¿Taqinix mayachtʼat jakassnati?

¿AKAPACHAX kunarus purtʼasini? ¿Sumankañaruti jan ukax jan walirucha? ¿Kamsasmasa? Uka tuqitxa, waljanix janiw kun sañs yatipkiti.

Ukat politiconakaxa, markanakax jan sumankthapipkaspa ukhax kunarus purtʼasipxaspa uka amuyañat sipansa, aka Uraqpachan taqiniw sumankxañäni sasaw sapxi. Ukampis yaqhipanakaxa, yaqha markanakaw axsarkañ wali jachʼa armamentonakapamp nuwasiñ qalltapxaspa sasaw axsarayasipxaraki. Ukhamäspa ukhaxa, ¿kunakïkaspa jiwasanakatakixa?

Nayrapachanakatpachwa uñisisiñampi jiskʼachasiñampixa, sumankthapiñampi ukat mayachtʼat sarnaqañampirux chhaqtayawayi. Ukat religionanakaxa, chʼaxwankir markanakar sumankthapiyañat sipansa, jukʼamp pitthapiwayi. Ukatwa, James Haught sat periodistax akham säna: “Kunanakatï jaqinakar jaljtayki ukaxa uñisiñ uñstayi, ukat religionawa jaqinakar jukʼamp mä jaljtayirixa” sasa. Ukat saskakïnwa: “Religionaw ‘suma jaqinakaptayi’ sasas taqinis amuyapkchixa, ukampis religionaw yaqhip jaqinakarux jukʼamp sinti jan walinak lurayi” sasin säna. Steven Weinberg sat física tuqit wali yatxattʼat jaqixa niya ukham arsurakikïna: “Suma jaqinakar jan walinak lurayañatakixa, religionaw munasi” sasa.

Ukampis mä tiemponxa sumankañaw utjani, mayachtʼataw jakasxañäni, ¿sasax sissnati? Jïsa. Ukampis kunjamtï jutir yatichäwin yatxatkañänixa, janiw jaqin amtaparjam ukax phuqaskaniti, janirakiw jaqin uñstayat religionasa ukanak apankaniti.

[3 janan qhanañchäwipa]

Akapachaxa, ¿janit aka granada sat armamentjam phallirjamäkpacha?