Cristianonakax trigorjam wali susjataw uñjasipxi

JESUSAX janïr jiwkasaxa, arkirinakaparux akham sasaw iwxäna: ‘Akaxay Satanasawa jumanakaru trigorjama susurañataki mayipxtam’ sasa (Luc. 22:31, MT). ¿Kamsañs munpachäna?

Jesusax jakkäna uka tiemponakanxa trigo yap apthapiñax wali chʼamänwa ukat tiempotakirakïnwa. Nayraqatxa, yapuchirinakax trigo yawthapisax mawjaruw apthapipxirïna. Ukat tikantat uraqiruw jawqʼsupxirïna, jan ukax trillañatak satäkis ukas qatattʼat uywanakampiwa trigor taksuyapxirïna, ukhamat paja apsxañataki. Ukxaruxa, khuyurapxarakirïnwa, ukhamat thayax jipinak apasxañapataki. Ukat tukuyxañatakixa, susuñampiw qalanak susunukuñatakix wal susjapxirïna.

Kunjamtï Jesusax siskänxa, Supayax nayrïr cristianonakarux jan sinttʼasisaw tʼaqhisiyäna, ukat jichhürkamas ukham tʼaqhisiyaskakiwa (Efe. 6:11). Supayan utjatapatwa jan walinakan uñjastanxa, ukat janiw taqpach jan waltʼäwinakax Supayan utjayatäkapuniti (Ecl. 9:11). Ukampis Supayax Diosat wal apaqañ munistu, ukatakix kunayman tuqitwa yantʼistu. Sañäni, Supayax qullqi chuym jakañaruw wiytistaspa, jan walinakampi kʼuchirtʼañanakaruw apistaspa jan ukax qʼañu lurañanakampiw yantʼistaspa. Ukat yatiqiri jan ukax irnaqiri masinakasampi ukat jan Diosar iyawsir familiaranakasampiwa akapach yatiñ utanakaru, akapach jan wali irnaqäwinakaru arkañasatakix nuktʼistaspa. Ukatxa, jaqimpi uñisiyasawa juchar puriyistaspa. Ukhamanakatwa Supayax trigorjam wal susjistuxa, ukampis janiw ukakïkaniti, jan ukasti walja sipitanakanïskiwa.

¿Kunjamatsa aka uñisirin yantʼanakapar saykatsna? Janiw chʼamasampix kamachksnasa, kunattix Supayax jiwasanakat sipansa jukʼampi chʼamaniwa. Ukampis Jehová Diosax Supayat sipansa jukʼamp jachʼa chʼamaniwa. Ukhamax Dios Awkisar taqi chuymampi atinisipxañäni. Aguantañatak munktan uka chʼamsa, yatiñsa jupar maytʼasipxañäni ukat taqi kunansa arunakaparjam arkapxarakiñäni. Jupaw uñisirisan yantʼanakapar saykatañatakix chʼam churistani (Sal. 25:4, 5).

Yantʼan uñjaskañäni ukhaxa yatxañasawa “kunatïx walïki, jan walïkaraki uk uñtʼañsa”, ukhamatwa Supayan sallqjäwinakapatxa amuyasiñäni (Heb. 5:13, 14). Jehová Diosan yanaptʼapampiw walïki jan walïki uk uñtʼañ yatiqañänixa, ukhamatwa suma amtäwinakarus purirakiñäni. Kun lurañ amtasasa ukarjamaw jan payachasis lurañasa. Jehová Diosan yanaptʼäwiparutï atinisiskakiñänixa, jupax kunatï askïki uk lurañ amtatasarux yanaptʼaskistaniwa (Efe. 6:10).

Supayax trigorjam wal susjañxa yantʼistaniwa. Ukampis Jehová Diosaw Supayan yantʼanakapar saykatañatakix chʼam churistani ukat iyawsäwisan saytʼatäskañasatakix jupaw chʼamañchistani (1 Ped. 5:9). Jehová Diosan Arupanxa akham sistuwa: “Supayatakisti saytʼasipxarakim, uka Supayasti jumanakatxa jaltawayxarakiniwa” sasa (Sant. 4:7).