Jesucristox taqi misioneronakat sipansa jilïr misionerowa

‘Nayax jupat jutta, juparakiw khitanitu.’ (JUAN 7:29.)

1, 2. ¿Kunjamas mä misioneroxa, ukat khitirus taqi misioneronakat sipansa jilïr misionero sasispaxa?

 MISIONERO uka aru parlir istʼasaxa, ¿khititsa amtta? Yaqhipanakax cristianopxtwa siri yaqha yupaychäwinakan misioneronakapatwa amtapxi, jupanakatxa waljanix yaqha markanakar sarasax politicanakaru ukat qullqi apnaqañanakaruw uka markanakan mitisipxi. Ukampis jiwasax Jehová Diosan Qhanañchirinakapjamaxa, Jilïr Irpirinakax aka Uraqpachan suma yatiyäwinak yatiyañapatak khitapki ukanakatwa amtpachätanxa (Mat. 24:14). Kunjamsa Jehová Diosampi sum apasipxaspa ukat kunjamsa Diosar jakʼachasipxaspa ukanakwa yaqha jaqinakarux yatichasipki, ukatakisti jan kun suyasaw uka jilat kullakanakax taqi chuyma tiempsa chʼamsa apstʼasipxi (Sant. 4:8).

² Misionero ukat misioneronaka uka arunakaxa janiw aymar Biblianxa uñstkiti. Ukampis “Diosat katuqat arunak qhanañchaña” sasa Efesios 4:11 siski uka arunakax griego arunxa “misionero” sasaw jaqukipasirakispa. Ukhamasti, Jehová Diosax taqi qhanañchirinakat sipansa jilïr qhanañchirïkchisa, janiw misionerükaspati, kunattix mä misioneroruxa mä luräwi phuqañapatakiw khitasi, ukhamax Jehová Diosarux janiw khitis khitkaspati. Ukampis Jesucristox akham sasaw jupat arsüna: ‘Nayax jupat jutta, juparakiw khitanitu’ sasa (Juan 7:29). Jïsa, Jehová Diosax jaqinakar wal munasisinwa sapa Yuqaparux aka Uraqir khitanitayna (Juan 3:16). Diosax “kunatix chiqäki uk yatiyiri[w]” aka Uraqir khitanirakitayna (Juan 18:37). Ukatwa, juparux taqi misioneronakat sipansa jilïr misionerow sasispaxa. Diosan Apnaqäwipat suma yatiyäwinakapxa wali sumpun yatiyäna, ukatwa misionerjam sarnaqäwinakapatxa jichhakamas askinak apstanxa. ¿Kunjamatsa askinak apstanxa? Amuytʼañataki, misioneroskañänisa janisa, kunjamsa jupax yatichäna ukhamarjamax yaticharaksnawa.

3. ¿Kuna jisktʼanakatsa jichhax yatxatañäni?

³ Kunjamsa Jesusax Diosat katuqat arunak qhanañchäna ukanakat yatxatasaxa aka jisktʼanakaw utji: Aka Uraqin qhanañchkasaxa, ¿kunjamanakansa uñjasïna? ¿Kunatsa wali sum yatichäna? ¿Kunatsa wali khusa qhanañchirïnxa?

Taqi chuymaw yaqha chiqan luqtiris saräna

4-6. Aka Uraqir khitanitäsaxa, ¿kunjam jakäwsa jaytaniwayi ukat kunjamas jakasxäna?

⁴ Misioneronakas ukat yaqha chiqanakar yanaptʼir sarir cristian jilat kullakanakasa, awisax janiw nayrjamax jakxapxiti. Ukampis qhawqsa Jesusax alaxpachar jaytaniwaykatayna ukxa janiw amuyksnati, kunattix Jesusax Awkip jakʼana, ukat Jehová Diosar yupaychir angelanakans muyuntataw utjasïna (Job 1:6; 2:1). Jupax janiw jucharar jaqinak taypina ukat jan walinakampi  phuqantat pachan jakasirïkänti, ukatwa mayjänxa (Mar. 7:20-23). Awisax munat arkirinakapaw jan sum apasipkänti ukanakwa aguantañapäna (Luc. 20:46; 22:24). Ukampis Jesusax kuna jan waltʼäwin uñjasisasa jan pantjasisaw ukanakat mistsüna.

⁵ Jesusax wawaskäna ukhaxa, janiw akatjamat jankʼak parlkänti, jan ukasti jukʼat jukʼatwa mayni wawanakjam parlañ yatiqaskäna. ¡Ukampis alaxpachanxa jupaw angelanakarux kun lurapxañapatakis mayirïna! Aka Uraqinkkasaxa, Jesusax “jaqinakana” arunakapatxa mä aruk parläna, uka arux janiw “angelanakana” arupjamäkänti (1 Cor. 13:1). Ukhamäkipansa, janiw jupjam ukha suma arunakamp parlirix utjkiti (Luc. 4:22).

⁶ Diosan Yuqapaxa aka Uraqir jutasaxa kunjam jakäwir yatinuqtañaparakïnsa uka tuqinakat amuytʼañäni. Janis Adanan juchap katuqkchïnxa, alaxpachar sarañatak ajllitäpki uka “jilanakapjam” jaqïnwa (Hebreos 2:17, 18 liytʼasiñapawa). Jesusax alaxpachankkasaxa, Miguel Arcangeljamaxa angelanakarusay pʼiqtʼkchïnxa, ukampis jupar jiwayañatakïxapxäna uka arumaxa, janiw Jesusax Awkipan “walja waranqa angelanakap [jan ukax tunka payan legionat sipansa jila angelanakapxa]” yanaptʼayasiñatakix maykänti (Mat. 26:53; Jud. 9). Chiqpachansa Jesusax milagronakxa luränwa, ukampis alaxpachankkasaxa jukʼamp milagronakwa lurasapänxa.

7. ¿Kunjamsa judionkax Leyinakar uñjapxäna?

⁷ Janïr jaqjam aka Uraqir jutkasaxa “Aruwa” jan ukax Jesusawa wasarnam israelitanakar irpankäna uka Yatiyiripäpachänxa (Juan 1:1; Éxo. 23:20-23). Jupanakax ‘angelanak tuqisay Diosan mandamiento arup katuqapchïnxa janiw phuqhapkänti’ (Hech. 7:53; Heb. 2:2, 3). Ukat nayra patak maranakanxa, Leyinakax kuna amtampi qillqatänsa ukxa judionakan yupaychäwi irpirinakax maysaruw qʼiwjayapxäna. Sañäni, sábado tuqitwa ukham lurapxäna (Marcos 3:4-6 liytʼasiñapawa). Ley yatichirinakampi (escribas) fariseonakampixa “janiw jaysapk[än]ti kunatix leyinxa wali askïki ukxa. Kawkïritix chiqäki, khuyapayasiñäki, iyawsañäkaraki ukxa apanukupx[än]wa” (Mat. 23:23). Ukampis Jesusax janiw chʼam laqʼjtayaskänti, jan ukasti chiqa yatichäwitxa yatiyaskakïnwa.

8. ¿Kunatsa Jesusax yanaptʼistaspaxa?

⁸ Jesucristox wali yanaptʼasir jaqïnwa. Jaqinakar munasitap laykuw yanaptʼänxa, ukat Diosat katuqat arunak yatiyañxa walpun chuymapan munäna. Aka Uraqinkkasin Jehová Diosat jan jithiqtasaxa, taqi jupar jaysirinakatakixa “wiñay qhispiyasiñ chuririw tuku”. Ukhamaraki, “kamistix jupa pachpa tʼaqhisiwayi, ukhamarak yantʼat uñjasiwaykixa, ukatwa jichhax yanaptʼarakispa khitinakatix [jiwasjam] yantʼar puripki ukanakaruxa” (Heb. 2:18; 5:8, 9).

Wali wakichtʼat yatichiri

9, 10. Jesusax janïr aka Uraqir jutkasaxa, ¿kunjam wakichäwsa katuqäna?

⁹ Jichhürunakanxa, aka Uraqpach uñjiri Jilïr Irpirinakaxa, misioneronakar janïr kawki markar khitkasaxa nayraqat sum wakichtʼawayapxi. Ukampis ¿Jesusax janïr Mesiasjam ajllitäkasinxa ukham wakichäwi katuqarakpachänti? Jïsa, ukampis janiw rabinonakan yatiqañ utapan yatiqkänti, janiw ni yatxatat judío jaqinakan yatichatas yatiqkänti (Juan 7:15; uñxatʼarakismawa Hechos 22:3). Ukhamasti, ¿kunjamatsa sum yatichañ yatïnxa?

¹⁰ Jesusarux María taykapasa José uywiripasa mä jukʼa yatichapkchïnsa, ukampis yatiqatapaxa wali Yatiñanitwa jutäna. Jesusax uka tuqit akham sänwa: “Janiw naya pachpatakti parlktxa; khitankitu uka Awkixaw situ kuntix arsuñaxäki, yatichañaxäkaraki ukxa” sasa (Juan 12:49). Yuqax kunanakattï yatichañapäki ukanakwa Awkipat katuqäna. Ukhamasti janïr aka Uraqir jutkasaxa, walja tiempowa Jesusax Awkipan yatichäwipxa katuqaskpachäna. ¿Uka wakichäwit sipansa yaqha suma wakichäwix utjaspati?

11. ¿Jesusax kunjamsa jaqinakar munasirïna?

¹¹ Jesusax luratäkän uka urutpachwa Jehová Diosampixa sum sarnaqasipxäna. Alaxpachankkasaxa, kunjamsa Awkipax jaqinakar uñjäna ukat sintisïna ukanak Jesusax amuyäna. Ukatwa Awkipjama jaqinakar munasirakïna. Chiqpachansa, Jesusax yatiñkankañjamaxa akham  sasaw säna: “¡Nayax kusisïyätwa jaqinak uñjasina” sasa (Pro. 8:22, 31).

12, 13. 1) ¿Kunjamsa Awkipax israelitanakar uñjäna ukatxa kunsa Jesusax yatiqasïna? 2) ¿Kunjamsa alaxpachan yatiqatanakarjam Jesusax luränxa?

¹² Jan waltʼäwinakax utjkäna ukhaxa Jehová Diosax kamachänsa, uk uñjasarakiw wakichäwxa katuqäna. Kutkatasir israelitanakat parltʼañäni. Jupanak tuqit parlasaxa Nehemías 9:28 qillqatax siwa: “Jupanakaxa mä jukʼa samaraña jikxatasinxa, wastatampiwa kuttʼapxäna [Jehová] juman nayraqatamana jan walinaka lurañataki; ukatwa uñisirinakapan amparanakapar katuytaxa jupanakar apnaqapxañapataki. Ukatxa wastatampiwa yanapa mayipxäyätam, ukampis jumax jachʼa khuyapayasiñam laykuxa alaxpachatpachwa istʼäyätaxa, jupanakaru walja kuti qhispiyasina”. Jesusax Awkipampi irnaqatap layku ukhamarak luräwinakap jakʼat uñjatap laykuxa, khitinakarutix yatichkäna uka jaqinakatxa Diosjam khuyaptʼayasïna (Juan 5:19).

¹³ Ukhamaraki Jesusax kuntï alaxpachankkasax yatiqaniwaykatayna ukarjamaw arkirinakaparux uñjäna, kunattix jupanakat khuyaptʼayasïnwa. Janïr Jesusar jiwayapkän ukhawa, wali munat apostolanakapaxa ‘jaytarpayasin tʼijtxapxäna’ (Mat. 26:56; Juan 13:1). ¡Ukampis apóstol Pedrox kimsa kutiw jan uñtʼirix tuküna! Ukhamäkipansa, Jesusax kuttʼanipxañapatakixa punksa jisktʼarkaspa ukham luräna. Ukatwa Pedrorux akham säna: “Nayaw jumatakix mayta jan iyawsañamax pistʼañapataki. Jumasti nayaru kuttanxät ukkhax chʼamañchtʼam jilanakamaru” sasa (Luc. 22:32). Chiqpachansa, Diosan Israelapaxa “apostolunakxaru ukhamarak profetanakxaru” pirqxatatäkaspas ukhamawa. Ukhamarusa, Machaq Jerusalenan cimiento qalanakapaxa Jesucristot jan jithiqtiri tunka payan apostolanakapan sutipampi qillqxatatawa. Jichhürunakanxa, ajllit cristianonakampi ukat ‘yaqha uwijanaka’ satäpkis uka jilat kullakanakampixa, wali suma markjamawa Diosan uñjatäsinxa Diosan Apnaqäwipat yatiyasipki ukhamarak Diosan Yuqapaw uka yatiyäwxa pʼiqtʼaski (Gál. 6:16, MT; Efe. 2:20; Juan 10:16; Apo. 21:14).

¿Kunjamsa Jesusax yatichäna?

14, 15. Ley yatichirinakan ukat fariseonakan yatichäwinakapat sipansa, ¿kunatsa Jesusan yatichäwipax mayjänxa?

¹⁴ Kunanaktï yatiqaniwaykatayna ukarjamaw Jesusax yaticharakïna. Judionakan yupaychäwip irpirinakat parlasaw jupan wali yatiñanïtapatxa qhan amuytanxa. Ley yatichirinakampi fariseonakampixa ‘awkinakapan amtäwinakaparjamaw’ Diosan kamachinakapxa apanukupxatayna. Ukampis Jesusax janipuniw amtanakapakxa yatichirïkänti, jan ukasti Awkipan yatichäwinakapwa yatichirïna (Mat. 15:6; Juan 14:10). Jiwasax ukham lurapxañasaraki.

¹⁵ Jesusax janipuniw uka tiempo yupaychäw irpirinakjamäkänti, ¿kunatsa ukham sistanxa? Jupax akham sänwa: “Jupanakarux jaysapxamaya, lurapxarakim kuntix sapktam taqi ukanaka. Ukampis jan jupanakjamax lurapxamti, jupanakasti may arsupxi ukatsti yaqrak lurapxi” sasa (Mat. 23:3). Ukampis Jesusax yatichataparjamaw lurarakïna. Mä uñachtʼäwi uka tuqit uñjañäni.

16. Jesusax Mateo 6:19-21 qillqatan jikxataski uka arunakarjamaw sarnaqäna ukxa, ¿kunjamatsa yattanxa?

¹⁶ Jesusax “alaxpachar suma yänaka imasipxam” sasaw arkirinakapar säna (Mateo 6:19-21 liytʼasiñapawa). ¿Ukarjamat jupax sarnaqäna? Jïsa. Ukatwa mä kutix akham säna: “Qamaqinakax putunakaniw, jamachʼinakas tapanirakiwa, ukampis Jaqin Yuqapanx janiw kawkhar pʼiqipa samartʼayañatakis utjkiti” sasa (Luc. 9:58). Jupax janiw walja utjirinïkänti; Diosan Apnaqäwipat suma yatiyäwinak yatiyañaw jupatakix wali  wakisirïnxa. Maynirux akapach yänakax jan walinakanwa uñjasiyi, ukham jakañat sipansa kunjamsa jan kuna llakini jakassna uka tuqitwa Jesusax jakäwipampix uñachtʼayäna. Ukhamarak suma yänak alaxpachar imañaw wali askixa, “ukansti janiw kharus thuthantkiti ni ina chʼusarus tukuskarakiti, janirakiw lunthatanakas lunthatkarakispati” sasaw säna. ¿Jiwasasti? ¿Jesusan iwxaparjamati alaxpachar yänak imasktanxa?

Kunatsa jaqinakax jupar wal munasipxäna

17. ¿Kunatsa Jesusarux wali khusa qhanañchirïnwa sasixa?

¹⁷ ¿Kunjamatsa Jesusax Diosan arunakapat wali khusa qhanañchirïnxa? Jaqinakar suma chuymampi uñjasa. Jesusax Awkipat yatiqasisawa, altʼat chuymanïña, munasiña ukat sintiqtʼasiña uñachtʼayäna, ukatwa walja jaqinakax jupar jakʼachasipxäna. Ukanakat jichhax parltʼañäni.

18. ¿Kunatsa Jesusax altʼat chuymanïnwa sasax sistanxa?

¹⁸ Aka Uraqir jutañatakixa, Jesusax taqi kun jaytjaniwayänxa “mä uywataruw tuku, jaqir tukusaw naciwayi” (Fili. 2:7). Ukham lurasawa wali altʼat chuymanïtapxa uñachtʼayäna. Ukhamaraki, janiw jaqinakar jiskʼachkänti, janirakiw alaxpachat jutatap laykusa, istʼatäñsa munkaspa ukhamxa jachʼa jachʼa tukusa sarnaqkarakïnti. Janiw Jesusax mesiasätwa sas parlir jaqinakjamxa taqi tuqir wali jachʼat arnaqasis sarnaqkänti. Awisax jupxata, luräwinakapxata jan parlapxañapatak kunaw yaqhipanakarux mayïna (Mat. 12:15-21). Jaqinakax uñjatanakaparjam arkañ munasaxa arkapxaspa jan ukax janisa ukwa Jesusax munäna. Ukat Jesusax janïr jutkasaxa jan juchan angelanakampiw jakasïna, ukampis janiw arkirinakaparuxa angelanakäkaspas ukham jan pantjasipxañanakapxa maykänti.

19, 20. ¿Kunjamsa munasiñampi khuyaptʼayasiñampix mayninakar yanaptʼañapatakix Jesusar wiytäna?

¹⁹ Kunjam wali munasirïkitix alaxpach Awkipaxa ukham wali munasirirakikïnwa Jesusaxa (1 Juan 4:8). Ukham munasirïtap laykuw jaqinakar yatichäna. Kunapachatï mä qamir waynax jupan ukar jutäna uka tuqit amuytʼañäni (Marcos 10:17-22 liytʼasiñapawa). “Jesusasti juparux munasiñampiw uñkatäna” ukat yanaptʼañ munäna, ukampis  uka waynax janiw jupar arkañ laykux qamirkankañapxa apanukkänti.

²⁰ ¿Kunatsa jaqinakax jupar jakʼachasipxarakïna? Khuyaptʼayasirïtapata. Arunakapar iyawsir jaqinakaxa, juchan jaqinakjamaxa, kunayman jan waltʼäwinakanwa jakasipxäna. Ukanak uñjasawa, Jesusax jupanakat khuyaptʼayasisa yatichäna. Mä kutixa, jupampi apostolanakapampixa jan tiemponipuniw sarnaqapxäna, janiw tiempox manqʼtʼasipxañapatakis utjkänti. Ukampis ¿walja jaqinak uñjasaxa kamachänsa? “Jupanakatsti khuyaptʼayasïnwa jan awatirin ovejanakjamäpxatap layku. Ukatsti walja yatichäwinak yatichañ qalltäna.” (Mar. 6:34.) Jesusax kawkjanakantï yatiyaskäna uka chiqanakan kunjam llakitas jaqinakax sarnaqasipkäna uk amuyasawa, jan manqʼatas Jesusax yatichäna, ukat jupanak laykuw milagronaksa luräna. Ukham suma jaqïtap laykuwa yaqhip jaqinakax jupar jakʼachasipxäna, ukat arunakapas arkiripäpxañapatak chuymar purtʼkirïnwa.

21. ¿Kuna tuqitsa jutir yatichäwin yatxataskañäni?

²¹ Jesusax Diosan arunakap parlkäna uka yatichäwinakat yatiqañax waljaw utjaski, uka tuqitwa jutir yatichäwin yatxataskañäni. Jesucristo, taqi misioneronakat sipansa jilïr misionerotxa, ¿kunjamanakatsa yatiqasiraksna?

¿Kamsasmasa?

• Janïr aka Uraqir jutkasaxa, ¿kunjam wakichäwsa katuqäna?

• Ley yatichirinakan ukat fariseonakan yatichäwinakapat sipansa, ¿kunatsa Jesusan yatichäwinakapax wali askïnxa?

• ¿Kunjam jaqïtapatsa jaqinakax Jesusar jakʼachasipxäna?

[Jisktʼanaka]

[21 janan fotopa]

¿Kunjamsa Jesusax walja jaqinakar yatichäna?