Aka revist liytʼirinakan jisktʼäwinakapa

¿Kunjamsa cristianonakax pampankir qutankir animalanakar katuñ uñjapxañapa?

Animanalanak katuñax Bibliarjamax janiw juchäkiti (Deuteronomio 14:4, 5, 9, 20; Mateo 17:27; Juan 21:6). Ukampis khitinakatï ukham katur sarapxirïchi uka jilat kullakanakax Qullan Qillqatanakan jikxataski uka yatichäwinakapwa uñxattʼapxañapa.

Noé chachasa wawanakapasa manqʼañatakix animalanak katupxirïnwa, ukampis Diosax janïr manqʼkasax wilap apsupxäta sasaw säna (Génesis 9:3, 4). Ukhamax kunjamtï siskixa, animalanakan jakäwiparux respetasiñapänwa, kunattix Diosan uchatawa. Ukatwa cristianonakax animalanakar respetapxi, janiw anatañ laykusa, ni kʼuchistʼañ laykukis jiwayapkiti (Proverbios 12:10).

Ukampis kunjam chuymampisa katur sartan uka tuqit amuytʼañaw wakisispa. Kawkïr apostolanakatix chʼawlla katuñ wal yatipkäna uka apostolanakaxa, walja chawlla katusax wal kusisipxirïpachäna. Ukampis jupanakax janiw katuñ yatisax jachʼa jachʼa tukupxirïkpachänti, ukat katurixa, janiw atipañ layku, chacha chach tukuñ layku sarapxirïkpachänti; ukat janiw animalanakampi nuwasisasa, ni alisnaqasasa, ni jiwayasasa kusisipxirïkpachänti (Salmo 11:5; Gálatas 5:26).

Ukhamax mä cristianox akham jisktʼasiñapawa: “¿Kunjamtï Jehová Diosax jakañar uñjki, ukhamti respetasktxa? ¿Animalanak katuñakiti amuyujankaski, ukat ukatakti parlasktxa? ¿Animalanak katurjamati sapürus sarnaqtxa jan ukax Diosan luqtiripjamacha sarnaqtxa? Animalanak katur sarañ laykuxa, ¿Diosar jan iyawsir jaqinakampiti sarnaqtxa ukat familiajat amtasiskti?” sasa (Lucas 6:45).

Kunapachatï animalanak katuñ urux purinki ukhaxa, yaqhip jilat kullakanakaxa, manqʼañatakiw animal katur sarta sasaw walïskaspas ukham tantachäwinaksa, Diosatak yaqha luräwinaksa jaytawayapxi. Ukampis yaqha lurañanakat sipansa, Diosan Apnaqäwip nayrar uchasaw Diosar iyawsatassa atinisitassa uñachtʼaytanxa (Mateo 6:33). Ukat cristianonakjamaxa, animal katuñ tuqit Cesaran taqi kamachinakaparuw istʼtanxa, autoridadanakax phuqayasipkpansa janis istʼaskaktanwa (Mateo 22:21; Romanos 13:1).

Jehová Diosax animalanak katuñ tuqitxa kamsisa uk yatxasaxa, yaqhipanakax inas Diosan arunakaparjam lurxapxchini (Efesios 4:22-24). Ukampis kunjamxay chuymanakaparjam amtapxchini uk respetapxañasawa. Ukatakix apóstol Pablon akïr iwxaparuw istʼapxañasa: ‘Jan jiwasanakanx maynit mayniru jiskʼachasiñax utjpanti, ukat sipansa jan munapxamti jilaman lanktañapxa kunäkipansa, ni jucharus puriyapxarakimti’ sänwa (Romanos 14:13). Ukham munasiña ukat respeto uñachtʼayañänixa, jilat kullakanakasampix sum apasiñäni, ukat taqi jakirinakar jakañ Churir Awkisarus kusisiyarakiñäniwa (1 Corintios 8:13). *

[Qhanañchäwi]