Kunjamatsa yatisma

“Kawkitsa jakañataki qullq apsuñäni uk yatxasina, ukat nayrax ni amuykayätansa —[...] aire acondicionado, jachʼa radionaka— taqi ukanak jikxatxasina, jichhax kunatakis jaktan uk yatiñakiw wakisxi. ¿Kunatakis chʼamachastanxa? ¿Kunatakis jaktanxa?” Universidad Hope (Holland, Michigan, EE.UU.) sat yatiqañ jachʼa utan Psicología tuqit yatichiri David G. Myers.

¿KAMSASMASA uka yatichirin jisktʼanakaparuxa? Yaqhipax janiw uka tuqit yatiñax wakiskiti, inamayaw tiempsa aptʼassna sapxaspawa. Ukampis uka tuqit jan yatiñ munirinakax tʼaqhisiñan uñjasipxaspa, sañäni, zapator qalax mantaspa ukat jan apsusa sarnaqaskaksna ukamp sasispawa, chiqansa, ukham qalanpachas maynix sarnaqaskaspawa ukampis thakinwa tʼaqhisini.

Akakïpachati jakañax sasin jisktʼasirïtati, waljaniw ukham jisktʼasipxi. Encuesta Mundial de Valores sat wakichäwin irnaqirinakawa jaqinak tuqit wali sumpun yatxatapxatayna, ukat jupanakaxa akham sapxiwa, sapürutjamwa walja markankir jaqinakax ‘akakit jakañaxa, kunatsa jaktanxa’ sas uka tuqinakat jukʼampi yatiñ munapxi.

Chuymas qhanartata sarnaqañatakixa, aka pä jisktʼäwinakatwa yatiñasa.

¿Kunatakis jaktanxa?

¿Jutïrin kunas paspachäni?

Akanaka yatiñatakixa, ¿kawkitsa qhanañchtʼäwinak jikxatasma? Aka yatichäwxar jutkis uka yatichäwinakanwa Diosan Aruparjam qhanañchtʼäwinak jikxatäta, janiw jaqinakan amuytʼaparjamäkiti. Ukhamasti wali askipunïspawa Bibliam uñxattʼasa juma pachpa ukanak amuytʼasma ukaxa.