Jilïr misionerot yatiqasipxañäni
Jilïr misionerot yatiqasipxañäni
“Jumanakax nayjam sarnaqapxam kunjämatï nayax Cristjam sarnaqktxa ukhama.” (1 CORINTIOS 11:1.)
1. ¿Kunatsa Jesucristot yatiqasipxañasa?
APÓSTOL Pablox Jesucristo jilïr misionerotwa yatiqasïna. Ukatwa jilat kullakanakaparux akham säna: “Jumanakax nayjam sarnaqapxam kunjämatï nayax Cristjam sarnaqktxa ukhama” sasa (1 Cor. 11:1). Jesusax apostolanakaparux ukham iwxarakikïna. Kunjamas altʼat chuymanïñax uk kayunakap jariqasin yatichasaxa, akham sänwa: “Nayax mä uñachtʼäwi churapxsma, kunjämtï nayax lurtxa ukham jumanakax lurapxañamatakiraki” sasa (Juan 13:12-15). Jichhürunakanxa, ukhamarakiw cristianonakjamaxa, Jesusat yatiqasisa parlapxañasa lurapxañasa, ukhamarak kunjam jaqïkänti ukham yatiqasipxañasaraki (1 Ped. 2:21).
2. Janisay Jilïr Irpirinakan khitat misioneronakäkstanxa, ukampis ¿kunjam chuymanirakïsnasa?
2 Pasïr yatichäwinxa, suma yatiyäwinak jaqinakar yatiyañapataki khitatäkis ukaw mä misionerox sasaw yatiqawaytanxa. Uka tuqitxa, Pablox amuytʼapxañasatakiw jisktʼanak arstʼäna (Romanos 10:11-15 liytʼasiñapawa). Mayax akham sänwa: “¿Kunjamaraki istʼapxanisti jan khitis [...] yatiyiri utjkchi ukasti?” sasa. Ukatxa Isaías profetan arunakap arstʼasaw akham sarakïna: “¡Kunja sumas sumankañ arunak apanirin purinitapaxa, ukhamaraki suma aski arunak yatiyatanakapasa!” sasa (Isa. 52:7). Janis jiwasarux misioneronakjam kawki markarus khitapkchistuxa, ukampis yatiyañ tuqitxa Jesusjam chuymanirakïsnawa, jupax taqi chuymaw suma arunakxa yatiyäna. 2006 septiembre phaxsit 2007 agosto tukuykamaxa, 6.957.852 Diosan Apnaqäwip yatiyirinakawa 236 markanakan “qhispiyasiñ arunak parlañaru” uchasipxatayna (2 Tim. 4:5).
“Taqi kunanakatix utjapkitän ukanakxa apanukunipxtwa, ukatsti jumaruw arkapxsma”
3, 4. ¿Kunsa Jesusax alaxpachar jaytanukuniwayäna, ukat arkiripäñatakix kunsa jiwasax lurapxarakiñasa?
3 Aka Uraqir luräwip phuqir jutañatakixa, Jesusax alaxpach jakäwipsa ukat alaxpachan kunjamäkäntix uksa jaytaniwayänwa ukat “mä uywataruw tuk[üna]” (Fili. 2:7). Nayax Jesusjamaw jaytanukuniwayta sasax janiw khitis sisksnati. Ukampisa, kunanaktï akapachar jaytaniwayktan ukanakat jan amtaskañäni ukhawa Jesusat yatiqasitasxa uñachtʼayarakiñäni (1 Juan 5:19).
4 Mä kutix apóstol Pedrox Jesusarux akham säna: “Nanakax taqi kunanakatix utjapkitän ukanakxa apanukunipxtwa, ukatsti jumaruw arkapxsma” sasa (Mat. 19:27). Chiqpachansa, kunapachatï Jesusax Pedroru, Andresaru, Santiagoru, ukat Juanar arkit siskäna ukhaxa, jan payachasisaw chawlla katuñ qänanakap jaytasax arkapxäna. Ukhamatwa irnaqäwinakap jaytasaxa, suma yatiyäwinak yatiyiri sarapxäna. Chiqanxa, jiwasanakat jilapartix janiw taqi kunanakatix utjkistu ukxa Jesusar arkañatakix apanukktanti. Arkiripäñatakisa Jehová Diosan taqi chuyma luqtiripäñatakisa, ukham lurañat sipansa ‘jiwas kipkatwa armtʼastanxa’, mä arunxa, janiw jiwasatakik jakxtanti (Mat. 16:24). Ukham jakasaw walja bendicionanak katuqtanxa (Mateo 19:29 liytʼasiñapawa). Kunjam chuymampitï Cristox yatiyir sarkänxa, ukham chuymampi yatiyarakiñäni ukhax chuymas chuymäniwa, ukat Diosar ukat Yuqapar uñtʼañapataki maynir mä jukʼaks yanaptʼañäni ukhax jukʼampi kusisitaw jikxatasiñäni.
5. Irnaqäwi layku markapat jaya markanakar saririnakax chiqa yatichäwit yatiqxasaxa, ¿jilapartix kamachapxisa? Maynit arstʼma.
5 Valmir sat Brasil markankir chachaxa, Surinam markanwa quri apsuñan irnaqäna, jupax machirïnwa ukat qʼañu sarnaqäwinakan sarnaqirïnwa. Mä markankaskatayna ukhawa Jehová Diosan Qhanañchirinakapax Diosa tuqit parltʼapxatayna. Ukat jupanakampiwa Bibliat sapüru yatxatatayna, ukat Bibliarjam sarnaqxasaxa jankʼakiw bautisasxarakitayna. Bibliat yatiqataparjam uka irnaqäwipan jan phuqañjamäxipanxa, negociop aljaniwayasinwa Brasilar kuttʼanxäna ukhamat Diosar yupaychañ tuqit familiaparu yatichañataki. Walja ukham qamir markar saririnakawa Diosan Arupat yatiqxasaxa irnaqäwipa jaytanukuniwayasin markapar kuttʼanxapxi, ukhamat familiaranakapar ukat yaqha jaqinakar chiqa yatichäwinak yatiyañataki. Diosan Apnaqäwipat taqi uka yatiyirinakax chiqpachansa yatiyañ wal munir chuymanïpxiwa.
6. Kawkjanakantix yatiyirinakax wal munaski uka chiqanakar jan sarirjamäkstan ukhaxa, ¿kamachapxsnasa?
6 Yaqhip Qhanañchirinakax markapanxa, kawkjanakantï yatiyirinakax munaski uka chiqanakaruw yanaptʼirix sarapxi, ukat yaqhipax yaqha markanakaruw luqtir sarapxi. Inas jiwasax ukham jan lurirjamäkstanti, ukampis Jesusax kunjamtï lurkän ukham luraskakiñasawa, ukhamaraki yatiyir sarañatakis taqi chuyma chʼamachtʼasisipkakiñäni.
Jehová Diosaw wakiskir wakichäwxa churistu
7. Diosan Apnaqäwipat yatiyirinakjama suma wakichatäpxañasatakixa, ¿kuna yatichäwinakas utjistu?
7 Kunjamtï Jesusax Awkipan wakichatax sum yatiqänxa, jiwasax ukhamarakiw Jehová Diosan uttʼayatäki uka yatichäwinakatxa askinak apssnaxa. Jesús pachpaw akham säna: “Profetanakan qillqatapanxa akham siwa: ‘[Jehová] Diosax taqiniruw yatichi’” sasa (Juan 6:45; Isa. 54:13). Jichhürunakanxa, Diosan Apnaqäwipat yatiyañataki wakichatäpxañapatakixa walja yatichäwinakaw utji. Sapa semanaw tamanxa Yatiyañataki Diosan Yatichäwipa sat wakichäwitxa wali askinak taqini apstanxa. Ukat precursoranakax Escuela del Servicio de Precursor sat yatichäwiruw sarapxaraki; ukat wali yatxattʼatanakax yamas pä kutiw uka yatichäwirux sarapxi. Irpir chuymaninakampi yanapirinakapampixa Escuela del Ministerio del Reino sat yatichäwiruw sarapxarakispa, ukhamat jilat kullakanakar sum uñjapxañapataki ukat sum yatichapxañapataki. Ukat sapäsipkchi ukhaxa, Escuela de Entrenamiento Ministerial sat yatichäwirux sarapxarakispawa, ukansti yatiyirinakaru yanaptʼañatakiw yatichasi. Ukhamaraki niya taqpach misioneronakaw yaqha markar khitatäñatakixa Escuela Bíblica de Galaad de la Watchtower sat yatichäwirux sarapxi.
8. ¿Yaqhip jilat kullakanakax wakichatäñatak Jehová Diosan yatichäwipxa kunjamsa uñjapxi?
8 Jan walinakan uñjaskasas walja Qhanañchirinakaw uka yatichäwinakar sarañatakix chʼamachtʼasipxatayna. Amuytʼañataki, Yugu sat jilatax irnaqäwipa jaytxasinwa Canadá markan Escuela de Entrenamiento Ministerial sat yatichäwirux saratayna, kunattix janiw irnaqäwipan permiso churañ munapkataynati. Ukat Yugux akham siwa: “Jaytatäjatxa janiw amtaskti; chiqpachansa, permiso churapxitasapän ukhaxa, ukar phuqañajatakixa jan mistusaw irnaqayapxitasapänxa. Ukampis jichhax Jehová Diosax kun luram sitaspa ukhaxa iyawsakiristwa” sasa. Kunjamtï uñjawayktanxa, nayrax wali askit uñjapkäna ukanakxa walja jilat kullakanakawa Diosampi yatichatäñatakix jaytawayapxi (Luc. 5:28).
9. Taqi chuyma chʼamachtʼastan ukhax Biblian yatichäwinakapax wali askiwa, uka tuqit mä uñachtʼäwimpi arstʼma.
9 Taqi chuyma chʼamachtʼasiñäni ukhawa Biblia tuqi yatichäwinakax wali askïnixa (2 Tim. 3:16, 17). Guatemala sat markankir jiskʼa Saulot parltʼañäni, jupax mä jukʼa pʼiqit usutaw yuritayna. Ukat yatiqañ utanxa, Saulon mä profesorapaxa, jan Saulor liyiñapatak sinti waytʼapxamti sasaw mamapar iwxatayna, kunattix jan liytʼirjamäxasaxa aynachtʼataw uñjasispa sasaw satayna. Ukatwa jiskʼa Saulox janir liytʼañ yatkas yatiqañ utat jithiqxatayna. Ukampis mä Qhanañchiriwa Liyiña qillqaña yatiqañaru uchasim sat folletompix liyiñ yatichatayna. Ukat tiempompixa, Saulox sum yatxatatayna ukat Yatiyañataki Diosan Yatichäwipa sat wakichäwinsa walja arstʼäwinakwa arstʼxatayna. Mamapax Diosat yatiyir sarasaw Saulon profesorapampix jikisitayna. Ukat wawapatwa yatichirir arxayatayna, wawajax liytʼañ yatxiw sasa, ukat mä semanaw irpanïta sasaw yatichiripax sawayatayna. Ukhamasti jikisisaxa “¿Saulo, kuns yatichitäta?” sasaw jisktʼatayna. Ukampis Sauloxa ¿Kunsa Bibliax chiqpachapuni yatichi? sat librotwa mä tʼaqa liytʼarapitayna, ukat yatichirixa, “¡Janiw chiqaw sañjamäkiti, kamisarak jumasti nayar jichhax yatichxitätasti!” sasaw jachʼat satayna. Ukat jachtʼasisaw qhumantatayna.
Chuymar purtʼkir yatichäwi
10. Biblian chiqa yatichäwinakap yatichañatakixa, ¿kuna yanaptʼas utjistu?
10 Jesusax Jehová Diosan yatichäwinakapampita Qullan Qillqatanakan arunakapampitpunwa yatichäna (Luc. 4:16-21; Juan 8:28). Jiwasax jupan iwxäwinakaparjam lurasa ukat Diosan Arupat yatichasawa Jesusat yatiqasitasxa uñachtʼayañäni. Ukhamatakwa, taqinisa mä tuqitak parlañäni, ukat mä amtakiw mayachtʼat sarnaqañäni (1 Cor. 1:10). “Amuyasiri chiqapa uywatasti” uka Uraqpachan pachpa yatichäwi yatichañasatakiw qillqatanak apayanistu ukhamat yatiyir Jesusan arunakapar istʼas yatiyañasataki. Uka yanaptʼat wal yuspärtanxa, ¿janicha? (Mat. 24:45, MT; Mat. 28:19, 20.) Kunsa yatichi sat librow mä yanaptʼaxa, ukasti 179 arunakan qillqatarakiwa.
11. ¿Kunjamsa jan munir warmir Etiopía markanxa mä kullakax Kunsa yatichi sat librompix yanaptʼatayna?
11 Kunsa yatichi sat librot yatiqañaxa jan munapki ukanakar yanaptʼañatakisa wali askirakiwa. Etiopía markankir Lula sat mä precursorax Bibliatwa mä warmir yatichaskäna, ukat akatjamatwa yatiqirin mä familiarapax wali tuqisisa mistunïna, ‘janiw jupanakan ukanak yatiqañapax wakiskiti’ sasa. Ukat Lulax sumakiw Kunsa yatichi sat libron 15 jaljap uñxattʼayasaxa, falso qullqi tuqit amuytʼayäna. Uka warmix sumaptxasaxa, yatiqapxamay ukhamax sasaw sarxatayna. Ukat Lulax mayan kuttʼkän ukhaxa, nayar yaticharakita, pagämaw sasaw satayna. Ukat mä jukʼa tiempotxa semanan kimsa kutiw Bibliat yatichayasxäna ukhamarak cristiano sarnaqäwirjamarakiw jiltaskäna.
12. Kunjamsa Biblian chiqa yatichäwinakapxa waynitunakas tawaqitanakas yatichapxaspa uka tuqit mä uñachtʼäwimpi arstʼma.
12 Waynitunakas tawaqitanakas Kunsa yatichi sat librompix jaqinakar yatichapxarakispawa. Hawai markanxa, 11 maran Keanu sat jiskʼa waynituwa uka libro yatiqañ utan liyiskäna, ukhamaruw mä yatiqir masipaxa kunatsa mayninakamp chika jan fiestanakar sarkta sasaw jisktʼatayna. Ukar qhanañchañatakixa Keanu sat jiskʼa waynituxa “¿Fiestanaka amtañasäspati?” uka yatichäwi librot uñxatayatayna. Ukatxa “Akanakaniwa” siski uk uñxatayasawa, kawkïr yatichäwsa yatxatañ munasma sas jisktʼatayna, ukhamatwa Bibliat yatichañ qalltatayna. 2006 septiembre phasxit 2007 agosto tukuykamaxa 6.561.426 jaqinakaruw Jehová Diosan Qhanañchirinakapaxa Bibliat yatichapxatayna, jilapartix Kunsa yatichi sat librompiw yatichapxatayna. ¿Jumax uka librompirakit yatiqirinakamar yatichaskta?
13. ¿Kunjamanakansa Bibliat yatxatañax jaqinakar yanaptʼi?
13 Khitinakatix Diosan chuymap kusisiyañ munapki ukanakatakixa, Kunsa yatichi sat librot yatiqañax wali askiwa. Noruega markanxa, precursor especial sat mä jilat kullakawa Zambiankir kimsa imill wawani chacha warmir Bibliat yatichañ qalltapxatayna. Uka chacha warmix janiw wawanïñ munxapxänti, ukatwa usuri uñjaskäna ukhaxa, waw apsuyasiñataki uka chacha warmix amtapxatayna. Ukampis janïr doctoran ukaru sarkasawa “Jakäwxa Diosjam uñjapxañäni” sat jaljatxa yatxatapxatayna. Taykan purakapankir wawar foton uñxatasaxa wal chuyma chʼallxtayasipxäna ukat janiw amtaparjam lurxapxänti. Panipax yatxatasipkakïnwa ukat ususxäna ukhaxa, uka wawarux yatichir jilatan sutipa uchapxäna.
14. Yatichatasarjam sarnaqañaxa kunatsa wali askixa, uka tuqit mä uñachtʼäwimpi arstʼma.
14 Jesusax kuntï yatichkänxa ukarjamaw phuqarakïna. Jiwasax Qhanañchirinakjamaxa Jesusat yatiqasisaw sarnaqtanxa, ukham jaqinakatwa walja jaqinakax uñtʼapxistu. Uka tuqit mä sarnaqäwi uñjañäni. Nueva Zelanda markankir qullqin jaqin autop jistʼarapxatayna ukat mä maletín lunthatsupxatayna. Ukat uka jaqix policianakaruw yatiyäna, ukat mä policiaxa: “Jehová Diosan mä Qhanañchiripa aptaspa ukhakiw uka maletinam katjxasma” sasaw satayna. Ukat chiqpachapuniwa mä kullakax uka maletinap waytatayna. Jaqipar yatiyasxäna ukhaxa, kullakan utaparuw saratayna ukat wali wakiskir papelanakap uñxatasaxa wal kusisitayna. Kullakax akham sataynawa: “Chiqpachansa, Jehová Diosan Qhanañchiripäsaxa, janipuniw nayax katuskiristti, kuttʼayañajapuniw wakisïna” sasa. Uka jaqix wal muspharäna ukat uka alwax siskäna uka polician arunakapatwa amtasïna. Ukhamasti Jesusan chiqpach arkirinakapaxa jupat yatiqasaw Biblian yatichäwinakaparjam sum sarnaqapxi (Heb. 13:18).
Kunjamtï Jesusax jaqinakar uñjkänxa ukham uñjapxarakiñäni
15, 16. ¿Kunjamatsa chiqa yatichäwinak yatxatapxañapatakix jaqinakar yanaptʼsna?
15 Jesusax kunjam jaqïkäntix uk amuyasawa jaqinakax yatichäwipar istʼapxäna. Sañäni, munasiñanïtapata, altʼat chuymanïtapatwa suma chuymaninakax jupar thaqhapxäna. Jupax jupanakar wal khuyaptʼayäna ukat suma arunakampiw chuymachtʼäna; ukat waljaniruw qullarakïna (Marcos 2:1-5 liytʼasiñapawa). Jiwasax janiw milagronak lurksnati, ukampis munasiñampi, khuyaptʼayasiñampi ukat altʼat chuymanïñampxa uñachtʼaysnawa, ukhamat chiqa yatichäwinak uñtʼapxañapatakis yaqhanakar yanaptʼaraksna.
16 Pacífico sur tuqinkir Kiribati sat wali jaya islanxa, khuyapayasiñaw mä precursor especial Tariua sat kullakarux yanaptʼatayna. Yatiyaskasaxa, Beere sat mä chuymankipstat jaqin utaparuw visittʼatayna, ukampis uka jaqix janiw istʼañ munkataynati. Ukat uka jaqin cuerpop chikatpach saytʼat uñjasaxa kullakax wal sinttʼasitayna. “¿Usutanak layku chuymaninak laykux Diosax kunsa lurani uka tuqit istʼirïtati?” sasaw jisktʼatayna. Ukatxa Isaías librot liytʼarapitayna (Isaías 35:5, 6 liytʼasiñapawa). Muspharasaxa, uka chachax akham satayna: “Walja maraw Biblia liyxta, ukhamarak walja maraw religionajatsa mä misionerox visititu, ukampis janipuniw uka qillqat liytʼirïkti” sasa. Beere sat chachax Bibliat yatiqañ qalltasaxa, ukarjam sarnaqxasaxa bautisasxarakïnwa. Mä tiempox wali usutäskchïnsa, jichhax mä jiskʼa tamanwa jaya chiqan pʼiqtʼaski ukat suma arunak yatiyasaxa islpachwa kayuk muyti.
Cristot yatiqasisipkakiñäni
17, 18. 1) ¿Kunjamatsa suma yatiyirinakäsnaxa? 2) ¿Kunsa taqi chuyma yatiyirinakax katuqapxani?
17 Kunjamtï yatiyañ tuqit yatiyäwinakax sapa kuti qhan amuytʼayistuxa, Jesusan yatichäwiparjam sarnaqañatak chʼamachtʼasiñäni ukhaxa jiwasax suma yatiyirinakas tukuraksnawa. Ukhamasti, Yatichirisat yatiqasipxañäni ukat kusisit taqi chuyma yatiyir mistsupxañäni.
18 Kunapachatï nayra patak maranakan yaqhipanakax Jesusan arkirinakap tukxapxäna ukhaxa, Pedrox akham Jesusarux jisktʼäna: “¿Kunarak nanakatakisti utjani?” sasa. Jesusasti: “Taqi khitinakatix jaytanukuni utanakapa, jilanakapa, kullakanakapa, taykapa, awkipa, wawapa ukhamarak uraqipsa naya layku ukanakaxa, patak kuti ukkhampwa katuqapxani, ukhamaraki wiñay jakañampi” sasaw sarakïna (Mat. 19:27-29). Taqi misioneronakat sipansa jilïr misionero Jesucristot yatiqasisa sarnaqañäni ukhaxa, Jesusan arsutaparjamaw katuqañäni.
¿Kamsasmasa?
• ¿Kunjamsa Jehová Diosax suma arunak yatiyirïpxañasatakix wakichistu?
• ¿Kunatsa Kunsa yatichi sat librox yatiyañataki wali askixa?
• ¿Jesusax kunjamsa jaqinakar uñjäna ukxa kunjamatsa yatiqassna?
[Jisktʼanaka]
[23 janan fotopa]
Kunapachatï Jesusax Pedroru, Andresaru, Santiagoru ukat Juanar arkit sas säna ukhaxa, jan payachasisaw arkapxäna
[25 janan fotopa]
Kunsa yatichi sat libroxa, pachpa yatichäwi aka uraqpachan yatichañatakiwa