¿Jumajj amttati?
¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼma:
¿Akapachajj tukusjjani ukhajj kunanakas jan utj-jjani?
Mä qawqhajj akanakawa: janiw akapach gobiernonakasa, guerranakasa, tʼaqhesiñanakasa, jan walinakasa, kʼari religionanakasa, jan wali lurir jaqenakas utj-jjaniti (5/1, 3-5 jananaka).
Ezequiel qellqatan Magog markat Gog satäkis ukat parlki ukajj ¿khitïpachasa?
Magog markat Gog satäkis ukajj janiw Supayäkiti, amuyatajj mayachtʼat walja markanakawa. Jachʼa tʼaqhesiña urojj qalltkani ukhajja, uka mayachtʼat markanakaw Diosan markapar tukjañ munani (5/15, 29, 30 jananaka).
Chuymankipstkasajj ¿kunjamsa kusisit jakassna?
Bibliajj siwa: 1) llampʼu chuymanïñasawa, 2) amuytʼasirïñasawa, 3) kusisitäñasawa, 4) wajjtʼasirïñasawa, 5) munasirïñasawa, 6) yuspärasirïñasawa. Ukanakaw chuymankipstasin kusisitäñatak yanaptʼistani (6/1, 8-10 jananaka).
¿Kuna milagronakas Jesusan khuyapayasirïtap uñachtʼayi?
Caná markanjja, mä casarasïwin walja litro umwa vinor tukuyäna. Yaqha urusti mä milagro lurasajj 5.000 jila jaqenakaruw manqʼa churarakïna (Mat. 14:14-21; Juan 2:6-11). Uka milagronak lurasaw Jesusajj Awkipjama khuyaptʼayasirïtap uñachtʼayäna (6/15, 4, 5 jananaka).
¿Pantjasir jaqenakajj Diosar kusisiysnati?
Job, Lot, David ukhamarak Diosar yaqha servirinakasa, walja kutiw pantjasipjjäna. Ukampis taqe chuymaw Diosar istʼañ munapjjäna, juchanakapatsa arrepentisipjjänwa, jan wali jakäwipsa jaytapjjänwa, ukajj Diosar wal kusisiyäna. Jiwasajj jupanakjamaw luraraksna (7/1, 12, 13 jananaka).
Jachʼa tʼaqhesïwinjja, ¿kʼari religionanakar saririnakajj taqenit tʼunjatäpjjpachäni?
Janjamakiw taqenejj tʼunjatäpkaniti. Zacarías 13:4-6 qellqatarjamajja, kʼari religionar saririnakat yaqhepajja janiw religionapar sarjjapjjaniti, ukatsti janipunis kunapachas kʼari religionanakar sarapkaspäna ukhamwa sapjjani (7/15, 15, 16 jananaka).
Barac chachajja, ¿kunatsa Débora warmimp chika sarasinak nuwasiñ munpachäna?
Barac chachajj wali iyawsäwinïnwa. Nuwasiñ armanak Diosar mayiñat sipansa, Diosan mä serviripampiw sarañ munäna, ukatsti Barac chachajj jupar yanaptʼir chachanakampiw sarañ munarakïna (Jue. 4:6-8; 5:7) (8/1, 13 jana).
¿Kuna toqenakatsa mä cristianojj lupʼiñapa?
Diosan luratanakapata, Arupata, Jupar mayisiñata, Jesusan jiwatapata, yaqha ukham toqenakampita (8/15, 10-13 jananaka).
¿Cristiano solteronakajj khitinakampis casarasiñatakejj jan parlapjjañapäki?
Taqeniruw munasiñampi uñjtanjja, ukampis jan bautisata, Diosar jan taqe chuyma servirinakampejj janiw parlañasäkiti (1 Cor. 15:33) (8/15, 25 jana).
¿Kunjamsa Pedrojj iyawsäwin aynachtʼäna, ukat kunjamsa wasitat iyawsäwin saytʼasïna?
Pedrojj uma patanjam Jesusan ukar sarasaw iyawsäwinïtap uñachtʼayäna (Mat. 14:24-32). Ukampis thayajj wal thaytʼasinkatap uñjasajj sustjaskchïnsa, Jesusar wasitat uñtasaw jupamp yanaptʼayasïna (9/15, 16, 17 jananaka).
Hechos 28:4 qellqatarjamajja, ¿kunatsa Malta markankirinakajj apóstol Pablojj jaqe jiwayiriw sasin amuyapjjäna?
Pablorojj mä katariw amparat achjäna, uk uñjasaw ‘cheqapar uñjiri Dike (Dicea) diosaw castigaski’ sasin sapjjäna (10/1, 9 jana).
Martan yaqha lurañanakar chuyma uchatapatjja, ¿kunsa yateqsna?
Mä kutejja, Martajj suma manqʼa phayañaruw chuym uchäna. Jesusajj Martar sänwa: “Mariajj sumïrïkis ukwa ajllisi, janirakiw ukjj khitis apaqkaniti” sasa. Jichhürunakanjja, ukhamarakiw kunanakatï Diosar serviñat tiempo apaqkistaspa ukanakat amuyasiñasa (10/15, 18-20 jananaka).