“Jukʼampi iyawsañ yaptʼapjjeta”
“Yanaptʼitay jukʼamp iyawsañajjataki.” (MAR. 9:24)
81, 135 QʼOCHUNAKA
1. ¿Kunatsa Diosar iyawsañajj wali wakiskirejja? (Aka janankir foto uñjjattʼam.)
“¿JACHʼA tʼaqhesïwi urun Jehová Diosajj nayar qhespiypachïtaniti?” sasin inas jisktʼasirïsta. Hebreos 11:6 qellqatajj akham siwa: “Janiw Diosarojj jan iyawsañampejj kunapachas kusisiyksnati” sasa. Ukhamajja jachʼa tʼaqhesïwit qhespiñatakejj Diosaruw iyawsañasa. Inas maynejj akham sas amuychispa: “Khitis Diosar iyawsakispawa” sasa. Ukampis 2 Tesalonicenses 3:2 qellqatajj akham siwa: ‘Janiw taqenis iyawsañanïkaspati’ sasa. ¿Kunsa uka pä qellqatanakajj uñachtʼayistu? Diosar taqe chuyma iyawsañatak chʼamachasiñajj wali wakiskiriwa ukwa uñachtʼayistu.
2, 3. 1) ¿Kunatsa Diosar taqe chuyma iyawsañajj wali wakiskirejja? 2) ¿Kuna jisktʼanakarus aka yatichäwin qhanañchasiskani?
2 Apóstol Pedrojj akham sänwa: “Iyawsañanakamasti mä qorir uñtataw ninampi yantʼatäñaparaki [...]. Ukhamatpï jumanakan iyawsañanakamajja, yantʼatäsinjja sumat uñtʼatänejja, jachʼaru aptatarakïniwa kunapachatejj Tatit Jesucristojj jutkani ukapachajja” sasa (1 Pedro 1:7 liytʼañataki). Jachʼa tʼaqhesïwi urojj wali jakʼankiwa, jiwasatï ukat qhespiñ munstan ukhajja Diosarojj taqe chuymaw iyawsañasa (Heb. 10:39). Ukhamasti Diosar taqe chuyma iyawsañatak urut urutjam jukʼamp chʼamachasipjjañäni. Ukhamatwa Jesusajj aka ñanqha pachar tʼunjir jutkani ukhajj qhespiyistani. Kunjamtï mä chachajj Jesusar siskäna ukhamarakwa jiwasajj saraksna: “¡Yanaptʼitay jukʼamp iyawsañajjataki!” sasa (Mar. 9:24). Ukatsti kunjamtï apostolonakajj Jesusar sapkäna ukhamsa saraksnawa: “Jukʼampi iyawsañ yaptʼapjjeta” sasa (Luc. 17:5).
3 Aka yatichäwinjja, aka kimsa jisktʼanakaruw qhanañchasiskani. ¿Kunsa jukʼamp iyawsäwinïñatakejj lurañasa? ¿Kunjamatsa Diosar taqe chuyma iyawsatas uñachtʼaysna? Jukʼamp iyawsäwinïñatak Diosar mayiñäni ukhajja, ¿kunatsa istʼitaniwa sasin confiyañasa?
DIOSAJJ JUKʼAMP IYAWSÄWINÏÑASWA MUNI
4. Diosar jukʼamp iyawsañatakejja, ¿khitinakan sarnaqäwipat yatjjatañas yanaptʼistaspa?
4 Jehová Diosajja, jukʼampi iyawsäwinïsna ukwa muni. Ukatwa Jupar taqe chuyma iyawsiri servirinakapan sarnaqäwinakap Biblian qellqayawayi (Rom. 15:4). Uka servirinakat yaqhepajj akanakawa: Abraham, Sara, Isaac, Jacob, Moisés, Rahab, Gedeón, Barac (Heb. 11:32-35). Jichha tiempon Diosar taqe chuyma iyawsiri cristianonakan sarnaqäwipat yatjjatañasa, jukʼamp iyawsäwinïñatakiw yanaptʼarakistaspa. *
5. ¿Kunjamsa Eliasajj Diosar taqe chuyma iyawsatap uñachtʼayäna, ukat kunsa jisktʼasiñasa?
5 Elías profetajj taqe chuymaw Diosar iyawsäna. Kunjamsa Diosar taqe chuyma iyawsatap uñachtʼayäna uk jichhajj phesqa toqet uñjañäni. Maya, Diosan arunakapat jan pächasisaw Acab reyir akham säna: “Juramentompiw arsta Israelan Tatit Diosap layku, khitirutejj yupaychkta, aka maranakanjja janiw jallojj purkaniti, ni sullasa kunapachatï nayajj siskä ukkhakama” sasa (1 Rey. 17:1). Paya, ‘Diosajj machʼa tiempon janiw nayarusa ni yaqha jaqenakarus kunatï wakiski uk faltayapkitaniti’ sasaw jan pächasis säna (1 Rey. 17:4, 5, 13, 14). Kimsa, kunapachatï mä viuda warmin wawapajj jiwäna ukhajja, Diosaw jaktayani sasaw iyawsäna (1 Rey. 17:21). Pusi, Carmelo sat qollun sacrificio loqtkäna ukhajja, sacrificio nakhantayañatakejj Diosaw nina apayanini sasaw taqe chuyma iyawsäna (1 Rey. 18:24, 37). Phesqa, janïr machʼa tiempo tukuykipanjja, Diosajj wasitatwa jallu purjjatayanini sasaw iyawsarakïna, ukatwa Acab reyir akham säna: “Sarjjam manqʼeri, umiri, jallun jutatapajja istʼasjjewa” sasa (1 Rey. 18:41). Eliasan sarnaqäwipat yatjjatasajj akham jisktʼasipjjañäni: “¿Eliasjamat Diosar taqe chuyma iyawsta?” sasa.
¿KUNSA DIOSAR TAQE CHUYMA IYAWSAÑATAKEJJ LURAÑASA?
6. ¿Kunsa taqe chuyma iyawsañatakejj Diosar mayiñasa?
6 Diosar taqe chuyma iyawsañ munstan ukhajja, qollan ajaywa Diosar mayiñasa. ¿Kunatsa? Iyawsäwejj qollan ajayun luräwipat maynïriwa (Gál. 5:22). Jesusajja Diosar qollan ajayu mayiñwa arkirinakapar yatichäna. Ukatsti sarakïnwa: ‘Alajjpachankir Awkimajj qollan ajayjja churaniwa mayipki ukanakarojja’ sasa (Luc. 11:13).
7. ¿Kunsa iyawsäwin jan aynachtʼañatakejj lurañasa? Uk mä uñachtʼäwimpi qhanañchtʼam.
7 Jiwasatï Diosar taqe chuyma iyawsjjstan ukhajja, iyawsäwin jan aynachtʼañatakejj chʼamachasiskakiñasawa. ¿Kunatsa? Iyawsäwejja, qherin ninajj nakki ukamp sasiwa. Qalltanjja, ninajj wali sumaw aqaspa, ukampis janitï phurusa ni lawasa apkataskaspa ukhajja, ninajj jiwaraspawa. Iyawsäwisampejj ukhamarakiw pasaspa. Ukhamajj iyawsäwisan jan aynachtʼañap munstan ukhajja, sapüruw Biblia liyiñasa, yatjjatañasaraki. Ukaw Jehová Diosar munasiñatakisa, Bibliaru wali askit uñjañatakis yanaptʼistani, ukatsti iyawsäwisas janiw aynachtʼkaniti.
8. ¿Kunas Diosar taqe chuyma iyawsañatakejj yanaptʼistaspa?
Heb. 6:1, 2). Sañäni, kunjamsa Bibliankir yaqhep profecianakajj phoqasiski uka toqetwa yatjjatañasa. Ukhamarusa Bibliat yatjjatkasajja, sarnaqatasan Diosar taqe chuyma iyawsatasajj qhanat amuyasi janicha ukwa amuyañasaraki (Santiago 1:25; 2:24, 26 liytʼañataki).
8 Diosar taqe chuyma iyawsaskakiñatakejja, kuntï janïr bautisaskasajj Bibliat yateqawayktan ukampejj walikïksnas ukham janiw amuyañasäkiti, jan ukasti Bibliat jukʼamp yatjjataskakiñasawa (9, 10. 1) ¿Kunjamsa jilat kullakanakajj Diosar taqe chuyma iyawsañatak yanaptʼistu? 2) ¿Kunjamsa tantachäwinakajj Diosar taqe chuyma iyawsañatak yanaptʼistu? 3) ¿Kunjamsa yatiyir sarañajj Diosar taqe chuyma iyawsañatak yanaptʼistu?
9 Apóstol Pablojj cristianonakar akham sänwa: ‘Maynit mayniru iyawsañanakaman chʼamañchtʼasipjjam’ sasa (Rom. 1:12). Kunapachatï tamankir jilat kullakanakampi chikachastan ukhajja, iyawsäwisajj jukʼampiw chʼamañchtʼasi, yamas khitinakatï jan waltʼäwinakan aguantawayapki ukanakampi chikachastan ukhajja, jukʼampiw iyawsäwisajj chʼamañchasi (Sant. 1:3). Jan wali amigonakajj iyawsäwisan aynachtʼayistaspawa, ukampis suma amigonakajj Diosar taqe chuyma iyawsañatakiw yanaptʼistaspa (1 Cor. 15:33). Ukatwa Bibliajj tantachäwinakar jan qheparas sarañataki chʼamañchistu, ukhamat maynit maynikam chʼamañchtʼasiñataki (Hebreos 10:24, 25 liytʼañataki). Maysa toqetjja tantachäwinakan yateqktan ukajj Diosar taqe chuyma confiyañatakiw yanaptʼarakistu. Romanos 10:17 qellqatajj siwa: “Iyawsañajja istʼapjjatap laykuw utji” sasa. Ukatwa akham jisktʼasiñasa: “¿Jan qheparasat tantachäwinakar sartjja?” sasa.
10 ¿Kunas Diosar jukʼamp iyawsañatakejj yanaptʼarakistaspa? Jaqenakaru Bibliat yatiyir sarañaw yanaptʼistaspa. ¿Kunatsa ukham sistanjja? Diosan arunakap yatiyasajja, nayrïr cristianonakjam jan ajjsaras yatiyaña ukhamarak Diosar confiyañwa yateqtanjja (Hech. 4:17-20; 13:46).
11. 1) ¿Kunatsa Josué, Caleb chachanakajj Diosar taqe chuyma iyawsapjjäna? 2) ¿Kunjamsa Josué, Caleb chachanakat yateqassna?
11 Kunapachatï Jehová Diosajj oracionanakas istʼistu, yanaptʼarakistu ukhajja, jukʼampiw Jupar iyawstanjja. Ukaw Josué, Caleb chachanakampejj pasäna. Kunapachatï Suma Oraqe uñaqer sarapkäna ukhajja, Diosar taqe chuyma iyawsapjjatapwa uñachtʼayapjjäna. Diosan yanaptʼap uñjasajja, marat maratjamaw Diosar jukʼamp confiyapjjäna. Ukatwa Josué chachajj israelitanakar akham sispachäna: “Diosasti taqe suma arunakapwa jumanakampi phoqhe” sasa. Ukatsti sarakïnwa: “Ukampisa nayampi taqe familiajjampejja Diosaruw servipjjä” sasa (Jos. 23:14; 24:14, 15). Jiwasatï Jehová Diosar confiyarakiñäni ukhajja, yanaptʼap uñjasajj jukʼampiw Jupar iyawsañäni (Sal. 34:8).
¿KUNJAMSA DIOSAR TAQE CHUYMA IYAWSATAS UÑACHTʼAYSNA?
12. ¿Kunjamsa Diosar taqe chuyma iyawsatas uñachtʼaysna?
12 Discípulo Santiagojj akham sänwa: “Nayasti uñachtʼayarakïmawa iyawsañajj-jja suma luratanakajj toqe” sasa (Sant. 2:18). Uka arunakampejja, luratanakasampiw Diosar taqe chuyma iyawsatas uñachtʼaysna sañwa munaskäna. Kunanak lurasas Diosar taqe chuyma iyawsatas uñachtʼaysna uk jichhajj mä qawqha yatjjatañäni.
Diosan arunakap yatiyañatak wal chʼamachasisajja, Jehová Diosar taqe chuyma iyawsataswa uñachtʼaytanjja (13 tʼaqa uñjjattʼäta)
13. ¿Kunjamsa yatiyir sarasajj Diosar taqe chuyma iyawsatas uñachtʼaytanjja?
13 Diosan arunakapat yatiyir sarasaw Diosar taqe chuyma iyawsatas uñachtʼaytanjja. Yatiyir sarasajja, Diosan arsutapar confiyatasa, akapachan tukusiñapajj ‘horasaparu niya Hab. 2:3). Diosarojj taqe chuymat iyawsasktan janicha uk sum amuyañatakejja, akham jisktʼasiñasawa: “¿Diosan arunakap yatiyir sarañajj nayatak wali wakiskiriti? ¿Yatiyañatakejj taqe chuymat chʼamachasisktjja? ¿Kunayman toqetti jaqenakar yatiyañatak chʼamachasisktjja?” sasa (2 Cor. 13:5). Yatiyir sarañatak chʼamachasiñäni ukhajja, Diosar taqe chuyma iyawsataswa uñachtʼayañäni (Romanos 10:10 liytʼañataki).
puriniñampïtapat’ jan pächasitaswa uñachtʼaytanjja (14, 15. 1) ¿Kunjamanakansa Jehová Diosar iyawsatas uñachtʼayaraksna? 2) ¿Asia toqenkir mä familiajj kunjamsa Diosar taqe chuyma confiyäna? Uk qhanañchtʼam.
14 Maysa toqetjja, Diosar taqe chuyma confiyatasjja jan waltʼäwinakan aguantasaw uñachtʼayaraktanjja. Jiwasatï usuta, pisin jakasiñäni, aynachtʼata jikjjatasiñäni, jan ukajj llakitas jikjjatasiñäni ukhajja, ‘Jehová Diosampi Jesusampiw horasaparu yanaptʼitani’ sasaw taqe chuyma confiyañasa (Heb. 4:16). Diosar yanaptʼa mayisajja, Jupar taqe chuyma iyawsataswa uñachtʼayañäni. Jesusasti akham sas mayisiñwa yatichäna: “Sapürutak manqʼañ churanipjjeta” sasa (Luc. 11:3). Diosajj kunatï jakañatak wakiski uk churistaspawa, Biblian qellqatäki uka sarnaqäwinakajj ukwa uñachtʼayistu. Amuytʼañataki, kunapachatï Israel markan machʼajj utjkäna ukhajja, Jehová Diosajj Elías profetarojj umsa manqʼsa churänwa. Bibliansti siwa: “Cuervo sat jamachʼinakawa tʼantʼampi aychampi aparapipjjerïna alwanakasa, jaypʼunakasa. Umsti umänwa [...] jawirata” sasa (1 Rey. 17:3-6). Ukhamarakiw Diosajj jiwasar kunatï jakañatak munaski ukanak churistani, janipun ukat pächasiñäniti.
Jan waltʼäwinakan aguantasajja, Jehová Diosar taqe chuyma iyawsataswa uñachtʼaytanjja (14 tʼaqa uñjjattʼäta)
15 Biblian ewjjanakaparjam sarnaqaskakiñäni ukhajja, familiasarojj kunatï jakañatak wakiski ukanakwa churañäni. Asia toqenkir Rebecca kullakan familiapampejj kunas pasatayna uka toqet parltʼañäni. Rebeccan esposopajj mä trabajonïnwa, ukampis uka trabajopajj Jehová Diosatwa jitheqtayaskäna. Jilatampi Rebecca kullakampejj kuntï Mateo 6:33 ukhamarak Proverbios 10:4 qellqatanakajj siski ukaruw istʼañ munapjjäna, ukatwa trabajo jaytañ amtapjjäna. Niyakejjay pusi wawanakanïpjjchïnjja, yanaptʼasiñatakejj manqʼa aljañwa amtapjjäna. Rebecca kullakajj siwa: “Wal trabajipjjta, Jehová Diosan yanaptʼapampejj janipuniw manqʼajj faltawayapkituti” sasa. Inas jumajj ukhamanakan uñjasiwayaraksta, cheqas ukanakajj Diosar taqe chuyma iyawsañatakiw yanaptʼistu.
16. ¿Kunatsa Jehová Diosar confiyañasa?
16 Jiwasatï Jehová Diosar confiyañäni, Jupatakjam sarnaqarakiñäni ukhajja, Diosajj yanaptʼistaniwa. Apóstol Pablojja Habacuc profetan arunakapat amtasajj akham sänwa: “Khititejj Diosampi katoqatäki ukajja iyawsañ toqew jakani” sasa (Gál. 3:11; Hab. 2:4). Ukhamarus Pablojj sarakïnwa: “Diosajj jachʼañchatäpan, jupajj chʼamaniwa kuntejj mayktan, lupʼkaraktan ukanakata jukʼampi lurañataki, chʼamap toqe jiwasanak taypina luratapata” sasa (Efe. 3:20). Janis taqe kunpun lurirjamäkstanjja, kuntï Diosatak lurirjamäktan uk lurañatakejj taqe chuymaw chʼamachastanjja, ukham chʼamachasitas Diosajj bendiciniwa sasaw confiytanjja. Jehová Diosan yanaptʼap uñjasajj wal kusistanjja.
IYAWSÄWI MAYIÑÄNI UKHAJJA DIOSAJJ CHURISTANIWA
17. 1) ¿Kunjamsa Jesusajj arkirinakapan mayisitapar istʼäna? 2) ¿Kunatsa Jehová Diosajj iyawsäwi mayisitasar istʼistaniwa sasin sistanjja?
17 Aka yatichäwi yatjjatasajj inas apostolonakjam jikjjatasirakstan, jupanakajj Jesusar sapjjänwa: “Jukʼampi iyawsañ yaptʼapjjeta” sasa (Luc. 17:5). Jesusajj uka mayitar istʼänwa ¿kunjamsa? Pentecostés 33 maranwa Diosan qollan ajayup katoqapjjäna, ukatsti Diosan amtanakapatsa jukʼamp sumwa amuytʼapjjarakïna. Ukaw Diosar taqe chuyma iyawsañatakejj jupanakar yanaptʼäna. Ukatwa walja cheqanakan yatiyañ qalltapjjäna, ukhakamajj janipuniw kunapachas ukham yatiyasirïkänti (Col. 1:23). Jiwasatï Diosan munañaparjam kuns mayiñäni ukhajja, Diosajj churistaniwa (1 Juan 5:14).
18. ¿Kunjamsa Diosajj Jupar iyawsirinakar bendici?
18 Jiwasatï Jehová Diosar taqe chuyma confiyañäni ukhajja, Jupajj bendicistaniwa, ukatsti jukʼamp iyawsäwi mayiñäni ukhas churarakistaniwa. Ukhamatwa jukʼamp iyawsäwinïñäni, ‘Diosan markaparusa’, mä arunjja, Reinoparus mantarakiñäniwa (2 Tes. 1:3, 5).
^ tʼaqa 4 Yaqhepajj akanakawa: Lillian Gobitas Klose, Feliks Borys, Josephine Elias. Jupanakan sarnaqäwinakapajj aka qellqatanakanwa jikjjatasi: ¡Despertad! julio 22, 1993, ¡Despertad! febrero 22, 1994, ¡Despertad! septiembre, 2009.