Jakañ uma jalsunakar irpatäñataki askit uñtʼat jaqinaka
Jakañ uma jalsunakar irpatäñataki askit uñtʼat jaqinaka
‘Corderowa jupanakarux awatxani, jakañ uma jalsunakarurakiwa jupanakarux irpani.’ (APO. 7:17, MT.)
1. ¿Biblianxa kunjam uñtʼatäpxisa ajllit cristianonakaxa, ukat kun lurapxañapatakis Jesusax uttʼayäna?
CRISTON taqi kunatix aka Uraqin utjki ukanak apnaqir ajllit jilat kullakanakaxa amuyasiri chiqapa ‘uywatawa’ sasinwa Diosan Arupax qhanañchistu. Ukat kunapachatï Utanixa, mä arunxa, Jesusax 1918 maran ‘uywatapan’ luratap uñjäna ukhaxa, “taqi utankkis ukanakar horasapar manqʼanaks” churaskirwa jikxatäna, ukhamax “taqi kunatix jupan utjki ukanakxaruw” uñjirit uttʼayäna (Mateo 24:45-47 liytʼasiñapawa). Ukatwa, ajllit cristianonakaxa janïr alaxpach churäwi katuqkasax jilat kullakanakapar yanaptʼasipki (Mal. 3:1-3).
2. ¿Kunanakas Jesucriston yänakapjam uñtʼataxa?
2 Mä utanix yänakapsa, jan ukax utjirinakapsa munañaparuw kunatakis aptaspa. Jehová Diosan apnaqirjam uttʼayata Jesucriston yänakapaxa, aka Uraqin Diosan Apnaqäwip layku uttʼayatäkis ukanakawa. Apóstol Juanax mä visionan “walja jaqinaka” uñjkäna uka jaqinakax Criston yänakapjam jakhutäpxarakikiwa, uka tuqitxa Pablox akham sänwa: “Ukatsti uñjaraktwa walja jaqinaka taqi markanakata, kunayman janchini, ukhamarak taqi casta parlani. Jupanakasti trono nayräxan ukhamarak Corderon nayraxäpan saytʼatäsipkänwa. Waljanïpxapunïnwa, janirakiw khitis jaktʼkaspati, janqʼu isinkamakïpxänwa, amparanakaparux palmanakas aytʼatkamakirakïnwa” sasa (Apo. 7:9).
3, 4. ¿Kuna wali aski luräwinakanïpxisa “walja jaqinaka” satäkis ukar jakhut jaqinakaxa?
3 Jesusax “yaqha ovejanakaxa” utjarakituwa siskäna uka taypin “walja jaqinaka[x]” jakhutäpxiwa, ukat wiñay wiñayatakiw aka paraíso Uraqin jakasipxani (Juan 10:16). Jesusax ‘jakañ uma jalsunakaruw anakistani’ ukat Diosasti ‘taqi jachanakaswa nayranakasat phiskurxistani’ sasaw uka jaqinakaxa atinisipxi. Ukatwa, ‘isinakapxa Corderon wilapampi tʼaxsusaxa janqʼuptayasipxi’ (Apo. 7:14, 17). Ukham Jesusan luqtasïwiparu iyawsapxatapatxa, Dios nayraqatanxa janqʼu isinïpkaspasa ukhamäpxiwa. Ukat Abrahamarjamarakiwa Diosax jupanakarux amigonakapjam aski jaqinakat uñtʼaraki.
4 Niyakixay yaqha uwijanaka taypin jakhuta aka “walja jaqinaka[x]” aski jaqinakat uñtʼatäxapxchixa, akapachax ‘wali jachʼa llakinakampi’ tukuskani ukhaxa jupanakax jakkiriw pasapxani ukaruw atinisipxi (Sant. 2:23-26). Ukat Jehová Diosaruw jakʼachasipxaspa ukat Armagedón sat jachʼa nuwasïwinsa tamjamax jakkiriw pasapxaspa (Sant. 4:8; Apo. 7:15). Ukampis jupanakax janiw yaqhanakäpkaspas ukham sarnaqapkiti. Jan ukasti, alaxpachankir Jesusan ukhamaraki aka Uraqin jiltʼir jilatanakapan apnaqataxa taqi chuymaw Diosar yupaychapxi.
5. ¿Kunjamsa Criston ajllit jilatanakaparux “walja jaqinaka” satäkis jupanakax yanaptʼapxi?
5 Ajllit cristianonakax Supayan ñanqha pachapanxa sinti uñisitapuniw sarnaqapxi. Ukampis yaqha uwijanak satäpkis uka cristianonakaw yanaptʼasipki. Ukat aka Uraqin jiltʼir ajllit cristianonakax jukʼanikïxchisa, ukampis “walja jaqinaka[x]” sapa maratjamwa jukʼampi waranq waranqanakax jilxattaski. Ukat ajllit cristianonakatakixa janiw 100.000 sapa tamar aka uraqpachan uñjañjamäxiti, jukʼanikïxapxatap layku. Ukhamax “walja jaqinaka” taypitwa suma wakichtʼat jaqinakarux uttʼayasi, ukhamat jupanakax tamanakar uñjapxañapataki. ‘Amuyasiri chiqapa uywatar’ Jesusax uñjätaw siskänsa ukhamarjamaw aka jilatanakax millón millón cristianonakar uñjañ yanapapxi.
6. Yaqha uwijanakaw ajllit cristianonakarux yanaptʼani sasaxa, ¿kunjamsa uka tuqit qillqasiwayatayna?
6 Yaqha uwijanakaw ajllit cristianonakarux yanaptʼani sasax nayratpachwa Isaías profetax qillqatayna, akham sasa: “[Jehová] Tatitusti Israelarux siwa: ‘Egiptonkir yapu lurir jaqinakasa, Etiopiankir alakipa jaqinakasa, Sabá chiqankir jachʼa jaqinakasa, jumaruw altʼasipxätam, juman esclavonakamarakïniwa, juman qhipäxamwa cadenampi ñachʼantata sarapxani’” sasa (Isa. 45:14). Kawkïr cristianonakatix aka Uraqin jakañ suyasipki ukanakaxa, uywata kastampiru ukat Jilïr Irpirinakapampiruw arkapxi. ‘Esclavonakjamax’ yaqha uwijanakax taqi chuymaw chʼamapsa yänakapsa qullqipsa yatiyir sarañ laykux aptapxi, kunattix ukham lurapxañapatakiw Cristox aka Uraqinkir ajllit jilat kullakanakaparux jaytawayäna (Hech. 1:8; Apo. 12:17).
7. ¿Kunatakis “walja jaqinaka” satäpkis ukanakax wakichasisipki?
7 Ajllit cristianonakar yanaptʼasaxa, “walja jaqinaka” satäkis ukanakax Armagedón pasatat aka Uraqin nayrïr jakirinakäpxañapatakiw wakichasisipki. Jupanakax chʼullqi ukat suma uttʼatäpxañapawa, janiw istʼasirinakakïpxañapäkiti, jan ukasti Utanin arunakaparjamax taqi chuymaw lurapxañapa. Jesucristo Apnaqirisan amparapanxa kun luriritakis askïsna uk uñachtʼayañatakix taqiniruw tiempox churasi. Jichhatï iyawsäwi uñachtʼayañäni ukat janirak jithiqtkañäniti ukhaxa, jutïrpachanxa jupan mayitanakapxa istʼañäniw ukwa ukham lurasax uñachtʼaytanxa.
“Walja jaqinaka” satäpkis ukanakax iyawsäw uñachtʼayapxi
8, 9. ¿Kunjamanakatsa “walja jaqinaka” satäpki ukanakax iyawsäwip uñachtʼayapxi?
8 Ajllit cristianonakan yanapirinakapax walja tuqinakatwa iyawsäwip uñachtʼayapxi. Nayraqatxa, Diosan Apnaqäwipan suma yatiyäwinakap yatiyasawa iyawsäwi uñachtʼayapxi (Mat. 24:14; 28:19, 20). Ukatxa, Uraqpachan uñjiri Jilïr Irpirinakarus jaysapxarakiwa ukhamatwa iyawsäwip uñachtʼayapxaraki (Heb. 13:17; Zacarías 8:23 liytʼasiñapawa).
9 Ukxaruxa, Diosan yatichäwinakaparjamaw sarnaqapxaraki, ukhamatwa ajllit jilat kullakanaka parux yanaptʼapxi. “Munasiña, kusisiña, samaraña, llampʼu chuymanïña, taqimpis sumankaña, khuyapayasirïña, taqi kunansa phuqhirïña [jan ukax ‘iyawsaña’, MT], llampʼu chuymanïña, janchin munañapar atipjaña” ukhamarjam sarnaqañatakiw chʼamachasipxi (Gál. 5:22, 23). Chiqansa, jichhürunakanxa janiw ukham sarnaqañax utjxiti, antisasa “jan wali luräwinakan qhipap” arkañanakakiw utjxi. Ukampis “walja jaqinaka” sas uñtʼatäpki ukanakax janipuniw “wachuqa jucha lurañanaka, qʼañu lurañanaka, vicionaka, idolonakaru yupaychañanaka, layqasiñanaka, uñisisiñanaka, quejanakan sarnaqañanaka, celasiñanaka, colerasiñanaka, jupa pachpatak munañanaka, tʼaqaqtasin yaqha tamanaka tukuñanaka, envidiasiñanaka, jaqi jiwayañanaka, machañanaka, jiljas manqʼañanaka, akanakaru uñtat” yaqha lurañanakan sarnaqapkaspati (Gál. 5:19-21).
10. Walja jaqinak taypin jakhutanakjamaxa, ¿kuns chuymatpach amtawaytanxa?
10 Niyakixay juchan jaqinakästanxa, ajayun luräwiparjam sarnaqañasa, jan wali luräwinak apanukuñasa, ukat Supayan pachapampi jan atipjayasiñatak chʼamachasiñasa chʼamawa. Ukhamäkipansa, chʼamachtʼasiskaktanwa; janiw iyawsäwisas Jehová Diosar munasiñasas thayarañapkamax chʼam laqʼjtayaskañäniti, janiw pantjasïwinakasampisa, lanktäwinakasampisa, jan ukax janchi tuqin jan waltʼäwinakampisa chʼam laqʼjtayaskañäniti. Kunapachatï wali jachʼa llakinakax jutkani ukhaxa, Jehová Diosax “walja jaqinaka” satäpkis ukanakarux aruparjamaw qhispiyani.
11. Cristianonakan iyawsäwip aynachtʼayañatakixa, ¿kuna sipitanaksa Supayax apti?
11 Chiqpachansa wali amuyumpiw sarnaqtanxa, kunattix Supayaw uñisirisaxa, jupax janiw jaytkistaspati, jan walir puriyañatakix chʼamachasiskakiniwa (1 Pedro 5:8 liytʼasiñapawa). Amuytʼañataki, Supayax Diosan markapat jaqsutäpki uka jaqinakampiw ‘uywatan’ yatichäwinakapax kʼarïkaspas ukham parlayi ukat yaqha tuqinakampitwa ukham luraraki. Ukampis inamayakiw ukham parlayaski. Ukat arknaqañanak uñstayaraki, ukham lurasax awisax yatiyir sarañ jarkʼkchisa, ukampis ukham arknaqatax jilat kullakanakasax iyawsäwinsa jukʼamp chʼullqinchataw jikxatasipxi. Ukatwa, Supayax yaqha sipit jichhax apnaqi, mä arunxa, sapakutitjamwa jukʼampi jilat kullakanakar chʼam laqʼayki. Ukhamatwa iyawsäwis aynachtʼayañ muni. Nayrïr cristianonakax chʼam laqʼayasiñax kuna jan walirus aptʼaspa ukxa sum yatipxäna. Ukat Jesusan uñachtʼäwip ‘wali amuyumpi’ uñtapxañapatakiw jupanakarux iwxasïna, kunattix ‘jupax juchararanakan tʼaqhisiyatasa aguantaskakïnwaʼ. ¿Kunatsa uñtapxañapäna? ‘Jan qaripxañapataki jan chuymanakapan thayjtapxañapataki’ (Heb. 12:3, MT).
12. Chʼama laqʼäktan ukhaxa, ¿kawkïr qillqatanakas chʼam jikxatañ yanaptʼistaspa?
12 ¿Jaytxä sas lupʼirïtati? ¿Jan phuqirjamäxasin llakisirïtati? Ukhamächi ukaxa, amuytʼasïtawa, ukatarak Supayax Jehová Diosar luqtañamat ukhaman uñjasax apaqaskiristma. Bibliat wali sum yatxatañäni, taqi chuyma Diosat maytʼasiñani, taqpach tantachäwinakar sarañäni, ukat jilat kullakanakasamp chika sarnaqañäni. Taqi ukanakaw chʼamañchätamxa ukat janiw ‘chuymamansa thayjtkätatiʼ. Jehová Diosax nayaw yupaychirinakajarux wasitat chʼama jikxatapxañapatakix yanaptʼäxa sasaw säna, ukat arsutanakapax phuqasipuniwa (Isaías 40:30, 31 liytʼasiñapawa). Diosan Apnaqäwip layku jan inaktʼas irnaqaskakma, jan inamay yaqhanakar tiemp aptʼamti, yaqhanakar yanaptʼañatak chʼamachasisipkakiñäni. Ukhamatwa chʼam laqʼjtatasa aguantaskakiñäni (Gál. 6:1, 2).
Wali jachʼa llakinakatwa mistunipxi ukat paraisoruw mantapxi
13. ¿Kuna luräwinakas Armagedón pasirinakatakix suyaski?
13 Armagedón pasatatxa walja jan aski jaqinakaw jaktanipxani, ukat taqi jupanakarux Jehová Diosan thakinakapat yatichañaw wakisini (Hech. 24:15). Janiw Jesusan luqtasïwipatak qhanañchkañäniti; jan ukasti uka luqtasïwiru iyawsapxañapatakiw yatichapxarakiñäni, kunattix uka luqtasïwitxa askinak apsupxaspaxa. Kuna kʼari yatichäwinakantï nayrax sarnaqapkäna ukanakwa jaytxapxani, ukat jan wali sarnaqäwinakapsa apunukxapxarakiniwa. Ukhamarusa, kunjamäpkitix chiqpach cristianonakaxa ukham suma jaqinakaruw tukxapxani, machaqatsa isthapisipkaspa ukhama (Efe. 4:22-24; Col. 3:9, 10). Armagedonan jakkir pasirinakax walja irnaqäwinakanïpxaniwa. Wali kusiskañapunïniwa ukham Jehová Diosatak irnaqañaxa, janiw khitis kunas aka ñanqha pachanjam jarkʼxistaniti.
14, 15. ¿Kunsa aski jaqit uñtʼatanakax jaktanisax yatiqapxani, ukat kunsa jiwasax jupanakat yatiqañäni?
14 Janïr Jesusax aka Uraqir yatiyir jutkäna uka tiempo nayra jiwarapkäna uka yupaychirinakaxa jaktanisax walja yatichäwinak yatiqapxarakini. Jutaniw sat Mesiasar uñtʼañataki suyasipkäna uk jupanakax yatxatapxani. Jupanakax nayra jakäwipanwa, Jehová Diosan yatichäwinakapar istʼañ munapxatapxa uñachtʼayapxäna. Amuytapxañäni, ¿kunj kusiskañakïkani Danielax jan amuykäna uka profecianakapan phuqasitapat qhanañchtʼañaxa? (Dan. 12:8, 9.)
15 Chiqpachansa, aski jaqit uñtʼat jaktanirinakarux walja yatichäwinaksay yatichapkchiñänixa, ukampis jiwasax jupanakat yatiqasirakiñäniwa. Biblian jan sum qhanañchki uka sarnaqäwit jupanakar jisktʼapxañäni. Amuytʼañäni, ¡wali askipunïniw Bautisir Juanampi Jesús primopat parltʼañaxa! Chiqansa, taqi chuyma luqtir qhanañchirinakat yatiqañaxa, Diosan Arup sum amuyañwa yanaptʼistani. Jehová Diosan luqtiripäkasin nayrapach jiwirinakaxa —ukhamaraki “walja jaqinaka” satäkis uka taypit tukuy urunakan jiwirinakasa— ‘jukʼamp suma jakatatañ’ jikxatapxani. Jupanakax Supayan apnaqat ñanqha pachanwa Jehová Diosarux yupaychañ qalltawayapxi. ¡Jutïrpach paraison wasitat Diosaru yupaychaskakiñax jupanakatakix wali kusiskañapunïniwa! (Heb. 11:35, MT; 1 Juan 5:19.)
16. Biblian profecianakaparjamaxa, ¿Taripäw Urunxa kunas pasani?
16 Bibliarjama ukat Taripäw Urun jistʼaraskani uka libronakarjamaw aka Uraqin jakirinakarux taripasini. Ukhamatakwa, wiñay jakañax maynitak wakisinit janich ukax yatisini (Apocalipsis 20:12, 13 liytʼasiñapawa). Taripäw Urunxa, taqi aka Uraqin jakirinakaruw khiti tuqitsa saytʼasipxani uk uñachtʼayapxañatak tiempox churasini. Diosan Apnaqäwiparux yanaptʼapxaniti ukat ‘jakañ uma jalsunakar irpatax’ Corderorux iyaw sapxaniti, jan ukax Diosan Apnaqäwip contrach saytʼapxani, janich akchʼas istʼapkani ukxa sapa mayniw amtapxani (Apo. 7:17; Isa. 65:20). Taripäw Urux tukuyxani ukhaxa, taqiniw khiti tuqitsa saytʼasiñäni ukxa uñachtʼayxañäni, kunattix Supayan ñanqha pachapas janiw utjxaniti ukat jiwasas jan juchanïxañäniwa. Ukhamaxa, Jehová Diosan taripäwiparux janiw khitis pantjasiw siskaniti. Ukat jan chiqañchkañ kutkatasiri jaqinakax wiñayatak tukjatäxapxaniwa (Apo. 20:14, 15).
17, 18. ¿Kunatsa ajllit cristianonakas ukhamaraki walja jaqinakjam uñtʼatäpki ukanakas Taripäw Uru wal suyapxi?
17 Jichhapachan utjasir ajllit cristianonakax Diosan Apnaqäwipar mantañatak askit uñtʼatäxapxiwa, ukat aka Uraqxaruw Taripäw Urunxa apnaqapxani. ¡Jupanakatakix wali askipunïniwa! Ukham suytʼäwinïsawa Pedron iwxanakaparux istʼapxi, uka arunakampix nayrïr cristiano masinakaparuw iwxtʼäna, akham sasa: “Diosax jumanakar jawsapktam, ukhamarak ajllipktam ukanxa sum saytʼapxañamaxa; jumanakatix taqi akanaka lurapxäta ukkhaxa janipuniw aynachtʼapkätati. Ukhamatwa jumanakarux churasirakini jiwasan qhispiyiri Jesucriston wiñay [apnaqäwipar] qhispita mantapxañamaxa” sasa (2 Ped. 1:10, 11).
18 Walja jaqinakjam uñtʼatäpki uka taypinkirinakaxa, ajllit jilat kullakanakapan ukham suytʼäwinïtapat yatisax walwa kusisipxi ukat taqi chuyma yanaptʼañwa amtapxi. Diosan amigonakapjamaxa, kunaymanitwa Diosar luqtañatakix jichhürux chʼamachasipxi. Taripäw Urunxa, kunapachatï Jesusax jakañ uma jalsunakar irpkani ukhaxa, kusisit taqi chuymampiwa Jehová Diosan mayitanakaparux istʼapxani. Jehová Diosax aka Uraqin wiñay wiñay jakasipxañapataki askit uñtʼani ukhaxa, ¡kunja kusisitaki jikxatasipkani! (Rom. 8:20, 21; Apo. 21:1-7.)
¿Amtasktati?
• ¿Jesusan yänakaparux khitinakas jakhutaraki?
• ¿Kunjamsa walja jaqinakjam uñtʼatanakax ajllit jilat kullakanakapar yanaptʼapxi?
• ¿Kuna askinaksa walja jaqinakjam uñtʼatanakax katuqapxi ukat kunsa suyasipki?
• Taripäw Urut lupʼisaxa, ¿kunjamsa amuyta?
[Jisktʼanaka]
[27 janan fotopa]
Walja jaqinakjam uñtʼatäpki uka jilat kullakanakax isinakap Corderon wilapampi tʼaxsusarakiw janqʼuptayapxi
[29 janan fotopa]
Kunapachatï askit uñtʼat jaqinakax jaktanxapxani ukhaxa, ¿kuna tuqit jisktʼañsa munasma?