‘Qalltan utjkistäna uka munasiñxa’ jan chhaqtayapxañäniti
‘Qalltan utjkistäna uka munasiñxa’ jan chhaqtayapxañäniti
“Sum katxäsim kunatix utjktam ukxa.” (APOCALIPSIS 3:11.)
1, 2. Jehová Diosat yatiqasktan uka yatichäwinakax chiqäskapuniwa uk sum amuyasaxa, ¿kunjamas jikxatasiyäta?
JEHOVÁ DIOSAR iyawsirinakatakix kuna suytʼäwis utji uka tuqit parlirxa, ¿kunapachas istʼirïta, uk amtasisktati? Nayrax yaqha yupaychäwir sarirïsta ukhaxa, ¿kunjamsa Diosan amtapat yatiqasax jikxatasirïta, jan ukax Biblian jan sum amuytʼañjam yatichäw sum amuytʼayapxirïtam ukhax kunjamsa jikxatasirïta? Inas kʼari yupaychäwinakan sallqjata sarnaqatamatxa amuyasirïsta. ¡Ukham chiqap yatichäwinak katuqasax wali kusisitaw jikxatasirïpachäta! Awkimas taykamas cristianüpxchïna ukhaxa, ¿Jehová Dios tuqit chiqa yatichäwinak sum amuytʼasasa ukat kamachinakaparjam sarnaqañ amtasasa kunjamas jikxatasirïta? (Rom. 12:2.)
2 Wali kusisitaw jikxatasiyäta sasinwa walja jilat kullakanakasax sapxätamxa, Jehová Diosar jukʼampi jakʼachasiyäta ukat markapar Diosax jawsitu ukatxa walpunwa yuspärtxa sasaw sapxätamxa (Juan 6:44). Ukham taqi chuyma Diosan thakipar sarxatapxatap laykuw Diosataki sum irnaqapxäna ukat taqinirurakiw yatiqatanakapatxa yatiyapxäna. ¿Jumax ukhamarakiti jikxatasiyäta?
3. Kunapachatï Jesusax Éfeso tamar mä iwxa apaykäna ukhaxa, ¿kunjamsa jilat kullakanakax sarnaqasipkäna?
3 Éfeso tamar qillqkasaxa, kunjamsa sum sarnaqasipkän ukanakatwa Jesusax arstʼäna, ukampis janiw nayrjam Diosarux munasxapxänti uka tuqimpitwa qillqäna. Akham sänwa: “Nayax taqi luratanakamxa yattwa. Chʼama tukutamsa, llampʼu chuymanïtamsa yatiraktwa. Ñanqha jaqinakaru jan katuqatamsa yatiraktwa. Khitinakatix: ‘Nanakax Tatitun apostolunakapäpxtwa’ siri jaqinakarus jumax yantʼtawa, ukampis uka jaqinakax janiw Tatitunkapkiti; jumasti ukham yantʼasax katjaraktawa kʼarisipxatanakapxa. Wali llampʼusiña taqi kunatakis usktaxa. Naya laykusti waliraki chʼam tuktaxa, jan qarjasisaw tʼaqhisiraktaxa. Ukampis mayaw utjitu juma tuqi arsuñaxaxa: qalltan utjkäyätams uka munasiñamax janiw utjkxtamti” sasa (Apo. 2:2-4).
4. Jesusax Efesonkirinakar siskäna uka iwxaxa, ¿kunatsa jiwasatakix wali askixa?
4 Jesusax kunjamsa Efesonkir tamarusa ukat yaqha tamanakarusa iwxtʼäna ukaxa walpunwa ajllit cristianonakarux jichha tiempon yanaptʼawayi, kunattix 1914 marat aksarux niya nayrjam tiemponwa uñjasiwayapxaraki (Apo. 1:10). Ukampis inas yaqhip jilat kullakanakax Jehová Diosarusa ukat chiqa yatichäwinakarusa jan ‘qalltanjam munasxapxchiti’. Ukhamächi ukaxa, ¿kunjamatsa wasitampi nayrjam taqi chuyma munasiraksna? Kunanaksa lurawaytan kunjamsa sarnaqawaytan ukanakwa amthapiñasa, ukat ukanakatwa lupʼiñasaraki, uka tuqitwa aka yatichäwin yatxatawayañäni.
¿Kunatsa akäskapuniw chiqax sasin sirïta?
5, 6. 1) ¿Kunsa maynix sum amuytʼasiñapa? 2) ¿Kunatsa ‘jumax Jehová Diosan Qhanañchirinakapaw chiq yatichapxi’ sasin sistaxa? 3) Qalltan munasiñapax utjkäna ukham munasiñanïñapatakixa, ¿kunas mä cristianor yanaptʼaspa?
5 Janïr maynix Jehová Diosar jakäwip katuykasaxa, “kunatix askïki, kunatix Diosarux kusisiyki, qʼumäkaraki” ukanakatxa sumwa amuytʼasiñapa (Rom. 12:1, 2). Ukhamax Biblian chiqa yatichäwinakapxa sum yatiqañapa. Jehová Diosan Qhanañchirinakapaw chiqap yatichapxi sañapatakixa, janiw taqinirux mä yatichäwikix chuymapar purtʼkiti, jan ukasti, may maya yatichäwiwa chuymanakapar purtʼaspa. Yaqhipanakax Diosan sutipatwa Biblian liytʼapxi jan ukax jiwatanak tuqit sum amuytʼxapxi (Sal. 83:18, NM; Ecl. 9:5, 10). Yaqhanakax Diosan markapan kunjamsa munasipxi uk uñjapxaraki (Juan 13:34, 35). Ukat yaqhipanakaxa, chiqpach cristianonakax janiw akapachankirïpkiti, mä arunxa, janiw politicarus ni kuna chʼaxwäwirus mitisipki ukanakwa uñjapxi, ukatwa jupanakapuniw chiq yatichapxi sasin taqi chuyma iyawsapxi (Isa. 2:4; Juan 6:15; 17:14-16).
6 Ukanak yatisa ukhamarak yaqha tuqinakampit yatisawa walja jilat kullakanakax Diosar wal munasipxi. Akäskapuniwa chiqa yupaychäwix sañatakix kawkïr yatichäwis jumar yanaptʼawaytamxa, ukanakwa amtañama. Janiw taqinix kikpa jakäwinïktanti ukat janirakiw kikp kikpäktansa, ukhamasti Jehová Diosarux kunayman tuqitwa taqinix munastanxa, ukhamaraki profecía arunakaparus iyawsaraktanxa. Kunatsa jumax Jehová Diosar munasiwayta ukax chuymamankaskpachawa, kunattix janiw chiqa yatichäwix mayjtʼkaspati. Ukhamasti, amtasim kunatsa jumax Jehová Diosan Qhanañchirinakaparux makatawayta ukat kunjamsa jikxatasiyäta ukanakata. Ukhamatwa munasiñamax nayrjamäxani (Salmo 119:151, 152; 143:5 liytʼasiñapawa).
Qalltan utjkistäna uka munasiñas jiltayapxañäni
7. Qalltan utjkistäna uka munasiñ jiltayañaxa, ¿kunatsa wakisi, ukat kunjamatsa ukham lursna?
7 Jehová Diosar jakäwim katuyasiwaykta ukapachat jichhakamax walja mayjtʼäwinakaw jakäwisan utjawaypacha. Ukhamasti, kunayman jan waltʼäwinakar saykatañatakixa, qalltan utjkäyätam uka munasiñama chʼamachañax wakisipunpachänwa. Uka yantʼanakan uñjaskayätan ukhaxa Jehová Diosan yanaptʼap unjaraktanxa (1 Cor. 10:13). Ukhamaxa, ukham walja maranak sarnaqatamaxa jumatakix wali askipuniwa. ¿Kunatsa? Kunattix qalltan utjkäyätam uka munasiñam jilxatañapatakiw yanaptʼawaytamxa ukat kawkïrisa Diosan suma aski munañapax uk amuyañsa yanaptʼawayaraktamwa (Jos. 23:14; Sal. 34:8).
8. ¿Jehová Diosax Moisesampi jikisisax kamsänsa, ukat kunjamatsa israelitanakax Diosar sum uñtʼapxäna?
8 Jehová Diosax Egipto markat israelitanakar qhispiyañatak arskäna uka tuqit amuytʼañäni. Diosax Moisesamp jikisisax akham sänwa: “Kunañtix nayax munkäxa ukaruw nayax tuküxa” sasa (Éxo. 3:7, 8, 13; Éxo. 3:14, NM). Markap qhispiyañatakix kunar tukuñaxay wakischispa ukaruw tukü sasaw Jehová Diosax saskäna. Kunanakas pasäna ukanak uñjasawa Jehová Diosan Jachʼa Chʼamanïtapxa qhanpach amuyapxäna, ukatxa, Jehová Diosax Taripiriru, Pʼiqtʼiriru, Qhispiyiriru, guerran Nuwasiriru ukat manq’ Chuririru ukhamanakaruw tuküna, ukhamarak kunatix wakiskäna ukaruw tuküna taqi ukanakwa israelitanakax uñjapxäna (Éxo. 12:12; 13:21; 14:24-31; 16:4; Neh. 9:9-15).
9, 10. ¿Kunapachanakas maynix Diosar jukʼamp uñtʼi ukat kunatsa wali askix amtañaxa?
9 Chiqpachansa, janiw jumax israelitanakjam jikxataskpachätati. Ukampis jakäwimanxa kunjamsa Diosax jumat llakisi ukanak amuypachätawa, ukaw juman iyawsäwimxa chʼamañchpachätamxa. Inas Jehová Diosax Churirjamax sumanak churstam jan ukax Chuymachtʼirjamax chuymachtʼarakstam jan ukaxa, Yatichirjamaw yaticharakpachätamxa (Isaías 30:20b, 21 liytʼasiñapawa). Kunjamsa Diosax mayisitanakamar phuqi uk amuyaraksta. Jan ukax kuna jan waltʼäwin uñjasisasa, inas mä jilatan yanaptʼapa katuqksta jan ukax Bibliat sapak yatxatkasax kuna suma iwxtʼa jikxataraksta.
10 Jumatï experiencianakamat mayninakar awistʼasmaxa, inas yaqhipanakatakix jan kunäkirikchisa. Chiqpachansa, janiw mä milagrokänti. Ukampis jumatakix uka experienciamax wali askiwa, kunattixa Jehová Diosax kuntï jumax munkayäta ukaruw tukünxa. ¿Qhawqha maras chiqa yupaychäwinkxtaxa? ¿Kunjamsa Jehová Diosax yanaptʼirïtam uk amtastati? Ukhamächi ukhaxa, ukanak sum wasitamp amtthapim ukat kunjamas jikxatasirïta ukanaksa amtarakma. Ukhamatwa kunjamsa Jehová Diosarux ukapachanakax munasirïta ukxa amtäta. Sarnaqäwimxa wali askitwa uñjañama ukat ukanakatwa lupʼiñamaraki, ukhamatwa jumat llakiski uka Jehová Diosamarux jukʼamp jakʼachasïta. Ukatxa janiw khitis uk apaqkätamti.
Jiwas pachpa amuykiptʼasiñax wali wakiskiriwa
11, 12. Mä cristianox jan nayrjam kunatix chiqäkis ukar munasxchixa, ¿kunasa ukhamar purtʼasiyaspa ukat Jesusax uka tuqit kamsänsa?
11 Jumatix nayrjam Diosar jan munasxstaxa ukhamaraki chiqa yupaychäwirus jan nayrjam uñjxstaxa amuytʼasiñamawa, jupax janiw mayjtʼkiti. Jehová Diosax pachpakïskiwa (Mal. 3:6; Sant. 1:17). Jupax kunjamtï nayrax llakiskänxa ukhamarakiw jichhax jumat llakisiski. Ukhamasti, ¿kunatsa jan nayrjam munasiñanïxta? Inas qaritaki jan ukax llakinakan sarnaqatam laykuxa Diosat jan nayrjam maytʼasxstati, ukat Diosat jan yatxatxarakstati ni lupʼxarakstati. Janirak yatiyiris taqi chuyma mistxstati, janirak taqi tantachäwinakarus sarxstati (2 Cor. 13:5).
12 Chiqasa inas jumax ukhaman jan uñjaskstati, ukampis ukhamäspa ukaxa, ¿kunas ukhaman uñjasiypachätamxa? Inas usuntat uñjasxaraksta jan ukax familiamar yanapañächi, ukanakawa tukuy urun jakʼankatap armasiyiristamxa. Jesusax apostolanakaparux akham sänwa: “Amuyasipxam, jan chuymanakamxa vicionakampi machañanakampi qalarayasipxamti, ukhamarak aka jakañan llakisiñanakampisa jan khä urun jumanakax akatjamat katjayasipxañamataki, kunjämtix mä sipitax jistʼantaskis ukhama. Uka urusti ukhamwa jutani taqi uraqpachan jakirinakxaru. Jumanakax jankʼakïpxamaya, ukhamarak orapxam, taqi horasana ukhamat taqi akanak paskani ukat jaltapxañamataki, ukhamarak Jaqin Yuqap nayraqatan uñstapxañamatakisa” sasa (Luc. 21:34-36).
13. ¿Diosan Arupax kunamp sasiwa sasas Santiagox säna?
13 Diosan Arupampi yanaptʼayasisa amuykiptʼasipxañapatakiw Santiagox jilat kullakanakaparux qillqäna. Diosan amuytʼayatäsinxa akham qillqäna: “Kuntix Diosan arunakapax yatichkistu uk lurapxarakim, janiraki aliq ischʼukirinakakïpxamti, ukham aliq ischʼukisaxa jumanakpachakiw sallqjasisipkasma. Khititix aliqaki uka arunak ischʼuki, ukatsti janiraki phuqkiti ukaxa, kunjämtix mä jaqix ajanup espejot uñkataskixa ukhamakiwa. Ukapachax uñkattʼasiwa kunjämäkitix uka, ukatsti sarxasinxa armtʼasxiwa kunjämäkäntix ukxa. Ukampis khititix jan armtʼaski kuntix istʼki ukxa, jan ukasti sum Diosan leyipatxa amuytʼasi, kawkïr leyitix qhispiyat sarnaqasiñ churkistu ukarjam sum sarnaqasa, phuqasaraki, uka jaqixa kusisiñaniwa” (Sant. 1:22-25).
14, 15. 1) Yupaychäwi tuqit nayrar sartañatakixa, ¿kunjamatsa Diosan Arupax yanaptʼistaspa? 2) Kuna tuqinakatsa amuykiptʼassna?
14 Maynix walikïskit janich uk uñkattʼasiñatakiw espejo apnaqi. Amuytʼañataki, mä jilatan corbatapax wixrjtatächi ukhaxa jankʼakiw espejot uñkattʼasisax askichtʼasi, ukat mä kullakax jan sum sanjtʼata uñkattʼaschi ukhax ukhamarakiw sum sanjtʼasi. Bibliax ukhamarakiwa, kunjam jaqïtansa uk amuytʼasiñatakiwa. Biblian kunjamaw sarnaqañax sistusa ukarjam sarnaqasax espejotjamwa uñkattʼastanxa. Ukampis janiw kuna askïkaspas espejot inamay uñkatasiñaxa. Ukhamarakiwa, “Diosan leyipat” amuytʼasax ukarjamaw lurañasaraki. Jehová Diosar munasiñasa ukhamaraki kunatix chiqa yupaychäwiru munasiñas qalltan utjkistäna uka munasiñax jan utjxchi ukhaxa, aka jisktʼanakwa jisktʼasiñasa: “¿Kuna jan waltʼäwinakansa nayax jikxatastxa, ukat jichhax kamachasktsa? ¿Nayrax kamachirïtsa? ¿Kunatsa jan nayrjamäxtxa?” sasa. Ukanak jisktʼasisax jan sum amuyaskstan ukhaxa, janiw ukhamaruk jaytañasäkiti. Nayrar sartaskakiñatakix kuna lurañas wakisi ukxa lurañamawa (Heb. 12:12, 13).
15 Amuykiptʼasiñaxa, jutïrin kuns lurañäni ukanak sum amtañwa yanaptʼistaspa, ukhamat Diosar yupaychäñ tuqit nayrar sartañataki. Diosan amuytʼayatäsinxa, Pablox akham sasaw jupamp chik sarnaqir Timoteo waynarux nayrar sartaskakiñapatakix qillqäna: “Akanakatxa taqi chuymamampi amtasim, kunjämtix jumax nayraqataru sarkta uk taqini uñjapxañapataki” sasa. Jiwasax Diosan Arupampi yanaptʼayasisax amuykiptʼasiñasarakiwa, ukhamatwa suma cristianjam luräwis jukʼamp sum lursnaxa (1 Tim. 4:15).
16. ¿Biblian yanaptʼapampi jiwas pachpa amuykiptʼasisax kunanakatsa amuyasiñasa?
16 Jiwas pachpa amuykiptʼasisaxa, kuna tuqinakatsa aynachtʼatätan ukwa amuyasiñäni, ukampis janiw ukanakampix chʼam laqʼayasiñasäkiti. Ukat amtapxapuniñäni, ¿kunatsa amuykiptʼasisktanxa? Kuna tuqitsa aynachtʼasktan uk yatisax chiqañchasiñasatakiwa. Aynachtʼatanakasat amuyasisin jukʼamp aynachtʼsna ukhaxa Supayax wal kusisispaxa. Nayra tiemponxa, mä jaqiw ukham amuyäna, Diosax chʼamachasitanakas jiskʼachkaspa ukhamwa amuyäna (Job 15:15, 16; 22:3). Ukax kʼariwa, Jesusax qhanwa uka tuqit parläna. Diosax taqi luqtirinakaparuw munasi (Mateo 10:29-31 liytʼasiñapawa). Antisas juchararätasa amuyasisaxa, jukʼampwa altʼat chuymampi Jehová Diosarux yanaptʼap mayisisax chʼamachtʼasiñäspa (2 Cor. 12:7b-10). Inas chuymanïxaraksta jan ukax usutäxaraksta, ukampis kuna amtäwinaktix phuqirjamäkstan ukanakak amtañäni, ukampis sarantaskakim janipun munasiñamxa thayarayamti.
Walja razonanakawa Diosar yuspärañasatakix utjistu
17, 18. Qalltan utjkäna uka munasiñ jilxattayirinakatakixa, ¿kuna bendicionanakas utjani?
17 Qalltan utjkistäna uka munasiñ jilxattayaskakiñäni ukhaxa, walja bendicionanakwa katuqañäni. Ukatxa jukʼampi Diosarux uñtʼarakiñäni ukatxa suma iwxanakapatsa wal yuspärarakiñäni (Proverbios 2:1-9; 3:5, 6 liytʼasiñapawa). Salmos sat libronxa siwa: khititix Jehová Diosan amtanakapar respetki uka jaqix ‘askinak jikxatani’ sasa, ukat “[Jehová] Tatitun arunakapax askiwa, jan yatiñan jaqir yatiñan tukuyiriwa” sarakiwa. Ukatxa, “jan juchañchkay sarnaqir jaqix kusisiñaniwa, Tatitun yatichäwiparjam sarnaqirix kusisiñaniwa” sasaw saraki (Sal. 19:7, 11; 119:1).
18 Chiqpachansa Diosar yuspärañatakixa walja razonanakaw utjistu. Sañäni, kunatsa akapachan jan waltʼäwinakax anchäxi ukxa jiwasax yatxtanwa, ukatxa, Jehová Diosaw chiqapar yupaychapxañapatakix markapar uñjaraki. Ukhamaraki Jupaw markaparux jawskatistu, ukatxa, jupan Qhanañchirinakapäñasatakiw uttʼayarakistu. Ukat taqpach bendicionanak jakthapisma ukhaxa, waljapunïspawa. Wali askïspawa ukanak amtañamaxa; ukhamatwa aka arunakarjamax phuqarakïta: “Sum katxäsim kunatix utjktam ukxa” (Apo. 3:11).
19. Diosar yupaychañan suma saytʼatäskañasatakixa, ¿lupʼiñat sipansa kun lurañasäspasa?
19 ‘Kunatix utjktam uk sum katxasiñatakixa’, kunjamsa iyawsäwimax jiltawaykäna ukanak tuqit lupʼiñawa yanaptʼiristamxa. Ukampis janiw uka mayakïkit yanaptʼaxa, jan ukasti yaqhanakampiw utji. Yupaychäw tuqit suma saytʼatäñasatakix kunanakas wakisi ukanakxa aka revistax amtayapuniwa Diosatwa mayisiñasa, taqi chuymaw suma yatiyäwinak yatiyir sarañasa, ukat tantachäwinakarus sarañasapuniwa ukatxa uka tantachäwinakanxa arstʼañasarakiwa. Ukhamarjam phuqañäni ukhaxa, qalltan utjkistäna uka munasiñasax jilxattaniwa (Efe. 5:10; 1 Ped. 3:15; Jud. 20, 21).
¿Kamsasmasa?
• ¿Kunatsa Jehová Diosar munasiñasaxa ukanakat lupʼisax kuna askinaksa jikxattanxa?
• ¿Nayra sarnaqäwinakasat amthapiñäni ukhaxa, kunjamsa Jehová Diosar uñjañäni?
• Nayrjamati Diosar munasisktan janicha uk amuykiptʼasiñaxa, ¿kunsa qhanañchistani?
[Jisktʼanaka]
[25 janan fotopa]
¿Kunatsa akäskapuniw chiqa yupaychäwix sasin sirïta?
[27 janan fotopa]
¿Sarnaqäwimanxa kunanak askichañamas wakisispa?