1, 2. ¿Kunatsa jaqen lejjwipajj wali suma lurtʼatawa sasin sistanjja?

MAYNEJJ mä aru parlañ yatisaw liytʼaspa, qellqaspa, parlaspa, kuntï mayninakajj parlapki uksa amuyarakispa, ukatsti Diosarojj mayisispawa, qʼochunaksa qʼochurakispawa. Taqe ukanak lurañajj wali muspharkañawa, lejjwi (lajjwi) utjatap laykuw ukanakajj lurasispa. Cientificonakajj uka toqenakat janiw sumpach amuytʼapkiti. Lejjwi utjatap laykuw mä aru parlañ yateqsna. Mä arojj kunjamsa parlasiñapa uka toqet yatjjatat mä yatichirejj siwa: “Wawanakajj kunjamsa mä aru parlañ yateqapjje uk amuytʼasajja, jaqe mayak ukham lurtʼatätaswa amuytanjja” sasa.

² Jehová Diosaw jaqenakarojj parliri lurtʼawayistu (Sal. 139:14; Apo. 4:11). Lejjwejj janiw mä aru parlañatakik yanaptʼkistuti, jan ukasti yaqha toqenakatwa yanaptʼarakistu. Animalanakat sipansa jaqe mayakiw Diosar ‘uñtasit’ luratätanjja. Jaqejj amtasarjam sarnaqer luratätanwa. Ukhamajj parlañ yatisajj Jehová Diosar jachʼañchañäniti janicha ukjja sapa mayniw amtjjañasa (Gén. 1:27).

3. ¿Kunsa Jehová Diosajj amuytʼasirïñataki churawayistu?

 ³ Jehová Diosajja, Jupar jachʼañchañ munirinakarojj Biblia churawayi. Bibliajj 2.800 jila arunakanwa phoqatpachasa jan ukajj chikatakisa utji. Diosan Arupat yateqasajja, kunjamtï Diosajj amuyki ukhamarakwa amuytanjja (Sal. 40:5; 92:5; 139:17). Diosan Arupat yateqañajja, amuytʼasirïñataki ukhamarak ‘qhespiñatakiw’ yanaptʼistaspa (2 Timoteo 3:14-17 liytʼañataki).

4. Lupʼiña siski uka arojja ¿kun sañsa muni, ukat kuna jisktʼanakarus aka yatichäwin qhanañchaskañäni?

⁴ Lupʼiña siski uka arojja, taqe amuyumpi mä toqet amuytʼaña sañwa muni. Ukampis mayniw kuna toqetsa lupʼini uk amtjjañapa (Sal. 77:12; Pro. 24:1, 2). ¿Kuna toqenakat lupʼiñas wakisispa? Jehová Diosampita Jesucristompit lupʼiñasäspawa (Juan 17:3). Aka yatichäwinjja, aka jisktʼanakaruw qhanañchaskañäni: ¿Liyiñampi lupʼiñampejj kikpakïpachati? ¿Kuna toqenakatsa lupʼiñasäspa? Lupʼiñajj jan qariñjamäñapatakejj ¿kunsa lurañasa?

5, 6. Liykta uk sum amuytʼañatakisa, jan armañatakisa, ¿kunas yanaptʼiristam?

⁵ Lejjwisajj wali muspharkañawa, awisajj jan chʼamachasisakiw kuns lursna. Amuytʼañataki: samsuñatakisa, sarnaqañatakisa, bicicleta apnaqañatakisa, maquinat qellqañatakisa janiw lupʼiñajj wakiskiti. Liyiñampejj niya ukhamarakïspawa, ukatwa mä qellqat liykasajj kuna toqetsa parlaski uk sum amuytʼañasa. Mä tʼaqa liyiñ tukuyasasa, jan ukajj mä jiskʼa pʼeqeñchäwi janïr liyiñ qalltkasasa, kuna toqettï liytʼawaykta ukwa lupʼiñama, ukhamatwa amuyasktati janicha uk yatïta. Liykasajj inas yaqha toqenakat lupʼiskchisma, ukhamäspa ukhajja, kuntï liykta uk janiw sum amuykasmati, liyitamajj inamayakïspawa. Jan ukhamäñapatakejj ¿kunas yanaptʼiristam?

⁶ Cientificonakajja, yatjjatkasin jiskʼat liyiñajj jan armañatakiw yanaptʼi sasaw sapjje. Lejjwi lurtʼir Jehová Diosajj uk sumwa yati, ukatwa Josué chacharojj Leyi libron qellqatäki uka arunakat ‘lupʼïta’ sasin säna, hebreo arurjamajj ‘jiskʼat liytʼäta’ sänwa (Josué 1:8 liytʼañataki). Jumatï Biblia jiskʼat liyïta ukhajja, janiw kuntï liykäta uk armkätati. Ukhamarus jiskʼat liyiñajj lupʼisin sum amuytʼañatakiw yanaptʼätam.

7. ¿Kunapachas Diosan Arupat lupʼsna? (23 janankir dibujo uñjjattʼam.)

⁷ Kuntï liyktan uka toqet lupʼiñajj chʼamakïspawa. ¿Kunatsa? Pantjasir jaqëtasatjja, lejjwisajj kunatï jan chʼamäki uk lurañakwa munaspa. Ukatwa samartʼkasina, jan khiti pantjasiyiris utjki ukapachanak lupʼiñajj wakisispa. Salmonak qellqeri Davitajj arumanakaw Diosat ikiñan lupʼirïna (Sal. 63:6). Jesusajj janis pantjasirïkchïnjja, kawkhantï jan khitis utjkäna uka cheqanakanwa lupʼirïna, Diosatsa mayisirakirïna (Luc. 6:12).

8. 1) ¿Kuna toqenakatsa lupʼsna? 2) ¿Kunjamsa Jehová Diosajj jupat yaqhanakar parltan ukhajj jikjjatasi?

⁸ Biblia liytʼasin uka toqet lupʼiñajj wali wakiskiriwa, ukampis yaqha toqenakatsa lupʼiraksnawa. Sañäni, Jehová Diosan muspharkañ luratanakapatwa lupʼsna. Ukham lurañajja, Diosar jachʼañchañatakiw yanaptʼistani. Ukatsti ukanak uñjasajj kunjamsa jikjjatastan uksa yaqhanakarojj yatiyarakiñäniwa (Sal. 104:24; Hech. 14:17). Jehová Diosajja, luratanakapat kunsa amuytan uk oracionan Jupar sistan ukjja wali askitwa uñji. Luratanakapat yaqhanakar yatiytan uksa ukhamarakiw  wali askit uñji. Ukatwa Bibliajj qhepa urunakat parlkasajj akham qhanañchi: “Kawkïri jaqenakatï Diosaru ajjsartasa sarnaqapkän ukanakajj jupanakkamaw parlasipjjäna, Diosasti kuntejj parlapkäna ukanakjja sumwa istʼarakïna, Diosan nayraqatapansti mä libroruw qellqasïna kawkïri jaqenakatï Diosaru ajjsarapkäna, ukhamaraki jupatsa jan armasipkarakïna ukanakajja” sasa (Mal. 3.16).

9. 1) ¿Kuna toqet lupʼiñapatakis Pablojj Timoteor chʼamañchtʼäna? 2) Pablon ewjjap istʼasajj ¿kunjamsa yatiyañatakejj wakichtʼassna?

⁹ Pablojj Timoteo waynarojja, kunjamsa parlatapasa, sarnaqatapasa, yatichatapas yaqhanakar yanaptʼani uka toqet ‘amtasiñapataki [jan ukajj “lupʼiñapatakiw”, MT]’ chʼamañchtʼäna (1 Timoteo 4:12-16 liytʼañataki). Jiwasajj Timoteo waynjamarakiw kunanaktï Diosar servisin lurktan ukanakat lupʼsna. Sañäni, mayniru Bibliat yatichir sarañatak wakichtʼaskasajja, lupʼiñaw wakisi. Ukatakejj tiempo apstʼasiñasawa. Bibliat yateqerinakat sapa maynit amuytʼasajja, kuna kasta jisktʼasa, jan ukajj kuna uñachtʼäwis nayrar sartañataki yanaptʼaspa uka toqetwa amuytʼañasa. Ukham lurañajja, iyawsäwisanwa chʼamañchtʼistani, ukatsti kusisita sum yatichañatakiw yanaptʼarakistani. Maysa toqetjja, yatiyir janïr sarkasajja ukhamarakiw lupʼiñasa (Esdras 7:10 liytʼañataki). Hechos librot mä jalja liytʼañajja, yatiyir sarañatakiw chʼamañchtʼistani. Yatiyir mistkañäni ukhajj Bibliankir kawkïr jiskʼa tʼaqanaksa liytʼañäni, jan ukajj kawkïr qellqatanaksa jaytañäni ukanakatwa lupʼiñasa, ukaw kusisit chuymampi yatiyañatak yanaptʼistani (2 Tim. 1:6). Yatiyktan uka cheqanakan jakasirinakarojj kunas llakisiyi, Bibliat yateqañ munapjjañapatakejj kunsa sissna uka  toqenakatwa lupʼiñasaraki. Ukham wakichtʼasiñäni ukhajja, Diosan Arupampejj wali sumwa yatiyañäni (1 Cor. 2:4).

10. ¿Kuna toqenakatsa lupʼiraksna?

¹⁰ ¿Tamansa, jan ukajj jachʼa tantachäwinakansa discursonakajj arstʼaski uk qellqaqtʼasirïtati? Ukhamächi ukhajja, uka qellqatanakamat liytʼasajj kunsa Diosan Arupatsa markapatsa yateqawayta ukanakatwa lupʼisma. Ukatjja, Yatiyañataki ukhamarak ¡Despertad! revistanaka liytʼasasa, jachʼa tantachäwinakan mistki uka qellqatanak liytʼasasa lupʼiñamarakiwa. Anuario libro liytʼkäta ukhajja, mä experiencia liytʼjjasin janïr yaqha experiencia liytʼkasajja, kuntï nayraqat liytʼawaykta ukwa sum amuytʼañama. Ukhamatwa uka experienciajj chuymar purtʼätam. Maysa toqetjja, liytʼkta uka qellqatat kawkïr arunakatï qhanstki uka arunakwa chimptʼasiñama, jan ukajj jana thiyanakaruw (qawayanakaruw) qellqtʼasiñama. Ukham lurañajja, Bibliat yateqañ munirir wasitat kuttʼañataki wakichtʼaskäta, jilat kullakanakar chʼamañchtʼir sarañataki wakichtʼaskäta, jan ukajj mä discurso arstʼañatak wakichtʼaskäta ukhaw yanaptʼiristam. Mä qellqata liytʼasin lupʼiñatak tiempo apstʼasïta ukhajja, yatichäwinakajj chuymaruw purtʼätam, uka yatichäwinakatsa Jehová Diosaruw yuspärarakïta.

11. ¿Kuna toqetsa jila partejj lupʼiñasa, ukat kunatsa? (Qhanañchäwi uñjjattʼam.)

¹¹ Diosan Arupatwa jila partejj lupʼiñasa. Inas mä urojj Biblia apnaqañ jarkʼapjjchistaspa. * Ukhamsa lurapkchispajja, janiw khitis kuntï yateqktan ukanakat lupʼiñjja jarkʼkistaspati. Sañäni, janiw khitis Bibliankir yaqhep tʼaqanak gustkistu uka toqet lupʼiñsa, kawkïr qʼochunakatï gustkistu ukanakat lupʼiñsa jarkʼkistaspati (Hech. 16:25). Kuntï yateqktan ukanak amtañ Diosan qollan ajayupaw yanaptʼistaspa (Juan 14:26).

12. ¿Kunsa Biblia sapür liyiñatakejj lursna?

¹² Diosan Arunakap Yatiyañatak Escuela tantachäwitakejja, sapa semanatakiw Bibliat liytʼañajj utji. Ukwa semanan mä qawqha urunakan liytʼsna ukhamarak liyktan uksa lupʼiraksna. Yaqhürunakasti Jesusan arunakapata luratanakapatwa Mateo, Marcos, Lucas, Juan qellqatanakan liytʼasajj lupʼiraksna. Uka qellqatanakanwa Jesusan sarnaqäwipatsa yatichäwinakapatsa parli (Rom. 10:17; Heb. 12:2; 1 Ped. 2:21). Jesusajj aka Oraqenkkäna ukhajj kunanaksa luräna uk yatiñatakejja, El hombre más grande de todos los tiempos librow utjistu. Uka librojja, wali suma yanaptʼapuniwa, yamas sapa jaljan jikjjataski uka jiskʼa tʼaqanak liytʼsna, lupʼiraksna ukhajj jukʼampiw yanaptʼistaspa (Juan 14:6).

13, 14. ¿Kunatsa Jehová Diosan luratanakapata ukhamarak Arupat lupʼiñasa, ukat ukajj kunatakis yanaptʼistaspa?

¹³ Jehová Diosan luratanakapata ukhamarak Arupat lupʼiñajja, cristianjam jiltañatakiw yanaptʼistani (Heb. 5:14; 6:1). Maynitï Diosan luratanakapata, Arupata lupʼiñatak jan tiempo apstʼaskaspa ukhajja, iyawsäwipan aynachtʼaspawa, Diosan markapatsa cheqa yatichäwinakatsa jitheqtjjarakispawa (Heb. 2:1; 3:12). Khitinakatï Diosan Arup jan ‘taqe chuymampi istʼapki, ukhamarak jan katoqapki’ ukanakajj janiw cheqa yatichäwinak katjjasipkaspati, jan ukasti ‘kunayman llakisiñanakampi, qamir kankañampi,  akapach kusistʼañanakampiw’ apayasipjjaspa sasaw Jesusajj säna (Luc. 8:14, 15).

¹⁴ Ukhamajj Diosan Arupat lupʼisipkakiñäni. Ukaw Jehová Diosat yateqasiñatakisa Jupjam chuymanïñatakis yanaptʼistani (2 Cor. 3:18). Jehová Diosar uñtʼañasa, Jupat yateqasiñasa janiw tukuskaniti, wiñayatakïniwa. ¡Ukajj mä suma bendicionapuniwa! (Ecl. 3:11.)

15, 16. 1) Jehová Diosan luratanakapata ukhamarak Arupata lupʼiñajja, ¿kunjamsa yanaptʼistu? 2) ¿Kunatsa awisajj lupʼiñajj chʼamakïspa, ukat kunatsa lupʼiñatakejj chʼamachasiñasa?

¹⁵ Jehová Diosan luratanakapata ukhamarak Arupata lupʼiñajja, Diosar taqe chuyma serviskakiñatakiw yanaptʼistani. Jilat kullakanakasa, yatiyktan uka jaqenakasa jiwasaru Diosar taqe chuyma servir uñjasajj ukhamarakiw Diosar serviñ munapjjani. Maysa toqetjja, Jesusan jiwas layku jiwatapat lupʼiñajja Jehová Diosampi sum apasiñajj qawqha wakiskirisa uk amuyañatakiw yanaptʼistani (Rom. 3:24; Sant. 4:8). Sudáfrica toqen jakasir Mark jilatat parltʼañäni, jupajja, akapachar jan mitisitap laykojj kimsa maraw carcelan llawintat uñjasïna. Jupasti siwa: “Lupʼiñajja, yaqha cheqar viajiñampi sasiwa. Jehová Diosan luratanakapata ukhamarak Arupata lupʼisajja, jukʼampiw Diosar uñtʼtanjja. Jutïr urunakat llakisisin aynachtʼata jikjjatasta ukhajj Biblwa liytʼta, ukatsti uka toqetwa lupʼirakta. Ukham lurañajj sum jikjjatasiñatakiw yanaptʼitu” sasa.

¹⁶ Jichhürunakanjja, tiempo apaqanakajj waljaw utji. Ukatwa awisajj Jehová Diosan luratanakapata, Arupata lupʼiñatak tiempojj jan utjkaspati. África toqen jakasir Patrick sat mä jilatajj akham siwa: “Pʼeqejanjja suma amuyunaka ukhamarak jan wali amuyunakaw utji. Ukatwa kunatï sumäki uk lupʼiñatak sapür chʼamachasiñajajj wakisi. Kuna amuyunakas pʼeqejan utjaski ukanak uñakipasta ukhajja, awisajj kunayman llakinak utjatapwa amuyta. Ukatwa Jehová Diosar uka toqet mayista, ukaw kunatï sumäki uk amuyañatakejj yanaptʼitu, cheqas uk lurañatakejj tiempow munasi. Ukampis uk lurasajj Jehová Diosaruw jakʼachasta ukatsti cheqa yatichäwinaksa sum amuytʼarakta” sasa (Sal. 94:19). Diosan Arupat sapüru yatjjatasin lupʼirinakajja, walja bendicionanakwa katoqapjjani (Hech. 17:11).

17. ¿Kunapachas lupʼiñatakejj tiempo apstʼassna?

¹⁷ Yaqhep jilat kullakanakajj wali alwaw Biblia liyiñatakisa, lupʼiñatakisa jan ukajj Diosat mayisiñatakis sartasipjje. Yaqhepasti, chika uru manqʼasiñatak samartʼasaw ukanak lurapjjaraki. Jiwasajj arumthapirusa, janïr ikintkasasa tiempo apstʼasiraksnawa. Yaqhep jilat kullakanakajja, alwaw Biblia liytʼapjje, ukatjja mayampiw janïr ikintkasajj liytʼapjjaraki, ukhamatwa Diosan Arup ‘uruy arumajj’ liytʼapjje (Jos. 1:8). Diosan Arup sapüru liyiñatakisa, lupʼiñatakisa yaqha lurañanakat tiempo apstʼasiñajj wali wakiskiriwa (Efe. 5:15, 16).

18. Diosan Arupat lupʼisin ukarjam sarnaqañatak chʼamachasirinakarojja, ¿kunsa Jehová Diosajj churani?

¹⁸ Jehová Diosajja, khitinakatï Arupat lupʼipki, ukarjam sarnaqañatakis chʼamachasipjjaraki ukanakarojj bendiciniwa (Salmo 1:1-3 liytʼañataki). Jesusajj sänwa: “¡Jukʼamp kusisiñanïpjjewa khitinakatejj Diosan arunakap istʼapki, ukhamarak jaysapjje ukanakajja!” sasa (Luc. 11:28). Jehová Diosan luratanakapata ukhamarak Arupat sapüru lupʼiñajja, lejjwisa lurir Jehová Diosar jachʼañchañatakiw yanaptʼistani. Jupasti jichhürunakan kusisita jakasiñatakiw yanaptʼistani, jutïrinsa wiñay jakañwa churarakistani (Sant. 1:25; Apo. 1:3).