MAMAJAN jilïr jilapajj Nikolai Dubovinsky satänwa. Jupajja, Jehová Diosar sirvkasajj kusiskaña ukhamarak llakiskaña experiencianakanïnwa. Ukanak amthapisaw janïr jiwkasajj qellqäna. Uka experienciat jila partejja, Diosan servirinakaparu nayra Unión Soviética markan arknaqaskäna uka tiempotawa. Jan walinakansa uñjasiwaykchejja, janipuniw Diosat jitheqtkänti, kusisitaw jakasïna. Tiojajja, wayna jilatanakaru kullakanakaruw experienciap parlañ munäna, ukatwa uka toqet mä jukʼa parltʼapjjäma. Tiojajj Podvirivka, (Oblast de Chernivtsi, Ucrania) markanwa 1926 maran nasïna, familiapajj campon jakasirïnwa.

Nikolai jilatajj siwa: “1941 maranjja, mä urojj Ivan jilajajj aka libronakwa apanïna, El Arpa de Dios, El Plan Divino de las Edades, Yatiyañataki sat mä qawqha revistanakampi, walja folletonakamp kuna. Ukanak liysusajja, tʼaqhesiñanak Supayan utjayatapwa yatiyäta, janiw Diosajj ukanak utjaykataynati. Ukatsti Mateo, Marcos, Lucas, Juan libronakwa Biblian liytʼarakiyäta, ukhamatwa cheqa yatichäwinak jikjjatataj amuyayäta. Diosan Reinopat taqe chuymaw yatiyirïta. Qellqatanak liytʼasajja, cheqa yatichäwinak jukʼampiw amuyayäta, Diosar serviñsa jukʼampiw munarakiyäta”.

“Bibliat yatjjatatajat tʼaqhesiyataw uñjasiñajäna. Niyakejjay uka maranakajj guerra tiempöchïnjja, janiw khitirus jiwayañ munkayätti. Yantʼanakan uñjasiñajäkäna ukhatakejja, mä qawqha qellqatanak yatsuyäta, ukanakatjja Mateo 10:28 ukat 26:52 tʼaqanakawa. ¡Jiwayatas uñjasiñajäkchïnjja, Diosat janipun jitheqtañwa amtayäta!”

“1944 maran 18 mara phoqkayäta ukhasti cuartelar sarañajatakiw jawsapjjetäna. Ukanwa nayrïr kutejj mayni jilatanakamp jikisiyäta. Uka jilatanakat yaqheparojja, cuartelar sarañatak maranïpjjatapatwa katuntapjjarakïna, ukatsti nanakan ukaruw apanipjjäna. Autoridadanakarojj jan ajjsartʼasaw akham sapjjayäta: ‘Janiw guerrar sarapkäti’ sasa. Militaranakasti wal colerapjjäna, ‘janiw manqʼa churapkämati, chʼama tukuñ trabajonakanwa tʼaqhesipjjäta, jan ukajj jiwayapjjämawa’ sasaw sapjjetäna. Nanakasti sapjjarakiyätwa: ‘Jumanakatäjjewa. Kunsay lurapkchitätajja, Diosajj “janiw jiwayätati” siski ukaruw istʼapjjä’ sasa (Éxo. 20:13).”

“Ukatjja, Bielorrusia markaruw pä jilatanakampi khitapjjetäna, ukanwa yapun trabajipjjañajäna, jan waltʼayat utanaksa askichapjjañajäna. Minsk marka anqäjjanakanjja, guerra utjatapat kunayman jan walinakaw uñjasïna. Qoqanakajj qʼala nakhantata, jaqe jiwatanaka, thaki qʼawanakansa, chʼuminakansa  jiwat caballonakakiw uñjasïna, carruajenakasa, nuwasiñatak armamentonakas uñjasirakïnwa. Mä avionarus jiskʼa jiskʼa qʼala tukjatwa uñjawayarakta. Ukanak uñjasajja, Diosan arupar jan istʼañajj kunja jan walisa ukwa amuyawayta.”

“Guerrajj 1945 maranwa tukusjjäna, ukampis guerran jan nuwasiñ munapjjatajat 10 marampiw carcelan llawintatäpjjañajäna. Kimsa marajj janipuniw khitimpis parlapkayätti, ni qellqatanaksa katoqapkayätti. Carta toqew mä qawqha kullakanakampejj parlasipjjayäta, qhepatjja jupanakas katuntatäjjapjjarakïnwa, chʼama tukuñ trabajonakanwa 25 maranak trabajipjjañapäna.”

“1950 maranwa carcelat mistjjapjjayäta, janiw 10 marapunejj ukankapkayätti, ukatjja utaruw kuttʼjjapjjayäta. Carcelankaskayäta ukhaw mamajasa, María sullka kullakajas Testigonakjam bautisasipjjatayna, kimsa jilanakajas Bibliatwa yateqasipkarakïna. Diosan arunakapat yatiyaskakiyätwa, ukatwa policianakajj wasitamp carcelar llawintañ munapjjetäna. Ukhamaruw Diosan arunakap yatiyasiñapatak pʼeqtʼiri jilatanakajj qellqatanak jamasan lurañatak jawsapjjetäna. Ukhatakejj 24 maranïyätwa.”

“Jehová Diosan Testigonakapajj akham sapjjeriwa: ‘Yatiyañtï taqe cheqan jarktʼapjjestani ukhajja, jamasatwa lurañäni’ sasa (Pro. 28:28). Uka tiemponakanjja, qellqatanakasajj oraq manqhanakanwa jila partejj imprimisïna. Imprimiñatak nayrïr tallerajajja, Dmitry jilajan utap oraq manqhankänwa. Awisajja, uka oraqe manqhat pä semanaw jan mistunirïkti. Querosenamp nakhir lamparajj saman jan utjatapat jiwiri ukhajja, samana mantaniñapkamaw iktʼirïta.”

 “Mä urojja, trabajipkayäta uka jilataw akham jisktʼitäna: ‘Nikolai, ¿bautisasjjtati?’ sasa. 11 maras Diosar sirvjjchiyätjja, janïraw bautisaskayätti. Uka toqetwa jilatajj parltʼitäna, ukatwa uka arumpachajj bautisasjjayäta, ukhajj 26 maranïyätwa. Kimsa maratjja, Comité de País ukan irnaqañatakiw invittʼapjjetäna, ukhamatwa jukʼamp luräwinak katoqayäta. Uka tiemponjja, katuntat jilatanak lanti irnaqtʼapjjañapatakejj jan katuntat jilatanakaruw uttʼayapjjäna, ukhamat Diosan Reinopat yatiyasiskakiñapataki.”

“Carcelan llawintatäñat sipansa, qellqatanak jamasan imprimiñaw jukʼamp chʼamänjja. Policiamp jan uñjayasiñatakejja, paqallq maraw tantachäwinakar jan sarkayätti. Diosar yupaychañ toqet jan aynachtʼañatakejj naya pachpaw chʼamachasiñajäna. Familiajarusti awisakiw visittʼir sarirïta. Ukhamäkchïnsa, familiajajj janiw mayjtʼaskänti, ukaw chʼamañchtʼitäna. Ukampis sint llakisiñasa, policiamp jan uñjayasiñatak chʼamachasiñas aynachtʼayitänwa. Jan waltʼäwinakar saykatañatakejj wakichtʼatäpjjañajänwa. Mä arumajja, kawkintï jakkayäta ukaruw pä policiajj purinïna. Ventanat mistusajj chʼumi chʼumiruw tʼijuntta. Ukhat mistusajj khuyusirinakwa istʼayäta. Ukatsti, ¡akatjamatwa fusiltʼirinaka istʼta! Cheqas balanakan khuyusitapätaynawa. Mä policiajj caballot arktanisin jan samartʼasaw balanak tukusiñapkam fusiltʼanitäna. Mä balaw amparaj usuchjitäna. Uka policiajj phesqa kilometronakwa arktanitäna, ukhamaruw chʼumi chʼumir imantasta. Jusgapkitäna uka urojja, ‘¡policiajj 32 kutiw fusiltʼantam!’ sasaw sapjjetäna.”

“Oraq manqhankir utat jaya tiempo jan mistutajatjja, wali janqʼor tukutayätwa. Ratukiw maynejj kunsa luraskayäta uk amuyaspäna, ukatwa lupinkañajajj wakisïna. Oraq manqhan wali jaya jakatajat usumpiw apantasirakiyäta. Mä kutejja, mä wakiskir tantachäwiruw mä qawqha jilatanakampi sarañajäna, ukampis nasajampit lakajampit wila jutatap laykojj janiw sarkayätti.”

“1957 enero 26 uruw katuntapjjetäna. Sojjta phajjsi qhepatsti, Ucrania markankir Tribunalankirinakajj fusiltʼat jiwañajatakiw mä amtar puripjjäna, ukampis uka markanjja  ukajj janiw lurasiñapäjjänti, ukatwa 25 maranakatak carcelar llawintapjjetäna. Kimsaqallqonisti chʼama tukuñ trabajonakanwa irnaqapjjañajäna. Ukatakejj Mordovia markaruw khitapjjetäna, ukansti niya 500 Testigonakaw utjäna. Yatiyañataki revista yatjjatañatakejj jamasanakanwa tantachasipjjerïta. Aparat revistanak liytʼasajja, mä guardiajj sapjjetänwa: ‘Jumanakatï aka revistanak liyisipkakïtajja, janiw khitis atipañ puedipkätamti’ sasa. Trabajonak katoqasajj jan inaktʼasaw lurapjjayäta, awisajj jilpachwa lurapjjerïta. Ukhamäkchïnsa, mä comandantejj akham sänwa: ‘Trabajipkta ukajj janiw nanakatak wakiskiti, jan ukasti istʼapjjetasma ukwa munapjjta’ sasa.”

Chʼama tukuñ trabajonakat 1967 maran mistjjasajja, Nikolai tiojajj Estonia ukhamarak San Petersburgo (Rusia) markanakan tamanakajj sum uttʼatäñapatakiw yanaptʼäna. 1991 mara qalltanjja, kuntï Tribunalankirinakajj 1957 maran amtapkäna ukajj janiw validonëjjänti. ¿Kunatsa? Janiw maynir juchañchañatakejj pruebanakajj utjkänti. Ukhamajj autoridadanakan tʼaqhesiyat Testigonakajj antutatäjjapjjänwa. 1996 maranjja, tiojajj Velikiye Luki (Oblast de Pskov) markaruw sarjjäna, ukajj San Petersburgo markat 500 kilómetro jayankiwa. Ukan mä jiskʼa uta alasïna, ukatsti 2003 maranjja, oraqepanwa mä Tantachasiñ Utajj lurasïna. Jichhajj pä tamanakaw ukan wal jiltaski.

Esposojampejj Rusia markankir sucursalanwa servisipkta. Nikolai tiojajj 2011 marzo phajjsinwa visitir jutäna. Mä qawqha phajjsit jiwawayjjakiwa. Arunakapajj walpun chuym chʼalljjtayapjjetäna, wali kusisitaw akham sapjjetäna: “Jericó marka muytañ paqallqöri urus qalltaskaspa ukham amuyta” sasa (Jos. 6:15). Tiojajj 85 maranëjjänwa. Wali tʼaqhesiñanakansa jakasiwaykchejja, akham sirïnwa: “¡Waynatpach Diosar serviñ amtatajat wal kusista. Janipuniw amtaskti!” sasa.