Waynäkasa tawaqükasaw Jehová Diosar luqtañama
Waynäkasa tawaqükasaw Jehová Diosar luqtañama
“Kuntix yatiqkta, ukat iyawskarakta ukarux jan pächasis arkam.” (2 TIMOTEO 3:14.)
1. Cristian wayn tawaqunakan qullan luräwinakaparuxa, ¿kunjamsa Jehová Diosax uñji?
JEHOVÁ Diosaxa, wayn tawaqunakan qullan luräwinakapxa wali askitwa uñji, ukatwa mä profecía qillqayäna. ‘Atiptʼañ urumanxa markamax taqi chuymaw luqtañatakix sartani. Sullar uñtataw waynanakax jumamp chika sarantapxani’ sasaw Salmo qillqirix säna (Sal. 110:3, NM). Ukhamasti, Jehová Diosaxa, luqtañatak iyaw siri wayn tawaqunakarux wal munasi.
2. Akapachankirinakax wayn tawaqunakaruxa, ¿jutïr tuqitxa kamsapxisa ukat kunjamsa uñjapxi?
2 Jumasti, wayna, tawaqu, ¿Jehová Diosar jakäwim katuyasxtati? Waljanitakix uk amtañax chʼamakiwa, kunattix empresarionakasa, yatiqañ utan yatichirinakasa, awisax familiaranakasa uñtʼat masinakasa qullqi thaqhañ tuqiruw wayn tawaqunakarux wiytapxi. Kunapachatix mä waynax jan ukax mä tawaqux Diosar yupaychañatak chʼamachasi ukhaxa, akapach jaqinakax jiskʼachapxiwa. Ukampis Diosar yupaychañ amtapxatapax wali askipuniwa, kunattix janiw ukham yaqha suma jakäwix utjkiti (Sal. 27:4). Aka kimsa jisktʼanakat yatxatañäni: ¿Kunatsa Jehová Diosar luqtañama? Jaqinakax kunsay parlasipkpan kunsay lurasipkpan jumaruxa, ¿Jehová Diosar luqtas jakañamatakixa kunas yanaptʼätamxa? ¿Kuna qullan suma luräwinakansa jumax irnaqasma?
Jehová Diosaruw taqinis yupaychañasa
3. ¿Jehová Diosan luratanakap uñjasax kamachañasasa?
3 ¿Kunatsa jakkiri ukat chiqpach Diosar yupaychañamaxa? Apocalipsis 4:11 qillqatanwa qhanañchistu: “[Jehová], nanakan Diosaxa, jumax askïtawa jachʼañchäwi, gloria, ukhamarak munañanïña katuqañatakixa. Jumaw taqi kuns ina chʼusat lurtaxa, munañamatarakwa taqi kunas jakaskaraki, juman uskutarakiwa” siwa. Taqi kunasa Jehová Diosan luratawa. ¡Wali suma uraqinpunwa utjastanxa! Quqanaka, panqaranaka, animalanaka, qutanaka, qullunaka, jachʼa jawiranaka... taqi ukanakax Jehová Diosan luratawa. Lurir Diosarux akham sasaw Salmo qillqirix säna: “Uraqix luratanakaman phuqhantatawa” sasa (Sal. 104:24). Jehová Diosax wali munasiñapatwa suma cuerpompi suma amuytʼampi churistu, ukatwa aka Uraqin kusisit sarnaqastanxa, ukatarakwa luratanak uñjasas kusisiraktanxa, ¡ukham jakasax walpun Diosar yuspärtanxa! ¿Janit ukham yuspäratas laykux luqtañäkaspa?
4, 5. Jehová Diosar taqi chuymamp atinisiñapatakixa, ¿kunanak uñjañas Josueyarux yanaptʼäna?
4 ¿Kunatsa Jehová Diosar luqtañasarakixa? Ukax israelitanakar irpir Josué chachan arunakapan qhanañchasi, janïr jiwkasaxa Diosan markaparux akham sawayänwa: “Muntwa jumanakan amtasiñanakama taqi chuymanakamampi, ukhamaraki taqi jakañanakamampiraki. Diosasti taqi suma arunakapwa jumanakampi phuqhi, kunjämtï jupax arsüna ukhama. Janiw kuna arunakapas jan phuqhasisax pasawaykiti” sasa. ¿Kunatsa ukham säna? (Jos. 23:14.)
5 Uraqinïxapxätawa sasin Jehová Diosax israelitanakar siskäna ukxa, wawatpachwa Josueyax Egipto markankkasax istʼpachäna (Gén. 12:7; 50:24, 25; Éxo. 3:8). Ukatxa, kunjamsa Jehová Diosax ukanak phuqañ qalltäna ukat kunjamsa Diosax Egipto markxarux 10 jan waltʼäwinak apayäna, ukat jachʼa jachʼa tukur faraonarus kunjamsa israelitanakar antutxañapatakix munkir jan munkir iyawsayäna taqi ukanakwa Josueyax jachʼäxasax uñjäna. Ukat israelit masinakapamp chikaw Wila Lamar Quta makatäna, ukat kunjamsa faraonampi soldadonakapampix uman apatäsin jiwarapxäna uksa Josueyax uñjarakïnwa. Ukat Sinaí satäki “uka jachʼa axsarkañ wasara[n]” israelitanakax sarasipkäna ukhaxa kunjamsa Jehová Diosax taqi kun churäna uksa Josueyax uñjarakïnwa, manqʼatjamsa umatjamsa janiw maynis jiwkänti (Deu. 8:3-5, 14-16; Jos. 24:5-7). Kunapachatï cananeo markanakaru tʼunjasa Suma Uraq katuqañ horasax purinkäna ukhaxa, Jehová Diosawa israelitanakarux yanaptʼäna ukxa Josueyax sum uñjaskarakïna (Jos. 10:14, 42).
6. Diosar wal luqtañ munañamatakixa, ¿kunas yanaptʼätamxa?
6 Kunjamsa Jehová Diosax arsutanakapar phuqäna ukxa sum Josué chachax yatïna. Ukatwa akham säna: “Ukampisa nayampi taqi familiaxampixa [Jehová] Diosaruw servipxä” sasa. (Jos. 24:15). Wayna, tawaqu, ¿jumasti? Kawkïr arsutanakaptix Diosax phuqki ukhamarak phuqkani ukanakat amuytʼasaxa, ¿Josué chachjamarakiti, Diosar luqtañ wal munta?
7. ¿Kunatsa bautisasiñax wali wakiskirixa?
7 Jehová Diosan luratanakap uñjañawa, ukhamarak kunjamsa Jehová Diosax arsutanakap phuqani ukanakat lupʼiñawa Jehová Diosar jakäwim katuyasiñamatakisa bautisasiñamatakisa yanaptʼätamxa. Maynix Diosar luqtañ munasaxa Jesusjamaw bautisasiñapa, ukaw wali wakiskirixa. Janïr Mesiasjam sarnaqkasaxa Jesusax Bautisir Juanamp bautisayasiriw saräna. ¿Kunatsa? “Nayasti janiw alaxpachat munañax lurasir jutkti, jan ukasti khitankitu ukan munañap luririw jutta” sasaw Jesusax säna (Juan 6:38). Ukhamasti, bautisasisaxa Awkipan munañap lurañataki wakichatätapwa uñachtʼayäna (Mat. 3:13-17).
8. ¿Kunatsa Timoteox Diosar yupaychañ amtäna, ukat kunsa jumax lurañama?
8 Timoteo sat cristiano waynat parltʼarakiñäni, jupax tiempompixa walja suma luräwinakwa Diosat katuqäna. ¿Kunatsa Timoteox chiqpach Diosar yupaychañ amtäna? ‘Yatiqatap layku ukhamarak iyawsatap layku’ siw Bibliaxa (2 Tim 3:14). Jumatix Diosan Arupat yatxatsta ukat chiqapaw sas iyawsaraksta ukhaxa, Timoteo waynjamarakiw jikxatasta. Ukhamasti jichhaw amtañ horasaxa. ¿Janit awk taykamampi parltʼañax wakiskaspa? Jupanakawa ukat tamankir irpir chuymaninakawa kuna mayitanakas bautisasiñatakix phuqañama ukxa amuytʼayapxätamxa (Hechos 8:12 liytʼasiñapawa).
9. Bautisasïta ukhaxa, ¿yaqhip jaqinakax kamachapxanisa?
9 Bautisasisaxa, chiqpach Diosar luqtañwa sum qalltäta. Wali jaya tʼijuñäkaspas ukham tʼijuñwa qalltäta, ukat premiopasti akanakawa: Diosan munañap phuqasaxa jichhax kusisitaw jikxatasïta, ukat jutïrinsti, wiñay jakañ katuqarakïta (Heb. 12:2, 3). Ukat jumjam tʼijusipki uka familiamankirinakarusa kusisiyätawa, ukat tamamankir munat masinakamarus kusisiyarakïtawa. Ukampis taqit sipansa Jehová Diosan chuymapwa jukʼamp kusisiyäta (Proverbios 23:15 liytʼasiñapawa). Chiqpachansa, kunatsa Jehová Diosar yupaychañ amtta ukxa yaqhipanakax janiw sum amuyapkaniti, ukat yaqhipanakaxa amtäwim contraw parlapxaspa. Awisax juma contraw saytʼapxaspa. Ukampis jumax uka jan waltʼäwinakarux saykatasmawa.
Amtäwim contraw jan ukax juma contraw saytʼapxaspa
10, 11. 1) Diosar yupaychañ amtatamatxa, ¿kamsasas jisktʼapxiristamxa? 2) Jisktʼäwinakar qhanañchasaxa, ¿kunjamatsa Jesusat yatiqasitam uñachtʼayasma?
10 Jehová Diosar yupaychañ amtatamatxa uta jakʼankirinakasa, yatiqañ utan yatiqir masinakamasa, familiaranakamasa muspharapxaspawa. Kunatsa ukham amtawayta, kunanaksa yatiqta sasin inas jisktʼapxiristam ukhaxa, ¿kamsasmasa? Chiqpachansa, amtäwimat qhanañchtʼañatakixa, nayraqatxa, ukhamaskapunit janicha ukat kunjamsa jikxatasta ukanakatxa janiw payachasiñamäkiti. Ukat qhanañchañ horasax Jesusat yatiqasisaw parlañama, janiw jupjam suma qhanañchirix utjkiti.
11 Kunapachatix judionakan yupaychäwip irpirinakax jaktaniñ tuqit Jesusar jisktʼapxäna ukhaxa, Qullan Qillqatanakan jan uñxatapkatayna uka arunakatwa Jesusax arstʼäna (Éxo. 3:6; Mat. 22:23, 31-33). Ukat kawkïris jachʼa mandamientox sasin ley yatichirix jisktʼäna ukhaxa, Jesusax Bibliat apstʼat arunakampiwa qhanañchäna, ukat ukham qhanañchataxa uka jaqix wal yuspäräna (Lev.19:18; Deu. 6:5; Mar. 12:28-34). Ukat Jesusan arstʼatapatsa ukhamaraki Qullan Qillqatanakat qhanañchtʼatapatsa “jaqinakax Jesús laykux tʼaqjtawayapxänwa”, ukat uñisirinakapasa janiw kunsa kamachapkänti (Juan 7:32-46). Kunapachatix yatiqatanakamat jisktʼapxätam ukhaxa, ¿Jesusat yatiqasisax kamsätasa? Bibliatwa uñxattʼayañama ukat respetompi “suma chuymampi[w]” qhanañchtʼañama (1 Ped. 3:15). Kun jisktʼatasa jan kamsañ yatksta ukhaxa, qhanakwa janiw yatkti sañama ukat yatxataniwayäwa sasin sarakiñama. Índice de las publicaciones Watch Tower jan ukax CD-ROM Watchtower Library uka wakichäwitwa yatxatañama. Sum wakichtʼasïta ukhaxa, “sapa mayniru kunjäm arusxatañsa” yatirakïtawa (Col. 4:6).
12. Uñisita jan walin uñjaskasasa, ¿kunatsa jan chʼam laqʼayasiñamäki?
12 Yaqhipanakax janiw yatiqatanakamataki jisktʼkätamti, ni Diosar luqtañ amtawayta ukanakatsa. Amtapunïtawa, Diosar uñisiri, Supay Satanasawa akapach apnaqaski (1 Juan 5:19 liytʼasiñapawa). Ukhamasti, janiw taqi jaqinakan iyawsatäña munañasäkiti, janiw akapachat chʼamachtʼäwi suyañasäkiti. Awisax jiwas contra saytʼirinakaw utjaspa. Ukat yaqhipanakax jiwasat ‘jan walinakwa’ parlapxaspa (1 Ped. 4:4). Ukampis amtapunim janiw jumarukix ukham lurapktamti. Jesucristorux ukhamwa tʼaqhisiyapxarakïna. Ukat apóstol Pedrox ukham jan walinwa uñjasirakikïna, ukat akham sasaw qillqäna: “Munat jilatanaka, jan mayjtʼasipxamti uka jachʼa yantʼanaka jumanakxaru jutatapatxa, mä kuna jan walis jutkaspa ukhama. Jan ukasti kusisipxam Tatitjama tʼaqhisipxatanakamatxa” sasa (1 Ped. 4:12, 13).
13. Tʼaqhisiyatasa, ¿kunatsa cristianonakax kusisitäpxaspa?
13 Cristor arkatam layku uñisita ukhamarak arknaqata sarnaqasin aguantasaxa kusisiñamawa. ¿Kunatsa? Supayan munañaparjam sarnaqasma ukhaw akapachax munasiristamxa, janiw Diosar yupaychatamatxa. Ukatwa Jesusax akham säna: “¡Ay, kamachapkakïta jumanaka, kunapachatï taqinis jumanakata ‘Walikiw’ sapkani ukapacha! Ukhamarakwa awkinakapax kʼari profetanakarux lurapxirïna” sasa (Luc. 6:26). Supayampi yanapirinakapampixa, Jehová Diosar luqtatamatwa wali coleratäpxi ukatwa tʼaqhisiytamxa (Mateo 5:11, 12 liytʼasiñapawa). Cristo ‘Tatit laykutix jan wali arunakampi tuqipxstamxa’ kusisiñamawa (1 Ped. 4:14).
14. Jan walinakan uñjaskasina Jehová Diosat jan jithiqtasa yupaychaskaktan ukhaxa, ¿kuna askinaksa jikxattanxa?
14 Uñiskatasa arknaqatäkasasa Jehová Diosat jan jithiqtasaxa, pusi askinakwa jikxattaxa. Nayraqatxa, Diosata ukhamaraki Yuqapatwa qhanañchtaxa. Ukatxa, jan jithiqtasa aguantatamampixa cristiano jilat kullakanakamaruw chʼamañcharaktaxa. Ukat Jehová Diosar jan uñtʼapki uka jaqinakasa, aguantatam uñjasaxa Jehová Diosat yatiqañ munapxarakispawa (Filipenses 1:12-14 liytʼasiñapawa). Ukatxa, yantʼanakaru saykatañataki Jehová Diosax chʼam churtam uk uñjasaxa, jukʼamp Diosar munasiñamax jilti.
Jumatakix “jachʼa punkuwa” jistʼarata
15. ¿Kuna ‘jachʼa punkus’ Pablotakix jistʼarasïna?
15 Éfeso markan yatiyatapatxa apóstol Pablox akham sasaw qillqäna: “Mä wakichata jachʼa punkuwa jistʼarasirapitu” sasa (1 Cor. 16:8, 9, MT). Uka markan suma yatiyäwinak yatiyañasa ukat arkirir tukupxañapataki yatichañasa waljapuniw utjäna, mä punkjamaw misionerjam irnaqañapatakix jisktʼarasirapïna. Uka punknama mantasaxa, mä arunxa, iyaw sas irnaqtʼasaxa, walja jaqinakaruw Diosar uñtʼaña ukat yupaychaña yanaptʼäna.
16. ¿Kunjamsa aka Uraqinkaskir ajllitanakax 1919 maran ‘mä jistʼarat punkxa’ pasapxäna?
16 Khä 1919 maranxa, Jesucristox aka Uraqinkaskir ajllitanakatakix “mä jistʼarat punkwa” uchäna (Apo. 3:8). Jupanakax uka punknam pasasaxa, nayrat sipansa wali chʼamampiw yatiyañ qalltapxäna ukhamatwa Biblian chiqa yatichäwinakapxa yatichapxäna. ¿Ukham yatiyasax kuns jikxatapxäna? Suma yatiyäwinakax aka Uraqpacharuw puriyasiski, ukat niya paqallqu millón jaqinakaw Diosan suma Uraqipan wiñay jakañatakix suyasipki.
17. ¿Kunjamsa jumax irnaqäwir mantañataki ‘jachʼa punknam’ pasasma?
17 Jehová Diosan taqi luqtirinakapatakiw irnaqäwir mantañataki ‘jachʼa punkux’ jistʼaratäski. Khitinakatix uknam pasapki ukat wal yatiyasipki uka jilat kullakanakax wali kusisitaw jikxatasipxi ukat chuymas phuqtʼataw sarnaqapxaraki. Wayna, tawaqu, ¿jumasti? Jaqi masisar ‘suma yatiyäwinakar iyawsapxañapataki’ yanaptʼañaxa, ¿jumatakix wali wakiskirirakiti? (Mar. 1:14, 15.) ¿Precursor auxiliarjam jan ukax regularjam irnaqtʼañ amtxtati? Yaqha irnaqäwinakax akanakarakïspawa: Tantachasiñ Utanak lurañwa yanaptʼasma jan ukax Betel utansa jan ukax misionerjamas irnaqtʼarakismawa. Supayan ñanqha pachapan tiempopaxa tukusiskiwa, ukat sapürutjamwa Diosan Apnaqäwip nayrar uchañ laykux jukʼamp irnaqañasa. Uka ‘jachʼa punkux’ jistʼarataskipanxa, ¿uknam mantätati?
“Yantʼapxam, uñjapxarakim, [Jehová] Tatitun munasir kankañapa”
18, 19. 1) Jehová Diosar luqtañ wal munañapatakixa, ¿kunas Davitarux yanaptʼäna? 2) Diosar luqtatapatxa janiw Davitax kunapachas arrepentiskänti, ¿kunjamatsa uk yattanxa?
18 Salmo qillqir Davitax Diosan amuytʼayatäsax akham iwxa arunakwa qillqäna: “Yantʼapxam, uñjapxarakim, [Jehová] Tatitun munasir kankañapa” sasa (Sal. 34:8). Kunapachatix nayra Israel marka apnaqir Davitaxa uywanaka awatir waynitukïskäna ukhaxa, Jehová Diosaw axsarkañ animalanakatsa jarkʼaqäna. Goliatampi nuwasiri sarkäna ukhasa, Jupaw atipañapatakix yanaptʼäna, ukat yaqha jan waltʼäwinakatsa qhispiyarakïnwa (1 Sam. 17:32-51; Sal. 18, pʼiqiñcha). Diosan wali munasitäsawa Davitax akham arunakamp qillqäna: “Dios Tatay, muspharkañ luratanakamax waljawa, nanakat khuyapayasitamas waljarakiwa: janiw khitis jumjamax utjkiti. Ukanakxat yatiyañ yantʼta, arsuñ yantʼarakta, nayatakisti janiw jaktʼañjamäkiti” sasa (Sal. 40:5).
19 Davitax Jehová Diosarux walpun munasïna ukat taqi chuymampi taqi amuyupamp jachʼañchañwa munäna (Salmo 40:8-10 liytʼasiñapawa). Chiqpach Diosar luqtasa sarnaqawayasaxa janipuniw arrepentiskänti. Dios chuyma jakañaw jupatakix jukʼamp wakisirïnxa, ukaw jukʼampi kusisiyarakïnxa. Chuymanïxasaxa, Davitax akham sänwa: “Tatay, jumaw nayan suytʼañaxätaxa, wayna kankañaxatpach alkatañaxätasa. Diosaxay, chʼama qarit pachan uñjaskasasa, janqʼu ñikʼutan pachankkasasa, janikiy jaytanuktʼasistati” sasa (Sal. 71:5, 18). Janchi tuqit tukusitäxchïnsa, ukampis Jehová Diosampix jukʼamp sum apasipxäna ukat Diosarus jukʼamp alkatarakïna.
20. Kuna tuqir chʼamachasiskañat sipansa, ¿kunatsa Diosar luqtas jakañax wali askixa?
20 Josué chachana, Davitana ukhamaraki Timoteona sarnaqäwinakapaxa, kunjam wali askisa Diosar luqtas jakañaxa ukwa uñachtʼayistu. Janiw mä jukʼasa akapach yänakjamäkiti, kunattix akapach yänakax mä jukʼa tiempotakikiwa, ukampis Diosar ‘taqi chuymampi ukhamarak taqi jakañampi’ luqtiristi wiñayatakiw bendicionanak katuqani (Jos. 22:5). Jehová Diosar jakʼachtʼasisin jan jakäwim katuyasksta ukhaxa, akham jisktʼasiñamawa: “Jehová Diosan Qhanañchiripäñatakixa, ¿kunas jarkʼitu?” sasa. Bautisatäxsta ukhaxa, ¿janit jukʼamp kusisitäñ munkasma? Ukhamax jukʼampi Diosatak irnaqañaru uchasim ukat Diosar yupaychañ tuqitxa nayrar sartañataki chʼamachtʼasiskakma. Kunjamsa ukham lurasma uka tuqitwa apóstol Pablon sarnaqäwiparjam jutir yatichäwin yatiqañäni.
¿Kamsasmasa?
• Kunatsa Diosar luqtañasa uka tuqinakat pay qhanañchtʼma.
• Diosar luqtañ amtañapatakixa, ¿kunas Timoteor yanaptʼäna?
• Uñisitäsin arknaqätakäsasa, ¿kunatsa sum saytʼasiñama?
• ¿Kawkïr qullan luräwinakansa irnaqtʼasma?
[Jisktʼanaka]
[22 janan fotopa]
Jehová Diosar luqtas jakañaxa wali askipuniwa, janiw ukham jakäwix utjkiti
[23 janan fotopa]
¿Cristianjam yatiqatanakamat qhanañchasmati?