1, 2. ¿Kunansa arsutanakasampi ninampejj niya kikpaki?

OCTUBRE, 1871 maranjja, Wisconsin (Estados Unidos) markan ninajj wal aqantäna. Ukan 1.200 jila jaqenakaw jiwarapjjäna, ukatsti 2.000 millón jila qoqanakaw nakhantarakïna, janipuniw ukhamajj uka markan uñjasirïkänti. ¿Kunjamatsa ninajj aqantañ qalltpachäna? Uka cheqnam pasir mä trenan jiskʼa chispapatakwa naktañ qalltatayna. Kunatï Estados Unidos markan paskäna ukajja, discípulo Santiagon aka arunakapan cheqätapwa uñachtʼayistu, jupasti sänwa: ‘Mä jiskʼa ninakiw mä jachʼa monte nakhantaspa’ sasa (Sant. 3:5). Santiagon arsutaparjamajja, ¿kunas ninampi sasispa?

² Santiago 3:6 qellqatajj akham siwa: “Lajjrajj mä ninampi sasiwa” sasa. Kunjamtï ninajj maynir jan walinakar puriykaspajja, ukhamarakiw arsutanakasajj maynir jan waltʼayaspa. Cheqas kuntï arsktan ukajj maynirojj jan waltʼayaspawa, jan ukajj yanaptʼaspawa sasaw Bibliajj qhanañchi (Pro. 18:21). Ukhamasti, ‘arsutajampejj mayniruw chuym ustʼayirista’ sas amuyasin amukïñajj janiw wakiskaspati. Ninat amuytʼaskakiñäni, janiw jan phichhantasiñ laykukejj nina jan apnaqjjsnati. Wali amuyumpi apnaqasajja, ninampejj juntʼurtʼassnawa, phaytʼassnawa, chʼamakansa  qhantʼayasiraksnawa. Arsutasampejj niya ukhamarakiwa, jiwasatï amuytʼasis parlañäni ukhajja, Jehová Diosaruw jachʼañchañäni, ukatsti jaqe masisarus yanaptʼarakiñäniwa (Sal. 19:14).

3. ¿Kunanakas mayninakar chuym jan ustʼayas parlañatak yanaptʼistaspa?

³ Kunjamas jikjjatastan, kunsa amuytan ukjja, arunakasampi jan ukajj amparamp parlasaw sissna, ukanakajj Diosan mä suma regalopawa. Ukhamajja, ¿kunjamsa mayninakar chuym jan ustʼayas arunakasampi yanaptʼsna? (Santiago 3:9, 10 liytʼañataki.) Ukwa jichhajj kimsa toqet yatjjataskañäni: 1) kunapachas parlañasa, 2) kuna arunakampis parlañasa, 3) kunjamsa parlañasa.

4. ¿Kunapachas amukïñajj wakisi?

⁴ Taqeniw sapür parltanjja ukampis jornälpacha parlañajj janiw wakiskapuniti. Bibliajj ‘amuktʼañ horasaw’ utji sasaw qhanañchi (Ecl. 3:7). Kunapachatï maynejj parlaski ukhajj janiw jiwasajj parlañasäkiti, ukhamatwa parlki ukar respetatas uñachtʼayañäni (Job 6:24). Kunatï jan yatiyasiñapäki uksa janirakiw arsuñasäkiti, ni maynin colerayatas jankʼak arsuñasäkiti (Pro. 20:19; 1 Ped. 3:10, 11).

5. Diosajj parlirwa lurawayistu, ¿kunjamatsa ukat yuspärsna?

⁵ Maysa toqetjja, Bibliajj ‘parlañ horasaw’ utji sasaw qhanañcharaki (Ecl. 3:7). Amuytʼañataki, amigomatï mä regalo churiristam ukhajja, wal yuspärasma, uka regalo mä kʼuchur liwkatañat sipansa wali sum uñjasaw yuspäratam uñachtʼayasma. Jehová Diosajj ukhamarakiw mä regalo churistu, cheqas parlirwa lurawayistu. ¿Kunjamsa ukat yuspärsna? Arunakasamp mayninakar chʼamañchasa, Jehová Diosar jachʼañchasa, kunjamsa jikjjatastan, kunsa amuytan uk mayninakar sasinwa yuspäratas uñachtʼaysna (Sal. 51:15). Ukhamajj ¿kunapachas parlañasa uk kunjamatsa yatsna?

6. Kunapachas parlañajj wakisi ukjja, ¿kuna uñachtʼäwimpis Bibliajj qhanañchi?

⁶ Kunapachas parlañasa uka toqetjja, Bibliajj akham siwa: “Mä suma arojja horasana arsutajja qori manzanajj qollqer uchatäkejja ukhamawa” sasa (Pro. 25:11, Aymar Biblia). Cheqas qori manzananakajj wali sumaw uñnaqaspa, yamas qollqet lurat bandejar uchatäspa ukhajj jukʼampi sumaw uñnaqaspa. Arsutanakasampejj ukhamarakïspawa, horasapar arsuta arunakajj jukʼamp sumäspawa. Kunjamsa horasapar parlsna uk jichhajj uñjañäni.

7, 8. Jesusat yateqasisajja, ¿kunsa Japón markankir jilat kullakanakajj lurapjjäna?

⁷ Kunapachas parlañajj wakisi uk yatiñatakejja amuytʼasirïñasawa, janitï ukham lurksna ukhajja, horasapar arskasas janiw yanaptʼksnati (Proverbios 15:23 liytʼañataki). Amuytʼañataki, marzo 2011 maranjja, Japón markan terremotompi, lamar qotat uma llumstäwimpiw utjäna, ukanjja 15.000 jila jaqenakaw jiwarapjjäna. Jehová Diosan Testigonakapajj uka cheqan jakasirinakjamas jan walin uñjasipkchïnjja, jupanakajj Bibliampiw jaqenakar chuymachtʼapjjäna. Ukampis uka cheqan jakasiri jaqenakat jilapartejj budista religionatäpjjewa, janiw Biblia uñtʼapkiti. Ukhamasti jiwatat jaktañajj utjaniwa sasin yatiyañajj janiw horasäkänti. Ukatwa jilat kullakanakajj uka toqet yatiyañat sipans jaqenakarojj chuymachtʼapjjäna, ukatsti kunatsa suma chuyman jaqenakajj jan walinakan uñjasipjjpacha uksa Bibliampiw qhanañchapjjäna.

⁸ Jesusajja, kuna pachas parlañajj wakisi uk sum yatïna (Juan 18:33-37; 19:8-11). Mä kutejja, jupajj akham sasaw arkirinakapar säna:  “Jukʼampiw jumanakar arsuñanakajjajj utjaskitu, ukampis jichhajj janiw amuytʼapkasmati” sasa (Juan 16:12). Japón markankir jilat kullakanakajja, Jesusatwa yateqasipjjäna. Lamar qotat uma llumstäwi utjkäna ukhat pä mara chikatani pasatatjja, ¿Jiwatanakajj jaktanipjjpachäniti? sat tratadompiw jilat kullakanakajj yatiyapjjäna, uka tratadompisti Oraqpachanwa yatiyasirakïna. Uka tiempotakejja, jiwatanakajj jaktanipjjaniwa sasin Bibliajj yatichki uk jaqenakajj istʼirjamäjjapjjänwa, ukatsti waljanirakiw uka tratadsa katoqasipjjäna. Cheqas costumbrenakasa, religionanakas sapa markanwa mayj mayjajja, ukatwa kunapachas parlañasa uk amuytʼañasa.

9. ¿Kunapachas amuytʼasis parlañasa?

⁹ Awisajja, janïr parlkasajj amuytʼasiñaw wakisi. Sañäni, maynitï arumpi chuym ustʼayistaspa ukhajja, ¿kunsa lursna? Inas akham jisktʼasiñajj wakischispa: “¿Chuyma ustʼayañ amtampit uka arunak sispacha? Jan ukajj ¿kuntï arski uka arunakajj jan walipuniti?” sasa. Ukham amuytʼasin arsuñ wakisitap amuystan ukhajja, janiw coleratajj arsuñasäkiti (Proverbios 15:28 liytʼañataki). Diosar jan serviri familiaranakasaru arunakasamp jan usuchjañatakejj ukhamarakiw parlkasajj amuyasiñasa. Jupanakajj Jehová Diosar uñtʼapjjaspa ukwa muntanjja. Ukatwa jupanakamp parlasajj paciencianïñasa. Cheqas amuytʼasis parlañäni ukhajja, chuymanakaparuw purtʼañäni. Ukhamajj kuna arunakamp parlañas wakisispa uk jichhajj yatjjatañäni.

10. 1) ¿Kunatsa suma arunak parlañasa? 2) ¿Kunjam parlañatsa amuyasiñasa?

¹⁰ Arunakasampejj maynir yanaptʼsnawa, jan ukajj jan waltʼayaraksnawa (Proverbios 12:18 liytʼañataki). Supayan apnaqat akapachanjja, jaqenakat jila partejj chuyma ustʼayir arunakwa parlapjje. Cheqas kuntï peliculanakansa, televisionansa uñchʼukipki ukarjamaw jan wali arunak parlapjje. ‘Jupanakajj espadar uñtatwa lajjranakap ariptayapjje’, arsutanakapajj flechanakar uñtatarakiwa (Sal. 64:3). Cristianonakajj janiw uka jaqenakjamäñasäkiti. Janiw yaqhanakar laruyañ laykukejj mayninakat sawkasis parlañasäkiti. Inas maynejj akham amuychispa: ‘Uka arunakajj aleq sawkakiwa’ sasa. Ukampis janiw ukhamäkaspati, mayninakaruw chuym ustʼayaspa. Lartʼasiñatak sawktʼasiñajj walikïskiwa, ukampis yaqhanakar mayninakat jan wal parlas laruyañaw jan walïkiti, ukanakat amuyasiñasawa. Bibliajj siwa: “Jan wali arunakjj jan parlapjjamti, jan ukasti suma arunakamp parlapjjam, ukhamata istʼirinakamajj jiltañana yanaptʼatäñapataki” sasa (Efe. 4:29, 31).

11. ‘Kunatï chuymanakaman utjki ukanakwa’ arsupjjta sasajja, ¿kunatsa Jesusajj sispachäna?

¹¹ Jesusajj akham sänwa: “Jumanakajj arsupjjtawa kunatï chuymanakaman phoqhantatäski ukanaka” sasa (Mat. 12:34). Uka arunakajj cheqapunïskiwa, kunatï chuymasan utjki ukarjamaw parltanjja. Chuymasantï mayninakar munasiñasa, khuyaptʼayasiñas utjchi ukhajja, arunakasajj ukhamarakïniwa.

12. ¿Kunsa ‘suma arunak jikjjatañatakejj’ lursna?

¹² Suma arunakajj janiw chuymatak mistuñapäkiti, jan ukasti amuytʼasisaw parlañasaraki. Salomón reyejj ukhamwa luräna, jupajj wali yatiñanïkchïnsa “taqe toqetwa suma arunaka jikjjatañatak thaqäna” ukhamat suma arunakampi qellqañataki (Ecl. 12:9, 10). Jiwasatakitï ‘suma arunak jikjjatañajj’ chʼamächi ukhajja, ¿kunsa lursna? Jukʼampi arunak yateqañaw wakisispa. Biblia liyisa ukhamarak Bibliat apstʼata qellqatanak liyisaw jukʼamp arunak yateqsna. Liykasintï jan uñtʼat arunak jikjjatañäni ukhajja,  kamsañsa uka arunakajj muni ukwa yatjjatañasa. Ukatjja, uka arunakjja mayninakar yanaptʼañatakiw apnaqañasa. Jehová Diosajja, Jesusarojj suma arunakampi mayninakar chuymachtʼañwa yatichäna sasaw Bibliajj qhanañchi (Isa. 50:4). Janïr parlkasatï amuytʼasiñäni ukhajja, suma arunakampi parlañajj janiw chʼamäkaniti (Sant. 1:19). Akham jisktʼasiñaw wakisispa: “Kuntï arsuñ munkta ukjja, ¿mayninakajj amuyapjjaniti? Uka arunak istʼasajja, ¿mayninakajj kunjamsa jikjjatasipjjani?” sasa.

13. ¿Kunatsa qhana arunakamp parlañasa?

¹³ Nayra Israel markanjja, tantachasiñatakisa, enemigonakamp nuwasiñatakisa, mä cheqat yaqha cheqar sarjjañatakisa, trompetaw phustʼasirïna. Amuytʼañataki, mä nuwasïwintï trompetajj kunatakis phustʼasi uk soldadonakajj jan amuyapkaspäna ukhajja, soldadonakajj janiw kun lurañs yatipkaspänti. Ukajj janipuniw akchʼas walïkaspänti. Jiwasampejj niya ukhamarakiwa, arunakasatï jan qhanäkaspa ukhajja, istʼirinakasajj janiw sum amuyapkaspati. Cheqas qhana arunakamp parlasajj janiw chuyma usuchjir arunakampi parlañasäkiti (1 Corintios 14:8, 9 liytʼañataki).

14. ¿Kunatsa Jesusan arunakap amuytʼañajj jan chʼamäkäna?

¹⁴ Jesusajj suma arunakampiw parlirïna, jupjam yaqhajj janiw utjkänti. Mateo 5 jaljat 7 jaljanakan Jesusan Wali uñtʼat arstʼäwipajj jikjjataski uka toqet amuytʼañäni. Arstʼäwipanjja, Jesusajj janiw jan amuykaya, chuyma ustʼayir arunakamp parlkänti, jan ukasti chuymar purtʼkiri, qhana amuykaya arunakampiw parläna. Amuytʼañataki, jaqenakajj manqʼa jikjjatañ toqet jan sinti llakisipjjañapatakejja, akham sänwa: “Uñtapjjam jamachʼinakajj jalaski uka, janiw jupanakajj satapkis ni apthapipkarakisa, janirakiw juyranaksa pirwanakarus imapkiti, ukampis alajjpachankir Awkimaw ukanakarojj manqʼayi. Uka jamachʼinakat sipansa jumanakajj jukʼamp munatäpjjtawa” sasa (Mat. 6:26). Kunjamtï uñjktanjja, Jesusajj amuykaña qhana arunakampikiw jaqenakan chuymanakapar purtʼäna. Jichhajja, kunjam arunakamp parlañas wakisispa uka toqet amuytʼarakiñäni.

15. ¿Kunatsa suma arunakamp parlañasa?

¹⁵ Kuna arunaksa arsuñäni uk amuyañasawa, ukampis janiw ukak amuyasiñasäkiti, jan ukasti kunjamsa arsuñäni uksa amuytʼañasarakiwa. Kunapachatï Jesusajj Nazaretankir sinagogan yatichkäna ukhajja, arunakap istʼasajj walpun jaqenakajj muspharapjjäna (Luc. 4:22). Cheqas suma arunakajj mayninakaruw yanaptʼaspa, chuymanakaparus purtʼarakispawa (Pro. 25:15). Jiwasajj Jesusat yateqasiraksnawa. ¿Kunjamsa? Jan chuym ustʼayasaw suma arunakamp parlañasa. Nayra tiemponjja, jaqenakajj Jesusan arunakap istʼir sarañatakejj wal chʼamachasipjjäna. Uk amuyasasti Jesusajj jupanakat khuyaptʼayasisaw “walja yatichäwinak yatichañ qalltäna” (Mar. 6:34). Enemigonakapajj jan wali arunakamp toqepkäna ukhasa, Jesusajj janiw jan wali arunakamp kuttʼayirïkänti (1 Ped. 2:23).

16, 17. 1) Jesusat yateqasisajja, ¿kunjamsa familiaranakasampisa, amigonakasampis parlañasa? (18 janankir foto uñjjattʼam.) 2) Kunjamsa mä kullakajj suma arunakamp parläna uk qhanañchtʼam.

¹⁶ Khitinakarutï sum uñtʼktan ukanakar suma arunakampi parlañasa, amuytʼasis parlañas chʼamakïspawa. Cheqas tamasankir mä munat amigosarusa, jan ukajj familiaranakasat maynir sum uñtʼjjtan ukhajja, jan ajjsarasakiw kuns jupar sissna. Jesusat amuytʼaskakiñäni, apostolonakapampejj wali sumwa apasïna, ukampis ukhamätap laykojj janiw  jan wali arunakamp jupanakar parlirïkänti. Apostolonakapajja, khitis jilïrejj sasin sapa kutis chʼajjwapjjerïkchïnjja, wali amuyumpiw Jesusajj cheqañchirïna. Altʼat chuymanïñajj kunja wakiskirisa ukjja, mä jiskʼa yoqall wawat amuytʼayasaw yatichäna (Mar. 9:33-37). Jesusat yateqasisajja, irpir chuymaninakajj ukhamarakiw jilat kullakanakarojj suma arunakamp ewjjtʼapjjañapa (Gál. 6:1).

¹⁷ Maynejj arunakamp chuym ustʼayistani ukhajja, janïr arskasajj sumwa amuytʼasiñasa, ukatsti suma arunakampiw kuttʼayañasa, ukham lurasajj coler apaqsnawa (Pro. 15:1). Amuytʼañataki, mä tamanjja mä kullakajj sapakiw wawapar uywäna, uka wawapasti jamasatwa jan walinak luräna. Uk uñjasajja, chʼamañchtʼañ munasajj akham sasaw mä kullakajj säna: “Wawamarojj janiw sum uywawayktati, ukajj llakkañawa” sasa. Ukham satajja, kullakajj sum amuytʼasisin akham sänwa: “Wawajajja, janiw kunjamtï nayajj munkayäta ukham jilsuwaykiti, ukampis yanaptʼaskakiristwa. Sumti uywawayta janicha ukajj Armagedón qhepatwa yatisini, ukhaw wasitat jisktʼitasma” sasa. Ukham suma arunakampi kuttʼayañajja, janiw uka kullakamp sum apasiñatakik yanaptʼkänti, jan ukasti wawaparus amuytatasiñapatakiw yanaptʼäna. Jupajj taykapan suma arunakap istʼataynawa, ukatwa jan wali amigonakapampejj jan sarnaqjjänti. Tiempompejj bautisasjjänwa, Betel Utansa mä qawqha tiempojj serviwayarakiwa. Ukhamajj jilat kullakanakampisa, familiaranakasampisa, jan uñtʼatanakampisa, suma arunakampipuniw parlañasa (Col. 4:6).

18. ¿Kunjamsa Jesusat yateqasitas uñachtʼaysna?

¹⁸ Kunjamsa jikjjatastan kunsa amuytan uk yaqhanakar sañajj Diosan mä suma regalopawa. Ukhamajj Jesusat yateqasipjjañäni, ukatakisti kunapachas parlañasa, kuna arunakampis parlañasa, kunjamsa parlañasa uk sum amuytʼapjjañäni. Ukhamatwa Jehová Diosajj parltʼasiri lurtʼawaykistu ukaru wali askit uñjatas uñachtʼayañäni, ukatsti yaqhanakarus yanaptʼarakiñäniwa.