1, 2. 1) ¿Kunas qʼajjo wayn tawaqo wawanakani awk taykanakarojj llakisiyi? 2) Cristiano qʼajjo wayn tawaqonakajja, ¿kunsa lurapjjaspa?

CRISTIANO awk taykanakajja, kunapachatï wawanakapajj bautisasipjje ukhajj walpun kusisipjje. Berenice kullakat parltʼañäni, jupan pusi wawanakapajj janïr 14 maranïkasaw bautisasipjjatayna, kullakajj siwa: “Wawanakajan bautisasipjjatapajj jan armkayapuniwa. Diosar serviñ amtapjjatapat walpun kusisipjjayäta. Qʼajjo wayn tawaqöjjasin kunayman yantʼanakan uñjasipjjañap sum yatipjjayäta” sasa. Berenice kullakan arunakapjja, khitinakatï qʼajjo wayn tawaqo wawanakanïpki jan ukajj wawanakapajj janïra qʼajjo wayn tawaqöpki uka awk taykanakajj sum amuyapjjpacha.

² Mä psicologojj akham siwa: “Wawanakajj qʼajjo wayn tawaqöpki ukhajja, jupanakatakisa, awk taykanakatakisa chʼamakiwa. Yaqhep awk taykanakajja, wawanakapajj janis kuns sum lurapkaspa, jiskʼa wawanakjamas kuns lurapkaspa ukham inas amuyapjjchispa. Ukampis janiw ukhamäkiti, antisas qʼajjo wayn tawaqonakajj jupanakpachpaw kun lurañs yateqapjje, janirakiw kunatï chuymanakapan utjki uksa imtʼapkaspati, amigonakanïñsa wal munapjjaraki” sasa. Qʼajjo wayn tawaqonakajja, wali sumwa Diosan arunakap yatiyapjjaspa Diosampis jukʼamp sumwa apasipjjaspa, jakäwipsa Juparuw katuyasipjjarakispa. Cheqas qʼajjo wayn tawaqösinjja, Jesusjamaw Diosarojj jukʼamp jakʼachasipjjaspa  (Lucas 2:52 liytʼañataki). Awk taykanaka, ¿kunjamsa qʼajjo wayn tawaqo wawanakamarojj yanaptʼapjjasma? Jesusatwa munasirïñsa, altʼat chuymanïñsa, kunjamsa jikjjatasipjje uk amuyañsa yateqasipjjañama. Ukaw wawanakamar wali sum uywañatak yanaptʼapjjätam.

3. Jesusajj apostolonakapan amigopänwa sasajja, ¿kunatsa sistanjja?

³ Bibliajj qellqaskäna uka tiemponjja, mä uywirejj janiw uywataparojj kunjamsa chuymapan jikjjatasi, kunsa amuyi uka toqenakat parlirïkänti. Ukampis Jesusajj apostolonakapar janiw uywatanakaparjam uñjkänti, jan ukasti amigonakaparjamaw uñjäna, cheqas jupanakatakejj wali munasiri, confiykaya amigönwa (Juan 15:15 liytʼañataki). Jesusajja, jilapartejj apostolonakamp chikapunïrïnwa, kunjamas chuymapan jikjjatasïna ukjja jupanakar awistʼirïnwa, janiw ukakïkänti, kunjamas jikjjatasipjjäna uk parltʼapjjäna ukhasa istʼarakirïnwa (Mar. 6:30-32). Ukham purapat parltʼasisajja, jukʼamp sumwa apasipjjäna, kuna luräwtï Jehová Diosajj jutïrin churañapäkäna ukatakis apostolonakapajj wakichtʼatäpjjarakïnwa.

4. Wawanakapan respetop jan aptʼasisajja, ¿kunjamsa awk taykanakajj amigopar tukupjjaspa? (8 janankir foto uñjjattʼam.)

⁴ Michael jilatajj mä yoqalla ukhamarak mä imill wawaniwa, jupajj akham siwa: “Wawanakajj awk taykanakapar istʼapjjañapäkchisa, amigopäpjjarakispawa” sasa. Kunjamtï yatktanjja, amigonakajj jilapartejj chiktʼatapunïpjjewa. Awk taykanaka, wawanakamampïñatakejj trabajotsa yaqha ukham luräwinakatsa tiempo apstʼasipjjam, ukham lurañataki Jehová Diosar yanapa mayipjjam. Amigonakajja, niya kikpwa taqe kunsa lurañ yatipjje. Ukhamasti awk taykanaka, wawanakamar gustki uka musicanakasa, videonakasa, kuna kasta anatañanakasa jumanakar gustañaparakiwa. Italia markankiri Ilaria kullakan awk taykapajj ukhamwa lurapjjatayna. Kullakajj siwa: “Kuna kasta musicatï gustkitäna ukanakajj awk taykajarojj gustarakïnwa. Awkijajj mä suma amigojapunïnwa, juparojj taqe kunwa awisirïta” sasa. Wawanakaman amigopar tukusina Jehová Diosar jakʼachasipjjañapataki yanaptʼasajja, janiw awk taykjamajj wawanakaman respetop aptʼasipkätati (Sal. 25:14). Jan ukasti, wawanakamajj jukʼampiw confiyapjjätam. Ukatsti jupanakar wal munasipjjatamsa, respetapjjatamsa, istʼañ munapjjatamsa amuyapjjaniwa. Kuna llakinakan uñjasisasa, jumanakaruw jakʼachasipjjarakïtam.

5. ¿Kunsa Jesusajj arkirinakapan kusisita jikjjatasipjjañapatakejj luräna?

⁵ Jehová Diosar servisajj kunja kusisitas maynejj jikjjatasispa ukjja Jesusajj sum yatïna, ukatwa arkirinakapan kusisita jikjjatasipjjañap munarakïna. Ukatakejja, Diosan arunakapa jan inaktʼasa yatiyapjjañapataki, jaqenakar arkiripar tukuyapjjañapatakiw apostolonakapar chʼamañchtʼäna. Jupanakarusti sänwa: ‘Nayajj sapürupuniw jumanakampïskäjjaʼ sasa. Ukhamasti Jesusaw arkirinakaparojj luräwinakapan yanaptʼañapäna (Mat. 28:19, 20).

6, 7. ¿Yatiyir sarañasa, Bibliat yatjjatañasa, tantachäwinakar sarañasa, yaqha ukhamanakasa wawanakarojj Diosar serviñan yanaptʼaspati?

⁶ Awk taykanakjamajja, wawanakaman Jehová Diosat jan jitheqtapjjañapwa munapjjpachätajja. Diosajja, wawanakamaru Jupatakjama sarnaqapjjañapataki yanaptʼapjjasma sum uywapjjasma ukwa muni (Efe. 6:4). Wawanakamar sapüruw Bibliat yatichapjjañama. Mä awkejja, wawanakapan escuelar sarapjjañapwa munejja, ukhamat yateqapjjañapataki, jakäwitak wakichtʼatäpjjañapataki. Cristiano awk taykanakajja ukhamarakiw wawanakapan Jehová Diosar uñtʼapjjañap munapjje, cheqas ukaw jan walinakat amuytʼasiñatakejj yanaptʼaspa. Ukatwa tantachäwinakata, jachʼa tantachäwinakata, Familiana Diosar Yupaychañataki Arumat jan faltasipjjañapatak chʼamañchtʼapjje (Pro. 24:14). Kunjamtï Jesusajj arkirinakapar yatiyapjjañapataki yanaptʼkänjja,  ukhamarakiw awk taykjamajj wawanakaman yatiyapjjañapataki yanaptʼapjjañama. Nayraqatajja, yatiyir sarañaru yatintapjjañapatakiw yanaptʼapjjañama. Ukatsti jaqenakaru Bibliat parlañ munapjjañapatakiw yanaptʼapjjañamaraki.

⁷ ¿Yatiyir sarañasa, Bibliat yatjjatañasa, tantachäwinakar sarañasa, yaqha ukhamanakasa wawanakamarojj Diosar serviñan yanaptʼaspati? Sudafricankir Erin kullakajj akham siwa: “Jilanakajampir nayampirojja, janiw Bibliat yatjjatañasa, tantachäwinakar sarañasa ni yatiyir sarañas gustapkitänti. Familjam Bibliat jan yatjjatañatakejja, awisajj kunsa lurapjjapunirïtwa. Ukampis awk taykajajj yanaptʼasipkakirïtuwa” sasa. ¿Awk taykapan ukham lurapjjatapajj inamayäpachänti? Kullakajj saskakiwa: “Awk taykajarojj walpun yuspärta. Kunapachatï yatiyirisa tantachäwirusa jan sarjjta ukhajja, wal chuym usuyasta” sasa.

8. 1) ¿Kunjamsa Jesusajj altʼat chuymanïtap uñachtʼayäna? 2) ¿Kunsa Jesusat arkirinakapajj yateqapjjäna?

⁸ Jesusajj janis pantjasirïkchïnjja, jupa pachpa taqe kun jan lurirjamätap amuyasaw Jehová Diosamp yanaptʼayasïna (Juan 5:19 liytʼañataki). Uk uñjasaw arkirinakapajj Jesusar jukʼamp respetapjjäna, confiyapjjarakïna. Altʼat chuymanïñwa jupat yateqapjjäna (Hech. 3:12, 13, 16).

9. Awk taykanakajj taqe kun jupanak pachpa jan lurirjamäpjjatap amuyasipjje, pantjasitanakapsa jan imtʼapki ukhajja, ¿wawanakajj kamachapjjesa?

⁹ Jiwasajja janiw taqe kunsa lurirjamapunïktanti, pantjasir jaqenakjamajja pantjasikipuntanwa. Awk taykanaka, altʼat chuymanïpjjañamawa, pantjasipjjäta ukhasa, “pantjastwa” sapjjañamawa (1 Juan 1:8). Amuytʼañataki, ¿khitirus jukʼamp respetapjjasma? ¿Pantjasitanakap imtʼiri patronaruti, jan ukajj pantjasitanakap jan imtʼiri patronarucha? Cheqas pantjasitanakap jan imtʼiri patronaruw respetapjjasma. Wawanakamampejj ukhamarakiwa, pantjasitanakamat perdón mayisipjjäta ukhajja, jukʼampiw respetapjjätam. Ukatsti jumanakatwa yateqasipjjarakini. Pä phuchani mä yoqani Rosemary kullakajj akham siwa: “Esposojampejj janiw pantjasitanakaj imtʼapjjerïkti. Uk uñjasajja, wawanakajajj jan ajjsartʼasaw jan waltʼäwinakap yatiyapjjerïtu. Awisajja kunjamsa jan waltʼäwinakap askichapjjaspa uk janiw sañ puedipjjerïkti. Ukatwa Bibliat apstʼat qellqatanakamp yanaptʼapjjerïta, Diosatsa mayisipjjarakirïtwa” sasa.

10. ¿Kunjamsa Jesusajj altʼat chuymanïtap uñachtʼayäna?

¹⁰ Jesusajja, kunsa arkirinakapajj lurapjjañapa ukjja janiw aleq ukhamak sirïkänti, jan ukasti kunatsa lurapjjañapa ukwa sirïna, ukhamatwa altʼat chuymanïtap uñachtʼayäna. Amuytʼañataki, Jesusajja akham sänwa: “Nayraqatajj Diosan reinopa munapjjam, ukhamarak kunatejj cheqäki jupan nayraqatapanjja ukanaka” sasa. Ukham lurasajj kunsa jikjjatapjjani uk akham sänwa: ‘Ukatsti kunas jumanakarojj churatakïpjjätawaʼ sasa. Yaqha horasajj sarakïnwa: “Jaqe masimarojj jan juchañchapjjamti” sasa. ¿Kunatsa ukham sispachäna? Jesusajj sänwa: “Diosajj jan jumanakar juchañchañapataki. Kunjämtï jumanakajj jaqe masimarojj juchañchapktas ukhamarakwa Diosajj jumanakarojj juchañchapjjätam; kunjämtejj jumanakajj jaqenakar lurapkäta ukhamarakwa jumanakarojj Diosajj lurapjjätam” sasa (Mat. 6:31–7:2).

11. Kuna amtar purisasa, ¿kunatsa awk taykanakajj wawanakapar qhanañtʼapjjañapa?

¹¹ Awk taykanaka, kunsa amtapjjäta ukhajja, qʼajjo wayn tawaqo wawanakamarojj kunatsa uka amtar puripjjta ukjja sapjjañamawa, ukhamatwa jupanakatakejj jumanakar istʼañajj jan chʼamäkaniti. Ukhamasti kunatsa kuns lurapjjta uk wawanakar sapjjañamapuniwa. Pusi wawani Barry jilatajj akham siwa: “Qʼajjo wayna tawaqonakajja, awk taykanakaparu munañaparjamak jan amtapjjatapa ukhamarak amuytʼirïpjjatapa uñjasajja, jukʼampiw jupanakar confiyapjje” sasa. Qʼajjo wayn tawaqo wawani awk taykanaka, wawanakamajj janiw jiskʼa wawanakäjjapjjeti, ukatwa kunatsa  kun lurañsa amtapjjta uk jupanakan yatipjjañapajj wakisi. Cheqas amuytʼasirïñwa yateqasipki. Barry jilatajj saskakiwa: “Kuna amtanakar puriñatakisa, sum amuytʼasiñwa yateqapjjañapa” sasa (Sal. 119:34). Awk taykanaka, altʼat chuymanïpjjam, kunatsa kun lurañsa amtapjjta uksa wawanakamar sapjjarakim. Ukhamatwa respetapjjatama amuyapjjani, ukatsti jupanak pachpaw kuna amtar puriñsa yateqapjjarakini.

12. ¿Kunjamsa Jesusajj Pedror yanaptʼäna?

¹² Jesusajja arkirinakapar kunjam yanaptʼañs yatïnwa. Mä kutejja, Jesusajj jiwayat uñjasiñapäkäna ukhajja Pedrojj akham sänwa: “Jan Diosajj munpati ukjja” sasa. Jan kuna jan wali amtampi uk satapjja Jesusajj yatïnwa, ukampis Pedron amuyupajj janiw walïkänti. ¿Kunjamsa Jesusajj Pedrorusa, mayni arkirinakaparusa yanaptʼäna? Nayraqatjja Pedroruw cheqañchäna, ukjjarusti jan walinakan uñjasisina Diosar jan istʼirinakajj kuna jan walinakansa uñjasipjjaspa ukwa qhanañcharakïna. Ukatjja Jehová Diosan munañap phoqañatak chʼamachasirinakajj bendicionanakwa katoqapjjaspa sasaw qhanañcharakïna (Mat. 16:21-27). Pedrojj Jesusat wali sumwa yateqäna (1 Ped. 2:20, 21).

13, 14. 1) Awk taykanaka, ¿kunjamatsa wawanakamajj iyawsäwin aynachtʼaskatap amuyapjjasma? 2) Wawanakapajj kunjamsa jikjjatasipjje, kunsa amuyapjje uk yatiñatakejja, ¿kunsa awk taykanakajj lurapjjaspa?

¹³ Awk taykanaka, Jehová Diosaruw kunjamsa, kunapachasa wawanakamar yanaptʼapjjasma uk amuyañataki yanaptʼa mayipjjañama (Sal. 32:8). Sañäni, Diosar iyawsañan kunas aynachtʼayaski uk ¿amuyapjjasmati? Inas wawamajj Diosar jan nayrjama servjjchispati, jilat kullakanakatsa jitheqtjjaspawa, jupanakatsa jan walinakwa parljjaspa, ukatjja kunsa imtʼkiristam ukhamwa sarnaqarakispa. ‘Jamasatwa jan walinak lurpacha, jan ukajj kuna jucharuw purtʼaspacha’ sasin janiw jankʼak amuyañamäkiti. Janirakiw janis kunas paskaspa ukham amuyañamäkiti ni akham sañamäkisa: “Qhepat amuytatasiskaniwa” sasa. *

¹⁴ Kunjamas jikjjatasipjje uk amuyañatakejja, kunjamtï Jesusajj arkirinakapar sum amuytʼasa, respetompi jisktʼirïkänjja, ukhamarakiw wawanakamar jisktʼapjjañama. Amuytʼañataki, maynitï mä balde wiskar chinkatasin wali manqha phujur jaqontaspa ukat jankʼak um waysunispa ukhajja,  ¿kunas pasaspa? Janiw balden umajj phoqäjjaspati. Awk taykanaka, wawanakamarutï jankʼaki kunas pasi uk arsuyañ munapjjäta ukhajja, janiw kunsa amuyapjje, kunjamas jikjjatasipjje uk yatipkätati (Proverbios 20:5 liytʼañataki). Pusi tʼaqan parlaniwayktan uka Ilaria kullakajj siwa: “Qʼajjo tawaqökayäta ukhajja, jilat kullakanakampïñsa escuelankir masinakajampïñsa wal munirïta. Ukaw aynachtʼayaskitäna, awk taykajajj uk amuyapjjänwa. Mä arumajja, ‘¿kunatsa llakitäta, kunach pasi?ʼ sasaw jisktʼapjjetäna. Jachtʼasisaw kunas pasitäna uk jupanakar awisayäta, ukatsti yanaptʼwa mayirakiyäta. Amuyapjjsmawa, yanaptʼapjjämawa sasaw qhomantasin sapjjetäna” sasa. Ilariarojj jankʼakiw awk taykapajj taman amigonakanïñapataki yanaptʼapjjäna.

15. Jesusajj mayninakan suma luratanakap uñjirïtapsa amuytʼirïtapsa, ¿kunjamatsa yattanjja?

¹⁵ Jesusajja, kunjamäpjjänsa arkirinakapajja uk sumwa amuyäna, kuntï sum lurañ yatipkäna uksa uñjarakïnwa. Amuytʼañataki, Jesusan Nazaretankirïtap yatisajja Natanael chachajj sänwa: “Nazaret markatjj ¿kuna sumarak mistuspa?” sasa (Juan 1:46). Uka arunakajj ¿jiskʼachir arunakäkaspasa, ukat Natanael chachajj janis Diosar iyawskaspa jan wali parlir jaqëkaspas ukhamti amuyta? Jesusajj janiw ukham amuykänti, jan ukasti uñnaqapat sipansa, kunjam chuymanïnsa ukwa uñjäna, ukatwa akham säna: “Jupansti janirakiw kuna sallqjañas utjkiti” sasa (Juan 1:47). Mayninakajj kunjamas chuymanakapan jikjjatasipjje ukjja Jesusajj sumwa yatïna, ukampis janiw jan wali luratanakap uñjirïkänti jan ukasti suma luratanakapwa uñjirïna.

16. ¿Kunjamsa wawanakamar chʼamañchtʼapjjasma?

¹⁶ Awk taykanaka, jumanakajj janiw Jesusjamajj kunjamas wawanakamajj chuymapan jikjjatasipjje uk yatipkasmati. Ukampis Diosan yanaptʼapampejja, uñnaqanakapat sipansa jukʼampwa uñjapjjasma. Ukhamasti wawanakamajj kunsa sum lurañ yatipjje uk uñjañataki chʼamachasipjjam. Janipun akham sapjjamti: “Jan istʼasirinaka, jan waltʼayirinaka” sasa. Janis kunsa sum lurañ yatipkchejja, akham sapjjañamawa: “Suma luratanakamwa uñjapjjta, sum lurañ munapjjatamsa yatipjjaraktwa” sasa. Nayrar sartapjjatap uñjasajja, jachʼañchtʼapjjañamawa, ukatsti jukʼat jukʼatwa jukʼamp luräwinak churapjjañamaraki. Ukhamwa Jesusajj arkirinakapampisa, Natanael (Bartolomé) chachampisa luräna. Natanaelar niya mä mara chikatani uñtʼasajja, apostolatwa Jesusajj jupar uttʼayäna. Natanaelasti apostoljamajj kuntï lurañapäkäna uk sumwa phoqäna (Luc. 6:13, 14; Hech. 1:13, 14). Awk taykanaka, wawanakamar chʼamañchtʼapjjam, kun lurapjjepansa ‘walik ukham lurapjjtajja’ sasin sapjjam. Ukatsti sapjjarakismawa: “Chʼamachasitanakam uñjasajja nanakasa, Jehová Diosasa wal kusisipjjta. Kun lurañtï yatipkta ukampejj jukʼampinakwa Diosatak lurapjjasma” sasa.

17, 18. Wawanakajj awk taykapan suma uywatajja, ¿Diosar serviñan kunjamäpjjaspasa?

¹⁷ Apóstol Pablojja, walja cristianonakatakisa Corinto markankir cristianonakatakisa mä awkjamänwa. Jilat kullakanakapar wal munasitap laykojja, awisajj mä awkjamaw llakita aynachtʼata jikjjatasïna. Walja awk taykanakajj Pabljamaw jikjjatasipjjarakpacha (2 Cor. 2:4; 1 Cor. 4:15). Victor jilatat amuytʼañäni, jupajj pä yoqalla ukhamarak mä imill wawa uywawayi. Jilatajj siwa: “Wawanakajajj qʼajjo wayn tawaqöjjapjjäna ukhajja, uywañajj chʼamakïnwa. Ukampis jan walinakat sipansa, askinakaw jilpach utjawayi. Jehová Diosaw wawanakajan amigopäñatak yanaptʼawayapjjetu” sasa.

¹⁸ Awk taykanaka, janipuni aynachtʼapjjamti. Wawanakamarojj Jehová Diosat jan jitheqtapjjañapataki yanaptʼapjjam, munasiñsa uñachtʼayasipkakim. Ukatsti, kunjamsa Diosar serviñan jiltasipki ukhamarak taqe chuyma servisipki uk uñjapjjañamwa munapjjta, ukhamatwa kusisitajj akham sapjjäta: ‘Wawanakajajj cheqanwa sarnaqapjje’ sasa (3 Juan 4, MT).