasa arnaqasëjja yanaptʼama mayisajja[?]” sasa. Diosajja, kunapachas Jerusalén marka tukjani uk janiw  siskänti, jan ukasti aka arunakampiw chuymachtʼäna: “Janisay jankʼäkpa, suyaskakim, purisinkaniwa horasaparu” sasa (Habacuc 1:1-4; 2:3 liytʼañataki).

13. 1) ¿Kunsa Habacuc profetajj amuyasapäna? 2) ¿Kunatsa ukham amuyatapajj jan walïsapäna?

¹³ Habacuc profetajj Diosan arunakap phoqasir suykasin wali qaritas jikjjataskaspa ukham amuytʼañäni, jupajj akham siwa: “Jerusalenajj tukjatäniwa sasin walja maranakaw parlir istʼtjja. Inas walja tiempo faltaskchi. Qharürus Jerusalenajj tukjatäkaspa ukham ¿kunatsa yatiyaskakiñaja? Jichhajj yaqhanakarak yatiyapjjpan” sasa. Jupatï ukham amuyaspäna ukhajja, Jehová Diosampejj janiw sum apasjjaspänti, babilonionakajj Jerusalén marka katuntapkäna ukhas inas jiwchispäna.

14. ¿Kunjamas Paraison jikjjatasiñäni?

¹⁴ Jichhajja, Paraisonsa jakasjjasma ukham amuytʼarakiñäni. Kunjamtï Diosajj siskäna ukhamapuniw taqe kunas phoqasiwayi. Uka toqet jukʼamp lupʼisajja, kunanakatï janïra phoqaski ukanakajj phoqasipuniniwa sasaw taqe chuyma suytajja (Josué 23:14 liytʼañataki). Jehová Diosajj Supayan apnaqat ñanqha pachaparu horasapar tukjatapatsa, jan qarjtasa suytʼaskakiñataki servirinakaparu ewjjtʼkäna ukatsa wal yuspärtajja (Hech. 1:7; 1 Ped. 4:7).

15, 16. ¿Kunatsa yatiyir sarañatakejj chʼamachasiñasa?

¹⁵ Diosan markapajja, Diosar serviñajj kunja wakiskirisa ukjja sapa kutiw amtayaskakistani. Ukaw Diosar serviskakiñatakejj yanaptʼistani. Janiw ukakïkiti, Diosan arunakap jankʼak yatiyañatakis yanaptʼarakistaniwa. Jesusajj aka qhepa urunakat parlkäna uka profecianakajj phoqasiskiwa, ukhamajj niyaw akapachajj tukusini. Ukatwa jakäwisan Diosar serviñasa, arunakapat yatiyañasa nayrankañapa (Mat. 6:33; Mar. 13:10).

¹⁶ Supayan apnaqat aka ñanqha pachapajj niyaw tʼunjatäni. Diosan arunakapat jaqenakar yatiyasajja, qhespipjjañapatakiw yanaptʼasktanjja. Uk lurañajj kunja wakiskirisa uk amuytʼañäni. 1945 maranjja, Wilhelm Gustloff sat jachʼa barcow lamar qotar chhaqaranttäna, ukansti walja jaqenakaw jiwarapjjäna. Ukanjja, mä chacha warmiw qhespïna, qhepatjja jupanakajj Jehová Diosan Testigopäjjapjjänwa. Kullakajj akham amti: “Mä warmejj akham sasaw jachäna: ‘¡Maletinanakaja! ¡Maletinanakaja! ¡Joyanakaja! Joyanakajaw barco manqhankaski. ¡Taqe kunpunwa aptʼasta!’” sasa. Ukampis mayni pasajeronakatakejja, jaqe masipar qhespiyañaw jukʼamp wakiskirïnjja. Jichhürunakanjja, uka  pasajeronakjamarakiw jaqenakar yanaptʼañasa, ukhamatwa qhespipjjani. Akapachan tukusiñapajj wali jakʼankiwa, ukatwa jaqenakar jankʼak yatiyañasa.

17. Akapachan tukusiñapajj akatjamatwa purinini sasinjja, ¿kunatsa sistanjja?

¹⁷ Biblian qellqatäki uka profecianakajj qhanaw phoqasiski, ukatjja akapachas niyaw tʼunjatäni. Naciones Unidas organizacionasa uka organizacionar yanaptʼiri gobiernonakasa, niyaw kʼari religionanak contrajj saytʼapjjani (Apo. 17:16). ¿Uk pasañapatakejj walja tiempot faltaskpacha? Janiwa. Diosaw gobiernonakarojj kʼari religionanakaru tʼunjañ amta churani. Ukhamajj uka tʼunjañ urojj akatjamatwa qalltaspa (Apo. 17:17). Supayan apnaqat aka ñanqha pachapajj niyaw tʼunjatäni. Ukatwa Jesusan ewjjtʼaparojj istʼañasa, jupasti sänwa: “Amuyasipjjam, jan chuymanakamjja vicionakampi machañanakampi qalarayasipjjamti, ukhamarak aka jakañan llakisiñanakampisa jan khä urun jumanakajj akatjamat katjayasipjjañamataki, kunjämtejj mä sipitajj jistʼantaskis ukhama” sasa (Luc. 21:34, 35; Apo. 16:15). Ukhamajja, akapachan tukusiñap suyasipkakiñäni, Jehová Diosarus serviskakiñäni. Jupasti khitinakatï wakichtʼata suyapki ukanakarojj qhespiyaniwa, janipun uka toqet pächasiñäniti (Isa. 64:4).

18. ¿Kuna toqetsa jutïr yatichäwin yatjjataskañäni?

¹⁸ Akapachajja niyaw tʼunjatäni. Uka uru puriniñapkamasti, Jesusan Judas arkiripan arunakaparuw istʼañasa. Jupasti akham sänwa: “Munat jilatanaka, uka qollana iyawsäwinakamanjja chʼaman saytʼasipjjam, qollan ajayun chʼamapampirak Tatitut mayisipjjam. Diosan munasiñapan jakapjjam, kunürutï Tatit Jesucristosajj khuyapayasiñapanjja wiñay jakañjja churkistani uka uru suytʼasina” sasa (Jud. 20, 21). Jutïr yatichäwinjja, kunjamsa Paraison jakañ munatas uñachtʼaysna uka toqetwa yatjjataskañäni.