1, 2. ¿Kunatsa Jesusajj Martaruw munasïna sasin Bibliajj qhanañchi, ukat kunatsa Martajj pantjasirïnwa sasin sissna?

¿KUNSA Lazaron Marta kullakapat amtta? Jesusajj munasiñampiw Martar uñjäna sasin jupatakwa Bibliajj sutipat ayti. Ukampis janiw jupa saparukejj munaskänti, jan ukasti Diosar taqe chuyma serviri mayni warminakarojj munasirakïnwa respetompiw uñjarakïna. Amuytʼañataki, Jesusajj María taykaparusa, Martan kullakaparus wal munasïna (Juan 11:5; 19:25-27). Jesusajj munasiñampiw Martar uñjäna sasin ¿kunatsa Bibliajj sispacha?

² Martajj wali suma irnaqtʼiri, suma katoqtʼasiri ukhamänwa. Ukampis Jesusajj janiw ukhamätap laykukejj Martar munaskänti, jan ukasti Diosar taqe chuyma iyawsatapatwa munasïna. Martajja, Jesusan yatichäwinakaparojj taqe chuymaw iyawsäna. Jesusan Mesiasätapatsa janiw pächaskänti (Juan 11:21-27). Ukampis Martajj jiwasjam pantjasirirakïnwa. Mä kutejja, Jesusaruw utapar jawsäna, ukansti María kullakapan jan yanaptʼatäsinjja, Jesusarojj akham sänwa: “Tata, ¿walikiti jumatakejj kullakajjan nayaru sapak taqe lurañamp aptʼatapajja? ‘Yanaptʼitpan’ sarapitaya”  sasa (Lucas 10:38-42 liytʼañataki). ¿Kunatsa Martajj ukham sispachäna? ¿Kuntï Jesusajj Martar siskäna ukat kunsa yateqsna?

3, 4. ¿Kunjamsa “Mariajj sumïrïkis” uk ajllïna, ukat kunsa Martajj yateqäna? (18 janankir dibujo uñjjattʼam.)

³ Mariana Martana utapar jawstʼatäsinjja, Jesusajj Diosatwa jupanakar yatichañ munäna. Mariasti Jesusan yatichäwinakap istʼañatakejja, ‘kayupawjaruw qontʼasïna kuntï siskani uk istʼañataki’. Martajj María kullakapjamarakiw luräwinakap apanukusin qontʼasisapäna. Ukham luratapjja Jesusajj wali askitwa uñjasapäna.

⁴ Ukampis Martajja, Jesusan sum jikjjatasiñapatakejj suma manqʼa phayañaru, yaqhanak lurañaruw chuym uchäna. María kullakapampi jan yanaptʼatäsajj kullakapatak wal coleräna. Walja lurañanakaru chuym uchatap amuyasajja, Jesusajj Martar akham sänwa: “Marta, Marta, walja lurañanakamp mayjtʼatäsktawa. Ukampis mayaw wakisejja. Mariajj sumïrïkis ukwa ajllisi, janirakiw ukjj khitis apaqkaniti” sasa. Mariajja, kuntï uka urojj manqʼkäna ukjja inas mä qawqha urunakat armasjjchïna. Ukampis kuntï uka urojj Jesusat yateqkäna ukjja, janipuniw armkpachänti. Sojjta tunka jila maranak qhepatjja, apóstol Juanajj sänwa: ‘Jesusajj Martarusa kullakaparusa wal munasïna’ sasa (Juan 11:5). ¿Kunsa uka arunakat amuytanjja? Martajj Jesusan cheqañchäwip taqe chuyma katoqasitapa, Jehová Diosar taqe chuyma serviñatakis wal chʼamachasitapwa amuytanjja.

5. 1) ¿Kunatsa Diosar serviñajj jichhürunakan chʼamakejja? 2) ¿Kuna jisktʼarus aka yatichäwin qhanañchañäni?

⁵ Kunjamtï uñjtanjja, Bibliajj qellqaskäna uka tiemponakan kunayman tiempo apaqanakaw utjäna, ukampis jichhürunakan jukʼampiw ukham tiempo apaqanakajj utji. Sojjta tunka jila maranak nayrajja, akham sasaw Estados Unidos markankir mä qawqha yateqer wayn tawaqonakar sasïna: “Kunanaktï jichhürunakan uñjktan ukanakajj janipuniw nayrajj uñjaskänti. Sañäni: suma imprentanaka, suma colorani lurat qellqatanaka ukatjja radio, cine, televisión [...]. Sapüruw yaqha ukhamanakajj uñstayasi [...]. Pasïr maranakanjja, ‘jukʼamp yatjjatañanakaw’ utjani sasaw jaqenakajj amuyapjjäna. Ukampis jichhajj ‘tiempo apaqanakakiw’ jukʼamp utj-jje” sasa. “Tiempo apaqanakata” parlkasinjja, La Atalaya septiembre 15, 1958 revistajj akham sänwa: “Akapachan tukusiñapajj jukʼamp jakʼachasisinkipanjja, jukʼamp tiempo apaqanakaw utjani” sasa. ¡Ukarjamaw jichhürunakan phoqasiski! Cheqas tiempo apaqanakajj jichhürunakan waljaw utji. “¿Kunas Mariat yateqasisin Diosar taqe chuyma serviñatak yanaptʼistaspa?”

6. Kuna aparatonaktï akapachajj uñstayki ukanakampejja, ¿kunjamsa Jehová Diosan markapajj yanaptʼasi?

⁶ Cheqa yatichäwinaka jukʼamp yatiyañatakejja, Jehová Diosan aka Oraqenkir markapajj kuna aparatonaktï akapachajj uñstayki ukanakampiw yanaptʼasi. Ukanakat mayajj “Foto Drama de la Creación” ukawa. Ukasti jiskʼa peliculanakampi, color fotonakampi, musicanakampi, arstʼäwinakampi mayachtʼat videönwa. Uka video tukuyanjja, kunapachatï Cristojj Waranq Maranak apnaqkani ukhajj kunja sumänisa jakasiñajj ukaw uñachtʼayasïna. Ukampiw Nayrïri Jachʼa Chʼajjwäwi janïr qalltkäna ukhasa, jachʼa chʼajjwäwi tiemponsa walja jaqenakar chuymachtʼasïna. Uka qhepatjja, radio toqerakiw walja jaqenakar cheqa yatichäwinakajj yatiyasïna. Jichhürunakanjja, computadorasa Internetasa ukhamarakiw Diosan arunakap yatiyañatakejj yanaptʼistu, ukanak toqew islanakan jakasir jaqenakasa,  jaya cheqanakan jakasirinakas Diosan arunakap yateqapjje.

7. 1) Akapachan kunanakatï utjki ukanakaruk chuyma sinti uchañajja, ¿kunatsa jiwasatak jan walïspa? 2) ¿Kun lurañas jakäwisan nayrankañapa? (Qhanañchäwip uñjjattʼam.)

⁷ Akapachan kunanakatï utjki ukanakar jan chuyma sinti uchañatakiw Bibliajj ewjjtʼistu (1 Corintios 7:29-31 liytʼañataki). Cheqas janiw taqpachapunejj jan walïkiti, ukampis ukanakajj tiempwa apaqestaspa. Ukanakat yaqhepajj akanakäspawa: kunatï maynirojj gustki ukanak luraña, libronak liyiña, televisión uñchʼukiña, yaqha cheqanakar viajiña, alasir saraña, jichhak uñstki uka aparatonak thaqhaña, jan ukajj suma cosasanak thaqhaña. Ukatsti celular toqe mensajenak qellqasa, computadora toqe correonak aptʼayasa, sapa kuti yatiyäwinak thaqhasa, jan ukajj pelota anatañan kawkïr equipos atipaski uka yatiyäwinak thaqhasaw tiempo aptʼassna, ukatsti ukanak lurañaruw yatintjjaraksna (Ecl. 3:1, 6). * Ukanak lurañaruk tiempo aptʼassna ukhajja, Diosar serviñajj janiw nayrankjjaspati (Efesios 5:15-17 liytʼañataki).

8. Akapachan yänakap jan munañatak Bibliajj ewjjtʼkistu ukar istʼañajja, ¿kunatsa wali askejja?

⁸ Kunanakatï akapachan utjki ukanakampi tiempo aptʼasisin Jehová Diosar jan serviñaswa Supayajj muni. Nayrïr cristianonakarojj kunayman toqetwa Diosat jitheqtayañ munäna, jichhürunakanjja ukhamarakwa Diosat jitheqtayañ munistu (2 Tim. 4:10). Ukatwa Diosan Arupajj akham ewjjtʼistu: “Jan akapachar munirïpjjamti, janirak akapachan yänakapsa” sasa. Jiwasatï uka ewjjtʼarjam sarnaqañäni ukhajja, Diosarojj taqe chuymaw serviñäni, jukʼampiw munasirakiñäni. Ukatsti Diosan munañap phoqañas janiw jiwasatak chʼamäkaniti, Jupan bendicionapsa katoqarakiñäniwa (1 Juan 2:15-17).

9. 1) ¿Kunas Jesusan arkirinakapatakejj nayrankañapäna? 2) ¿Kunjamsa Jesusajj Diosan Reinop nayrar uchatap uñachtʼayäna?

⁹ Jesusajja, yaqha lurañanakamp jan tiempo aptʼasiñapatakiw Martarojj munasiñampi ewjjtʼäna. Arkirinakaparusa Diosan Reinop nayrar uchasipkakiñapatakejja, kunanakatï akapachan utjki ukanakamp tiempo jan aptʼasipjjañapatakiw ewjjtʼäna (Mateo 6:22, 33  liytʼañataki). Jesusajj janiw utjirinïkänti, janirakiw utapasa oraqepas utjkänti (Luc. 9:58; 19:33-35).

10. ¿Kunatsa Jesusajj jiwasatak yateqaskayajja?

¹⁰ Jesusajj Diosan arunakap taqe chuymaw yatiyäna, janiw kunarus tiempo inamay aptʼaskänti. Mä kutejja, Capernaúm markanwa Diosan arunakap yatiyaskäna milagronaksa lurarakïna. Ukanjja, jaqenakajj uka markar qheparañapatakiw wal ruwtʼapjjäna. Ukhamsa ruwtʼapkchïnjja, Jesusajj jupanakar sänwa: “Wakisirakiw nayanjja Diosan reinopat yaqha markanakaru yatiyir sarañajjajja, ukataki khitanitarakïtwa” sasa (Luc. 4:42-44). Uka arunakarjamaw Jesusajj sarnaqäna, jupajj taqe jaqenakar yatiyañatakiw chʼamachasïna ukatakejj wali jaya cheqanakaruw saräna. Jan pantjasir jaqëkchïnsa, awisajj Diosan arunakap jan inaktʼas yatiyasajj qaritaw jikjjatasïna, ukatwa samartʼañsa munarakïna (Luc. 8:23; Juan 4:6).

11. ¿Kamsänsa Jesusajj jilapampi jan waltʼayasir jaqerojja, ukat kamsasas istʼirinakapar ewjjtʼäna?

¹¹ Mä urojja, jan waltʼäwinakar kunjamsa saykatapjjaspa uka toqetwa Jesusajj arkirinakapar yatichaskäna. Ukhamaruw mä jaqejj Jesusar jakʼachasisin akham säna: “Yatichiri, kunatejj herenciat nayarojj waktʼkitu uk churjjetpan sarapit jilajjaru” sasa. Jesusasti jupar sänwa: “Jaqe, ¿khitis jumanakjjaru juesata, jan ukajj jaljiritsa uchasitojja?” sasa. Uk sasinsti, Jesusajj akham sasaw istʼirinakapar ewjjtʼäna: “Amuyasipjjam jumanakatakik taqe kuns munañjjata; jaqen jakañapasti janiw kunatejj utjarapki uka walja yänakapankkiti” sasa (Luc. 12:13-15).

12, 13. 1) Jesusan jiwañap jakʼäjjäna ukhajja, ¿kunas judionakan religionapar mantir griego jaqenakar muspharayäna? 2) ¿Kunsa Jesusajj luräna?

¹² Jiwañapäkäna uka semanajja, Jesusajj wali llakitaw jikjjatasïna (Mat. 26:38; Juan 12:27). Wali khuyaña tʼaqhesiyatäsin jiwayataw uñjasiñapäna, uk jupajj yatisïnwa. Ukampis walja lurañanakapaw utjaskäna. Amuytʼañataki, 33 maran nisán phajjsit llätunka uru saraqatarojja, mä asnor qonjjatataw Jerusalén markar mantäna. Ukanjja, walja jaqenakaw akham sasin katoqapjjäna: “¡Bendecitäpan Tatitun sutipar jutir Reyejja!” sasa (Luc. 19:38). Qhepürojja, temploruw mantarakïna, ukanjja jaqenakar engañjas aljirinakarojj jan ajjsartʼasaw templot alissüna (Luc. 19:45, 46).

¹³ Jerusalenan tantachtʼatäpkän uka jaqenak taypinjja, judionakan religionapar mantir griego jaqenakaw utjarakïna. Kuntï Jesusajj templon lurkäna uk uñjasajja, jupanakajj wal muspharapjjäna. Ukatwa Feliper akham sapjjäna: “Tata, Jesusaruw uñjañ munapjjta” sasa. Ukampis Jesusajj janiw uka arunakar istʼkänti, janiw jupar arjjatirinak thaqhañ munkänti. Jan ukasti Diosan munañap lurañaw jupatakejj jukʼamp wakiskirïna, mä arunjja, jiwasanak laykuw jiwañapäna. Jiwañap jakʼäjjatap yatiyasinjja, Andresampir Felipempirojj akham sänwa: “Khititejj jakañaparu munchi ukajja aptʼasiniwa, ukampis khititejj aka oraqen jakaña uñiskchi ukajja, wiñay jakañanïniwa” sasa. Uka griego jaqenakan munañap lurañat sipansa, jupat yateqasisin taqe chuyma arkapjjañapatakiw Jesusajj arkirinakapar ewjjtʼäna. Ukatsti akham sarakïnwa: “Khititejj sirvkitani ukarojj Awkejjajj jachʼañchaniwa” sasa. Felipejj taqe uka arunakwa uka griego jaqenakarojj yatiypachäna (Juan 12:20-26).

14. Jesusatakejj Diosan arunakap yatiyañas nayrankchïnjja, ¿kunanakatakis tiempo apstʼasirakïna?

¹⁴ Jesusatakejj Diosan arunakap yatiyañas nayrankchïnjja, awisajj yaqhanak lurañatakejj tiempo apstʼasirakïnwa. Sañäni: mä casarasïwiruw mä kutejj invittʼapjjäna, ukarusti jupajj saränwa, ukan mä milagro lurasaw umjja vinor tukuyäna (Juan 2:2, 6-10). Diosan  arunakap istʼañ munirinakasa, amigonakapasa utapar manqtʼasiñatakiw invittʼapjjäna, ukarus sararakirïnwa (Luc. 5:29; Juan 12:2). Ukampis taqe ukanakat sipansa, Jesusajj oración lurañatakisa, lupʼiñatakisa samartʼañatakisa, tiempo apstʼasipunirïnwa (Mat. 14:23; Mar. 1:35; 6:31, 32).

15. ¿Kunsa Pablojj ewjjtʼäna, ukat kunjamsa ukarjam sarnaqäna?

¹⁵ Cristianonakajj mä tʼijüwinksnas ukhamwa Pablojj amuytʼayäna, ukatwa akham säna: “Kunatejj jarkʼkistu ukjja maysaru apanukuñäni” sasa (Hebreos 12:1 liytʼañataki). Pablojj kuntï siskäna ukarjamaw sarnaqäna. Jupajj judionakan religionapanjj wali qamiri, uñtʼata ukhamäsapänwa. Ukampis taqe ukanak jaytasajj kunatï ‘askïki’ ukwa luräna. Taqe chuymaw Diosar servïna, Diosan arunakap yatiyañatakejja Siria, Asia Menor, Macedonia, Judea markanakaruw saräna. Jupajj alajjpachan wiñay jakañ katoqañwa suyäna, ukatwa akham säna: “Kunatejj qhepankki ukjja, armanuktwa, nayrankkis uk jikjjatañkamaw chʼamañchasiskta, kawkharutejj puriñasäki, ukar puriñataki” sasa (Fili. 1:10; 3:8, 13, 14). Pablojj solterösinjja taqe chuymaw Diosar servïna (1 Cor. 7:32-35).

16, 17. Casadöskstansa solteröskstansa, ¿kunjamsa Pablot yateqasisajj Diosar sirvsna? Uk mä experienciamp qhanañchtʼam.

¹⁶ Diosar jukʼamp serviñatakejja, yaqhep jilat kullakanakajj Pablot yateqasisaw sapakïskañ amtapjje (Mat. 19:11, 12). Casado jilat kullakanakajja, familiapar kunayman toqetwa yanaptʼapjjañapa. Ukampis casadöskstansa, solteröskstansa taqeniw “kunatejj jarkʼkistu ukjja maysaru apanu[ksna]”, ukhamat Diosar taqe chuyma serviñasataki. Kunanakatï tiempo sint apaqkistu ukanakat amuyasiñasawa, ukhamat Diosar jukʼamp serviñatakejj tiempo utjañapataki.

¹⁷ Gales markan jakasiri Mark jilatampita Claire esposapampit parltʼañäni. Jupanakajj colegio tukuyasaw precursorat serviñ qalltapjjäna, casarasjjapjjäna ukhasa precursorat servisipkakïnwa. Mark jilatajj siwa: “Diosar yupaychañ utanak yaqha markanakan lurasiñapataki yanaptʼir sarañatakejja, kimsa cuartoni utajsa, chika urukam irnaqapkayäta uka trabajsa jaytapjjayätwa” sasa. Aka qhepa 20 maranakanjja, jupanakajj África toqenkir markanakanwa Tantachasiñ Utanak lurasiñapatak yanaptʼawayapjje. Mä kutejja 15 dólar qollqenikiw jikjjatasipjjäna, ukampis Jehová Diosaw jupanakarojj sum uñjaskäna. Claire kullakajj siwa: “Jehová Diosar sapüru serviñajj wali kusiskañawa. Walja cheqanakan trabajisajja, waljaniruw uñtʼawayapjjta, ukatjja janipuniw kunas faltapkitänti. Janis walja utjirinïpkstjja, Jehová Diosar sapürunjam serviñajj wali kusiskañapuniwa, janipuniw yaqha ukhamajj utjkaspati” sasa. Uka jilat kullakjamajja, waljaniw Jehová Diosar servisajj kusisit jikjjatasipjjaraki. *

18. ¿Kunsa taqenis jisktʼasiñasa?

¹⁸ Taqenis akhamwa jisktʼasiñasa: “Jehová Diosar jan taqe chuyma servitaj amuyasisajja, ¿kunsa lurirista? ¿Kunanakatï akapachan utjki ukanakampi tiempo apaqayasisat Diosar jan taqe chuym yupaychtjja? Ukhamächi ukhajja, ¿jakäwijan kunanak mayjtʼayañas wakisispa?” sasa. Inas Biblia liyiñatakisa, yatjjatañatakisa jukʼamp chʼamachasiñajj wakischispa. Kunjamsa uk lursna uka toqetwa jutïr yatichäwin yatjjataskañäni.