Diosan Apnaqäwipax niyaw qhispiyxistani
Diosan Apnaqäwipax niyaw qhispiyxistani
“Munañamampisti apnaqapxita. Munañamasti luratäpan akapachanxa, kunjämatï alaxpachana luratäki ukhama.” (MATEO 6:10.)
1. Chiqpachansa, ¿kuna tuqitsa Jesusax yatichäna?
KUNJAMSA arkirinakapax Diosar mayisipxañapa ukwa Jesusax Wali Uñtʼat Arstʼäwipanxa yatichäna, uka tuqit arsusawa kun yatichiris jutäna ukxa qhan uñachtʼayäna, akham sasa: “Munañamampisti apnaqapxita [jan ukax “apnaqäwimax jutpan”, NM]. Munañamasti luratäpan akapachanxa, kunjämatï alaxpachana luratäki ukhama” sasa (Mat. 6:9-13). “Jesusax jachʼa markanakana, ukhamarak jiskʼa markanakanwa sarnaqäna Diosan arunakap yatichasa, ukhamarak Diosan reinopat parlasa” (Luc. 8:1). Ukat arkirinakaparux “nayraqatax Diosan reinopa munapxam, ukhamarak kunatix chiqäki jupan nayraqatapanxa ukanaka” sasaw säna (Mat. 6:33). Aka wakichäwit yatxatasaxa, kunjamsa yatiyir sarkasax aka yatichäwimpix jaqinakar yatichsna uk amuytʼapxañäni. Sañäni, kunjamsa aka jisktʼanakarux qhanañchsna uk amuytʼañäni: ¿Qhawqha wakiskirisa Diosan Apnaqäwipan yatiyäwipaxa? ¿Kunatsa jaqinakax qhispiyatäñ muntanxa? ¿Kunjamsa Diosan Apnaqäwipax qhispiyistani?
2. Diosan Apnaqäwipan yatiyäwipaxa, ¿qhawqha wakiskirisa?
2 Jesusax jichhürunakatakix akham sänwa: “Diosan reinopat aka suma yatiyäwisti aka uraqpachanwa yatiyatäni, ukhamat taqi markanakan yatipxañapataki, ukatsti akapachan tukusiñapaw jutani” sasa (Mat. 24:14). Diosan Apnaqäwipat yatiyañax wali wakiskiriwa; janiw ukham yaqha yatiyäwix utjkaspati. Ukatwa, Diosan Apnaqäwipax alaxpachan uttʼayatäxiwa sasina Jehová Diosan niya paqallq millón Qhanañchirinakapax aka Uraqpachan wal yatiyasipki, jupanakasti patak waranqa jila tamanakanwa tantachasipxi, janipuniw nayrax ukham yatiyasirïkänti. Ukax wali suma yatiyäwipuniwa, kunattix uka gobiernompiw Diosax aka Uraqxa apnaqxani. Ukhawa, Jehová Diosan munañapax aka Uraqin luratäxani, kunjamatï alaxpachan luratäki ukhama.
3, 4. Diosan munañapax aka Uraqin luratäxani ukhaxa, ¿kunanakas pasani?
3 Diosan munañapax aka Uraqin luratäxani ukhaxa, ¿kunsa Jehová Diosax jaqinak laykux lurani? “Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa.” (Apo. 21:4.) Kunjamtï jichhax juch katuqatas layku ukat juchararätas layku usunttan ukat jiwaraktanxa, jutïrinxa janiw ukhamäxaniti. Diosan amtatäki uka jiwatanakax wiñayatakiw aka Uraqin jakasipxani, kunattix Bibliax siwa: ‘Jiwatanakatxa jan aski jaqinakasa, aski jaqinakasa jaktanipxaniwa’ sasa (Hech. 24:15). Chʼaxwañanakasa, usuntañanakasa, manqʼat awtjatäñanakasa chhaqtxaniwa, ukat aka Uraqpachaw mä paraisor tukxani. Jichhürun axsarata animalanakasa janiw axsaratäxaniti ukat animalanakkamas suman jakasxapxani (Sal. 46:9; 72:16; Isa. 11:6-9; 33:24).
4 Ukhamax wali sumapunïniwa, ukatwa Diosan Apnaqäwipanxa kunjamänis jakäwix uka tuqit parlasax akïr arunakampi mä profeciax sispachäna: “Llampʼu chuymaninakasti uraq katuqapxani, jilarkir sumankañampiw kusisipxarakini”. Ukampis ¿kunas ñanqha luririnakarux pasani? Profecía arunakax akham siwa: “Akat mä jukʼa urunakarux ñanqha lurir jaqinakax chhaqtxaniwa” sasa. Jehová Diosar ‘suytʼirinakakiw uraqin jakasipxani’ (Sal. 37:9-11).
5. Akapachaxa, ¿kunjamansa uñjasini?
5 Janïr taqi ukanakax phuqaskipanxa, akapach may may politicanakasa, yupaychäwinakasa, qullqi tuqi uttʼayäwinakasa chhaqtxañapawa. Ukat Diosan Apnaqäwipaw taqi ukanak chhaqtayani. Daniel profetax Diosan amuytʼayatäsax akham sänwa: “Uka reyinakan apnaqañapkamasti, alaxpachankiri Diosax mä yaqha reino saytʼayarakini, [alaxpachankir] uka reinosti janipuniw tukjatäkaniti ni apnaqatäkarakinisa yaqha markanakampixa, jan ukasti jupaw taqi yaqha reinonakarux tukjani, wiñayan wiñayapaw uka reinox utjarakini” sasa (Dan. 2:44). Ukatxa, ‘machaq alaxpachaw’ (Diosan alaxpachankir machaq apnaqäwipaw) utjani, ukaw ‘machaq uraqirux’ (Diosan iyawsata jaqinakarux) apnaqani “ukansti taqi kunas chiqapapunïniwa” (2 Ped. 3:13).
Nayra pachanakat sipansa jichhaw qhispiyatäñ wal muntanxa
6. Akapach jan waltʼäwinakatxa, ¿kamsis Bibliaxa?
6 Supayasa, Adanasa, Evasa, Dios contra saytʼapkäna ukhaxa, ukat jupanak pachpat kunas askixa ukat kunas jan askïki uk lurañ amtapxän ukhaxa, taqi jaqinakaruw jan walir aptʼawayistu. Ukat Noé chachax jakkäna ukhaxa, mä arunxa, waranq suxta patak jila maranak pasatatxa ‘jaqinakan jan walinak lurapxatapax sintïnwa’ ‘jaqix ñanqha lurañakpun amtaskäna’ (Gén. 6:5). Ukat waranq kimsa patak mara pasatatxa, jan waltʼäwinakax ukhamaskakïnwa, ukatwa Salomonax akham sas qillqäna: “Ukatwa jiwxirinakarux waliki jiwxi sista, khitinakatix jakasipki ukanakat sipansa”, ukat saskakïnwa: “Aka panpachanit sipanxa jukʼampi askinkapxiwa khitinakatix janïra nacipki ukanakaxa, jupanakasti janïraw uñjapkiti aka uraqina ñanqha lurañanakxa” sasa (Ecl. 4:2, 3). Uka pachat aksarux kimsa waranq maraw pasawayxi, ukat jan waltʼäwinakax utjaskakiwa.
7. Nayra pachanakat sipansa, ¿kunatsa Diosan qhispiyäwip wal muntanxa?
7 Chiqpachansa, waranq waranqa maranakaw jan waltʼäwinakax utjxi, ukampis jichhax Diosan Apnaqäwipampi qhispiyatäñxa wal muntanxa. Kunanaktix aka qhipa patak maranakan uñjawayktan ukanakaxa, janipuniw kuna pachas yatisirïkänti, ukat sapürutjamwa jukʼampi jan walir sarasktanxa. Amuytʼañataki, Worldwatch sat Institucionax akham sasaw yatiyi: ‘Cristox aka Uraqinkkäna uka marat 1899 marakam utjiri chʼaxwäwinakat sipansa [1900 marat aksarux] walpunwa jaqinakaxa chʼaxwäwinakanxa jiwarawayapxi’ sasa. Khä 1914 marat aksaruxa, patak millonat sipansa jila jaqinakaw chʼaxwäwinakan jiwarapxatayna. Mä qillqatax sarakiwa, payïri jachʼa chʼaxwäwinxa (II Guerra Mundial) niya suxta tunka millón jaqinakaw jiwarapxatayna sasa. Jichhaxa, yaqhip jachʼa markanakaxa armas nucleares satäkis uka armamentonakanïpxiwa, ukat aka Uraqit niya taqiniru chhaqtayañatakisa chʼamanïpxiwa. Ciencia tuqit sumsay yatxatasipkchixa ukat walja qullanaksay uñstayasipkchixa, sapa marax phisqa millón wawanakaw manqʼatjam jiwarasipki (¿Kunsa Bibliax chiqpachapuni yatichi? sat libron 9 jaljap uñxatäta).
8. Jaqinakax waranq waranqa maranakaw apnaqawayapxi, ukampis ¿kunjamsa apnaqawayapxi?
8 Jaqix janiw jan waltʼäwinakxa chhaqtaykaspati. Suman jakasxapxäta, janiw pisinkxapxätati, janiw usuntañas utjxaniti sasinxa inamayaw politiconakasa, religionanakasa, qullqi apnaqir institucionanakasa parlasipki. Yanaptʼañat sipansa jukʼamp jan walin uñjasiyistu. “Jaqix janiw alaskiti pachpa jakañapxa, janirakiw tukuyäwipsa munañapar apnaqkaspati” siski uka arunakax kunja chiqäskapunis ukwa jaqinakan waranq waranqa maranak apnaqatapax uñachtʼayistu, inamayaw ukhataq maranakax chʼamachasiwayapxi (Jer. 10:23). Jïsa, ‘jaqix chʼamanïsaxa, masinakaparu jan walinak luri’ (Ecl. 8:9). Ukatwa, “jichhürkamax [...] aka Diosan lurat uraqix wal tʼaqhisiski, kunjämtix mä wawachasir warmix warariski ukhama” (Rom. 8:22).
9. Kunjamtï cristianonakjamax sum yatxtanxa, ¿aka ‘qhipa urunakanxa’ kunanakas pasañapäna?
9 Bibliax akham sänwa: “Qhipa urunakanxa jan wali tiemponakaw jutani” sasa. Jaqinakan apnaqäwipanxa, kuna jan walinakas utjani ukanak parlañ tukuyasaxa, akham iwxtʼarakïna: “Jan wali jaqinakax ukhamarak sallqjirinakasa jan walit jukʼamp jan waliruw sarapxani” sasa (2 Timoteo 3:1-5, 13 liytʼasiñapawa). Jiwasatakixa, janiw ukax muspharkañäkiti, kunattix “taqi aka uraqpacha Supayan munañapankatap[x]a” yattanwa (1 Juan 5:19). Ukampis niyaw Diosax luqtirinakaparux aka ñanqha pachatxa qhispiyxani ukaw suma kusiskañ yatiyäwixa.
¿Khitikis qhispiyistaspa?
10. ¿Kunatsa Jehová Diosakiw qhispiyistaspa sasax sistanxa?
10 Suma yatiyäwinak yatiykasaxa, Jehová Diosakiw qhispiyistaspa sasaw qhanañchañama. Taqi jan waltʼäwinakatxa, jupakiw luqtirinakaparux qhispiyañ muni ukat jupakirakiw wiñay qhispiyañatakis chʼamanirakixa (Hech. 4:24, 31; Apo. 4:11). Ukhamasti juparuw alkatañasa, markaparux qhispiyaniwa ukat taqi arunakapsa phuqarakiniwa, kunattix juramentompiw akham arsüna: “Janiw qhipar kuttañax utjkiti, kuntix amtkta ukax phuqhasipuniniwa” sasa. Ukhamax arupax “janiw [jupan] ukarux chʼusaki jan kun lurasax” kuttʼkaniti (Isaías 14:24, 25; 55:10, 11 liytʼasiñapawa).
11, 12. ¿Jehová Diosax luqtirinakaparux kamsisa?
11 Jehová Diosax ñanqha jaqinakaru jiwarayir sarki ukhaxa, luqtirinakaparux qhispiyapuniwa. Amuytʼañataki, jan wali jaqinakar juchañchañataki Jeremías profetar Diosax khitkän ukhaxa, akham sänwa: “Jan khitirus axsaramti, nayaw jumampi chiktʼatäskä jumar imañataki” sasa (Jer. 1:8). Ukat janïr Sodoma, Gomorra markanakar tʼunjkasaxa, pä angelaruw Lot chachampiru familiapampir uka chiqat irpsuñatakix khitäna. Ukat “[Jehová] Tatitusti ninampi, asufrempwa” uka markanakxarux puriyäna (Gén. 19:15, 24, 25).
12 Diosax aka Uraqpachat jan walinak chhaqtayirisay jutkchinixa, ukampis Jehová Diosax istʼasirinakarux qhispiyaspawa. Uma Juiciompi nayra ñanqha pacha chhaqtaykäna ukhaxa, “chiqa arunak parlatapat[x]a” Noé chacharux qhispiyänwa, ‘jupamp chikasti paqallquniw qhispiyasipxarakïna’ (2 Ped. 2:5). Jehová Diosax aka ñanqha pacharu chhaqtaykani ukhaxa, aski jaqinakarux qhispiyaniwa. Ukatwa Arupanxa akham sistu: “Taqi jumanakax Diosaruy thaqtapxam, akapach uraqin llampʼu chuyman jaqinaka [...]. Ukatsti chiqa kankañampi llampʼu chuymampirak sarnaqapxam, inas ukhamata Diosan jachʼa colerasïwi urupata imatäsipkchisma” sasa (Sof. 2:3). Ukat ‘jan wali sarnaqir jaqinakaxa aka uraqitxa apanukuta tukjatäpxaniwa’. Ukampis ‘aski jaqinakasti ukanwa wiñayatak jakapxani’ (Pro. 2:21, 22).
13. ¿Kunjamsa Jehová Diosax jiwatäxapxi uka luqtirinakaparux qhispiyani?
13 Jichhakamax Diosan walja luqtirinakapaw usuntasina, arknaqatäsina, jan ukax yaqha jan waltʼäwinak utjipana, jiwata uñjasipxi (Mat. 24:9). ¿Jupanakasti? Qhispiyatäpxarakiniwa. ¿Kunjamatsa? Kunjamtï siskayätanxa, ‘aski jaqinakax jaktanipxaniwa’ (Hech. 24:15). Ukhamasti, Jehová Diosax taqi luqtirinakaparuw qhispiyani, ¡ukaw wali kusiskañaxa!
Suma apnaqäwi
14. Diosan Apnaqäwipaxa suma gobiernopuniw sasaxa, ¿kunatsa sistanxa?
14 Jehová Diosan alaxpachankir Apnaqäwipaxa wali suma gobiernopuniwa sasaw yatiykasax qhanañchañama, kunattix Diosax kunjam Diosäkitix ukaw uka apnaqäwinxa wali qhan uñjasi, sañäni, taqi kunsa chiqaparuw uñji ukat munasiñampiw apnaqaraki (Deu. 32:4; 1 Juan 4:8). Apnaqañataki suma wakichatäki uka jaqiruw Diosax aka Uraqxaru apnaqañatakix uttʼayi, mä arunxa, Jesucristoruw uttʼayi. Ukatxa, 144.000 ajllit cristianonaka alaxpachar sarapxañapatakirakiw amtatayna, jupanakasti Cristomp chikaw aka Uraq apnaqapxani (Apo. 14:1-5).
15. ¿Kunatsa Diosan Apnaqäwipax jan akapach apnaqäwinakjamäki?
15 Jesusax 144.000 ajllitanakampi apnaqkani ukhaxa, janiw akapach apnaqirinakjam apnaqkaniti. Kunattix akapach apnaqirinakax qhurunakäpxiwa ukat chʼaxwañanakaruw markachirinakaparus puriyapxi, ukatwa millón millonax jiwarapxi. Ukatpï Bibliax sistuxa, jan jaqinakarux alkatapxamti sasaxa, kunattix “janiw qhispiyapkaspati” (Sal. 146:3). Ukampis Criston apnaqäwipanxa, munasiña khuyaptʼayasiñaw utjani. Jesusax akham sänwa: “Nayar jutapxam taqi qarjatanaka jatjatanaka, nayaw samarayapxäma. Nayan yugoxa apapxam, ukatsti nayat yatiqasipxarakita. Nayasti llampʼu chuymani, altʼat chuymanirakïtwa, ukatwa almaman samarañapxa jikxatapxäta. Nayan yugoxasti jasa apañakiwa, khumuxasti sinti phisnakirakiwa” sasa (Mat. 11:28-30.)
Niyaw aka qhipa urunakax tukusini
16. ¿Kunjamsa aka qhipa urunakax tukusini?
16 Khä 1914 maratpachwa akapachax qhipa urunakankxi. Ukat aksaruw ‘akapachan tukusiñap urunakankxtanxa’ (Mat. 24:3). ‘Jachʼa tʼaqhisïwiw’ utjani sasin Jesusax siskäna ukax niyaw qalltani (Mateo 24:21 liytʼasiñapawa). Janiw ukham tʼaqhisiñax utjkänti ni utjkanisa ukaw Supayan pachap chhaqtayxani. Ukampis ¿kunjamsa qalltani? ¿Ukat kunjamsa tukuyani?
17. Jachʼa tʼaqhisïwi qalltkani ukhaxa, ¿kunaw pasani sis Bibliaxa?
17 Jachʼa tʼaqhisïwix akatjamatwa qalltani. Ukhamax Jehová Diosan ‘urupaxa’, jan suykañäni ukhaw purinini, “kunapachatix jaqix akham siskani: ‘Taqi kunas sumakïskiwa, janiw kunas paskaniti’” ukhaw purinini (1 Tesalonicenses 5:2, 3 liytʼasiñapawa). Kunapachatï markanakax jachʼa jan waltʼäwinakap niya askichatjam uñjapxani ukhawa jachʼa tʼaqhisïwix qalltani. “Jachʼa Babilonia”, Uraqpach apnaqir kʼari yupaychäwixa, akatjamatwa tʼunjatäni, muspharkañapunïniwa. Tʼunjatäkani ukhaxa Apnaqirinakasa ukat yaqha jaqinakasa wal musphapxani (Apo. 17:1-6, 18; 18:9, 10, 15, 16, 19).
18. Supayax Diosan markap contra saytʼkani ukhaxa, ¿Jehová Diosax kamachanisa?
18 Ukatxa, “unañchanakaw utjani intina, phaxsina, warawaranakana” ukat “ukapachaw alaxpachan mä chimpux uñstanini Jaqin Yuqapata”. “Kunapachatï akanakax pasañ qalltani ukkhaxa, chʼamachasipxam, ukhamarak suyapxam jankʼakirakiw qhispiyatäxapxäta” (Luc. 21:25-28; Mat. 24:29, 30). Gog satäkis ukaxa, mä arunxa, Supayaxa minkʼanakapampiw Diosan markap contra saytʼapxani. ¿Jehová Diosax ukhax kamachanisa? Jupax siwa: “Khititix llamktʼi markaxaruxa, ukax nayan nayraxaruw llamktʼaski” sasa (Zac. 2:8). Taqi munañan Jehová Diosax jankʼakiw taqi chuyma luqtirinakaparux qhispiyani. Inaw Supayax chhaqtayañ munaskani (Eze. 38:9, 18).
19. Diosan alaxpach ejercitopawa Supayan ñanqha pachapar tukjani sasaxa, ¿kunatsa sisnaxa?
19 Diosax akapach markanak contra saytʼkani ukhawa markanakax ‘yatipxarakini jupax Jehová Tatitütapa’ (Eze. 36:23). Taqi chʼamani Diosaxa walja angelanakapwa Supayan pachap qal chhaqtayxañatakix khitanini, jupanakarusti Jesusaw pʼiqtʼani (Apo. 19:11-19). Amtapxañäni, mä angelakiw Diosar uñisir “pataka kimsaqallq tunka phisqani waranqa jaqinaka[ru]” mä aruman jiwarayäna. Ukhamasti, jachʼa tʼaqhisïwix Armagedonan tukusxani ukhaxa uka alaxpach ejercitoxa jankʼakiwa Supayan pachaparux qʼal tʼunjani (2 Rey. 19:35; Apo. 16:14, 16). Supayampi saxranakapampixa mikʼayan waranq mara jistʼantataw uñjasipxani uka qhipatxa tʼunjatäxapxaniwa (Apo. 20:1-3).
20. ¿Jehová Diosax Apnaqäwip tuqix kuns lurani?
20 Ukhamatwa aka Uraqinxa jan walinakax chhaqtxani, ukat aski jaqinakax wiñayaw ukan jakasipxani. Jehová Diosaw Jachʼa Qhispiyirixa ukaw qhan uñachtʼayasirakini (Sal. 145:20). Uka Apnaqäwip taypiwa, Diosax jachʼa munañanïtap uñachtʼayasini, qullan sutipas qʼumachasini, ukat aka Uraqitak amtapasa ukhamatwa phuqasirakini. Taqiniw aka suma yatiyäwinak yatiyasax kusissna. Ukhamaraki, ‘wiñay jakañatak wakichatäpki’ uka jaqinakaru, kunjamsa Diosan Apnaqäwipax niy qhispiyistani uka tuqinakat amuytʼayasax kusisiraksna (Hech. 13:48).
¿Amtastati?
• Diosan Apnaqäwipax kunja wakiskirisa ukxa, ¿kunjamsa Jesusax uñachtʼayäna?
• ¿Kunatsa Diosan qhispiyäwip jichhürunakan wal muntanxa?
• ¿Kunanakas jachʼa tʼaqhisïwin pasani?
• ¿Kunjamatsa Jehová Diosax Jachʼa Qhispiyirïtap uñachtʼayani?
[Jisktʼanaka]
[16, 17 jananakan fotonakapa]
Janiw nayras ukham yatiyasirïkänti ukhamaw suma yatiyäwinakax aka Uraqpachanwa yatiyasini sasaw Diosan Arupanxa säna
[19 janan fotopa]
Kunjamtï Jehová Diosax Noé chacharus familiaparus qhispiyänxa, ukhamarakiw qhispiyistaspa
[20 janan fotopa]
Jehová Diosax ‘taqi jachanakapwa picharani, janirakiw jiwañas utjkxaniti’ (Apo. 21:4)