KHÄ 1927 maranwa Wakaw (Saskatchewan, Canadá) sat mä jiskʼa markan nasiwayta. Awk taykajajj paqallq wawanakanïnwa, ukhamajj jiskʼatpachaw waljanimp jakasiwayta.

Qollqe toqet aynachtʼañaw 1930 maranakan utjäna uk familiajajj uñjawayiwa. Janis walja qollqejj utjapkchitänjja, utajan manqʼañajj utjapuniriwa. Mä wakampi mä qawqha wallpanakampiw utjapjjetäna, ukhamatwa kʼawnasa, lechesa, quesosa, mantequillasa, yaqha ukhamanakas utjapjjetäna. Uywanak uñjañsa, utan lurañanaksa taqeniw yanaptʼapjjerïta.

Wali kusisitaw jakasiwayta, kunjamsa manzananakajj uta manqhan thujstʼiri uk amtasipuntwa. Phajsa tiemponjja awkijajj granjat apsupjjerïkta uk aljiriw sariri, ukatsti jichhak cosechata mä caja manzanwa jila partejj apaniri. ¡Manzananak sapüru manqʼañajj wali kusiskañänwa!

Sojjta maranïskayäta ukhaw awk taykajajj Bibliat yatjjatañ qalltapjjäna. Johnny jilïr jilajaw naskäna uka qhepata jiwatayna. Awk taykajajj uka cheqankir sacerdoteruw wali llaktʼat akham jisktʼapjjatayna: “¿Kawkinkpachas wawajajja?” sasa. Sacerdotesti sataynawa: ‘Niyakejjay wawamajj jan bautisatäkchïnjja, janiw alajjpachankkiti. Jan ukasti kawkharutï jan bautisat jaqenakasa, wawanakasa sarapki ukankiwa. Ukampis pagapjjetasma ukhajja, alajjpachar sarañapatakiw Diosat mayirapipjjerisma’ sasa. ¿Ukham satajj kunjamsa jikjjatasismäna? Awk taykajajj chuym wal ustʼayasipjjäna, janirakiw uka sacerdotempis parlañ munjjapjjänti. Ukhamäkchïna ukasa “¿kawkinkpachas Johnny wawajajja?” sasin jisktʼasisipkakïnwa.

Mä urojja, Jehová Diosan Testigonakapan lurat ¿Dónde estan los muertos? sat folletwa mamajajj jikjjatatayna. Wali kusisitapuniw uk liytʼäna. Tatajajj utar purinïna ukhajja, mamajajj akham sänwa: “¡Wawasajj kawkinkisa uk yatjjtwa! Jupajj ikiskiwa, mä urojj sartaniniwa” sasa. Uka arumpachaw tatajajj uka folleto liysüna. Jiwatanakajj ikisipkiwa, mä urusti jaktanipjjaniwa sasin Bibliajj yatichki uk liytʼasajja, chuymachtʼataw jikjjatasipjjäna (Ecl. 9:5, 10; Hech. 24:15).

Testigonakampi Bibliat yatjjatañ qalltañajja, kusisita, chuymachtʼata jakasiñatakiw yanaptʼapjjetäna. Awk taykajajja, tantachäwinakarus sarjjapjjänwa. Mä qawqha tiempotjja, Diosan arunakap yatiyiris sarjjapjjarakïnwa. Uka tamankirinakat waljanejja, Ucrania markat jutirïpjjänwa.

Qhepatjja, British Columbia markaruw sarjjapjjayäta, ukanjja jilat kullakanakajj wali kusisitaw katoqapjjetäna. Domingo urutakejj kunjamsa familjamajj Yatiyañataki revista wakichtʼasipjjayäta uk janipuniw armkti. Ukaw Diosaru, Biblian cheqa yatichäwinakaparu munasiñatak yanaptʼapjjetäna. Kunjamsa Jehová Diosajj bendicipjjetäna, Biblian yatichäwinakapas yanaptʼapjjetäna uksa uñjawayaraktwa.

 Kunjamtï wawanakar paskejja, Bibliat jaqenakar parlañajj nanakatak chʼamakïnwa. Ukampisa, mä jukʼa ajjsarirïpjjchiyätsa, Eva sullka kullakajarusa nayarusa, yatiyañataki yanaptʼanakajj utjki uk yatsuñampi, Yatiyañataki Tantachäwin demostracionanak lurañampiw jaqenakar yatiyañatakejj yanaptʼawayapjjetu. ¡Ukham yanaptʼanaka katoqasajj walpun yuspärta!

Jiskʼäskayäta ukhajja, Jehová Diosaru sapürunjam serviri jilat kullakanakaruw utar qorpachapjjerïta, uk janipuniw armaskti. Amuytʼañataki, tamanak tumptʼiri Jack Nathan jilatajj tamajaru jutasin utajaru qorpachasiri ukhajja, wal kusisipjjerïta. * Experiencianakapajj wali sumänwa, chʼamachtʼkir arunakapampejj Jehová Diosar jukʼamp serviñatakiw yanaptʼapjjerïtu.

Akham amuyirïta: “Jachʼäjjä ukhajj Nathan jilatjamäyäwa” sasa. Uka jilatajj sarnaqatapampiw Diosar sapürunjam serviñatak yanaptʼaskitäna. 15 maraniw Diosar serviñ amtasajj Eva sullka kullakajampejj 1942 maran bautisasiwayapjjta.

Payïr Jachʼa Chʼajjwäwejj qalltäna ukhajja, niya taqeniw markapar munasipjjatap uñachtʼayapjjäna. Scott sat mä profesorajja Testigonakar walpun uñisïna, ukatwa pä sullka kullakajampiru mä sullka jilajampirojj banderar jan aruntañ munapjjatapat escuelat jaqsüna, nayarus ukhamarakiw lurañ munitäna. Ukatakejja profesorajampiw parläna. Ukampis profesorajajj uka profesorar sänwa: “Aka markanjja taqeniw librëtanjja, ukhamajj janiw khitis markasar jachʼañchañäniti janicha uk siskistaspati” sasa. Profesorajajja, uka profesoran wali jariyatpachas akham sänwa: “Ukaw amtajajja” sasa.

Scott profesorasti sänwa: “Janiw amtamäkaniti, janitï Melitaru escuelat jaqskätajja autoridadanakaruw awisäjja” sasa. Ukatwa profesorajajj awk taykajar säna: “Melitaru escuelat jaqsupjjañap janiw munkti, ukampis janitï uk lurkäjja, nayaruw trabajot jaqsupjjetani. Janis ukham lurañajajj wakiskchejja, Melitarojj escuelat jaqsuñajawa” sasa. Ukhamäkchïna ukasa, utanjja yateqañatak libronakajj utjapjjetänwa. Mä qawqha urunakatsti, yaqha markaruw sarjjapjjayäta, ukanwa escuelan katoqjjapjjetäna. Uka markajja, kawkhantï jakaskayäta ukatjja 32 kilometronak jayankänwa.

Guerrajj utjkäna ukhajja, Bibliat apstʼata qellqatanak jaqenakaru churañajj wali jarkʼatänwa, ukatwa utat utajj Bibliampik yatiyapjjerïta. Ukhamatwa Bibliampi yatiyañ wali sum yatsupjjayäta. Ukaw suma cristianöñatakisa Diosan yanaptʼap uñjañatakis yanaptʼapjjetäna.

Eva kullakajasa nayasa escuela tukuyjjasajja, precursorjam serviñwa qalltapjjayäta. Qalltanjja, mä jachʼa tiendanwa trabajiyäta. Ñikʼut khuchuñajj wal gustitäna, ukatwa jukʼamp yateqañatakejj sojjta phajjsinak mä cursor sarayäta. Uka curso tukuyjjasajja, mä peluquerianwa semanan pä kuti trabajiyäta, ukatsti ñikʼut khuchuñwa phajjsin pä kuti yaticharakiyäta. Ukhamatwa precursorjam serviñatakejj yanaptʼasiyäta.

1955 maranjja, “Reino Triunfante” sat jachʼa tantachäwejj Nueva York (Estados Unidos), Núremberg (Alemania) markanakan apasiñapäkäna ukaruw sarañ munayäta. Janïr Nueva York markaru sarkasinjja Nathan Knorr jilatampiru  esposapampiruw uñtʼayäta, jupanakajja Vancouver (Canadá) markan jachʼa tantachäwejj apaskäna uka tantachäwinkasipkataynawa. Ukankasinjja, esposapar ñikʼuta askichañajatakiw mayipjjetäna. Jilatarojja, esposapan ñikʼutap sum askichatajajj wal gustäna, ukatwa jukʼamp uñtʼañ munitäna. Jilatampi parltʼaskasajj akham sayäta: “Janïr Alemaniaru sarkasajj Nueva York markaruw nayraqat sarañ munta” sasa. Ukatwa Knorr jilatajj Brooklyn markankir Betelan llätunka urunak trabajiñatak invittʼitäna.

Brooklyn markanjja, Theodore (Ted) Jaracz jilataruw uñtʼayäta, ukhamatwa jakäwijajj mayjtʼäna. Mä qawqha urunak pasatatjja, jilatajj akham jisktʼitäna: “¿Precursorätati?” sasa. Nayasti “janiwa” sayätwa. Uksti LaVonne amigajaw istʼaskäna, ukatwa jupajj arjjatanïna: “Jïsa, jupajj precursorawa” sasa. Jilatasti uk istʼasajj sänwa: “¿Khitis sumpach yatejja, jumati jan ukajj jupacha?” sasa. Nayasti jilatar sayätwa: “Precursorjamaw irnaqaskayäta, ukampis aka jachʼa tantachäwit kuttʼasaw precursorjam serviñ qalltä” sasa.

Ted jilatajj 1925 maranwa Kentucky (Estados Unidos) markan nasïna. Jupasti 15 maraniw bautisasïna. Familiapat janiw maynis Diosan arunakapar iyawskänti, ukampis bautisasitapat pä mara qhepatjja precursorjamaw serviñ qalltäna. Ukhat jiwañapkamajja, 67 maranakaw Diosatakejj sapürunjam irnaqtʼawayi.

Julio, 1946 maranwa jilatajj Galaad Escuelat (clase 7) mistüna, ukhatakisti 20 maranïnwa. Qhepat tamanak tumptʼirjamaw Cleveland (Ohio) markan irnaqtʼäna. Pusi mara qhepatsti Australiankir sucursal sarayañapatakiw invittʼapjjäna.

Núremberg (Alemania) markan jachʼa tantachäwejj apaskäna ukhajja, Ted jilatajj ukankarakïnwa, ukansti mä qawqha tiempojj sapa kutiw uñjasipjjayäta, ukhamatwa jukʼamp uñtʼasiñ qalltapjjayäta. Jilatasti, Jehová Diosar jukʼamp serviñ munasapuniw kun lurañs amtirïna. Diosar taqe chuyma serviri, munasiri ukham jilatänwa. Jupa pachpat llakisiñat sipansa mayninakatwa llakisirïna. Jachʼa tantachäwi tukuyatarojja, Ted jilatajj Australia markaruw kuttʼjjäna, nayasti Vancouver markaruraki. Ukampis sapa kutiw carta qellqasipjjerïta.

Phesqa mara Australiankasinjja, Ted jilatajj Estados Unidos markar kuttʼasinjja, Vancouver markanwa precursorjam servïna. Familiajajj jupar wali suma jaqetwa uñjäna, ukajj walpun kusisiyirïtu. Michael jilajajj janiw khiti waynampi parlañajsa munirïkänti, ukhamajj ‘khiti wayna jilatacha kullakajar munkani’ sasaw llakisirïna. Ukampis jilajajj Ted jilatar wal munasïna. Mä kutejj akham sitänwa: “Melita, uka jilatajj wali suma jaqewa, wali sum uñjäta, ukatarak aptʼasiskasma” sasa.

Nayas Ted jilatarojj wal munasirakiyäta. Jupampejj diciembre 10, 1956 maranwa casarasipjjta. Ukatjja Vancouver, California markanakanwa precursorjam serviwayapjjta. Qhepatsti, Misuri, Arkansas markanakan tamanak tumptʼañatakiw khitapjjetäna. Estados Unidos markankir yaqha cheqanakansa, sapa semanajj may maya utanwa qorpachasipjjerïta, 18 maranakaw ukham lurawayapjjta. Uka cheqanakan yatiyañajj wali sumapunïnwa, jilat kullakanakampi Diosar serviñas ukhamarakïnwa. Sapa semana mä utat yaqha utar sarañataki cosasanak apthapiñajj chʼamakïchïnsa, tamanak tumptʼañajj wali kusiskañänwa.

Tedatakejj Jehová Diosampi sum apasiñasa, Taqe Kunjjar Munañani Diosar serviñas wali wakiskiripunïnwa. Uk uñjasajj jukʼampiw jupar respetirïta. Biblia liyiñasa, Bibliat jukʼampi yatjjatañasa  walpun gustapjjetäna. Janïr ikintkasajja, sapa arumaw ikiñat saraqasin qonqortʼasis Diosat mayisipjjerïta. Nayraqatajja, Tedaw panpachataki maytʼiri, ukjjarojja sapa mayniw mayisipjjarakirïta. Juparu kunas wal llakisiyiri ukhajja, ikiñat saraqasaw arumajj qonqortʼasis Diosat wali jaya mayisiri, ukhamatwa llakisitap amuyirïta. Taqe kunataki mayisitap uñjasajj wal kusisirïta.

Mä qawqha maranak casaratäjjasinjja, mä urojj Tedajj akham sitänwa: “Jichhajja, Jesusan jiwäwipajj amtaski ukanjja, tʼantʼa manqʼaña vino umañwa qalltäjja. Ukham lurañatakejj walpun Jehová Diosar mayista, ukhamat munañaparjam lurañataki” sasa. Jehová Diosajj qollan ajayupampi alajjpacharu sarañapataki ajllitapatjja janiw pächaskayätti. Uka qhepatjja nayatakejj Criston jilaparu yanaptʼañajj Diosan mä suma bendicionapapunïnwa (Mat. 25:35-40).

1974 maranjja, Oraqpachankir Jilïr Irpirinak taypinkañapatakiw Tedar invitapjjäna, ukajj janiw cheqaw sañjamäkänti. Mä qawqha tiempotjja, Brooklynankir Betelaruw invitapjjetäna. Esposojajj Jilïr Irpirinak taypinwa trabajïna, nayasti Betelan cuartonak qʼomachasa, ñikʼut khuchusaw trabajiyäta.

Tedarojj sucursalanak tumptʼir sarañapatakiw uttʼayapjjäna. Yatiyañajj jarkʼatakäna uka markanakan yatiyasiñapatakejj walpun jupajj yanaptʼañ munirïna. Mä kutejja vacacionatwa Suecia markar sarapjjayäta. Ukankasinjja, esposojajj sitänwa: “Melita, Polonia markanjja, jilat kullakanakajj yatiyañ toqet jarkʼataw uñjasipjje, jupanakar yanaptʼañwa munta” sasa. Ukhamajj Polonia markar sarañatak documentonak apsusajja ukaruw sarapjjta. Purisasti khitinakatï yatiyasiñapatak pʼeqtʼapkäna uka jilatanakampiw Tedajj jikisïna, ukampis jan khitimp istʼayasiñatakejja, parlasisajj wali jay sarapjjäna. Jilatanakampisti pusi uruw tantachasipjjäna. Ukham yanaptʼasajj esposojajj kusisitapuniw jikjjatasïna, jilat kullakanakar yanaptʼatapat nayajj wal kusisirakiyäta.

Noviembre, 1977 maran wasitampiw Poloniar kuttʼapjjta. F. W. Franz, Daniel Sydlik, Ted esposojasa nayrïr kutipuniw Jilïr Irpirinakjam tumptʼapjjäna. Uka markan yatiyañajj jarkʼatakïskchïnsa, Jilïr Irpirinakajj tamanak tumptʼirinakampi, precursoranakampi, experienciani mayni jilat kullakanakampiw walja markanakan parltʼapjjäna.

Mä maratjja, wasitampiw Milton Henschel jilatampi Ted esposojampejj Poloniar kuttʼapjjäna. Ukansti yaqhep autoridadanakampiw parlapjjäna, jupanakajj Diosan arunakap yatiyañ janiw añcha jarkʼjjapjjänti. 1982 maranjja, Poloniankir gobiernojj mä uru jachʼa tantachäwinak apasiñapatakiw permiso churäna. 1983 maransti, jachʼa tantachäwinakajj jukʼampiw apasïna, ukanakasti jilapartejj  alquilat lugaranakanwa apasïna. 1985 maranjja Testigonakajj gobiernon jarkʼatäsipkakchïnsa, pusi jachʼa tantachäwinaka estadionanakan apasiñapatakiw permiso churapjjetäna. Mayo, 1989 maratakejja, jukʼamp jachʼa tantachäwinak apasiñapatakiw amtasiskäna. Ukhamaruw Polonia marka gobiernojj Testigonakar mä religionarjam uñtʼjjäna. Ukajj walpun esposojarojj kusisiyäna.

2007 maranjja, Sudáfricankir sucursalaw Diosar katuyasiñapäna, ukaruw sarasipkayäta, ukhamaruw esposojajj Inglaterra markan presión altampi jan waltʼäna. Ukanjja, doctorajj jupar sänwa: “Janiw viajkasmati” sasa. Walirjjepansti, Estados Unidos markaruw kuttʼapjjta. Mä qawqha semananak qhepatsti, esposojan pʼeqepanjj mä venaw phalläna, ukhamïpansti kupi toqe cuerpopajj janiw onjjtjjänti.

Janiw jankʼak walirtkänti, qalltanjja janiw oficinaparus sarirjamäkänti. Ukampis parlaskänwa, ukajj wal kusisiyapjjetäna. Usutäkchïnsa trabajiskakïnwa, Jilïr Irpirinakajj semanan tantachasipki ukansa teléfono toqew utatpach yanaptʼäna.

Betelan fisioterapiamp yanaptʼatajj jukʼat jukʼatwa esposojajj walirtjjäna, ukat walpun yuspäräna. Yaqhep luräwinakansa yanaptʼjjänwa. Usutäkchïnsa kusisitapuniw jikjjatasirïna.

Kimsa maratsti, wasitampiw pʼeqepan venajj phalläna, ukhamatwa junio 9, 2010 maran miércoles urojj jiwjjäna. Aka Oraqen Diosar serviñ tukuyañap sumwa yatiskayäta. Jiwatapatjja, wali llakitaw jikjjatasiyäta, jichhakamas janipuniw jupat armaskti. Tedar yanaptʼawayatajat wali kusisitaw jikjjatasta, ukatjj sapürupuniw Jehová Diosar yuspärta. Tedampejj 53 jila maranakaw Diosar sapürunjam serviwayta. Diosar jukʼamp jakʼachasiñatakejj esposojaw yanaptʼawayitu, ukat walpun Jehová Diosar yuspärta. Tedasti jichhajj yaqha luräwinïsajj kusisitapuniw jikjjataspacha.

Esposojampejj walja maraw Diosar kusisita, jan tiemponi serviwayapjjta. Jichhajj janiw nayrjam kuns lurirjamäjjtti. Esposojampejja, khitinakatï Betelarusa, Tantachasiñ Utarus jutapkäna ukanakarojj munasiñampiw katoqapjjerïyäta. Jichhajj uk lurañatakejj janiw esposojajj naya chikäjjeti, janirakiw nayas nayrjam chʼamanëjjtti, ukatwa taqenir jan aruntirjamäjjtti. Ukhamäkchisa, Betelansa, tantachäwinsa jilat kullakanakampejj parltʼasipuntwa. Betelan horarioparjam phoqañajj nayatak chʼamakëjjewa, ukampis Betel Utan Diosar serviñajj kusiskañapuniwa. Diosan arunakapsa yatiyaskaktwa. Walja tiempo saytʼatäsajj qarjjaktwa, ukhamäkchisa, jaqenakaru callenakan yatiyasasa, Bibliat yatichasasa, kusisitapuniw jikjjatasta.

Akapachan kunayman jan walinak uñjasajja, munasir chachampi Diosar serviwayasajj kusisitapuniw jikjjatasta. Cheqas Diosan bendicionapaw yanaptʼawayitu (Pro. 10:22).