¿Kunas Diosan Apnaqäwipaxa?

¿KUNA tuqitsa Jesusax yatiyäna? Diosan Apnaqäwipat yatiyäna (Lucas 4:43). Jesusan parlatanakap istʼir jaqinakax walja kutiw uka Apnaqäwit parlir istʼapxpachäna. ¿Janit uka jaqinakax uk sum amuyapkpachäna? ¿Kunas uka Apnaqäwix sasati Jesusar jisktʼapxpachäna? Janiwa. Biblian janiw ukham jisktʼäwix utjkiti. Ukhamaxa, ¿kunas Diosan Apnaqäwipax uk sumti yatipxpachäna?

Judionakax qullanjam uñjapkäna uka nayra Qillqatanakanxa, Diosan Apnaqäwipatxa sum parläna. Chiqpachansa, kunas uka Apnaqäwixa ukhamarak kuns apanini ukxa wali qhana arunakampiw qhanañchäna. Jichhürunakanxa, jiwasax Qullan Qillqatanakat uñxatasarakiw uka Apnaqäwitxa jukʼamp yatxatsna. Kunanaktï Bibliax Diosan Apnaqäwipat yatichki ukanak paqallq tuqit uñxattʼañäni: Jesusan judío mitanakapasa ukat jupanakat nayra jakirinakasa kimsa yatichäwitxa sum yatipxäna. Ukat Jesusampi apostolanakapampirakiwa kimsa yatichäwinakatxa qhanañchapxarakïna. Ukat paqallqükis uka yatichäwixa jichha tiemponwa sum qhanstawayxi.

1. Diosan Apnaqäwipaxa chiqpach gobiernowa, ukasti wiñayatakiw apnaqani. Biblian nayrïr profeciapanxa, Diosaxa Dios chuyma jaqinakar qhispiyañatakix mä qhispiyir khitanïx sasaw säna. Uka qhispiyiriruxa ‘wawa’ sasiwa. Supayampi ukhamarak Adanampi Evampix Diosa contra saytʼasax kunanakarus aptʼawayistu ukanakwa uka Wawax chhaqtayani sasaw arsusïna (Génesis 3:15). Walja maranak pasatatxa, uka ‘wawatxa’ jan ukax Mesías tuqitxa Davitarux sum qhanañchasirakïna: Jutaniw sat wawax mä Reinon apnaqani, janiw mayni gobiernonakjamäkaniti, kunattix wiñayatakïniwa sasa (2 Samuel 7:12-14).

2. Diosan Apnaqäwipawa akapach apnaqirinakarux tukjani. Kunjamsa nayrapachanakatpach jichhakamax yaqha yaqha jachʼa markanakax apnaqapxäna ukwa Daniel profetax mä visionan uñjäna. Kunanaksa tukuyarux uñjäna uk uñxatapxañäni: “Uka [qhip qhipa] reyinakan apnaqañapkamasti, alaxpachankiri Diosax mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampixa, jan ukasti jupaw taqi yaqha reinonakarux tukjani, wiñayan wiñayapaw uka reinox utjarakini”. Ukhamasti akapach taqi apnaqäwinakax wiñay wiñayatak tukjatäxaniwa, chʼaxwäwinakasa, ñanqha luräwinakapasa, lunthatasïwinakapasa chhaqtxarakikiniwa. Kunjamtï uka profecian siskixa, Diosan Apnaqäwipax niyaw aka Uraqxaru apnaqxani (Daniel 2:44, 45). Janiw mä suma gobiernokïkaniti, jan ukasti uka gobiernokiw apnaqxani.

3. Diosan Apnaqäwipaxa chʼaxwäwinaksa, usuntañanaksa, manqʼat pisinkañanaksa, jiwañsa chhaqtayxaniwa. Aka Uraqin kunanaksa Diosan Apnaqäwipax lurani ukanakat qhanañchiri walja profecianakaw Biblian utji. Wali askinakpun lurani, janiw kuna apnaqäwis ukham lurkiti ni lurkarakispasa. Amuytʼapxañäni: ¡nuwasiñ armamentonakax wiñayatak chhaqtayatäxaniwa! Bibliax akham siwa: “[Diosax] aka uraq tukuskamaw nuwasiñ tʼakurayi” sasa (Salmo 46:9). Janiw qullirinakas ni hospitalanakasa munasxaniti, usunakax chhaqtatäxaniwa. Ukanxa ‘janiw khitis sisxaniti: “Usutätwa” sasaxa’ (Isaías 33:24). Janiw khitis manqʼatjam usutas jikxatasxaniti ni manqʼatjamsa jiwxaniti. ‘Manqʼax yapunakan jilarkiriw utjani’ (Salmo 72:16). Janiw jiwirin utapar sarañasa, ukhamarak jiwatanakar allintañasa utjxaniti, panteonanakasa, morguenakasa, wali llakit jachtʼasisa sarnaqañas chhaqtxaniwa. Jiwañas chhaqtayatäxaniwa. Taqi kun lurir Jehová “Tatitux wiñayatakiw jiwañarux tʼunjani, taqi jaqinakana nayranakapatsti jachanakapsa pichararakiniwa” (Isaías 25:8).

4. Diosan Apnaqäwipanxa Dios kikpan ajllit Apnaqiriwa apnaqi. Mesiasax janiw jupa kikpa apnaqirjam uttʼayaskänti, janirakiw  juchan jaqinakas chhijllapkarakïnti. Jan ukasti Jehová Dios kikpaw ajlliwayi. Mesías ukat Cristo uka arunakax “ajllita” sañ muni, ukhamasti mayniw ajllïna. Ukhamaxa, Jehová Diosaw apnaqañapatakix Jesusar ajllïna. Diosax jupa tuqit akham siwa: “Akax servirixaxa, khitirutix nayax uywaskta ukaxa, ajllisitaxawa, jupanrakwa kusistxa. Ajayuxsa jupxarurakiw uchtxa, ukhamat kunatix chiqapäki ukanak taqi markanakaru apaniñapataki” sasa (Isaías 42:1; Mateo 12:17, 18). Kunjam apnaqirsa muntan uka tuqitxa, ¿khitis Lurir Diosasat sipansa jukʼampi yatispa?

5. Diosan Apnaqäwipan kunjamsa uka Apnaqirix apnaqani ukxa taqi jaqinakaruw uñachtʼayäna. Nazaretankir Jesusawa jutaniw sat Mesiasaxa. Kawkïr familiat jutanix siskäntï Diosaxa ukhamarjamaw purinïna (Génesis 22:18; 1 Crónicas 17:11; Mateo 1:1). Janïr jutkäna uka nayra qillqat profecianakawa Jesusan sarnaqäwipan phuqasïna. Ukatxa, alaxpachatwa, jupax Mesiasaskapuniw sasax sasïna. ¿Kunjamatsa? Dios pachpawa alaxpachat arsunïna ukat Yuqajaw sasaw sanirakïna, ukat angelanakax jupaw jutaniw satäkäna uka Mesiasaxa sasaw sapxarakïna. Mä tuqitxa, Jesusax milagronak lurarakïna, ukhamatwa Diosan yanaptʼapampi luratapax amuyasïna, waranq waranqa jaqinakaw uka milagronak lurir uñjapxäna. * Sapa kutiwa kunjam apnaqirïnisa ukxa uñachtʼayäna. Jaqinakarux janiw chʼamanïsakix yanapkänti, jan ukasti, wal jaqinakar yanaptʼañ munäna (Mateo 8:1-3). Waxtʼasiri, khuyaptʼayasiri, jan axsariri, ukat altʼat chuyman jaqïnwa. Uraqinkkasax kunjamsa sarnaqawayäna ukax Biblian qillqatäskiwa.

6. Diosan Apnaqäwipanxa, Cristomp chikax 144.000 ajllitanakaw apnaqapxani. Yaqha jaqinakaw nayamp chikax alaxpachan apnaqapxani sasaw Jesusax säna, ukham sasax apostolanakapamppachatwa parlaskäna. Uka jilat kullakanakarux “jiskʼa tama” sasaw säna (Lucas 12:32). Uka qhipatwa, jiskʼa tamaxa 144.000 Diosar luqtirinakäpxaniwa sasax apóstol Juanarux yatiyasiskäna. Jupanakaw Cristompi chika sacerdotenakjam luqtapxani ukhamaraki apnaqapxani (Apocalipsis 5:9, 10; 14:1, 3).

7. Diosan Apnaqäwipax alaxpachan apnaqxiwa, niyaw aka Uraqxaru apnaqanxani. Diosan Apnaqäwipat paqallqükis uka yatichäwix wali muspharkañawa. Jesusax alaxpachan munañanïñwa katuqxi sañatakixa, walja chiqanakanwa Biblian qillqata. Alaxpachanwa jichhax apnaqxi ukat niyaw aka Uraqxaru apnaqanxani ukat kawkïr profecianaktï arsuwayktan ukanakwa phuqayani.

¿Jumax Diosan Apnaqäwipan bendicionanakap katuqarakïtati?

Jesusax kuntï yatiykäna ukham suytʼäwix janipuniw utjkiti. Kunapachatï nayra waranq waranqa maranakan Adanax Diosa contra saytʼkäna ukhaxa, Jehová Diosax amtaj phuqañatakixa mä apnaqäwi uttʼayäxa sasaw säna. ¿Kunas Diosan amtapaxa? Taqi chuyma luqtir jaqinakax aka Uraqin wiñay wiñayataki mä paraison jakasipxaspa ukaw Diosan amtapaxa. Diosan nayrapach arsutaparjamax uka apnaqäwix jichhax uttʼayatäxiwa uk yatisaxa, ¿janit chuymamax wali kusisitäki? Ukhamaxa, Diosan Apnaqäwipax janiw jan amuykañäkiti, jan ukasti uttʼayatäskapuniwa.

Diosan uttʼayata Apnaqirixa uñisirinakap taypin apnaqxiwa (Salmo 110:2). Diosat jithiqtata ñanqha jaqinak taypitwa, Diosar uñtʼañ munirinakaru ukhamaraki ‘ajayuna chiqakankañampi’ yupaychañ munir jaqinakaruxa Mesiasax thaqhaski, ukhamatwa Jesusax Awkipan munañap phuqaski (Juan 4:24). Diosan Apnaqäwipan wiñay wiñay aka Uraqin jakasxapxañapatakixa, taqi kasta jaqinakaru, jiskʼar jachʼaru, pisinkirinakaru ukhamarak qamirinakaruw yatiyasiski (Hechos 10:34, 35). Jumax ukham sum jakasirakismawa ukatakiw chʼamachtʼapxsma. Jïsa, Diosan Apnaqäwipat jukʼampi yatxataskakim ukhamatwa Diosan gobiernopan jakasïta (1 Juan 2:17).

[Qhanañchäwi]